السلام عليكم
قبل ما اروح للبر قلت خلني اسوي عشا عشان ما ابتلش هناك , وفكرت شنو اكل شنو اكل و طرى علي اسوي ستيك مع خضروات و بطاطه مهروسه
طبعا كل اللي تشوفونه تحت حسب الرغبه , يعني انت و رغبتك اذا تبي شريحه اللحم مستويه حيل او نص ونص اللي يسمونها المثقفين و العلماء "ميديم"
والبطاطه حسب رغبتك بعد , تبيها مثل العصيده او نص ونص , انا مااحبها مثل العصيده اللي تكون مفيوحه كثير
المهم وعشان مااطول عليك
هذي كل المكونات
قبل ابدأ بقولكم عن التصوير , بصراحه صدمني لما حطيت الصور بالكمبيوتر , لما اصور بالتلفون شفت الصور واضحه 100% لكن من حطيت الصور بالكمبيوتر طلعوا مادري شلون
المهم المكونات عباره عن
من اليمين . فلفل اسود . بهارات شوي و الشي المميز ان فيهم فلفل احمر حار . زيت زيتون وداخله زعتر . مو انا حاط الزعتر اهو يباع جذي . ملح
تحت من يمين . صحن فاضي , يعني بذمتكم قاعدين تشوفون فيه شي ؟ فاضي
شريحتين ستيك ولازم تختارون الشريحه المناسبه للشوي واهي تكون نفس الصوره , او تي بون , رب اي , المهم ان تكون الشريحه فيها شحم , يعني بوسط الشريحه مثل العروق شحم وهذي تكون مناسبه للشوي , يعني بعد ماتشويها تكون زبده وتذوب بخشمك . اكيد بحلقك يعني انت من وين تاكل ؟
خضروات وهي عباره عن كوسا , بروكلي , جزر , فطر . و فوق العلبه البرتقاليه كريمه خاصه للطبخ . مو مالت الحلويات
لاحظوا الجزر حجمه صغير , اهو جذي صغير مو انا مقطعه , واذا ماعندكم جذي حطوا جزر عادي و قطعوه بعدين بالحجم هذا او اي شكل تحبون
نحط البطاط بالجدر و ماي حار و نفتح النار عليه
مااعطيكم وقت كم يحتاج , انت شوف الاستواء اللي تبيه , بالسكين او الشوكه قز البطاطه وشوف مستوى النضوج
او اذا عندك فرن استخدم طريقه الشوي , حط البطاطه بالقصدير و لفها و حطها بالفرن ساعه ونص , بالمواضيع راح تشوف موضوع خاص فيها للكاتبه بلو روز
لكن اذا انت مستعجل ماراح تصلح لك او انك تجهزها مسبقاََ
هذا اليمين البهار اللي فيه فلفل وحتى مكتوب عليه اذا ماتعرفون انجليزي , مكتوب سبايسكي يعني حار , واللي يسار فلفل اسود و ابيض
الصوره تحت
نحط شويه زيت زيتون على الشريحتين . مو واجد بس شويه و نمسح الشريحه ونحط عليها الملح والفلفل
نقطع الكوسا ارباع و الحزر حجمه مناسب مايحتاج , الفطر نقطعه شرايح والبروكلي نفس الصوره , يعني كل وحده لقمه
هذي صلصله جاهزه للستيك . يعني اذا مالك خلق تسوي صلصه استعمل هذي او اي نوع بالجمعيات . انواع واشكال
لكن انا ابي من هالصلصه ملعقه كبيره فقط
نحط الخضروات بالمشخال هذا وتحتهم جدر صغير في ماي , نطبخهم عالبخار , لحد يقول الماي حاط فيه ملح او لأ ؟
رجاءا اسأله مثل جذي مابي
نسكر عليهم ونخلي البخار يلعب دوره
لاحظوا جولتي العزيزه فيها شوايه بالنص
نفتح النار ونخلي الشبك يحتر
نحط الشريحه الاولى . بس وحده عالشوايه بسوي ونخليها عالنار مده 3 دقايق من كل جهه . مثل ماقلت سابقا "مادري قلت او لأ" ان حسب الرغبه واللي تحبه بمستوى الشوي , ول دن او ميديم او مديم رير كيفك المهم ان الشريحه ماتطول عالشوايه
