قرار دمج الأقسام .. ما رأيك فيها؟

[NiN RevO]

يا سلام عليك يا فارس .. كنت ناوي اطرح عليك اقتراح الدمج بس انت سبقتني O.O

مو بس المواقع الاجنبيه حتى في مواقع عربيه محترفه مسويه عملية الدمج بين جميع الاقسام بس النسخه من VB مطوره اكثر من الي عندنا .. تبين مواضيع كثيره و ردود كثير عندنا محدوده بعشر ردود .. وفكرة الدمج رائعه وبتختصر وقت على الي يتصفح المنتدى ..

[ToUaReG]

انا أؤيد فكرة دمج الأقسام مع بعض ..

يعني من ايجابياتها بالنسبه لي تسهل التنقل بين المواضيع ما يحتاج تدخل قسم قسم ..
و راح نشوف اعضاء وايد في القسم الواحد وخاصه انه بعض الأعضاء ما يشاركون الا بالقسم المتخصص فيه ..

و من سلبياتها راح تقلل المواضيع في اقسام الالعاب ..
مثلا بدال لا يكون في اكثر من موضوع لرزدنت ايفل في نفس الوقت راح يكون في موضوع واحد رسمي !!!

[GT4 SKYLINE]

الافضل دمج مواضيع الالعاب المشتركة بين الاجهزة فقط يكون قسم خاص بالالعاب المشتركة ويوضع الموضوع
المرغوب فيه ويتناقش الاعضاء وكل يرجع لقسمة
والتقليل من الاقسام في كل قسم خاص بجهاز معين
ايش الفايدة من اني اشوف موضوع للعبة ما املك الجهاز اللي نازلة عليه راح انط للموضع اللي ابي
وبعدين بدل ما اجد احدث المواضيع في صفحة واحدة القى اكثر من صفحة وهذا بيتعب اصحاب الاتصالات البطيئة
لان المنتدى نفسه ثقيل تصفحة
+ اللخبطة
انا ارى دمج تفرعات قسم للعبة ما بدل مايكون قسم عام وقسم للحلول وقسم للمواضيع المميزة
مثلا يكون قسم واحد لفاينال فانتسي ويتفرع منه قسم لالعاب الاربي جي كل الالعاب الثانية تكتب هنا موضوعها لانها ماتحتاج قسم
احس اني بديت اخبص مادري وش ابي

[Al-RaQmi]

دمج الاكس والثري لحالهم .. والننتندو ماله رب P:

اذا فيه دمج فيكون بين كل الاقسام ..

ويقسم منتدى الالعاب الى (قسم اخبار-قسم تقارير ونقاش-قسم تروفيزوالاشيفمنت-قسم الاستفسارات )

[langrisser]

أشكرك فارس على الفكرة الجيدة والي راح تحل بصراحة أزمة في نظري لكثر الأقسام

والإنتقال من مكان إلى مكان وثقل المنتدى فأنا أشوف أنه دمج قسم الأكس بوكس مع

البلايستيشن 3 فكرة مرة حلوة أولا شي

1 - إذا كان فيه تعصب أو حتى لو تعصب خفي ممكن أنه بروح ونصير كلنا سوى ونتناقش

ونرفع من مستوى القسم والمنتدى بشكل عام وأيضاً نقلل المواضيع الي بعض الأحيان

ما تكون لها لزمة

2 - الآن في صراع أو خلني أقول 80 % من الألعاب مشتركة بين البلايستيشن 3 والأكس بوكس

وأنا أشوف في رأي أنه نتبادل الخبرات <<<< بيننا في القسمين يعني بيكون أحسن في التنظيم

3 - طبعاً فيه شي شوي مضايقني في هالمنتدى أنك تشوف قسم فاينل فانتسي وقسم سيارات وقسم

ميتل غير وقسم وقسم وقسم ..... هي صح حركة حلوة بس لما نعيد هالتقسيم ونضعه في قسم

البلايستيشن والأكس بوكس إذا أفترضنا أنه راح يندمج رايح يكون شكل المنتدى أحلى وسهل

الوصول .

