قهوة WoW .. :P

[Warchif]

زين وورشيف لو اعطيك وورير مثلا لفل 90 هل تقدر تدخل بين الناس وتزاحمهم في جيلد وتضع لك موضع قدم وتدخل رايدات هيروك و تلعب ارينا بعد

او انت مثلي تلعب وحداني وما تخالط احد ابنوب ؟

انا اكره الرايدات والدناجن لأنها ممله وتاخذ وقت طويل وانت تلعب وماحس بالحماس وانا اطق بنفس الاستايل والاسلوب
ماحب غير رايدات FOR THE HORDE
ولو عندي واريور لفل 90 ارقده واخليه ينام هههههههههه ماهمتني السمعة في لعبه

الأرينا خشيت مع اكثر من واحد بدون معرفه وطبعا مافيه تفاهم مرات فوز ومرات خسارة لكن في النهاية لازم التفلسف وليش وليش وبعدها كلام ومطاقه وكل يمشي في حاله وهذا كله يصير مع واحد ماتعرفه وتوك داش معه هههههههههه
عشان كذا تعقدت من الارينا وكرهتها
وكل اللي كنت العب معهم سابقا أيام TBC للأسف تركوا اللعبه بعد اللش كنج بس أتذكر واحد كنت دايما معاه وكنا نلفل سوا الوحيد اللي كنت متفاهم معه واسلوبه مثلي وكنا نلعب اكثر شئ باتل جراوند على عز أيام الهورد وكنا ننبسط بقوه وهو اللي معلمني كل حاجه باللعبه وساعدني في بدايتي فيها لكن الحلو مايكملش وطلق اللعبه بالثلاث

واكثر وقتي باللعبه وحداني مثلك زي ما تقول وفوق كذا انا ماقول اني برو والا فنان تقدر تقول عني نووب متقدم ههههههههههه وتعتمد بالدرجة الأولى على المزاج
اذا كنت رايق بتشوف واحد يتفننن في اللعب واذا بدون نفس تشوف قدامك أكبر نوووب

يبيلنا نلعب سوا ونفلها وش رايك

[Karazhan]

انت يعني نفسي

انا قبل البوت كنت مثلك بالضبط والحين لو تشيل مني البوت ارجع مثلك

والحين البوت حتى حاطه لشغلات عامه , يعني كنت حاطه الفتره الماضيه في نورثرند بالمكان اللي يطلع منه المونت الrare اللي اسمه time-lost وخليته شهر , شفته مرتين بدون ما يقدر يذبحه البوت لأني ماضبطت البوت عدل و امس بعد التضبيط طلع وذبحته ولله الحمد

يعني صاير وضعي جذي باللعبه الحين , وين المونتات تشوفني موجود , وطبعا هذا بفضل البوت , يعني لو تشيل مني البوت تشوفني رجعت مثلك بالضبط


احنا مساكين باللعبه , مساكين ومظلومين

وانا ليش حظي جذي ؟ ليش اللي اعرفهم مثل وضعي او نوباات

الله يرحم ايامك يا ولد بطنها الاصلي ياللي عروقك بالماي , الله يرحم ايامك يا جوفيال , الله يرحم ايامك يا كلبجه , الله يرحم ايامك يا فلدوم , الله يرحم ايام الشباب قبل اللي راحوا ولا رجعوا للعبه

كانوا لعيبه من الطراز الاول , كانوا ناس على قولتك برو , ناس تلعب لعب تخلي اللي يطالعهم يفتح حلقه عالآخر واهو يشوفهم , ناس متخصصين باللعبه , اي كلاس تعطيه يجيبلك فيه ريتنق عالي ويروح رايدات ويكون الزعيم وكل الناس تتمنى تلعب معاهم ويجيبون كل اللي نفسك فيه

اخخخخخخخخخخخخخخخخخ

انا غبي ما استغليتهم مع انهم كانوا يقولولي تعال نضبطك , اقولهم لا بعدين الحين مو فاضي , وراحوا وانا لما الحين على وضعي

عموما انا بسوي حساب بالامستدرام او الانستدرام او الانغسقرام

مدري شسمه بالضبط بس اهو جذي بالتلفون برنامج مال صور ومقاطع قصيره , المهم بسوي واحد جديد و بضيف ناس وناس تضيفني

منو عنده امستدرام ؟ اللي عنده يقولي عشان نضيف بعض

او انتوا تخافون ؟ يعني الخدامه تشوف اجهزتكم وتشوف ضايفين واحد كبير يمكن تصير مشاكل وتروحين فيها

عموما بروح حق رفيجي وبخليه يضبطني بحساب امسترجام


برب

[Karazhan]

