يا يا يا ،،، لين متى يا عرب ؟

[caveat]

ملاحظة : أنا ذكرت المثال السابق مع علمي أن العصبية لجنسية أو قبيلة ...إلخ ليست بالضرورة مرتبطة بالزواج ...

لأنه موضوع الزواج هذا له عدة جوانب مختلفة ... فقد يكون واحد مثلاً غير متعصب أو عنصري لكنه لن يتزوج أو يزوج أبنته أو أخته من غير جنسيته لا لعنصرية لكن لأجل إختلاف العادات والتقاليد المحلية فهي" قد " تكون سبباً لفشل الزواج ...

[VaSh ThE sTaMpEdE]

السلام عليكم Caveat
حياك الله في الموضوع

أيهما أكثر نمواً التفكير الجاهل أم الواعي ونسبة كل منهما ...

بصراحة أنا لا أظن التفكير الجاهل أو الواعي ، ولكن التفكير الغير الواعي ، الي يقولونه بالإنجليزي subconscious إذا فهمت قصدي

لكن لأجل إختلاف العادات والتقاليد المحلية فهي" قد " تكون سبباً لفشل الزواج ...

نقطة مهمة ذكرتها

شكرا...والسلام

[القبطان فرفشلي]

باختصار عقليات طفولية لا اكثر

واذا تبي تشوف السب والشتم بينهم شوف هالرابط www.youtube.com

واكتب كويت او السعودية وتشوف الفضائح للاسف

وشكرا

[اٍحساس حقيقي]

تسلم اخوي على الموضوع والله هالموضوع كنت انتظر شخص جريء مثلك يسويها .. مشكور اخوي .

بما اٍنني من الامارات .. تعال شوف التعصب القبلي وين وصل !!
المواطن يعامل على حسب الدرجة .. !!
مثلا : هذا مواطن أصله بلوشي ولا سوداني ولا يمني ولا عيمي ولا ايراني ولا ولا ولا ....!!
ومثال آخر . لما تتعرف على شخص اماراتي يحمل اسم قبيلة كبيرة وقوية جدا وشهيرة يعني لازم تخاف منه وتحترمه غصب عليك !! اما لما تشوف اماراتي بس اسم قبيلته شكلها أي كلام !! فما يستاهل تحترمه وتقدر تتعلى عليه !!

والدنا الله يرحمه الشيخ زايد .. لم يكن يريد هالشيء .. هو لما أسس دولة الامارات قام بجمع كل القبائل الاماراتية ولا فرق بين قبيلة فلانية وقبيلة علانية .. هذا مواطن ويجب أن يعامل كمواطن بدون تفرقة ..

اما مسألة الفرق بين مسلم خليجي وآخر عربي و آسيوي وأوروبي .. فهذا مشكلة كبيرة ..
يعني الخليجي يتكبر ويتعلى على العربي بس على أساس أن دولته أقوى وأغنى من دولة اخيه العربي !! وعندها نفط أكثر .

الاسلام زمان كان ما يفرق بين لون وجنسية ولغة ..
الاسلام دين الاخوة والترابط والسماحة .

فعلى العلماء والشيوخ الكبار أن يتحركوا لايقاف هالظاهرة التي تؤخر تقدم المجتمعات العربية نحو التطور والتكنولوجيا ..

مشكور اخوي

[الاستفزازي]

السلام عليكم ورحمة الله وبركاته

لاحظوا أنا قلت مسلم في الأرض الفلانية ، ولا قلت مسلم فلاني أو كذا ، لاني كمسلم محا أخلي هذي الحدود الجغرافية تفرق بيني أنا وإخواني

وعليكم السلام ورحمة الله وبركاته

انا معاك ما افرق بين المسلمين بجنسياتهم
ولكن بتقواهم وخوفهم من الله سبحانه وتعالى

وان لقيت واحد يحكم على المسلم بجنسيته هذا تلاقيه اسمه مسلم فقط
لانه لم يؤمن بان الله سبحانه وتعالى رب الناس اجمعين في كل بقاع الارض
وليس في بقعه جغرافيه معينه

[VaSh ThE sTaMpEdE]

السلام عليكم جميعا

أخي القبطان فرفشلي :

واكتب كويت او السعودية وتشوف الفضائح للاسف

أنا هذا الي صارلي تماما ، كنت أدور فيديو عن تاريخ السعودية ، وطلعت لي أشياء بعيييييييدة عن هدف البحث ، الله يهديهم بس

باختصار عقليات طفولية لا اكثر

أنا أسميهم مبزرة

شكرا على المرور

أخي EMPIRE OF EVIL :
كل الكلام الي قلته صح 100%

بما اٍنني من الامارات .. تعال شوف التعصب القبلي وين وصل !!

