خطوات التلوين باستخدام الألوان الخشبيه مع أبله مادوكـــا

**wildkitty** · 26-12-2002, 08:52 PM

طانكوش حق الموضوع
بس بس ماعرف الون خشبي :":
بوريج تجربه لي ومن ذاك اليوم انا بطلت الون خشبي

اوبس مادري وينها انا راسمتها على كتاب الموسيقى ك ^^;

**Neo Cid** · 26-12-2002, 09:04 PM

يا سلام على الموضوع خيتو مادوكا ..

هذي المواضيع الحلوة ..

من زمان ما شفنا مواضيع دروس وما شابهها .. وينها الدروس هذي عنا .. ":"

التلوين بالخشب هو من أفضل أنواع التلوين .. و أنا أشهد بهذا الشي ..
أحلى من التلوين بالفوتوشوب ..

يعطيج العافية أختي مادوكا ..

لكن بالنسبة لتلوينج البنت شوية بعض الاجزاء بالأزرق بأوائل الخطوات .. ليش هذا ؟ .. خليتي البنت لونها أخضر ؟ .. ممكن أعرف ليش ؟ .. عشان أزيد من خبراتي بالتلوين ..

تحياتي .. نيو سيد . ":"

**Madoka** · 27-12-2002, 12:07 AM

orange road .. مشكوره حبيبتي عالرد ^ ^ .. ان شالله تجربين الخشبي و تتعلمين عليه

.. على فكره التلوين بالخشبي شبيه بالتظليل بواسطه الرصاص ...

fatoom و ][Mylene][ .. شكرا عالردووود ^____^ ... ان شاء الله احط بنفسجي بدال الوردي

.... shaheen ..

.. شكرا عالرد ... انطر و شوف النهايه راح تسير احلى من جذي انشالله (اذا ما خربتها >_<) ..

mirage و Last_Angel و Ranzie مشكوووووورين وايد عالردود ...

حسين العطار

كنت اعتقد انك تستخدم الطريقه الدائريه في تلوين رسومك ^___^ ماشالله الخطوط اللي تستخدمها ما تبين و ناعمه حيل .. ... بس انا ما احب ورق الطباعه الخفيف >___< شلون تقدر تلون عليه !! ... انا سعيده جدا بمشاركتك في الموضوع

Space Cowboy و كيتي ... مشكورين عالرد ^^ ... كيتي هههه ضحكتيني بسالفه دفتر الموسيقى ^____^ احس انج موسيقاره معروفه لكن لحد الحين ما كشفوا مواهبج ":"

Neo Cid هلاااااااا فيك اخوي

... و اخيرا قررت الرجوع للمنتدى ^_____^ ... مو تقاطعنا مره ثانيه ... مفهووووم!!
راح اجاوب على سؤالك بعد شوي ..

**Madoka** · 27-12-2002, 12:49 AM

الرسالة الأصلية كتبت بواسطة Neo Cid

لكن بالنسبة لتلوينج البنت شوية بعض الاجزاء بالأزرق بأوائل الخطوات .. ليش هذا ؟ .. خليتي البنت لونها أخضر ؟

اكو اكثر من سبب ^^:

*اول شي حطيت اللون الازرق الخفيف عشان احدد الظل و النور .. و انا دايما قبل لا الون اي شي احط درجه ظل خفيفه على المنطقه اللي بلونها عشان التوضيح ... بس ما استعمل اللون اللي ابي الون فيه المنطقه (يعني كنت ابي الرسمه تكون درجات الاخضر لكني ما استخدمت اخضر من البدايه) .. و شوف بعد شوي مراحل تلويني للشعر ^^
ليش؟؟ لاني ابي ادمج الوان و لو استخدمت اللون بشكل مباشر من البدايه راح تسير الرسمه ... مادري شقول بس يعني تسير بايخه ?: ...... و لاحظ شلون دمجت الازرق مع الاصفر او مع درجه وحده من الاخضر بدال ما احط الاخضر علطول

... دمج الالوان اثناء التلوين بالخشبي اهم شي !!! (حاله حال باجي انواع الالوان) ..
عشان تعرفون الخشبي مو هين ههههه

