تعلم بالتفصيل عن لعبةSimCity4(Rush Hour)i-الشرح الكامل!!

[PC-PS2]

الاخ ...mazoran
اسف مانتبهت على ردك ... بالنسبة لمشكلتك انشاء الله عن قريب اضيف شيء مفيد ومهم بخصوص هالنقطة
وحل مشكلتك السريع بيكون بحل مشكلة الضرائب عندك !! حاول توازن بين الضرائب قد ماتقدر بنفس الطريقة المختصرة اللي ذكرتها في مشاركة رقم 17 .. راجعها .

وبكرة انشاء الله بتلقى كم كبير من الملاحظات المهمة والحساسة جدا جدا في اللعبة وخاصة اللي ناوي يتعمق فيها !!

[محمد النعمي]

ان شاء الله نتعمق باللعبة ونعرف كل شيء فيها

وبمساعدتك ...

[PC-PS2]

يتبع...الملاحظات

معلومات بسيطة مساعدة لعملية موازنة الضرائب....

حاول توزن بين الضرائب في كل مرة ... شف لوحة الضرائب العامة شريحة رقم 8 ايقونة رقم 14 او ادخل على الخاصة (بأن تضغط على نفس الايقونة وتظهر لك التفاصيل الخاصة بالضرائب)، وعدل في الضرائب حسب الحالة !!
ولا تنسى توفر تراخيص سكانية واراضي للاسكان لانه ممكن يوصل عدد السكان الى حد معين ومايكون فيه سكن وانت تعبان وموفر كل الخدمات ومع ذلك ماتلقى لتعديل الضرائب فايدة .. القصد اذا كانت الضرائب متوازنة والخدمات متوفرة بتلقى السكان بيزيدون في مدينتك بشكل كبير وبسرعة .. بس من المهم جدا متابعة توفر الخدمات وحل المشاكل ... واسهل حل متابعة المشرفين وحل المشاكل اللي يشوفونها او من خلال لوحة الاخبار !!

=========================

المهمات

في هذا الإصدار (rush hour) ميزة مهمة وجديدة وممتعة جدا جدا وهي (المهمات)!!
خطوات عمل المهمة وضحتها لكم بالصور وبشكل مبسط انشاءالله ...
اولا//

في هالصورة يقدر تلاحظ انه بامكانك أداء مهمات كثيرة تخدمك في اللعب وفي توفير خدمات جديدة ماكانت ممكنة مثل الجامعات اذا كانت المهمة عن الصحة او التعليم .... ومثلا تنفتح لك خاصية بناء مبنى الشرطة الضخم واللي عن طريقه تقدر تستخدم الهليوكوبتر ... او توفر ميزة مطار الدفاع المدني .. الخ!! وهكذا حسب نوع المهمة !! فكرة ممتازة

ثانيا//
مثال لأحدى المهام....

هذي احدى المهمات .. وهي خاصة بالصحة... والمميزات اللي بالمقابل راح تكون موجودة في اسفل الرسالة (مثلا هنا راح يحصل عمدة المدينة اذا نفذ هالمهمة على 80 درجة اضافية الى نشاطة) وبالتالي تزيد محبة الناس له وهذا له اثار ايجابية كثيرة في اللعب !!
والمهمة كانت نقل مريضة اسمها (جيني) علشان عملية نقل او زراعة عضو او شيء من هالكلام .. ولك مدة معينة تنقل فيها المريضة من بيتها الى المستشفى !! مهب خويانا يموت الواحد وهو بجنب المستشفى !!!(والله قوية ) وهذولا يطيرون طيارات مهب يحركون سيارات بس علشان سلامة المريض ... وحنا الشكوى لله !!! :vereymad:

ثالثا//
بعد اداء المهمة ...