وصل لدرجة لا لتعقل ، والمشكلة الناس تسمي نفسها مسلمة لما يكون تفكريها كذا
وحتى في السعودية عندنا هالكلام ، إذا فلان من القبيلة الفلانية احترمه وإذا علان من القبيلة العلانية لا تعطيه وجه

الاسلام زمان كان ما يفرق بين لون وجنسية ولغة ..
الاسلام دين الاخوة والترابط والسماحة .

هذي هي روح الإسلام ، ولكنها حاليا ضايعة

شكرا على المرور


أخي الاستفزازي :

انا معاك ما افرق بين المسلمين بجنسياتهم
ولكن بتقواهم وخوفهم من الله سبحانه وتعالى

حلو كلامك ، ولكن المشكلة التقوى ضعيفة هالأيام
شكرا على المرور


شكرا...والسلام

[ToUaReG]

السلام عليكم ^^ ..

هلا اخوي عساك عالقوه ..

فعلا هاذي مشكله كبيره حاليا التفرقه بين الناس ..

ان كان هذا سعودي ولا كويتي ولا مصري ولا لا لا ..

و هالعنصريه حتى هني بالمنتدى صايره .. على انه كويتي غلط عليه ..

تلقاه يغلط على الكويتيين كلهم !! .. مو حجي هذا كل واحد يغلط عالثاني !!!

احنا عرب مسلمين شخلينا للمسيحيين واليهود والكفااااار !!! ..

ولي باط جبدي حتى بديرتي فيه عنصريه .. هذا بدوي .. هذا حضري ..

هذا من قبيلة فلان وهذا من قبيلة علان ..

الله يهدي الجميع ان شاء الله ..

و فعلا لما شفت youtube انصدمت من أشياء كثيره ما المفروض

تطلع منا إحنا كعرب .. بس شقول .. هذا حال العرب إلحين !!!

وشكرا عالموضوع ..

[VaSh ThE sTaMpEdE]

السلام عليكم

عندي كلمة أبي أقولها للجميع :
ما توقعت أبد أشوف تفاعل من الأعضاء في هذا الموضوع ، لقيت إنه في ناس غيري ضد العنصرية بكل أنواعها - اللونية والقبلية والدولية - . وإظن إنه يمدينا نسوي شوي عشان نوقف هالمشكلة ونحاول نحيي روح الإخوة مرة أخرى بين المسلمين ، شعور حلو بمجرد إني أفكر بهالشيء ، أهم شيء ما نفقد الأمل ونحاول كسر العنصرية أينما وجدناها

أخي ToUaReG :
وعليكم السلام

و هالعنصريه حتى هني بالمنتدى صايره ..

للأسف

هذا بدوي .. هذا حضري ..

هذا من قبيلة فلان وهذا من قبيلة علان ..

موجودة وأنا أكرها كره

الله يهدي الجميع ان شاء الله ..

آمين

شكرا لك على المرور

[ملك الأقلام]

مشكووووووووووووووووووووووور

[ملك الأقلام]

كلامك صح 100%

[sam jericho]

مع احترامي لكم اكثر العنصريات الي تكون في الوطن العربي هي من الخليجيين

[VaSh ThE sTaMpEdE]

السلام عليكم أخي sam jericho

يا ليت لو ما كتبت الرد لأن الحين بيسبب مشاكل. طبعا أنا لا أنكر أن هناك عنصرية كبيرة من بعض الخليجين وأنا أعرف هالشيء لأني خليجي. ولكن لا يحق لك التعميم. حتى وإن كان 99% من الشعب الخليجي عنصري ، فلا يحق لك أن تقول أن كل الشعب الخليجي عنصري. لأنك بهذا ظلمت نسبة ال 1%.