* سبب ثاني :": ... كان الدكتور اثناء المحاضرات يفتر علينا و احنا نلون .. و يقولي تلوينج تلوين وحده خايفه >_< .... يعني انا اخاف ابدأ بدرجه لون غامجه من البدايه .. و تطلع مو حلوه و انصدم بعدين :" ... و التدرج بالتلوين من الخفيف بعدين التغميج احسن من الناحيه النفسيه

( انقلبت دكتوره نفسيه الحين ) ... و اقصد من كلامي ان الرسام يكون متعود على شكل الرسمه بالرصاص و لو فجأه حط لون داكن :واو: راح يخترع كل ما يلف ويهه عن الرسمه و يرد يطالعها !! لووووول

^__________^

و عندي تعليق على الاوراق الخشنه ... اعرف فنانه (تلوينها توب ماشالله عليها) ما تلون الا عالاوراق الخشنه لانها تحب تدمج الوان وايد .. و تضغط حيل عاللون لما تلون ..... و الورق الناعم ما يتحمل دمج وايد الوان و عند مرحله معينه ما راح يتقبل اللون و يمكن تذوب الورقه من كثره الالوان !! ... لكن الورقه الخشنه تتحمل و تاكل الوان وايد :0) ... و عندي بعد ملاحظات ثانيه عالاوراق بس مالي خلق اكتبها >_<

ابيكم تعتبرون الورقه يوعانه اثناء التلوين

و تدمجون الوان بدون تردد ..

**Madoka** · 27-12-2002, 01:01 AM

كملت تلوين الأرضيه !! و سويت دوائر شوي بالخلف ...

استخدمت درجه بنفسجي ^^ و درجه ازرق داكن .. و اخضر شوي .. مع بني !! البني ما استخدمته الا شوي عشان اكسر من حده الالوان (لانها فاقعه)!!

**Madoka** · 27-12-2002, 01:15 AM

الحين ... الشعر ^^

اكثر شي يتعبني هو تلوين الشعر :":

اول شي ( الرسمه عاليمين ) حددت خطوط الشعر بالاخضر الزيتي ... و بعدين خذيت رمادي و ظللت شعرها ( عيوزه هههههه )

ثم .. لون بنفسجي حددت الشعر اكثر و بينته اكثر ^ ^ ( ما بغيت اكشف عن طريقتي السريه في تلوين الشعر .. بس عشانكم

حطيتها )

... لاحظوا ان البنفسجي مو متماشي مع لون الارضيه لكن انا راح اخليه يتماشى بعد شوي غصب

**Madoka** · 27-12-2002, 01:21 AM

الرسمه عاليمين ----> لونت الخط فوق العين بلونين (ازرق و اخضر) ... و حددت الرموش بالاخضر .. و سويت الحاجبين بالازرق ...
حطيت شويه ازرق عالشعر

.... و استخدمت نفس الازرق في تغميج لون البشره ^^

الرسمه عاليسار----> لونت بالاخضر اماكن الظل في الشعر و بينت الخصل اللي فيه اكثر

..

ليلحين ما كملت الرسمه ... التكمله احطها بالليل انشالله

**حسين العطار** · 27-12-2002, 03:16 AM

حسين العطار كنت اعتقد انك تستخدم الطريقه الدائريه في تلوين رسومك ^___^ ماشالله الخطوط اللي تستخدمها ما تبين و ناعمه حيل .. ... بس انا ما احب ورق الطباعه الخفيف >___< شلون تقدر تلون عليه !! ... انا سعيده جدا بمشاركتك في الموضوع

لا. طريقة الخطوط المايلة أسهل و أسرع بس آني أمرر القلم عدة مرات على نفس المنطقة حتى تروح الفراغات و بعدين آني أضغط على القلم في المناطق الغامقة ( لهذا السبب الأقلام تخلص بسرعة

) و أطلع دهنه.