4 - وأيضاً من ناحيتي أشوف قسم النيتيندو بالحالة الي هو فيها الآن جيد يعني ماله شغل في

البقية وكل شي فيه خاص فيه فأشوفه لحاله أفضل

5 - مدري بس أحس لما نضم قسم ال pc للبلايستيشن والأكس بوكس زين ومو زين .؟؟؟؟؟

أولا : نقول أنه كويس لأنه بعض العاب الأكس بوكس أو خلينا نتكلم عن العاب ال shooter

أكثرها تكون للأكس بوكس وال pc وما شاء الله محبين ال shooter كثيرين فأنا أشوف من

هالناحية أفضل

ثانياً : أقوله انه ما يصلح لسبب أنه راح يصير لخبطة بسبب ألعاب الأونلاين الي فيه يعني

مدري ليه أحس أنه ما يصلح فيه شي غلط
___________________________

طبعاً هذي وجهة رأيي في هالموضوع وما قصرت أخوي فارس على مجهودك في الإرتقاء في

قسم الألعاب وطبعاً التغيير أهم سبب من أسباب النجاح والإرتقاء الجيد وأتمنى من الله التوفيق

لك
________________________

وشكرا

[Luna B.Noctis]

انا مؤيد لفكرة دمج الاقسام وايضا

دمج الاقسام الفرعية ويكون في قسم لالعاب

الاربي جي والفايتنغ وغيرها .

[طفسن دفش]

انا ارفض الفكره
والسبب لان الدمج ماله داعي من الاساس....القسمين موجودين وكل واحد له نشاطه الخاص وله اعضائه الخاصين والخيار متاح للاعضاء سواء يبي البلاي او الاكس.....وشكرا

[ps3 player]

غير موافق
لأن إذا تم دمج الأقسام مع بعض راح تصير صفحة المواضيع كبيرة
ويمكن تكون صفحتين
فالواحد يضيع معاها

[ps3 player]

و في أقسام ما لها داعي
ومييييييتة مثل قسم GTA , GT, TOMB RAIDER
يعني هذه الألعاب ما تستاهل أن يكون لها قسم لوحدها

[Yamato]

اذا في نية لدمج الاقسام فالاولى انكم تبداون بالاقسام الفرعية..
رجعوا للنظام السابق في كل قسم.. يعني بالمنطق ليش في قسم خاص بفاينل فانتسي وميتل غير وريزيدنت ايفل.. وما في قسم اربيجي او اكشن او رعب.. وين المنطق في هالتقسيم الحالي!!

فاذا تحذفون التقسيم بالبداية.. وتكون كل مواضيع الالعاب لجهاز معين في قسم واحد فاكيد ناس اكثر بيتواجدوا بالمواضيع بشكل عام..

امشوا خطوة بخطوة.. لا تنطوا مرة وحدة لدمج قسمين لجهازين مختلفين مرة وحدة..

[FARES360]

^
Yamato انا معاك في هالنقطة

حذف الاقسام الفرعيه الي تخص لعبة سلسلة من فتره نطالب فيها .. وانشاءالله يصير خير xD
لأنه قرار التغير النهائي ماهو بيدنا نحن المراقبين احنا مجرد نوصل الأخبار والخطط ..اهم بيدهم التطوير والتقسيم
عموما التصويت لحد الحين منافس بين الأثنين..

شخصيا ببالي الدمج لكن مهو كامل.. بمعنى
مثلا دخلت الصفحة ونزلت تحت "اضغط على المنتدى العام " وداخله يكون مفرع الى 4
الكبيموتر
الأكس
البلاي
النيتندو
حيث الصفحة الرئيسية تكون مختلطة بالأخبار لجميع الأجهزه
اما الي بباله يختار قسم معين .. يضغط على الأفرع واحد من الأربع..