في هالصورة شكر وتقدير لعملك كمسعف في المستشفى من المريضة وعائلتها على سرعة الاستجابة وتذكر فيه المشرفة حالة المريضة ووضعها الصحي حاليا بعد العلاج!!
بينما عندنا لو لقيت رجال مخلص يكرفونه زيادة ولا يلاقي يمكن حتى كلمة شكر ... والموظفين الفالتين تلقاهم ماخذين راحتهم ويستلمون نفس الراتب !!! والنظرية هنا تقول (دام هالرجال امين ومخلص بعمله ماني لاقي مثله ينجز اعمال مهمة مو مثل الموظفين السيئين!! ، علشان كذا يحملونه فوق طاقته ولايكرمونة ولا يزيدون راتبة ) هالكلام مو من راسي ... والله كله موجود ببلدنا وللأسف (لاحياة لمن تنادي)!!

[PC-PS2]

يتبع ... الملاحظات

بيانات وملاحظات وصور متنوعة توضح وضع المدينة اللي انشأتها بشكل سريع!!

لاتيأس من الخسارة وحتى لو كانت لفترة طويلة !! لانك قاعد تأسس نظام متكامل يحتاج الى عمليات توازن كثيرة ومتعددة ومتشابكة!!
علشان كذا لو مرت فترة طويلة وانت مانجحت في حل مشكلة الخسارة لا تيأس !! لكن تابع عملك واهم شيء تكون الخطوات اللي تنفذها جيدة وصحيحة .

في هالصورة اول ايام قدرت فيها اوصل الى التوازن وبعدها الى الطفرة وزيادة دخل المدينة والتحول من الخسارة الى الربح ! والمهم هنا ان الواحد يصبر علشان يوصل الى هالمرحلة لان عملية الموازنة من اصعب مافي اللعبة وخاصة من الناحية الاقتصادية !!
وفي النص تشوفون معدل الضرائب كان مناسب جدا ومرتفع في الاسكان والزراعة .
وللأسف ماسجلت التاريخ لكن مرت سنين كثيرة حتى وصلت الى هالمرحلة .... وطبعا حطوا اللعبة على الخيار السهل اذا بديتوا انشاء المدينة لانه بيكون عندكم رصيد عالي يمكنك من الاستمرار باللعبة ، ولو ان المتعة تكون اكبر اذا بديت المدينة بالخيار الصعب او المتوسط واللي تكون فيه السيولة قليلة عكس السهل .. وفي ذيك الحالة راح تحتاج الى قروض علشان تقوم المدينة بس ما انصح في هالخطوة الا بعد ماتتعلمون تماما كيف تتحكمون في المدينة بشكل جيد !!

========================


في هالصورة بيانات دقيقة عن الضرائب وكان مستواها جيد ومتناسب نوعا ما !!

========================


في هالصورة لازم تتعلم استغلال البيانات في اختيار الخدمات والمشاريع ... مثلا هنا من بيانات عمر السكان لقيت ان الشباب يمثلون النسبة الكبيرة والساحقة علشان كذا دورت على المشاريع والخدمات اللي تهتم بهالفئة !!
مثل الملاعب الرياضية او اماكن الترفية والرياضة !! :icon6:

========================

معلومة مهمة تخص عملية التشجير (وهي عملية مهمة جدا للتخلص من التلوث )!!

في هالصورة مهم انك تلاحظ عملية التشجير كم تاخذ وقت علشان توصل الاشجار الى عمر كبير ويزيد الغطاء النباتي وبالتالي يخف التلوث !! (واقعية احبها في اللعبة)!!
علشان كذا لابد انك تواكب عملية التشجير مع انشاء المصانع والمنشأت اللي تسبب لك التلوث وهذا يعطي فرصة اكبر لزيادة عدد السكان اللي يقل تواجدهم كل ماكان التلوث كبير !! (سلملي على الواقعية)!!
مو عندنا بالرياض حاطين مصنع الاسمنت بوسط الاحياء وطز بصحة الناس !!! (شكلي ببات في ابو زعبل الليلة)!!
ههههه

[PC-PS2]

اضافة الشخصيات الى المدينة ... ومعلومات اخرى!!