الورق اللي أستعمله مو خفيف بس سطحة ناعم جداً

سلام;-)

**سياكا** · 27-12-2002, 03:48 AM

هااااااااااي

اشلونج اليوم يا ابله :6 ....موضوعج وااااااااااااااايد حلووووووو

والله زين الواحد يطور مهارته عندج ...تلوينج يجنننن ;-)

وابي اتعلم واطور مهارتي في التلوين ...بس ما اجدر ادخل النت كل يوم

لان شغلي ما يخلص :"

**L.B** · 27-12-2002, 08:25 AM

موضوع روعة
اكيد الاهداء لالي

:6

بستنى التتمة على احر من الجم مع اني لهلا مو مستوعبة كيف حتصير الالوان طبيعية

شو يا جماعة كلكم خريجي كلية الفنون ؟؟ طيب ويلي مالت عليه ودرس تخصص تاني شلون يكتشف اسرار التلوين ?:

**Madoka** · 27-12-2002, 09:11 PM

شكرا عالردود .. حسين و سياكا و Talla

Talla ... ممكن الشخص يطور مهارته من خلال الممارسه .. مو شرط يدرس تخصص فنيه

..... او ممكن من خلال الدراسه في الدورات التعليميه اثناء العطله ^_^

-----

قمت بتلوين العين ... استخدمت ازرق و اخضر و شويه بنفسجي .. و ما غمجت عالالوان وايد ...
و لونت الحلج باللون البنفسجي الفاقع >_< و سار شكله غامج حيل و اللون طلع مو حلو ?: تدرون ليش؟؟
لاني كنت مظللته بالرصاص و لما ييت الون فوقه طلع اللون اللي شايفينه جدامكم

**Madoka** · 27-12-2002, 09:17 PM

قمت بتلوين قفاز البنت و جناحها بالبنفسجي الفااااااااااااااتح مع الاخضر ... و دمجت اللونين بالابيض

و كملت تلوين الشعر .. استخدمت شوي اخضر فاقع مع اصفر خفيييف .. و اخضر و كل الالوان >_< هههه و سار شكله مثل ما انتو شايفينه

لونت الطوق اللي في شعرها ( لانها ملاك خليت الطوق في شعرها بدال ما اخليه فوق راسها ^^ ) لاحظوا لونته نفس لون الفم (اللون البايخ>_<) و حطيت شوي اصفر معاه

طلع لونه مو حلو ادري :": لكن بغيت احط درجه لون نفس لون الفم عشان اضيّع السالفه >_< ... فكرت البسها سوار بس قلت ماله داعي

قارونوا بين الرسمه قبل التلوين و بعده ^______^

**Madoka** · 27-12-2002, 09:21 PM

و هذا الرسمه خلصت ^________________^

لونتها خلال يومين .. مثل ما شفتوا

ملاحظه عقب ما خلصت الرسمه حطيت قوفها طبقه غراء شفاف ( طبقتين من الغراء!!) لان الالوان الخشبيه تبهت و يخف لونها لو تركت فتره طويله !!! و لازم نحفظ الوان الرسمه ...

ممكن بالغراء او بالمثبت الخاص اللي ينباع في محلات الرسم ... او الورنيش >_<

ما انصح باستخدام الورنيش

لانه يخلي الرسمه تلمع و يقلل قيمتها !!

ملاحظه: درجات الالوان اللي اخترتها لتلوين الرسمه اقتبستها من صوره بمجله ( لاني كنت بحط الرسمه بالمنتدى و مابغيت اجازف و الون بدجات لونيه من ابتكاري و تطلع مو زينه بالنهايه !! ) عشان جذي اقتبست الالوان (الاخضر و الازرق) من صوره واقعيه ^_____^ و زدت عليها البنفسجي

خلصت و ملصت :0) .. ارجو ان تنال اعجابكم

**النجمة الامعه** · 27-12-2002, 09:26 PM

هلااااااااااا ...

مشكوررررررره حبيبتي على الرسم الحلووووووو الي مثلج

;-)

**shaheen** · 28-12-2002, 10:15 AM

واو يا رهيبة انتي
مادوكا فعلا ابدعتي

لم اتصور ان تلونين هذه الرسمة بهذه الروعة
ممتاااااااازة فعلا

شكرا على هذا الدرس المفيد فعلا في التلوين الخشبي وانتظروا مني رسمة بالالوان الخشبية الشاهينية ههههههههه

الموضوع: خطوات التلوين باستخدام الألوان الخشبيه مع أبله مادوكـــا

أدوات الموضوع

باااااااك

الخطوه الجديده

النهايه

ضوابط المشاركة