مايحتاج ريفيجي

انا توني سويت حساب امستردام اسمي tankblack

طبعا طاح حيلي وانا ادور اسم , كل شي ماخذينه الناس

ضيفوني و بلغوا ربعكم وكل معارفكم بالوطن العربي انهم يضيفوني , بكل منتدى انتوا تشاركون فيه خلهم يضيفوني , اكتبوا حسابي بالتواقيع عشان يضيفوني

انا الحين ماعندي ولا اضافه , مابي اظل طول عمري بدون اضافه

ابي الملايين وينهم ؟ وين الملايين ؟ الشعب العربي وين ؟ الدم العربي وين ؟ النفط العربي وين ؟



المهم هذا حسابي وبحطه بالتوقيع عشان تصبحون و تمسون عليه كل يوم لين تضيفوني غصب

[Karazhan]

الفجر عطيتكم انستدرامي ولما الحين ما ضافني ولا واحد

انتوا شنو ؟ عديمين الرحمه ؟ عديمين الانسانيه ؟ قلوبكم من حجر

ما ضافني الا واحد و طلع اسرائيلي , مع ان اسمه علي بس يكتب عبري


بلغوا الشباب , كل معارفكم بلغوهم خلهم يضيفوني

ابي اجمع الملايين

[قزم مصرطح]

السلام عليكم
يعني من شنو ابدأ ومنين انتهي وحشتوني بجد تراني لسه عايش لكم وحشة ما لها قياس كوحشة خروف للتبن
اول شي تحية للغائبة والغالية دي دي ما اذكر كثير لاني جيت بوقت قصير ورحلت فيه لكنها لسه بالقلب وتحية للحب الاول الكرزان عشرت العمر والرفيق الذي لا افرط فيه ابدا كذا قال الكابتن ماجد بالحلقة الاخيرة لمسلسل الكارتون عن صديقه ياسين ةتحية للاخضر الكيت كات والاخ حارفيش نورتنا بطلته اللي نسيتو يكتب رد عشان افتكرو

اروح انام وغذا نكمل حكايتنا الف ليلة وليله ، لان سهر الليل كثير جابني لكم كبحر لما يرمي سمكة ميتة

[Karazhan]

ياسبحان الله

يغيب وورشيف ويطلع القزم

يغيب القزم ويطلع وورشيف

ويقولون ليش تتبلى علينا

مو انتوا اللي تجيبون الكلام لنفسكم و تشككون الناس فيكم

انا عندي رسائل خاصه واصليني , بروح اشوف منو المرسل وشنو ارسل و راجع لكم


بالمناسبه الى الان ما اضافني الا واحد اسرائيلي

انا ماادري انتوا لما الحين على النوكيا ابو ليت او انكم اعداء الملك واعدائي


يلا انا بشوف البريد احسن

[Warchif]

انت إلين الحين تفكرني والقزم واحد
ليش ما تتوب من هالأفكار

بعدين تعطينا حسابك بالإنستغرام ليش يعني تبي تفرجينا خشتك
هذا الإسرائيلي اللي اضافك تراه ينفعك اكثر من العرب الحين
تقوله صدري ضايق يقولك افتحه لك
تقوله انا فقير يقولك اسرق واذا سرقت اسرق جمل
تقوله ابي اصير يهودي واخذ الجواز الاسرائيلي يقولك خلاص صير جاسوس واحنا نحميك واول ماتكفشك الحكومة وتشيلك المباحث تصير خاين والإسرائيلي مايعرف انت منهو

الحياة مع الإتصالات أصعب وأصعب
بطلت العب اونلاين بسبة الديزل المخيس اللي كل ربع ساعة يفصل
كبياين مصدية وتمديدات من العصر الحجري

حتى نت كويس مافيه يادافع البلى

[Karazhan]

السلام عليكم ورحمه الله وبركاته

اخواني و حبيباتي

كيف حالكم


الاسرائيلي اللي ضافني بالامس لغى المتابعه

شكله من نظام اتابعك ولما تتابعني اشيل المتابعه

يعني مع راسه يبي يصير مثل رفيجي ولد بطنها اللي عروقه بالماي , اللي يتابع 4 فقط واللي يتابعونه على حد 65 مليون تقريبا

لكن هيهات منا الذله , اول ما لغى متابعتي انا لغيت المتابعه بعد و رجعت كما ولدتني امي , بلا اي متابع

وانا الى الان ماحطيت ولا صوره بالانسترغام مالي , جديد ما مشى شي ابد , بقراطيسه


بخصوص النت , انصحك تروح تسكن بالخفجي و تحاول تقرب صوب الكويت عشان السيرفس يلقط و تركب فوق بيتكم اريل "هوائي" قوي , ان ماحصلت بالسعوديه اطلبه من بره , اللي تشوفه على الهمر مال الجيش



