قهوة WoW .. :P

[Karazhan]

كأني استانست عالتصوير

شكلي بخلي الصيد وبقزرها صور

[Warchif]

انا جبت النفيش وخلصته وشربت ترمس شاي وبعدني ماخلص من القراءة
هذا كتاب البؤساء أبو خمس مجلدات مو رد بالمنتدى

كارزان انت ما تتوب من سواليف الف ليله وليله
انت شكلك كنت شهرزاد وقاص على شهريار مسوي روحك مره

نشفت ريقي وانا اقرا وش قاعد تكتب
انت بعدك تحجي مع روحك
وتبي تورط غيرك في نصايحك


اقول لسه مسوي روحك مسكين وفقير وانت شاطف فلوس وخير الناس و عندك عشرين حساب بالبنك وكل حساب في كم مئات الوف من الفلس الحمر


الا وش اخبارك يالطيب
ما شفناك منذ مبطي
عساك ناوي تزونا بالسعوديه بالفراري حقتك

[Karazhan]

ياهلا والله وورشيف

تصدق امس طريتك مريت على بالي وانا اكتب مشاركه خفيفه هني وذكرتك

وينك قطعت قطعه قهر انت مع باقي الشباب بعد ما احتلينا القسم كله وصار للملك واتباعه

انت القزم او لأ

انا بديت اشك فيكم

ماعلينا دام داش بحسابك هذا , وانتوا الحين اذا السعودي حب يعتزل هل يعتزل بضمير او بس انت جذي

لا والله مو بس انت حتى جيرمي و لوعه و بوحا و الكثير من السعوديين اللي كانوا هني عندهم الاعتزال بضمير , ان اعتزل خلاص ما يشرف عليك الا لما يدخل مواقع النت كلها ويخلص مواقع العالم ويجي بعد 5 سنين يقول خلني اشوف شنو صار بالمنتدى


دق على الشباب بما انكم سعوديين وتعرفون بعض خلهم يدشون

وانا على حطه ايدك , مازلت مسكين وفقير ومظلوم

انا اللي قبل تعرفه , ماتغير شي الا اللهم اني حطيت قفل الحين , او اللي يسمونه التجار نيو لوك

[Warchif]

والله مادري عن الشباب
هم اصلا هجوا من ذا المنتدى والبوابة الرقميه بعد
ماعاد اشوفهم
حتى جيرمي ارسله واتس أب مايرد
في المنتدى ماله حس
يمكن تزوج وبطل صحبة المصبنجية

انت تعرفه عدو الزواج والأفراح والمسرات يمكن طاح في شر أفعاله وتزوج غندوره بنت الجيران

لوعه الفرقا أتوقع انه يتعالج نفسيا عند دكتور في المركز السعودي الصيني للعلاج بالأبر الصينية بالدمام
يقولون السبب نظرة من بنت إبليس جان شبت النار بروحه
الله يستر عليه وعلينا

أخونا ديفل ماي كراي قصدي كراي مي ريفر يقولون ضاع وهو يلعب واو وفي رواية اخرى انه أصبح مقرب من سايلفاناس زعيمة الفورساكن ومو راضي يرجع لأهله

يوشي اتوقع صار مساعد طباخ في فتافيت ويقولون على عهدة الراوي أنه مرفوع ضده قضيه تفجير كبسة لحم في قدر ضغط

ولنا لقاء آخر

[قزم مصرطح]

اهلا اخي الأرشيف هل انت من رواد اللعبة ايضا ومن الباحثين عن الجوهرة الثمينة في اللعبة مثل الكرزان لايهمه اللعبة بل يهمه الجوهرة ففط
اعرفك بنفسي اخي الأرشيف

الاسم : قزم مصرطح
العمر : 24 سنة ضوئية
البلد : مهاجر مثل الطيور المهاجرة وغير مستقر
المهنة : مهرب وأقوم بعمليات تهريب عبر البحر
ايجابياتي : وسيم جدا ,ومدخن جيد لكل الأنواع ,غيور جدا على مراتي لدرجة اقتلها
سلبياتي : لاتوجد

[Karazhan]