يمكنك اضافة الشخصيات (الشريحة رقم 5 ايقونة رقم 11)...وبتطلع لك رسالة مثل ماهو موضح بالصورة يمكنك من خلالها تعديل الاسم وبيانات ثانية .
الاسم اللي اخترته كان لواحد من الشباب الحلوين من شلة دورية يوم الخميس الخاصة بالـ(net work) وخصمي اللدود في لعبة (جينرالز زيرو اور) ... مدمن بعيد عنكم لهاللعبة ...
المهم اسمه ياسر!! سميت الشخصية بأسمه علشان نخليه حقل تجارب في موضوعنا هذا هههههه (لو يدري عني صفقني)!!
المهم ... هذي الصورة توضح اكثر طريقة اضافة الشخصيات واشكالهم بعد

اولا//

في هالصورة بيانات كاملة عن اضافة الشخصية الى المدينة علشان تعطيك انطباعت ومميزات اضافية في اللعبة !!
وودي تلاحظ ظاهرة صحيةصارت بعد تحسن دخل المدينة وتوازن الضرائب وهي (تكون المجمعات السكانية)... وشف الفرق ؟
لانها اول كانت على شكل بيوت متجانبة(توسع عمراني افقي)وهذا ماينفع اذا كان عدد السكان كبير ... المهم هالظاهرة جيدة اذا زاد السكان لانها بتنظم الاسكان وتوفر عليكم توزيع الخدمات (مثل مشكلة الرياض الحين قاعد يتوسع ولا ندري متى بيوقف ولا وين يوصل؟؟ ولا ندري بعد متى يسمحون بالتوسع العمراني العمودي(المجمعات السكنية كمثال)وهذا يحل مشاكل كثيرة !!؟؟
خلونا على الاقل نسوي هالحلول في لعبة نفضفض اللي بداخلنا ومنها نستانس ولعله بيوم يحلون المشاكل الكثير اللي تراكمت !! :vereymad: :shock22:

ثانيا//

اذا اخترت الشخصية وسميتها مثلا تقدر تنقلها المكان اللي تبي .. وبتلاحظ ان المناطق تختلف من ناحية التعليم والصحة والرواتب ... رسمة الدولار تعطيك انطباع عن مستوى الدخل (ضعيف-متوسط-كبير) وكبير هذي مثل الحيتان (الراجحي وطقته عندنا) ماشاءالله تبارك الله ...تلقاهم يجلدون دفاتر عيالهم بأمهات خمسمية !! ههههههههه
المهم بعد ماتختارمكان اقامة الشخصية وانا افضل انك تختار المكان او المنطقة اللي يكون فيها التعليم منخفض والصحة ضعيفة والرواتب قليلة علشان تقدر تاخذ تفاصيل دقيقة وتعالج المشاكل !! (معلومة دقيقة ومهمة)!!
وعلى يسار الصورة تلاحظون ايقونتين الاولى علشان تقدر تاخذ بيانات عن الشخصية والثانية تحتها اذا تبغى تكون انت الشخصية هذي وتقود أي نوع موجود من المواصلات اللي متوفرة مثل الهليوكوبتر او الطائرة الخاصة بالدفاع المدني اذا طبعا قدرت توصل الى هالمرحلة ... وبعد تقدر تقود طائرات حربية مثل التورنيدو اذا ماخانتني الذاكرة بعد ماتبني المنشأة العسكرية !! (صراحة وناسة التورنيدو)!! خذها وتخيل نفسك في العراق وتقصف الامريكان !! رهييييييب !!هههههه