بس اول شوف قوته اذا قوي اخذه واذا مو قوي شوف غيره , شوفلك واحد يجيب مدينه الكويت نفسها من قوته وبعدين وصل الاريل بالراوتر و خلاص

اشتراكك يكون كويتي يعني , تشتري جهاز راوتر من شركه زين او فيفا , يعني مو تاخذ وصله اللي تركبها مكان اليو اس بي ولا تاخذ هوت سبوت , اخذ الراوتر الثابت و ان شاءالله تنحل مشكلتك وترجع حالك كحال اي مواطن في بلد يعد اغنى بلد في العالم

عسى بس مو موقعين معاهده انتربول بيننا ؟ اذا مو موقعين راح اخربها

المهم

انتوا مظلومين بالشرقيه صراحه

عيال الرياض و جده كلهم يلعبون ومرتاحين باللعبه ولا يشتكون من لاق او تقطيع وانتوا مساكين بس تتشكون

لازم تتحركون , الشوارع مسوينا ليش ؟ للسيارات بس يعني ؟ لا

للسيارات و الثورات


باي

[Warchif]

أنت مجنون
تبيني اترك الدمام بكبرها واروح اسكن الخفجي صوب الكويت عشان انترنت
انا اروح الكويت واسكن قربك يالغالي قولي انت في اي حي واي شارع وانا اجيك لمك واحضنك وابكيك
بس سلفني كم دينار عشان اشتري الهمر اللي حاط صورته واروح اسوي ثورة في شارع الكويت

هيهات هيهات منا الذلة

[Karazhan]

شتبي فيها الدمام زحمه وازعاج و عرابجه تارسين الشوارع , من يضمن نفسه يطلع بالليل جوعان يبي يروح مطعم الا خاطفينه و رايحين فيه الربع الخالي , عاد هناك انسى احد يدري عنك , لا تلفون ولا انترنت يشتغل معاك , تصير مقطوع عن العالم كله وانت بوسط الربع الخالي

خصوصا ان العرابجه راح يختارون نقطه تكون معدومه , لا سيرفر ولا حتى طياره تمر عليها او سياره

ولما تروح الخفجي عشان تنتقل من دوامك الى الخفجي وتصير موظف بالخفجي , اما تجي الكويت بعدين تنفصل من دوامك بسبب الانقطاع عن العمل وبعدها ماتلقى تاكل

انت خلك بالسعوديه بس انتقل من الدمام الى الخفجي و غير وظيفتك اذا لهم اداره بالخفجي قولهم بروح هناك واذا تحتاج واسطه شوفلك اي شخص خوي امير وينقلك

ليش كل هذا ؟

عشان انتوا ماعندكم ناس تشتغل بضمير , يعني وزاره البرق والهاتف او الهاتف والبرق او الاتصالات والبرق . اهو في برق بس الاسم الصحيح نسيته , المهم وزارتكم ماتشتغل بضمير

يعني تجي الميزانيه للوزاره يتقاسمونها المسؤولين وينسون تطوير الخدمات

ثاني شي المحولات اللي عندكم قديمه و مصديه ولما عملوها اول مره كانت تستوعب 100 الف شخص , الحين صار العدد مليونين فلازم تطوير للمحولات عشان تستوعب العدد هذا , لكن المسؤولين الله يهداهم مطنشين , اهم شي عندهم ان كيف يختلس بدون احد يحس فيه

وبعد الثوره المعلوماتيه صار حتى راعي الغنم و النياق عنده جالكسي وصار يكلم اهله بالتانغو مجانا وسمعت ان الغنم نفسهم والنياق قاموا يستخدمونه بعد لكن روايه ضعيفه

خلنا على الرعيان , المهم ان العالم كلها تستخدم الاتصالات وغير الشعب اللي صاروا فوق المليونين صار ضغط كبير على المحولات هذا عشان جذي الانترنت ضعيف

والحين خبرك مو مثل قبل , قبل الانترنت للكمبيوترات بس , ايام نوكيا كت كات و النيكل والمستشار والباندا , الحين حتى اجهزه التلفون انترنت , صار الضغط على المحولات 1000% ف شلون تبي انترنت سريع ؟

لذلك و لهذه الاسباب وغيرها انصحك تروح قريب من الكويت , وتحط فوق بيتكم الجديد اريل طوله 50 متر وتركب مكثف و مقوي , اريل يصيد قنوات المريخ المشفره حتى و تشترك بأي شركه بالكويت وترجع الخفجي تشبك وتشوف

