السلام عليكم
وصلني خبر انكم تطبون فيني ودخلت
ههههههههههههه
مشكورين كلكم على الاحتفال بالذكرى لغيابي , مازلتوا تتكلمون عني
خفوا شوي و من الحب ماقتل
المهم
كوتش , اولا اشكركم على الكلام الجميل و الصراحه الحلوه اللي قاعد اشوفها
بس في شي غلط يا اخوان
لو اتكلم مني لي الوفره ماراح اخلص , ولكن بتكلم قدر المستطاع عشان ابرئ ذمتي امام الله و امامكم
اول شي انا اختلافي كان مع الاداره , مو عشان وسام او منصب , انا مجرد قلت اقتراحات كتبتهم في مدونه و دخلوا ناس قالوا كلامك صح و هذا المفروض يصير , لكن الاداره حذفت موضوعي و حذفت ردود الناس
انا لما قلت الكلام هذا مو عشان اشوف المنتدى real life لا
شوف الحين دق سلف وروح شوف المتواجدين الحين , تدري شلون ماراح اتعبكم انا بنسخ المتواجدين الحين عشان تشوفون اللي موجودين وانا اكتب الكلام هذا
يتواجد الآن 1340. الأعضاء 47 والزوار 1293
هذا اللي الحين موجودين
منتدى من زمان موجود اللي فيه 47 عضو , 17 واحد لون اسمه اصفر و ازرق واحمر يعني مراقبين ومشرفين والباقي 30 عضو عادي
انت تشوف ان المنتدى قديم واللي موجود الحين 47 بس و الزوار 1293 طيب ليش ماتستغل الوضع بما انك تدري كل يوم هذا العدد مايتغير
احجب الروابط والصور عشان الناس تسجل غصب وتشوف
انا لما كنت اتكلم عن الزقاره الالكترونيه ما تكلمت من فراغ
الحين دق سلف بعد و روح جوجل واكتب الزقاره الالكترونيه , راح يطلعلك كم واحد من بينهم انا
تدخل تشوفني انا اكثر واحد فصلت بالزقاره و كتبت , الباقي اما انه يعرض او يسأل عنها , انا اتبع الملك قدس سره , هذي سياسه المظلوم
واطلق على هذي السياسه "سياسه السحب"
انه يسحب للمنتدى ناس من جوجل , يعني اي شخص مهتم , طبعا انت مو مدخن مايعجبك الموضوع ولكن في من العرب الكثيرين مدخنين ويهمهم الموضوع , لما يبحث عشان يشوف الزقاره الالكترونيه , راح يشوفني تكلمت وفصلت عنها
راح يستفيد و من ثم يمكن عنده بعض التساؤلات عنها واللي انا ماذكرتها , يضطر انه يسجل و يسألني عنها , وبعدين ياخذ لفه على المنتدى ويمكن يعجبه و يقعد يصير عضو معانا
الموضوع مو موضوع زقاره اكتبها لكم , لأن انا ادري ان اكثركم غير مدخن , ولكن انا انظر للي يجون من جوجل
هذي السياسه اللي اطلق عليها الملك دام ظله سياسه "السحب المقدس"
تكلمت عن امور ثانيه يمكن ماتدرون عنها ولا تدرون اني اقصد من وراها سياسه السحب المقدس
عرفت السر الحين من المواضيع اللي يمكن ما تهمكم واللي اكتبها هني ؟
الشي الثاني , انا ماطلبت من الاداره شي صعب , قلت فعلوا الشكر للمشاركات نفس باقي الاقسام
عطوا مشرف القسم صلاحيات اكثر
ارفعوا المشرفين اللي باللون الاصفر و خلوهم باللون الازرق , ويكون اللون الاصفر للأعضاء المميزين والمراقبين السابقين
احجبوا الروابط والصور عن الزوار عشان يضطرون للتسجيل
يعني ماقلت عطوني معاش عشان اشارك ولا قلت عطوني كل شهر اوسمه و لون والامور اللي ما تقدم ولا تأخر المنتدى
لكن المشكله اني ماحصلت رد , تكلمت عبر الرسائل الخاصه ولا حصلت رد , كتبت ولا حصلت رد , كتبت مدونه ولا حصلت رد بل حصل تهديد و حذف مشاركه
يعني شنو تبوني اسوي عشان يردون علي ويقولولي طلبك راح ننظر فيه او مرفوض , لو يقولون مرفوض ويبدون الاسباب يمكن يقنعوني واعرف انهم معذورين ولكن لا صوت ولا صوره
انا قلت جهد الناس يروح عالفاضي , انت تكتب موضوع تشوف الزوار 10 الاف شخص , الردود 2 تقول واللي شكروك 1
انت تقول ليش اكتب بعد