ثالثا//

1-من هنا تقدرون تعرفون تفكير (ياسر )في هاللحظة !!
بتلاحظون تصرفات وكلام طبيعي واحيانا من كثر ماهو واقعي تحس انك منت في لعبة
المهم ، اعتبر هالايقونة مهمة جدا لانها بتعطيك انطباعات كثيرة عن حياته في هالمنطقة (سكنته في حي مثل منفوحة عندنا) ههههاااااي خله يذوق مر الحياه هناك
من الاشياء اللي بتلاحظ ياسر يفكر فيها... احتياجاته والامور السلبية في منطقته وبعد الاشياء اللي يشوفها ايجابية في منطقته وهكذا ... وصفقوني اذا بحل مشاكله الا بخليه يخيس في( منفوحة pc )واخلي سيارات الصرف الصحي تمر جنب بيته دايم هههههههه (مادامني العمدة حق المدينة اسوي اللي ابي (ديموقراطية !! )
طبعا انت راح تستفيد كثير من هالمعلومات (مثلا تشتكي الشخصية من زحمة الطريق او من السرقات في منطقته !!) في هالحالة مهمتك تكون توفير الخدمة اللازمة حسب الحاجة .
2-الملف الخاص ببيانات الشخصية المختارة ، وهنا بتحصل بيانات كثيرة يمكن يعتقد البعض انها غير مهمة بدرجة كبيرة ... وانا اشوف العكس ، كمثال(ممكن من خلال البيانات الخاصة اتعرف على معلومات احتاجها لاقامة المشاريع او تحسين الخدمات)!! ومن المعلومات اللي تظهر لك مثلا ...(الاسم والعمر والجنس ومكان الاقامة بالظبط (اسم المبنى او الموقع)!! وبعد مكان العمل ونوعه وتقدر من خلال هالايقونة تغير عمله او مكان اقامته اذا تبي تعرف مشاكل مناطق ثانية او حتى اذا تبي تعرف انواع المشاكل اللي تلاقيها الشخصية في عملها !!(مثلا ازدحام الطريق اثناء الذهاب للعمل، او انخفاض الرواتب او حتى البطالة اذا مالقى عمل )!! ههههه حقيقة تفاصيل دقيقة في هاللعبة تخلي الواحد يتعجب ويضحك في نفس الوقت :shock22:
3-الايقونة رقم 3 تخص المواصلات اللي تستخدمها الشخصية ، ومن خلال هالايقونة تقدر تغير نوع المواصلات اللي يستخدمها (ياسر) !!
تقدر تخليه مثلا يستخدم السيكل ولا الدباب بدل السيارة لووووووول .... اما يركب سيكل !! ههههااااي كني متخيلة بسيكل وهو ماسكن طريق الملك فهد مع صبح الله وهو رايح للدوام ورافعن ثوبه وسيقانه طالعة للهوا مع ذا البرد !! هههههه
ولا ... يسوق هالسيكل بالرياض عند هالشباب (المطفوقين) العاقل فيهم يمشي 140 في خط خدمة !! وخاصة اللي معهم سيارات (الكامري) !!! ولا لا؟! :icon6:
اسف ياشباب على خروج النص !!

[PC-PS2]

يتبع ... الملاحظات

تلوث المياه الجوفية...

في هالصورة نشوف مشكلة كبيرة وهي التلوث..
والتلوث مثل تلوث الهواء وهذا شرحناه في المشاركة رقم (18) ، ومشكلة التلوث الاشعاعي وهذا مابعد وصلت له لانه يكون غالبا في المدن المتطورة كثير او في حالة المدن اللي اقتصادها تعبان واحتاج العمدة فيها الى الدخل وسمح للشركات اللي تستخدم المواد المشعة في عملها (وهذا موضوع ثاني بنتكلم فيه اذا جت فرصة ) والتلوث الاخير هو تلوث المياه وهذا مثالنا هنا...
والحل لهذا النوع من التلوث يكون في عدة امور:
1-تقليل عدد المزارع لانها هي اكبر مسبب لتلوث المياة .. او المصانع او مولدات الطاقة اللي تعتمد على الفحم .
2-انشاء محطات لمعالجة المياه من التلوث وهذي الايقونة موجودة .