صدقني راح ترتاح نفسيا وجسديا وعقليا وتقول الحمدلله اني سويت الحركه هذي

واحد اعرفه عراقي ساكن في بغداد كان مثل حالتك , نصحته ان يروح ام قصر يسكن فيها ويسوي مثل ما قلتلك

ومن غير اريل ولا مقوي عملها وضبطت معاه والسيرفر يقول 3 شخطات من 5 , يقول ارتحت نفسيا والحين العب ارينا و جايب ريت 2700

انا انصحك تسويها




-



توه اضافني شخص بالاستنغرام اسمه ووركرافت , بس مو حاط ولا صوره او مقطع

منو هذا ممكن تعرفني بنفسك ؟

[Warchif]

انا على كلامك هذا بعتزل الدنيا بما فيها
وبروح جبل النور واعتكف هناك بس يقولون صار بإيجار على حسب آخر رواية

أنا ابي اهج من الديره
زي ماقلت كلهم المسئولين تقريبا حرامية وكل واحد يختبر شطارته شلون يختلس بدون ماحد يدري عنه
واهو يطلع أكبر مسئول وأكبر حرامي وعيلته كلهم حرامية
ياكلون فلوس الشعب والشعب ياكل شعير وتبن وضاحكين عليهم
يقولون له قدم شكوى ومايضيع حق وراه مطالب وكيف يجيك حقك اذا خصمك القاضي

الله يسودها من وجوه
اليوم عايشين على الحرام وبكره في قبوركم تتعذبون وفي الأخره مصيركم جهنم وبئس المصير

انا بعدت كثير عن موضوعنا انت ياخي تخلي الواحد يتنكد لما تجيب طاري السياسة والمسئولين وهموم المواطن وغير المواطن

خلونا في لعبة واو

احد يلفل معي في سرفر رجناروس بمولتن باتش اللش كنج

والا وارسونج كاتا بنفس سرفر مولتن انستانت 85

نبي نفلها شوي
ببلاش يا سيد القوم اللعب ببلاش
مو انت تحب البلاش قم يالله طاحت عليك عفريته

الا اقول شخبار تواير اليوكون مالك

[Karazhan]

هلا وورشيف

اول شي اللعبه اشتراكها 5 دنانير و رسميه , ليش اروح للناقصه واللاق فيها عالي واذا جمعت مايننق وتروح تبيعه ما تحصل احد يشتري

ثانيا سيارتي تاهو LTZ مو يوكن اللي يفشل و بخصوص التواير حاليا قمت اركب تواير اسمهم سوميتومو , اسم ياباني بس احنا نختصر ونقول سوميتو

تواير يابانيه بس مو معروفين مثل الثانيين بريجستون و جود يير و ميشلان وغيرهم , هذوله يابانيين 100% و ممتازين و رخيصين , التاير الواحد من ميشلان قالولي ب150 و تاير واحد من جود يير 180 , دينار طبعا مو ريال

اما تواير سوميتو قالي 70 دينار , حسابهم حساب تاير او كفر 17 , انا الرنغات 20 بوصه , يعني توايري 20 بالعربي و الشركه هذي سعر التاير حجم 20 ب70 دينار

مع ان تاير حجم 17 تحصله عند الشركات المعروفه ب70 وفوق , المهم اني اخذت منه 4 تواير و لما الحين ممتازين , رحت مشاويري عليهم و رحت البر و ما اشتكيت منهم , انصحك فيهم



نرجع حق الانسترغام

انا قلتلكم ان ضافني واحد و التوبك كاتب كلام اسرائيلي مع ان اسمه عربي , المهم ان هذا الشخص انا اعتقدت انه اسرائيلي و لغى المتابعه وانا لغيتها

لكن الظاهر ان هالشخص من رواد المنتدى هذا , شلون عرفت يا كزران ؟

انا اقولك

لما كل واحد لغى المتابعه ثاني يوم ضافني حساب اسمه ووركرافت , عرفت ان هالشخص من القسم هني لأن واضحه

ولما اضافني و اضفته شفت من الناس اللي اهو ضايفهم الشخص الاسرائيلي

قلت هااا , اكيد هالشخص من رواد المنتدى بعد وله شلون يعرفون بعض

المهم اني وانا ابحث بالسجل مال ووركرافت شفت اغلب الناس اسرائيليين , يعني التوبك او التعريف مالهم اللي يجي تحت اسمهم باللغه الاسرائيليه , الا اللي كاتبين بالانجليزي يطلع انجليزي

