FFVII Remake يحتـآج آلى 10 آضعـآف من آلوٍقـت

[Arashi]

أبي أفهم وين الصعوبه في عمل ريميك لـ7 ؟
او ان سكوير تتعمد تذل الفانز عشان يزيد حماسهم للعبه و تكسب من وراهم الملايين بعد ما تنزل الريميك O.o

[حـــلا]

او ان سكوير تتعمد تذل الفانز عشان يزيد حماسهم للعبه و تكسب من وراهم الملايين بعد ما تنزل الريميك O.o

سكوير ما قالت شيء رسمي .. فـ بالتالي مالها علاقه بهالخبر..
هذه تصريحات من كيتاس نفسه.. وهو مجرد منتج p: < كرهته خخخ
يوشي وادا قال إنهم راح يدرسون احتمالية صنع الريميك < هذا المدير التنفيذي لسكوير

[Arashi]

كلهم عيال لسكوير
في النهايه الشركه تتحمل المسؤوليه بسببهم P:

انا مادري شنو في راسهم بالضبط
بس احس فهمت وين الصعوبه (تحليل الخوي الصغير) :
الظاهر الصعوبه في انهم اولا لازم يخلون الشخصيات تتكلم...يعني صوت بدل كتابه
الحين هم عباره عن 6 شخصيات رئيسيه و 2 سريّه
كل شخصيه لازم تسوي لها حركات وصوت ولاتنسون الجرافيكس العالي دام انها عالبلاي3
ومتأكده انهم يضطرون يخلون الشخصيتين السريتين فينسينت ويوفي مع الشخصيات الرئيسيه ووجودهم اجباري لأنهم دخلوا في كل اصدارات السلسله على انهم حاربوا سيفيروث مثل غيرهم
يعني زيادة خساير لأن لازم تكون لهم قصصهم الخاصه بتفاصيلها مثل غيرهم

الحين الطامه الكبرى
لازم تختار معاك شخصيتين كل مره عشان يرافقون كلاود..افرض اخترت باريت وتيفا ودخلت مثلا مدينة الالعاب (جولد سوسر) وتصير احداث مقاطع سنيمائيه وكلام كلام كلام وحسب اختياراتك ممكن ترافق تيفا في الالعاب او ايريث...كل هذا يحتاج لمقاطع وشغل
هني سكوير تضطر تسوي مقاطع لكل الاحتاملات: انت ممكن تاخذ معاك باريت ويوفي..ممكن سيد وفينسينت...مكن ايريث و ريد13
طيب هاذي 100 احتمال يبي لها 100 مقطع عشان يوفرون لك كل الاحتمالات

شي ثاني...اللعبه خريطتها كبيييييييره وعندك وسائل مواصلات مختلفه عشان تمر على كل نقطه فيها...هاذي خساير

عندك العشرات من الاسرار و الاماكن الغريبه اللي لازم تكتشفها...بعد خساير @_@


اما فاينل 10 و12 و13 فالشخصيات قليله وكلها مشتركه في قصه وحده وكلها تكون موجوده غصبن عن اللاعب من غير اي احتمال لتبديلها....وكل شي يمشي حسب القصه ما عندك خريطة عالم وطياره تطيرها بيدك وتدور في انحاء العالم (انا مالعبت 13 لحد الحين فمب متاكده بالنسبه لهذا الجزء)...يعني شغل سهل بالمقارنه مع 7 وحتى 8 و9


اسفه عالاطاله ^^

[Pika-Chu]

arashi

كل اللي ذكرتيه ما يمنع وجود الريميك ، وبناخذ نقطه نقطه ..

الحين هم عباره عن 6 شخصيات رئيسيه و 2 سريّه
كل شخصيه لازم تسوي لها حركات وصوت ولاتنسون الجرافيكس العالي دام انها عالبلاي3

فف 13 عدد الابطال فيه ما يقلون وايد عن هالعدد من غير ما اقولج كم ( عشان ما اخرب عليج )

ومتأكده انهم يضطرون يخلون الشخصيتين السريتين فينسينت ويوفي مع الشخصيات الرئيسيه ووجودهم اجباري لأنهم دخلوا في كل اصدارات السلسله على انهم حاربوا سيفيروث مثل غيرهم
يعني زيادة خساير لأن لازم تكون لهم قصصهم الخاصه بتفاصيلها مثل غيرهم

دام انه ريميك فمافي شي يمنع انهم يغيرون من السيناريو ، عندج مثلاً ريزيدنت ايفل الريميك اللي على الجيم كيوب احداثه مختلفه عن الجزء القديم