اظن بالجزء اللي مضى الان تقدرون تبدأون اي مدينة كبداية ... وانشاء الله استمر في طرح المزيد من المشاكل والملاحظات

بس الله يعين اذا بدت الدراسة ... وأي سؤال انا حاضر بس ياليت قبل نهاية هالاسبوع (ما أضمن نفسي ارد اذا بدت الدراسة ) ويهمني كثير يزيد عدد اللاعبين في هاللعبة !!

[Night Road]

الله يعطيك الف عافية على التكلمة والشرح الحلو .,.

بس والله قعدتبها انا اليوم ، توني جاي من برا وشريت شريط سيم ، بس للأسف يوم شغلته طلع انه رش اور هو اكسبنشن يعني اضافة ، يعني لازم الجزء الي قبله يكون عندي علشان يتنزل ذا الجزء >,< .,.

والله نفس الهجولة تهجولتها مع شريطين ووار كرافت وو جينيرالز ، انه لازم الجزء الي قبل يكون عندي .,.

الله يهديك بس لو كان وضحت انه ذا اضافة ولا زم الجزء الي قبله (والله كان وفرت مشوااااااااااااااااااار) .,.

الله يعين بكرة بعد اروح اشري الشريط >,< .,.





.,.

[PC-PS2]

لو كان وضحت انه ذا اضافة ولا زم الجزء الي قبله (والله كان وفرت مشوااااااااااااااااااار) .,.

الله يعين بكرة بعد اروح اشري الشريط >,< .,.

.,.

... لو دققت في إسم اللعبة تمام كان لاحظت
>>>>تعلم بالتفصيل عن لعبةSimCity4(Rush Hour)i-الشرح الكامل!!

وانا بعد المفروض اني موضح اكثر .. لاني اصلا مستهدف المبتدئين !! بس يالله نعوضها في لعبة ثانية (RollerCoaster Tycoon® 3) ولا (Zoo Tycoon 2) انشاءالله ... لاني احب العاب التصميم اللي من هالنوع !! وانشاءالله تجي فرصة اتكلم عنها شوي.

وبالنسبه للمشوار اللي كرفته !! لاتشيل هم >>>> البنزين على المشرفين والمنتدى !!!! (هم اللي سمحوا لي احط الموضوع !! (خيانة)..

سلام.

[Night Road]

هههههههههههههههه ، يارجال مشي حالك حالك يمشي .,.

بس وش اللعبتين الي تتكلم عليهم ؟ ، زو تايكون قد سمعت عنها .,.

ياليت لو في العاب روعة مثل سيم ستي تعطيني اسمائها (تكون في نفس الروعة مو اي كلام) علشان اشتريهم مع سيم سيتي .,.

انا ان شاء الله الحين طالع ، بس ابي اعرف وش اشري يعني انا عندي سيم ستي يعني اخذ الي قبله وش يكون 4 او 3 ؟؟ ، علشان لا انخم ويعطيني جزء غير .,.





.,.

[Night Road]

شريت اللعبة ، بس والله خشيت جو مع Rome Total War لعبة خطيرة (مو قد كذه بس خطيرة ) ، تقريبا توني مخلص وتوه انفتح لي خيار السيف (من الساعة 10 وانا العب ) ومنكوب ابي اخزن مو قادر ، لاكن الحمد لله التعب ماراح على الفاضي .,.

الحين والله طافي بنام ، لاكن بكره ان شا ءا الله اول مااصحى راح انزل اللعبة والعبها (طبعا ماقصرت راح اطبق من شرحك ) .,.





.,.