المهم وانا ابحث قلت ماكو الا سبب واحد

شكله جهازي مايطلع اللغه العربيه ويقلبها اسرائيليه , يعني هالناس كاتبين بالعربي لكن جهازي اما انه مو معرب الانستفرام ويخليهم بالعبري او ان الانستقرام عندي مال الجلاكسي مايطلع الكلام بالتوبك عربي

وله الناس عرب وكاتبين بالعربي بس المشكله اهو من جهازي


الشي الثاني اضافني شخص كاتب بالتوبك "ولد بطنها"


منو هالشخص اللي منتحل شخصيه رفيجي ؟ اتمنى يرد علي عشان نناصحه ونخليه يغير التوبك

[Mufcanas]

السلام عليكم ، كيف حالكم
طبعا هذي اول مشاركة لي في منتدى
الزبده :P
انا رجعت لـ wow في lvl 90 ، وحاليا جالس ملحوس بالحالي في السيرفر ما اعرف احد ، انا اللعب في kazzak و grim batol ، عندي alliance و horde
اللي حاب يضيفني هذا الـ battle tag حقي Anas#2947 ... وشكرا 3>

[Karazhan]

وعليكم السلام

شوف اخوي

اعرفك بنفسي

انا كرزان , الملقب بمندوب الملك ولد بطنها اللي عروقه بالماي , اشهر من نار على علم , رفيجي صاحب الزمان اللي اهو ولد بطنها له خير كبير على اللاعبين العرب من بدايه اللعبه الى يومنا هذا

انا مندوبه وانقل للشباب كل اقوال رفيجي ونصايحه

فوق هذا كله

جيت مره على نياتي وانا كسير الجناح , قلت يا شباب انا مسوي اكاونت جديد لأن اكاونتي انصك باند , و ابي شخص منكم يتكرم ويعطيني كم جولد اشتري شنط فيهم

الكلام هذا قبل 4 او 5 سنوات

الى يومك هذا ماشفت جولد 1 ولا حول ولا قوه الا بالله

مره ثانيه احتجت مساعده في قروب , غسلت ايدي من الانجليز وقلت بسأل بالمنتدى اذا احصل قروب خصوصا ان الحين تقدر تسوي قروب و اصحابك من سيرفرات مختلفه

المهم قعدت اسبوع اطر طراره احد يساعدني وماحصلت احد ولا حول ولا قوه الا بالله

هذا وانا مندوب ولد بطنها , فما بالك لو كنت مندوب تحصيل فواتير كان شنو عملوا فيني

للأمانه اضافني شخص وقالي انا اساعدك , لكن راسي و راسه مانسوي شي . لازم قروب كامل

المهم اني نسيت ليش ابي القروب الحين و كملت حياتي , يعني اذا البنت تطلقت تعيش طول عمرها قاعده بالبيت وماتتزوج ؟ اكيد بتشوف زوج ثاني

انا جذي . ماانطر احد يطق باب بيتنا ويتقدملي , قلت حبيبي كمل اللعبه وانسى اللي فات , يعني اللعبه وقفت على المهمه هذي اللي احتاج فيها قروب . مصير اللعبه راح تتطور و نخلص الكويست فيما بعد

مثل مثلا تقعد ايام لفل 60 تطلب قروب 40 لاعب عشان تروح ملتون كور , الحين تروحله بروحك وتخلصه بدون منه من احد

انتظر لما يصير لفلك 3000 وبعدين روح كل الرايدات اللي الحين موجوده وما تقدر تخلصها بروحك في لفل 90

عموما احب اوصل رساله , احتمال كبير انك تحصل احد يعطيك حسابه عشان تضيفه , هني الكل يعتقد انك هكرز وتسرق حسابه , الله والحساب عاد

راح زمن الطيبين , لما كنت نضيف اي شخص طالما انه عربي وكنا نساعده بكل شي من لفل 1 الى 60 و نخليه يحصل جير كامل بنفسجي ويكون مميز باللعبه لما كان وقتها اللي عنده جير بنفسجي يجون اللاعبين يصورون معاه

الله يرحم زمان اول

الحين كل واحد يقول نفسي يا نفسي واذا حب يضيف احد مايضيف الا اللي يعرفهم معرفه شخصيه ولا حول ولا قوه الا بالله

الله يعينك يالطيب

والسلام عليكم ورحمه الله وبركاته

[Mufcanas]

والله ي كرزان انا مقدر وضعك ، والصراحه معك حق في كلامك اول اي شخص عربي نساعده لو ما كلمته الا مره ، اكثر من شخص ساعدته و سويت له بوست وانا ما اعرفه بس لانه عربي ! وزي ما قلت راح زمن الطيبين ..