الحين الطامه الكبرى
لازم تختار معاك شخصيتين كل مره عشان يرافقون كلاود..افرض اخترت باريت وتيفا ودخلت مثلا مدينة الالعاب (جولد سوسر) وتصير احداث مقاطع سنيمائيه وكلام كلام كلام وحسب اختياراتك ممكن ترافق تيفا في الالعاب او ايريث...كل هذا يحتاج لمقاطع وشغل
هني سكوير تضطر تسوي مقاطع لكل الاحتاملات: انت ممكن تاخذ معاك باريت ويوفي..ممكن سيد وفينسينت...مكن ايريث و ريد13
طيب هاذي 100 احتمال يبي لها 100 مقطع عشان يوفرون لك كل الاحتمالات

لوول ،لو تفكرين فيها بتشوفين ان ماشي اي اختلاف بين فف 7 عن فف 10 وفف 12
في كل الاجزاء تكون مجموعه تغامر بس انته تختار لك ثلاث شخصيات تلعب فيهم ، والشخصيات اللي تختارها ما تعني ان الباقين ما يغامرون معاك =)

شي ثاني...اللعبه خريطتها كبيييييييره وعندك وسائل مواصلات مختلفه عشان تمر على كل نقطه فيها...هاذي خساير

عندك العشرات من الاسرار و الاماكن الغريبه اللي لازم تكتشفها...بعد خساير @_@

الخريطه ممكن تكون مشكله خاصه على جهاز HD مثل الـps3
بس مثل ما قلت سابقاً دام انه ريميك فيقدرون يغيرون في السيناريو مع الاحتفاظ بكونسبت اللعبه ..

[ShinGundam]

هو بدون أدنى شك الريميك موضوعه صعب جداً من ناحية التطوير أعتقد من أحد الأسباب هو أن جزء كبير من مطوري فف7 (حسب كلام نومورا) يشتغلون على الفيرسس و من بعدها راح ينتقلوا الى كينغدوم هارتس 3

[حـــلا]

وتصير احداث مقاطع سنيمائيه وكلام كلام كلام وحسب اختياراتك ممكن ترافق تيفا في الالعاب او ايريث...كل هذا يحتاج لمقاطع وشغل

هذا يدخل بالقصه الاساسيه ,, كان فيه مقطع fireworks لما اّريس كانت تقول
لكلاود i want to meet you ,هذا CG كشخه بوقتها << p: باقي المشاهد كلها غيم شارك

عموماً تكرار المشاهد بشخصيات مختلفه ماله داعي ,
الافضل والاسرع ريميك للقصه الاساسيه وبس..

انا حابه اللعبه تكون مثل مستوى جرافيكس XIII بس مو مثل
الـgameplay , وما ابيها تكون لاينر وبسرعه نخلصها

[NsaN]

انا مستغرب انكم للحين تتكلمون عن موضوع الريميك..
انا من دخلت هالمنتدى..كم؟؟ 9 سنين؟ والناس للحين تتكلم في نفس الموضوع..

ليش تبون الريميك؟؟ حد يشرح..
مو على اساس انها بالنسبة لكم كانت THE perfect FF؟؟
و كانت عايبتكم بالغرافيكس الي هي كانت عليه..و الموسيقى و اسلوب اللعب؟
عيل ليش الريميك؟؟ شو الي كان ناقصها؟؟

احس والله الاغلبية ماشية على مبدأ "مع الخيل يا شقرا"..
الناس طالبت..فقامت تطالب شراتها..

محسسيننا ان مافي FF غير VII..
اعتقد الجزء هذا اخذ كفايته من الاهتمام.. ويكفي انه الجزء الوحيد الي نزلته هالاصدارات الكثيرة..

[Pika-Chu]

^
لوول ، لا حرام مب من تسع سنين الفانز يطابلون بالريميك xD
اتوقع السالفه بدت من العرض التقني لـVII في سنه 2006

ومره قريت ان سكوير بتدعم فف 7 بإصدارات حتى ذكراها العشرين تحت مسمى Compilation of Final Fantasy VII
يمكن عشان جيه الفانز وايد متمسكين في الريميك

[Arashi]

Pika-Chu

[QUOTE]فف 13 عدد الابطال فيه ما يقلون وايد عن هالعدد من غير ما اقولج كم ( عشان ما اخرب عليج ) [/QUOTE]

شكرا عالاهتمام
يس هم عددهم وايد حسب ما اذكر من الصور يعني اكيد هم فوق الاربعه
لكنهم كلهم موجودين في كل الماقطع حسب ادوارهم بدون ما نختار ناخذ من معانا ولا نحذف من
يعني الحدث الواحد يكونون موجودين وسكوير تقدر تسوي له مقطع سنيمائي واحد مب مثل 7 اللي تضطر تسوي مقاطع لكل الاحتمالات حسب منو تاخذه معاك

دام انه ريميك فمافي شي يمنع انهم يغيرون من السيناريو ، عندج مثلاً ريزيدنت ايفل الريميك اللي على الجيم كيوب احداثه مختلفه عن الجزء القديم