[محمد النعمي]

أشكر على العمل الرائع وبدأت أعرف في الضرائب وغيرها :icon6:

بس ( تراخيص سكانية ) ايش تقصد بها لاني اضيف اراضي وبس ما اعرف شيء اسمه تراخيص سكانية ؟؟؟

وشكرا مره ثانية

[PC-PS2]

هلا اخوي محمد... خبر جيد

بالنسبة لقصدي بالـ(التراخيص السكانية) هو نفسه إضافة الاراضي الخاصة بالإسكان (اللون اخضر)، وسميتها بتراخيص الاسكان بإجتهاد مني ... وكنت اقصد فيه نفس العملية اللي تقوم فيها البلديات او غيرها في اصدار تراخيص الاراضي او المحلات او ...الخ!! علشان تنمح مواطن او جهة معينة حق التملك او الايجار لعقار معين او أرض .

ودورك هنا في هاللعبه ... تقدر تتخيله بأنك عبارة عن سلطة او مجموعة من دوائر حكومية متعددة ولها نشاطات مختلفة للقيام بأمور المدينة من احتياجات مختلفة.

اتمنى اني وصّلت المعلومة بشكل جيد ...

[Night Road]

السلام عليكم .,.

كيفك ياغالي ، المهم انا اليوم لعبت اللعبة وبديت افهم شوي من شرحك ، بس المشكلة انك شارح الاشياء ، بس منت شارح كيف نبدأ ! .,.

المهم انا سويت البيوت مثلك ، وتحتها مديت المواصير حق الموية ، بعدين بنيت المصنع (ثاني واحد) ، بعيد شوي مثل ماقلت ، بعدين بنيت المرواح حق الكهربة ، والاعمدة الي اثنين مع بعض او ثلاث (صار في كهربة) ، المهم بعدين بنيت في كل قطعة (مسوي 4 مثلك) محل اطفاء ، و شرطة و مدرسة ومستوصف ، طبعا بنيت على حسب المسافة الي مغطيها الي ابنيه (يوم تبني يطلع لك دائرة تعني المكان الذي يغطيه مثلا مركز الشرطة او غيره .,.
اعتقد اني ماشي تمام ؟؟ ، المهم شوي الا جالي ذا حق الفلوس ، ويقولي انه الصرف اكثر من الدخل ، وقالي لازم تعدل ، عدلت في كم شي ، وقل المصروف ، بس شوي الا جالي حق الشرطة ويقولي انه واحد من الشباب طلع من الشرطة لانه مافي فلوس وانه مايلومه (زي الي يقول جيب فلوس ولا حتى انا بطلع ) ، المهم زودت الفلوس حق الشرطة ، شوي الا الاطفاء نفس الشي ، المهم اخذت قرض ، بس رجعت الديون علي (طفشت وقفلت الجيم ) قلت خلني اسألك كيف العب ، وتفهمني علشان العب تمام .,.

بس في الصور الي حاطها فوق ، شايف المدينة فل ماشاء الله ، المباني حق المدينة كيف ابنيها ؟؟؟ ، تكفى اشرح لي اول ماابدا وش اسوي ، ووش ابني ، لاتقولي شوف الشرح ، لانه مافهمت تمام (الشرح مفيد جدا بس للي فاهم كيف يلعب وعنده مشكلة) موب مثلي مبتدأ .,.
ويعطيك العافية .,.





.,.

[محمد النعمي]

أخي SniperZ

كل المشاكل الي قلتها موجودة في الشرح !!!!! بس ممكن انت تقرأ فقط ما تركز

المهم مشكلتك معى الفلوس (الميزانية)
اول ما تبدأ خفض الظرائب (وين احصل الظرائب؟؟؟)
الجواب : هنا شوف الصورة - قائمة الظرائب -


أول ما بتبدأ مدينة جديدة بتصير عنك الظرائب كلها 90% لذلك خفظة إلى 50 % أو 70% براحتك

وبعدين سوى الاراضي وسوى لهم حدائق ومدارس وشرطة ودفاع مدني ومستوصفات حتى تشوف الاشرطة الي تحت امتلئت شوي والمباني ظهرت والسكان إزدادو.... علي شوي من الضرائب!!!