العنصرية موجودة في كل مكان ، بشكل واعي وغير واعي ، جهرا وسرا .

شكرا...والسلام

[abdulaziz1]

طيب إيش رأيك في هذي ..

واحد داعية (الله يهدينا ويهديه) .. راح ألقى محاضرة في الطايف أظن (هذا الكلام سمعته من واحد نفس الشخص حكاه) .. فالمهم قعد يتكلم عن العنصرية وإنو المفروض مانفرق ...الخ .. وآخرتها ضرب مثال ياريته ما ضربه ..

صاحبه أسمر وقاعد وراه .. فقام قال .. (شوفوني أنا وهذا العبد اله ورايا مانفرق بين بعضنا وبعض ) ..

طبعا كلامي هذا مو انتقاد للداعيين ورجال الدين .. الا والله ونعم ..

بس الغرض من هل مثال إني أبين إن العنصرية شملت جميع الطبقات .. ^^

وفيه عبارة أنقالت في مانغا بيرسيرك .. بصراحة عجبتني وتطابق الوقت ..

هذي وحدة تقول .. (بما معناه لأني مو متذكر الكلام حرفيا ) ..

(بني آدم إذا كان أنقص من بني آدم زيه ولو حتى بشئ بسيط .. حسده .. وبالمقابل .. إذا كان أزود منه ولو بشئ بسيط .. أحتقره ! )

عموماً أنا العنصرية هذي ما أطيقها خير شر ..

So I Agree With You ..

بس بالنسبه للزواج ..

(الله يرزقنا بالزوجة الصالحة أول .. وبعدين العيال والبنات إن شاء الله .. )

طبعا لي رأي ثاني هنا ..

الرسول عليه الصلاة والسلام .. حط مقياس إختيار الزوجة في 4 شروط (ما أدري عن صحة الجملة لكن أهم شي إنها وصلت )

1-الجمال
2-النسب
3-الأخلاق
4-الدين

بالنسبة لإثنين وثلاثه مني متأكد منهم .. ممكن تكون عكس ..

لكن عموما .. نلاحظ إن النسب قبل الدين .. وهذي فيها حكمة .. بإنك ما تقبل دين المرأه ثم ترفض بسبب جمالها !!

هذا الشي ..

الشي الثاني وهو مايهم موضوعنا ..

الزواج ماله دخل بالعنصرية .. احيانا قد تكون العنصرية سبب ..

لكن أنا من الناس اله ما أبغى أتزوج إلا من ديرتي .. أو من دول الخليج مثلا .. والسبب تقارب العادات والتقاليد والتنشئه واللهجه .. وأشوف إن هذا الشي بيخلينا نتفق ونتفاهم أكثر .. بس مو معناه اني إذا لقيت بنت الحلال اله أبغاها في بلد ثانيه مثلا ما آخذها عشان بلدها مثلا ..

يعني مالها دخل بالاستحقار أو شي .. لكن كما قال أحد الإخوة قد تكون العادات والتقاليد أو التنشئه أو غير ذلك ..

فربط الزواج بالعنصرية أراه أمر خاطئ "صح في هذه الفتره " .. حتى ان فيه قبايل ماترضى ان بناتهم يتزوجوا من قبل أخرى .. بينما الرجال لا .. وهذي القبايل تلقى الرجال ماخذ إثنين أو ثلاثة ..

هذي صراحة أعتبرها تخلف مو عادات وتقاليد .. وليش المرأه ماتتزوج من بره والرجال يتزوج !؟!!

عموماً هذا مو موضوعنا في الأصل ..

وفي الأخير .. نشكر الأخ الحبيب فاش ..

[Amarantine]

السبب الرئيسي في العنصريه والقبليه هي ضعف الدين وتزعزعه عن قلوب المسلمين مما خلف فيهم تخلف كبير وضعف لا يوصف و مضحكه لكل عاقل.

[rushin_911]

مع احترامي لكم اكثر العنصريات الي تكون في الوطن العربي هي من الخليجيين

الطريف إن في هذا الرد عنصرية

عموماً ادّعائك باطل، و لولا إنّي ما ودّي أخرب موضوع الأخ vash و أسير عكس دعواه الحميدة كان ردّيت عليك و بيّنت لك وين العنصريّة في العالم العربي موجودة فعلاً