هذا وورشيف مو ارشيف

يعني قائد حرب

قائد كتيبه الشبيحه واليد اليمنى للملك

قضى على جميع اعداء الملك في المنتدى و من القاده اللي في كتيبته المشهورين البسطويسي و نخيلان

انت ما لحقت على ايام القسم الحقيقيه والحروب اللي صارت عشان جذي تجهله

لو تعرفه و ملحق على ايام الحروب اللي خاضها مع الملك والمندوب والتلاميذ كان قمت و عطيته تعظيم سلام

[قزم مصرطح]

انت ما لحقت على ايام القسم الحقيقيه والحروب اللي صارت عشان جذي تجهله

لو تعرفه و ملحق على ايام الحروب اللي خاضها مع الملك والمندوب والتلاميذ كان قمت و عطيته تعظيم سلام

يعني لو ينضم للجيش الحر في سوريا في امل يفوز بالحرب على بشار واتباعه ثم يحارب امريكا وروسيا ممكن يعني , ولا انت تقصد وتتكلم على حروب عيال وبس

[Karazhan]

الحرب النفسيه والكلاميه والكتابيه اشر و امر من الحرب بالاسلحه التقليديه

انت لو مثلا انا اقولك يا غبي شنو يصير فيك ؟

راح تتحبط و راح تمتنع عن الاكل والشرب و تحوشك حاله نفسيه سيئه يمكن توصل الى الانهيار العصبي

اهلك راح يبتلشون فيك وراح ياخذونك من طبيب الى طبيب و من عياده الى عياده و من مستشفى الى مستشفى وبالاخير اهلك يتعبون ويعورهم قلبهم بسبتك وانت حالتك تسوء يوم بعد يوم

اخر شي يجي دكتور يشتغل بضمير يقولكم ترى مشكله ولدكم مو صحيه تتعالج بمستشفى عادي , مشكلته نفسيه ولازم دكتور نفسي , وتبدأ المعاناه من جديد

ومن دكتور الى دكتور و من عياده الى عياده ومن مستشفى الى مستشفى

انت بالحاله هذي تعبت اهلك معاك وكل يوم يشوفون حالتك تسوء زياده و جسمك يضعف ومايقدرون يسوون شي

يعني مرض ما اصابك انت بس و عذبك , عذب اهلك معاك

لكن الحرب العاديه شنو ؟

تاخذ سلاح وتروح تقاتل و تقتل , يجي الخبر لأهلك ترى القزم استشهد , يسألون اهلك اللي جاب لهم الخبر شلون استشهد ؟

يقول كان يقاتل معانا تحت قياده الشيخ المعمم فلان , و الشيخ المعمم فلان ممنوع عنده التدخين و حرام

القزم قحط يبي يشرب زقاره مو قادر , قال ماكو الا انحاش من الشيخ واروح ورى محول او بيت مهجور اشربها بدون يشوفني , واهو يمشي بين البساتين داس على لغم و اختفى

اللغم اذا داس عليه رجل عادي يقطعه نصين , هالمره داس عليه قزم جان يختفي بعد شلون ينقطع نصين , اذا اهو نص

المهم جذي استشهد

اهل يسوون عزاء 3 ايام , والجيران كل يوم يجيبولك غدا و عشا , حسب وضع الفريج , يعني احنا اذا توفى واحد عندنا الجيران يتهاوشون منو يجيب الغدا والعشا و تتقسم على 6 اشخاص بالنهايه , كل يوم اثنين يجيبون ذبيحه للغدا وللعشا

انتوا حسب ميزانيتكم , اللي يجيب دجاج واللي يجيب خروف واللي يقدر يجيب قعود واللي يجيب بط . انتوا وعاداتكم

المهم بعد ال3 ايام عزى اهلك كل واحد زايد 5 كيلو من الخرفان والدسم

بالحاله هذي انت ما عذبتك اهلك و لا جرجرتهم معاك من دكتور الى دكتور , بالعكس يدعولك ان عالاقل طلع شي من وراك اللي اهو ال6 ذبايح ويوم القيامه تشفع لهم و 70 , يعني نقص اهلك من ال70 والباقي تشفع لهم , اتمنى ما تنساني