------------
مشكلتك معى الدفاع المدني والشرطة والمدارس والمستوصفات

الحل : مثلا انت وضعت مبنى المدرسة روح لعلامة الاستفهام تجدها في القائمة بالاسفل فوق التاريخ , بعدما تأخذها روح لمبنى المدرسة واضغط عليه راح يعطيك قائمة لمعلومات عن المبنى -شوف الصورة-



رقم 10 هو المطلوب (حيث هنا تجد شريطين)
الشريط الاول : لمساحة المبنى
الشريط الثاني : مدى وصول الحافلات المدرسية(حيث انه إذا بنيت مدرسة أو اي مبنى بتطلع لك دائرة تعني المكان الذي يغطيه المبنى) وانت فاهم هذا الشيء

الشريط الأول : وهذا للتعديل بالمساحة
في الصورة الرقم 5 (عدد الطلاب) والرقم 6 (مساحة المبنى) والرقم 7 (عدد المدرسين)

المهم شوف مساحة المبنى مثلا 500 وشوف عدد الطلاب والمدرسين مثلا مجموعهم 100
في هذه الحالة روح نقص من الشريط الاول شوي وشوف المساحة بتتغير (انت كسبان انك نقصت من المصروف)

بس لا تنسى بمرور الوقت وزيادة المباني بيزيد عدد الطلاب لذلك تفقد المدرسة في حين لاخر

الشريط الثاتي : وهذا للتعديل بمدى وصول الحافلات المدرسية

هذه بشرحها لك وأرجوا انك تفهمها !!
انت فهمت المدى وهو الدائرة , اذا كانت الدائرة تغطي اماكن السكان وهناك اماكن فاضيه ,هذه الاماكن الفاضية الدائرة تغطيها لذلك المصروف حقى الحافلات زائد بسب هذا
روح نقص من الشريط الثاني حتى تشوف ان الدائرة تغطي على السكن فقط ...

وهذا ايضا يطبق على مباني الشرطة والمستشفيات والدفاع المدني وغيرها !!!

اما سؤالك عن مباني المدينة ؟؟؟

فهذه انك اذا تبي تضع اراضي بيعطيك خيار (مباني صغيرة او متوسطة أو كبيرة)
الصغيرة : ضعها اول مابتبدأ
المتوسطة : إذا طلب منك مساعدك بالاسفل المزيد من المباني
الكبيرة : عند التطور (ناطحات سحاب)

يعني بدايتك بقرية ثم بلدة ثم مدينة (ولا تنسى انها بتجيك منازل صغيره وبعدين بتتطور)
مثل يعني وضعت اراضي للمباني الكبيرة , هي اول ما بتنبني بتجيك صغيره وبعد فترة ببتطور لمتوسطة وبعد فترة لكبيرة وبعد فترة لناطحات سحاب وهكذا

وشكرا

ارجوا اني فهمتك

[PC-PS2]

ههههههه ماشاء الله تبارك الله ... والله استانست من اخوي محمد (لقيت واحد يساعدني في الردود !!

يعطيك العافية .. وماتقصر

==================

اخوي SniperZ...

الحقيقة كنت مجهز لك رد احاول فيه مساعدتك ... لكن سبقني محمد ... على العموم بضيف ردي برضه يمكن يفيد

الرد اللي كنت مجهزه .....

هههههه ... تذكرني بأول ايام لعبت فيها هاللعبة !!

وكانت حالتي اسوأ من كذا :vereymad: !!

اخوي SniperZ ... تأمد من شيء واحد تماما .... يقول المثل ((كل دقة بتعليمة))!!

كل غلطة تغلطها تأكد انك استفدت معلومة جديدة حتى لو ماحسيت بهالشيء!! وبالنسبة لكلامك ... مو ممكن الا اذا كان عرض فيديو ومباشر !!

