السلام عليكم
اليوم رحت مطعم اسمه بيتزا ان
يمكن محد فيكم سمع فيه
حدكم حدكم سمعتوا عن بيتزا ام ربع اللي يسويها راعي الفطائر اللي بالجمعيه
وله بيتزا ان شعرفكم فيها انتوا . هذي بيتزا الناس الراقيين مثلي و مثل التجار و الشيوخ والوزراء
انتوا عند ابو عبدو , ابو عبدو اللي طول اليوم قاعد ماكو شغل و مطفي الفرن مال الفطاير حتى وان صادف زبون قاله انطر نص ساعه على ما يحتر الفرن
وطبعا ماراح اقول ان طول وقت فراغه قاعد عالكرسي يشرب جاي و مصندح بالعالم و اصبعه بخشمه و ان طلبت حتى مايغسل ويسويلك العجينه و يفرك فيها بأصبعه اللي تقول برغي دلكتر ومتروس اللي خبركم
احنا الناس الراقين نروح مطاعم 5 نجوم بلا شك , من عمري وانا اروح مطاعم 5 نجوم , ماادري شلون تاكلون عن ابو عبدو , هذا اللي بفرع الجمعيه , انتوا اكيد عندكم نفس ابو عبدو
ما الومكم بصراحه , ناس ماتعرفون الانتيكيت ولا حتى شنو معنى 5 نجوم على بالكم اتكلم عن ضابط شرطه
لا , ال5 نجوم تصنيف المطعم العالمي , كل ماحصل نجمه ارتفع تصنيفه وصار كشخه , كشخه مثلي يعني و مثل ابناء الطبقات المخمليه الراقيه , مو الطبقات الكادحه
فمن هذا المنطلق و وضعي الاجتماعي الراقي المخملي لا يسمحلي اني اروح حق ابو عبدو ومن هم على شاكلته , احنا نروح مطاعم كشخه عليها القيمه , مطاعم يطبخ فيها شيف عالمي
نظيف و مرتب و كوول , للناس اللي مثلي
ماعلينا , دع الخلق للخالق
المهم هذا المطعم اللي يمكن بس تسمعون فيه او تشوفونه بالصور والافلام و تتمنون انكم تاكلون فيه , اليوم تغديت عندهم
طبعا هذا مطعم بيتزا , لو اقولكم عن المطاعم الثانيه اللي رحت لها شنو تسوون , يمكن تبجون من القهر , وعشان جذي ماراح اقولكم اني رحت مطعم ابل بيز , يمكن على بالكم ايفون جديد , لا اسمه ابل بيز المطعم
و مطعم فرايديز و مطعم دراجون الصيني و مطعم تشيلي , يعني عده مطاعم راقيه ماودي اقولكم عشان ما تقومون بأي عمل متهور للذهاب اليهم بالعافيه , اعرف واحد من كثر ما انه مات قهر اضطر انه يسرق عشان يقدر يروح ياكل بالمطعم وجبه
الحين يتغدا و يتعشى و يتريق عدس لأنه بالسجن , ضيع عمره عشان وجبه في مطعم راقي
فأنا ماودي اقول اكثر عشان مايكون السجن نهايتكم و تكون السالفه بسببي
انا ودي اقولكم جربوا الشريحه المشويه من صدر البط في مطعم دراجون الصيني , لكن المشكله اني لو قلت ماراح تجربونها لأنكم ماتقدرون عليها
انتوا حدكم بطاط وفلافل وطحينه و تترسها سلطه و شطه عشان تشبع
جباتي مع كيمه و بطاط , عجبه او شكشوكه , انتوا متعودين على جذي و بطنكم متعود على جذي , صمونه فول , صمونه طعميه , شنو بعد
واللي يكشخ فيكم ياكل شورما
حتى ان لو احد فيكم اكل في مطعم راقي يعوره بطنه , اي مسكين مو متعود على هالنوع من الاكل و النكهات الاستوائيه , الغربيه والشرقيه
انتوا حدكم نكهه بومبي , مطعم هندي ويخب عليكم
واتوقع ان حتى لو تسرقون بنك وتاخذون منه 100 دينار و تروحون المطعم ماراح يدخلونكم , ليش ؟
لأن عيال الطبقه المخمليه مثلي معروفين , من شكله تعرفه , قلم كارتير , عطر تومي , ايفون في ايد , ايباد ميني في ايد ثانيه , دشداشه جديده , مسباح , بوك كليفن , يعني مواصفات خاصه تعرف ان اللي امامك انسان مخملي اما ولد تاجر معروف او وزير او عضو
انتوا لو تروحون مايدخلونكم ليش ؟ الشكل يكفي , عربجي او مصبنجي شعر كشه والغتره على الكتف و قلم رصاص او بك والعطر زقاير او شيشه , بدون بوك و رابط فلوسه بسير نباطه , نعال مقطعه و مسحوكه
يعني من الشكل ينعرف الشخص فما يرضون يدخل ويقولوله روح اخر الشارع في مطعم هندي هناك , روح اكل هناك ولا عاد نشوفك مار بالشارع هذا بعد
الواحد ما وده يتكلم ويقول , خلها على الله يارجل
المهم
اليوم رحت اتغدى في مطعم بيزا اسمه بيتزا ان
ودي اقول انصحكم فيه لكن شلون ؟ محد يقدر يروح فيكم , مصروفه الاسبوعي دينار وين يقدر يروح مطاعم كشخه
المهم ان صار العيد و جمعت فلوس او لقيت جنطه فيها فلوس او عملت سطو مسلح على بنك و صارت عندك فلوس انصحك تروح للمطعم وتطلب جوانح دجاج حار , مو صلصه البركبيو مالت الشواء , لا قوله ابي الصلصه الحاره مالتكم
شي مو طبيعي
والسلام عليكم ورحمه الله وبركاته