عرفت شلون ان الحرب الكلاميه اقوى مليون مره من الحرب التقليديه

ماتشوف كل يوم طالعه محطه فضائيه جديده تتكلم بالسياسه والدين و الثورات , مثلا الجزيره , خلك الليبيين يتحاربون والمصريين والسوريين واليمنيين

لكن الجزائريين ما عملوا شي لما طلعوا لأن ماكو تغطيه كلاميه و حرب نفسيه

عرفت الحين ان الكلام اقوى من السلاح , سقطوا الحكام بالكلام , حاكم دهر طاح بكلمه , والاسلحه ما سقط ولا حاكم و سوريا مثلا لما الحين بشار موجود لأن الحرب بالسلاح , لو بالكلام جان طاح بس اهو ذكي استعمل السلاح بسرعه عشان مايطيح بسرعه











يلا خلي اروح اسوي الريوق لأمي واجي

[Dudette]

السلام وعليكم

شخباركم

خلاص بكون رسمية الحين وما بتكلم غير كلمتين وبسكت بعد مافينا نقط كلمة ونتلوم عقبها

[قزم مصرطح]

الأخ الكرزان انت تشوف الأخت دي دي زعلانة وماتخبرني وانت تدري اني ما استحمل اشوفها زعلانة , الأخت دي دي من هو الشخص الذي زعلك وعصبك اعطيني اسمه وراح امسح به الأرض و راح اقتله و راح آكله وراح ألفه سيجارة وأدخنه .. من هو بس اعطيني اسمه , دنا ولع واحرق المنطقة باللي فيها عشانك وعشان خاطرك .

[Karazhan]

مدري والله

خصوصا انها تقول ونتلوم

مدري قصدها ماروم او كلمه جديده

[Karazhan]

انت عارف ان البنات يحبون يسوون نفسهم زعلانين عشان نصير خرفان و نراضيهم

اثقل شوي خل شخصيتك قويه , ترى الخروف عمره ما عمر مع البنت , بعد ثاني او ثالث كرت يشوتونه

[Karazhan]

لو مغني بصوته الطبيعي كان يمكن اجازوه , لكن حب يغير صوته مثل الفنانين يعني لكن شقول

وعينه قويه اخر شي كمل يغني

let my people go

يااخي الناس هذي عندها ثقه بنفسها مو طبيعيه

[Karazhan]

مايكل جاكسون ماليزيا هذا




من كثر ما ضحكت على الاهبلين هذا واللي فوقه مو قادر امشي من كثر ما شدوا عضلات بطني

دمعت عيوني لين قالت بس


مو طبيعيين , هذا مايكل جاكسون له مقابله قبل مشاركته مع جدته بعد , يتكلم عن ان يعني الكل يناديه مايكل جاكسون بالفريج وانهم يشوفون فيه الخليفه لمايكل جاكسون

وجدته بعد زادت عليه وخلته يصدق انه مايكل , تقول كل مااشوفه اشوف مايكل جدامي

من كثر ما طيروه ربعه والظاهر انهم يبون يضحكون عليه صدق نفسه وراح يشارك

النهايه شنو

خله بطني يشد ودموعي تصب من الضحك

انا بعد ليش اسوي تمارين معده ؟ اشوفهم كل يوم و اسوي تمارين معده وانا بمكاني

[قزم مصرطح]

انت عارف ان البنات يحبون يسوون نفسهم زعلانين عشان نصير خرفان و نراضيهم

اثقل شوي خل شخصيتك قويه , ترى الخروف عمره ما عمر مع البنت , بعد ثاني او ثالث كرت يشوتونه

يا أخي دنا هز الدنيا أولع المنتدى والمنطقة باللي فيها أقطع نفسي , راح أولع يا ناس , وانت تقول لي خلي شخصيتك قوية , الأخت دي دي لا يكون الكرزان هو اللي زعلك دنا اروح حتى عنده الكويت وزعزع منطقته باللي فيها .

يا اخي الكرززان الفيديوهات قديمة شاهدتهم منذ مدة خصوصا البقالي الأول