تحديت انا وصديق لي للحصول على بطن مقسمة خلال ثلاثة شهور . التحدي كان من باب التنافس الشريف ورفع الحماس والعزيمة .
التحدي سيبدأ ابتداء من 3/12/2011 ولمدة ثلاثة شهور , بالضبط 12 اسبوع . طبعا هذي ممكن تكون مدة طويلة بالنسبة للمحترفين .
لكن للعلم نسبة الدهون عندي 21% ,هذا بعد التخفيض وعندي كرش يحبها قلبك وحقيقه مليت منها ومليت من الملابس الواسعة ومن الثوب على طول .
مع ان جسمي مايعتبر سمين , لكن الكرش فعلا كبيرة .
اما صديقي فما شاء الله جسمه افضل مني , الدهون عنده تقريبا مثلي لكن ماعنده كرش , الدهون موزعة على كل جسمه , يعني تشوفه ماتقول مليان ابدا .
عملت بحث مكثف جدا عن البطن المقسمة , والنظام الغذائي وتمارين الحديد والكارديو , واستفدت من المنتدى هذا كثير الله يعطيكم العافية . وجمعت معلومات كافية اضافة الى خلفيتي الرياضية و اتباعي لاكثر من نظام غذائي من مدة .
مختصر ماوصلت له :
1- الكل عنده عضلات بطن لكن الدهون مغطيتها .
2- لابد تلعب حديد لرفع معدلات الايض و تسهيل ظهور عضلات البطن
3- البطن مثل اي عضلة تحتاج لراحة , يعني التمرين مايكون كل يوم
4- لابد من نظام غذائي صحي وقوي جدا (ساكتب لكم لاحقا عن النظام المستخدم ). وهو يشكل الجزء الاهم في الحصول على بطن مقسم.
5- الكارديو مهم , لكن ايضا لابد تعمل كارديو صح . يعني السير وبسرعه متوسطة هذا مايحرق دهون بالشكل السريع.
6- الدهون تنحرق من الجسم كله ومافي تمرين يحرق منطقة معينة .
7- كل جسم وطبيعته في اختيار اماكن حرق الدهون , بعض المقالات تتكلم عن دور بعض مكونات الجسم ونقص التغذية في تحديد مكان الحرق لكن ماكانت مقنعة
8- النسبة المعقولة لحرق دهون اسبوعيا وبدون حرق عضل هي من 0.5 بالميه الى 1% , وقليييل جدا من يستطيع تجاوز هذا الرقم .
9- خسارة الدهون في الاسبوع الاول اكبر ومع الوقت تصعب خسارة الدهون . وكل ماكان وزنك اكبر تخسر اسرع في الاول
10 - والاهم : لا لحارق الدهون . مما قراته في الموقع ومن النتائج المعروضه من قبل الشباب المستخدمينه اشوف انها غير مرضية .
يعني اقصى شخص شفته خسر 4 % دهون خلال شهر او اثنين باستخدام حارق دهون وكارديو وحديد ودايت . يعني ممكن توصل لنفس النتيجه بدون
مخاطر هذي المنتجات .(كافيين عالي- او حراره عالية - او نبضات قلب مخيفة - او لعب في الغدة الدرقيه )
سبب طرح الموضوع :
1- اتمنى مشاركتكم جميعا معاي في التحدي , كل اسبوع يوم الجمعة تدخل وتكتب كم خسرت نسبة دهون من جسمك , ونظامك الغذائي وتمرينك كيف كان و شكل البطن تغير او لا .
2- مناقشة ارائكم والاستفادة من بعض في افضل الطرق لتحقيق نتائج .
طريقة المشاركة:
فقط اكتب انك ودك تشارك بالتحدي , واذكر نسبة الدهون بجسمك , وكل جمعة نقيس نسبة الدهون من جديد . لمدة ثلاثة شهور .خلال الاسبوع ننتناقش في افضل الطرق والانظمة الغذائية والتمارين .
بانتظار مشاركاتكم في التحدي وتوديع الكرش والحصول على بطن مقسمة