قلتلكم ان من الترفيهي صوتك يوصل اما تحت الترفيهي كأنك قاعد في جليب
الاداره تقول اذا تبي تغير اسمك لازم مشاركاتك 500
وكلكم تذكرون دارك ايرور لما كان يبي يغير اسمه , كان عاشق الملك او شي جذي , قالوله لازم 500 مشاركه , واضطر الاخ الفاضل انه يشاركنا بالقسم عشان يزيد عدد مشاركاته
اخذوا هذي
بنت فاضله اسمها ليال المرح , عدد مشاركاتها 150 , من رواد الترفيهي , غيرت اسمها بعدد مشاركات 150 بس
ليش ؟
لأنها بالترفيهي و بنت
^^^
راح تحذف الجمله هذي اعتقد
-
عشان جذي اغلب المشرفين هني من الجنس الناعم , والمشرفين الرجال مالهم حس , كل في فلك يسبحون
مو عيب او غلط لما اكتب حقائق عن المنتدى , اذا تزعلكم هالحقائق لا تسوونها , او سووها بس تكون عندكم القوه و تتحملون نقد الاعضاء عليكم
انا حبيت اغير من الوضع المزري هذا , لكن بعد محاولات متكرره كلها بائت بالفشل قلت انسحب
ما طلبت من احد يعتزل معاي و جيرمي قالها و شاركت مخصوص عشان اقوله يرجع
رحت منتدى ثاني حصلت فيه الشباب مثل وورشيف اللي ماعرفته الى الان و لوعه الفرقا و جيرمي و ريستو شامان و كراي ومادري اذا في بعد بس ما اكتشفتهم و رحت عندهم لأن منتداهم ما يقدمون البنت على الرجل , ولا في احد احسن من احد
ولكن ماادري ليش ماوصلتني رساله بالبريد عشان افعل عضويتي هناك , الظاهر مايبون كويتي كافي واحد
انا ما قلت لأحد يطلع معاي لكن اذا تبي الصج والحاصل , ان القسم توفى بعد ماطلعت , واللي تشوفه ترى مجامله لك لا اكثر , لأنك انسان محترم و خوش رجال ومايبون يخسرونك , ولو تشارك في المنتدى اللي هم فيه الحين راح تشوف هالقسم يموت مره وحده
انا كل مره اكتب واقول نفس الكلام و اقولكم الاسباب و انتوا مادري ليش مو راضيين تفهموني
الموضوع يخص المنتدى , مو يخصني , انا مابي شي من المنتدى , شفت ان المنتدى كل يوم ينزل الى ان صار عدد المتواجدين من الاعضاء تقريبا بين ال3 الى ال50 قلت لازم تتغير السياسه
فعلا لو تدخل الصبح او الفجر تشوف 3 موجودين بس
قلت منو تكلم يامندوب الملك , نكلم المراقب , اتضح ان المراقب مابيده شي قال روح للي اسمه احمر , رحنا للي اسمه احمر قال مابيدي شي روح للعنابي , رحنا للعنابي قال مابيدي شي
منو اللي بيده الموضوع اجل ؟
ضاعت السالفه الحين , ماتدري منو اللي بيده الموضوع
ماكو الا دارك تب , و دراك تب عاد مايعطي وجه , ان كلمته قال هذا اكيد مصلحجي يبي رقابه او وسام او شي , هذا اذا شبك عاد
بس لابد فيه ناس تحته عندهم صلاحيه , منو هالناس ماتدري , كل عضو يصير عنابي يقدم استقاله من ثاني يوم , ليش ؟ يمكن عشان يشوف او تأتيه تعليمات ان يكون تابع للأوامر , مايقدر يسوي شي
عشان جذي يستقيلون ويفضلون الاسم الذهبي على العنابي
كل شي جايز طالما الاداره تتبع سياسه التطنيش فالتكهنات وارده
عموما انا قلت اللي في بالي , اذا نسيت شي ماقلته , ولو ان عندي كلام كثير , بس ادري ان كلامي ضايع بالطوشه
عموما نلتقى بعد اسبوع ونشوف شنو الجديد
يوشي , انا ادري ان الباب يوسع جمل لكن انا اسعى والباقي على الاداره , انا قلت و ابديت رأيي بالوضع , ان صار كان بها وان رفضوا ماراح اخسر شي
دام ان التسجيل بالمنتديات مجاني و حصلت منتدى فيه كل الشباب اللي هني و ماعندهم تفرقه بين الجنسين ليش اقعد في منتدى كل ادارته مايقدرون يكتبون , او انهم يطنشون ولا يردون
انا مااعنيك بالكلام , انت مجرد مراقب على قسم
يعني كلامي هذا والمشاركات السابقه ترى ما اعنيك فيها لا من قريب او بعيد