المشكله الفانز نحيسين >>> وانا منهم
ريميك رزدنت ايفل اضافوا عليه اشياء
لكن لو بغيرون في 7 وعشان يقدرون يوفرون فلوس اكيد راح يحذفون احداث حلوه
مثلا...مستحيل افوّت فرصة ظهور كلاود بالفستان

في كل الاجزاء تكون مجموعه تغامر بس انته تختار لك ثلاث شخصيات تلعب فيهم ، والشخصيات اللي تختارها ما تعني ان الباقين ما يغامرون معاك =)

صح وانا فكرت فيها قبل انهم لو يحشرون كل الشخصيات في مقطع واحد ويفكون عمرهم يكون أسهل عليهم
لكن شكلها سكوير تبي تمشي نفس الجزء القديم بالحرف الواحد لكن بجرافيكس اعلى

حلا كويتيه

لكلاود i want to meet you ,هذا CG كشخه بوقتها << p: باقي المشاهد كلها غيم شارك

صح اذكر ان في فانز شياطين ههههه خلوا زاك مكان ايريث
بس تقدرين بطريقه ثانيه تخلين تيفا مكان ايريث...صارت معاي اخر مره لعبتها
بس هالحركات تصير ايام زمان...الحين اكيد اصعب عالبلاي3

وما ابيها تكون لاينر وبسرعه نخلصها

خاطري فيها بنفس نظام الجيم بلاي لكن بجرافيكس اقوى
يعني لما تضربين Attack تجوفين كلاود يركض طق طق طق طق بخطوات خفيفه ورشيقه صوب العدو ويضربه بالسيف ويرجع مكانه بخطوات خلفيه طق طق طق طق
مب مثل الجزء القديم اللي تحسين فيها الحركه سريعه ومب طبيعيه


NsaN

عيل ليش الريميك؟؟ شو الي كان ناقصها؟؟

ما جوف في مشكله لو سووا لها ريميك
ما انت قلتها بنفسك..مافي شي ناقصها وكان أحسن جزء لسلسلة FF
فمن الطبيعي ان نتمنى نلعبها مره ثانيه (بالاصح عاشره) بشكل جديد وجرافيكس اقوى
انا ودي اجوف كلاود بالفستان clearly

[حـــلا]

محسسيننا ان مافي FF غير VII.. اعتقد الجزء هذا اخذ كفايته من الاهتمام.. ويكفي انه الجزء الوحيد الي نزلته هالاصدارات الكثيرة..

VII مشروع لعبه متعددة الإصدارات , شيء طبيعي تتبعها اجزاء
وبالنسبه للعبه الاصليه مو ناقصها غير ميزة الـHD لعبه بمستواها تستحق HD وgameplay مطور ^_^

انا ودي اجوف كلاود بالفستان clearly

حتى انا هههههههههههه
امس كنت افكر شلون بيلبسونه فستان p:
وتيفا ومعركتها مع سكارليت , وكلاود لما ضرب
اّريس , يااااااااه اللعبه فعلاً محتاجه لـ ريميك

[NiN RevO]

^^^^
حلا ترا فيه ايقونه بالمنتدى معناها اقتباس .. -_-

[سكوال الصنديد]

شيء طبيعي أنه الكل يرغب في ريميك لهذا الجزء فقط ؟؟؟ الجزء السابع وكمان قصصه

الفرعية كثيرة كما ذكرتم ؟؟ بس يا شباب ألا ترون أن هذة المسألة طالت في كل مناسبة

نسمع كلام جديد ولا نرى أي شيء فقط وعود وكلام في كلام خصوصاً أن هذا الجزء قفز

بأرباح الشركة إلى النجوم ؟؟؟ الله يستر من الجاي ؟؟؟؟؟

[حـــلا]

اقتباس : حلا ترا فيه ايقونه بالمنتدى معناها اقتباس .. -_-

ادري , ما احب استخدمها تخلي شكل الرد مو مرتب
خلاص إذا بقتبس بحط جذي قبل الرد > اقتباس : < p:

[Drasticxx]

و اخيراً !!

من زمان كنت اريد FF7 REMAKE

كنت ابغى اشوف Cloud و Tifa و Barret بــ HD

لانهم الصراحة رووووعة

و لكن 40 سنة ؟! مستحيل

FF XIII لعبة جديدة و كل شي و شخصيات جديدة و مدينة , و كل هذا خذاله 3-4 سنوات

و لكن لـ FF VII
40 سنة ؟!

لابد من انهم يمزحون

[Arashi]

سمعتوا عن كتيّب الساوندتراك مال كرايسيس كور

اذكر ان في صفحه من صفحاته مكتوب فيه ان الفانز يطلبون ريميك للسابع
مب قادره احصل الصوره لكن ليش سكوير تسوي هالحركه؟
هل لأنها ناويه تلمح لنا ان في ريميك؟؟؟

هذا intro واحد صممه لفاينل فانتسي الريميك
تخيلوا لو حقيقه..انا انبهرت فيه @_@