في النهايه قرار الدمج ماهو اكيــد للحين.. مجرد أخذ اراء الأعضاء فقط -_-

[Modi]

انا موافق وبقوه .. خصوصا الـ X360 و PS3
لأن تفكير اعضاء الجهازين تقريبا واحد "هاردكور" يعني
ومشتركين بألعاب المالتي اللهم فقط الحصريات هي الي تفرق

غير كذا بيكون تفاعل اكبر اذا نزلت لعبه مالتي كبيره
مثلا بايوشوك 2 .. التفاعل بيكون اكبر وبيكون هناك اهتمام

وافضل ان الاقسام الفرعيه ماتكون بأسماء الالعاب
يعني يكون اكشن - رعب - اربيجي - ستراتجي الخ الخ

اما اهل النيتندو بسلامتهم خلوهم بحالهم .. لأنهم بعالم ثاني لول

[(Walter Sullivan)]

لا أوافق فكرة الدمج وأفضل إستقلال الأقسام ...

لسببين تحضرني الأن :

1- فكرة الدمج حتجلب التعصب وخاصة في المواضيع المشتركة وبصراحة ما يميز هذا المنتدى أن التعصب موجود بنسبة بسيطة فيه عن باقي المنتديات وتقريباً هو السبب الأول لهروب الأعضاء من أغلب المنتديات .

2- عندي إحساس أنه حتصير لخبطة كبيرة لو تم تنفيذ فكرة الدمج هذه .

[Nexun]

لا لدمج
صحيح منتدانا خالي من التعصب لسبب لأن الأقسام مفرقة أما لو دمجت وجدت التعصب
منتديات نيو جيف صحيح موحد لكن شوف التعصب إلا فيه أنواع وأشكال

---------------
ثانيا

نقول دمجنا الأقسام ويش يصير للمراقبين سواء كانو مراقبين البلاستيشن3 أو الأكس ( ويش يصير مسمياتهم )
( مراقب البلاستيشن والإكس ؟ )

حرام والله المراقبين جدد توهم أترقوا

[Spartan Heart]

شخصيا ببالي الدمج لكن مهو كامل.. بمعنى
مثلا دخلت الصفحة ونزلت تحت "اضغط على المنتدى العام " وداخله يكون مفرع الى 4
الكبيموتر
الأكس
البلاي
النيتندو
حيث الصفحة الرئيسية تكون مختلطة بالأخبار لجميع الأجهزه
اما الي بباله يختار قسم معين .. يضغط على الأفرع واحد من الأربع..

^^ اوكي فارس انتو شسويتوا الحين .. ما هيه هيه .. انا افضل كل قسم يبقى على حاله .. مع احترامي لحبايبي الحلوين الاعضاء الي يبون الاقسام تندمج عشان الوقت ... ترا كلها كلكين وانت واصل لصفحتك ومضوعك خالص .. يعني بتفرق اذا شديت حيلك اشوي ... ولا اصابع بتعورك يعني ؟؟
بعدين شباب خلونا صريحين ترا في عنصريه للقسمين يعني في شباب مثلي انا ما يدشون قسم الاكس وفي شباب بالاكس ما يدشون قسم السوني .. شلون اتقولون النشاط راح يزيد ..؟؟ّ!
انتو نظرتوا للموضوع بزاويه واحده !!
خلوا كل شيء مرتب ومنسق ولا تلخبطون الاشياء مع بعضها << بأسم توفير الوقت

.................................................................................................... ...

واذا فيكم نقل ودمج افاا عليكم .. موجده اقسام تبي الدمج والنقل مثل:

يعني بالمنطق ليش في قسم خاص بفاينل فانتسي وميتل غير وريزيدنت ايفل.. وما في قسم اربيجي او اكشن او رعب.. وين المنطق في هالتقسيم الحالي!!

^^ الله عليك يا ياماتو ... هذا الترتيب ولا بلاش شوفوا الاعاده

( وما في قسم اربيجي او اكشن او رعب.. وين المنطق في هالتقسيم الحالي!! )

انا معاك والله .. كلامك طيب ومضبوط

كل التوفيق لإدارتنا الحبيبه
واتمنى اني ما ازعل احد في كلامي
السلام عليكم