واذا فحم تحتاج دقيقتين بس لكل جهه عشان تصير الشريحه مديم
------------------
00000 كانت هني صوره للشريحه الثانيه بالمقلاه ومدري وين اختفت 0000000
---------------------
بعد شوي الشريحه مده 3 دقايق الى 4 دقايق و بعد استواء الخضروات تقريبا 10 الى 15 دقيقه شلتهم من النار
وملاحظه مهمه بخصوص الشريحه ان بعد ما تشيلها من النار تخليها ترتاح 5 دقايق على الاقل . في خلال هذا الوقت الشريحه ترتاح و تتمدد الشعيرات او مادري شسمهم بداخلها و تبدأ بفرز العصاره
لو تروحون مطعم امريكي يسوي جذي راح تلاحظون انه لما يقدم لكم الشريحه تشوفون بالصحن تحت متروس ماي و دم . هذا لأن اللي يطبخ اثول , ما يبخص بالشوي , لازم الشريحه ترتاح وتفرز كل اللي في بطنها
ولاحظوا الشريحه بالصوره يسار . مو اليمين اليسار تشوفون العصاره قامت تطلع منها
انا احتاج العصاره هذي مع توابلها للصلصه
البطاطتين طلعتهم وغسلتهم و قطعتهم و رشيت ملح و زيت زيتون عليهم و راح ابدأ بالدعك , لا تخافون مو بأيدي بالشوكه
بعد ما ارتاحت الشريحه و طلعت عصارتها اخذته و حطيته بالمقله هذي
حطيت ملعقه من صلصه الشوي اللي حطيت لكم صوره القرشه مالته على العصاره و انطر يفوح
----------
000000 صوره ضاعت بعد 00000
وانتوا حتى الموقع جوعان ياكل صور
-----------
بعد ما بدأ بالغليان حطيت المشروم او الفطر او فقع الانجليز عليهم و نطرت لما يبدأ يذبل شوي , يعني وانت تحركه عزيزي العزوبي تحس كأن ذاب بيدك
بعدين نضيف الكريمه السائله وهذي تباع في كل مكان , انا شغلي كله من مركز صلطان
نضيف الكريمه و انت عزيزي المصبنجي تحدد نسبه اللون , تبي فاتح زيد الكريمه تبي غامج قلل الكريمه
اهم شي راحتك و ذوقك
بعد ما خلصت الصلصه واهي ماتاخذ وقت يعني
نجي للتقديم
نحط البطاط فوق و عاليسار الخضروات وتحت الشريحتين و نصب عليهم الصلصه مع المشروم
تبي تخلي الصلصه بصحن بروح و تقطع لحم و تغمس , كيفك
تبي تكبه فوق الشريحه هم كيفك
للأمانه انا كنت بصور الطبق قبل اصب الصلصه فوق اللحم لكن راحت علي
قلت اقلب الشريحه واصورها من تحت
هذي قطعه من الشريحه اوضح لك مدى المستوى للشوي
انا مسويها ميدم , تبيها ول دن اللي يعني استواء كامل خلها شوي زياده عالنار , يعني تقريبا 5 او 6 دقايق
انا مثل ماقلتلك افضلها مديم و تقريبا 2 الى 3 دقايق من كل جهه
صوره اقرب عزيزي العزوبي , شرايك تدخل داخل الصوره بعد ؟
-------------
انتهى التقرير او الطبخه , والله يعيني عالغسيل
هذا ما لدينا اخواني واخواتي , و يمكن في امور ناقصه او طريقه سويتها غلط او اي شي ثاني ارجوا السموحه منكم , لأن كل شخص و امكانياته اللي يقدر عليها ويوفرها , لا املك فرن وعلى الله والجوله اللي عندي
لا ادعي الكمال و الفهاميه بالطبخ ولكن هوايه امارسها و حبيت اعلم اخواني العزوبيه بالذات بعض الوصفات ان كانوا بأخر الليل و زهق من الخبز وجبن قلاص
ترى في صور اختفوا . وانا ماسك الكوكاكولا مادري وين راحت
المهم
وسلامتكم