انا اقولكم هاللعبة مو اي واحد يلعبها .. وكل الناس عارفه هالشيء !! لاسباب عديدة مافي مجال لحصرها !!!
التعقيد اللي فيها هو اللي عاجبني !! وكل ما كنت احل مشكلة معقدة فيها يزيد حماسي اكثر ... علشان كذا اذا انت من اللي بيستسلمون بدري ... ما اظنك بتكون من الناس اللي بيتقنوها مستقبلا !! كلامي يمكن يقهرك ... لكن هذا الواقع .

===========

محاولة بسيطة لحل مشكلتك...
اقتراحي لك وباختصار شديد ... ابدأ عملك بأشياء اساسية في المدينة :
1- الطرق (وحاول ترسم في مخيلتك شكل المدينة كيف راح يكون ؟)
2-الماء والكهرباء والخدمات التابعة لها من تمديد وخلافه (ابدأ بداية بسيطة وحاول تبني منشأت توفر لك الخدمة وبأقل التكاليف ... مثلا الكهرباء في البداية تغنيك عن بناء المنشأت الكبيرة او مصانع توليد الطاقة ... ابداها باعتمادك على تحويل الطاقة الحركية الى كهربائية عن طريق المراوح العملاقة اللي تعمل .. والمياه ابداها بالخزانات !! ومشكلتك الكبيرة انا متأكد منها تقريبا وهي عدم اعتمادك على ايقونه مهمة جدا جدا جدا وانت اهملتها وهي الايقونة الخاصة باعطائك تفاصيل عن اي منشاة تستخدمها واذا تبي تعرفها اكثر شوف الشريحة رقم 17 ايقونة رقم 1 )
شف بتغلط كثير لكن بتتعلم اكثر انشاءالله .... اذا بنيت مثلا مصنع طاقة كبير وانت في البداية راجع بيانات هالمصنع او المولد حق الطاقة عن طريق مؤشر المعلومات اللي قلت لك ... بتلاقي فيه طاقة كبيرة مرررة مهدرة والمشرف اكيد بيكون بلغك بهالشيء ومولد الطاقة له عمر زمني !! يعني بعد 100 سنه مثلا بتلقاه ينتج لك طاقة اقل وبسعر اعلى نظرا لتكاليف الصيانة وعمر المبنى الخ ... وهنا تكون خسارتك كبيرة اولا بتكلفة بناء المولد وثانيا لان تكاليف الصيانة اعلى منها في المراوح العملاقة مثلا على ان الطاقة اللي تحتاجها ممكن تتحصل عليها من الاثنين !! (راجع شريحة رقم 17 بكاملها ) بستفيد كثير !!
اتمنى اكون وصلت شيء مفيد في هالمعلومة بالذات .
3- تمهيد التقسيم للمدينة من تراخيص الاسكان والتجارة والصناعة ... وتوفير الاراضي (تخيل برضه شكل المدينة اللي تبي ترسمه براسك وبعدها وزع الاراضي زي ماتبي ... لكن مهم جدا توفر عدد كبير من التراخيص السكانية .. اوكي).
4- الخدمات المختلفة (تشجير ، مرمى النفايات، ربط مدينتك بالمدن المجاورة (وبالنسبة لربط المدينة بالمدن المجاورة لابد انه تكون في نفس المنطقة فيه مدن غير اللي انت بانيها .. مثلا شوف الشريحة رقم 1 ايقونة رقم 6 .. هذي هي المدينة اللي بتبدأ تبني فيها ... ومافيه مدن حولك الا في الشمال .. بس ... علشان كذا اربط مدينتك من جهة الشمال (ضروري) لانك اذا احتجت الى بناء مولد طاقة بيصير عندك طاقة زايدة وبدل ما تخفض نشاط هالمولد وتخفف المصاريف ممكن تخلي عمله زي ماهو وتستفيد منه بدل الخسارة من انتهاء عمرة وانت ما استخدمته )!! .. الخ))

بعد هالخطوات المختصرة بشدّه !! اساس اللعبة وهو عملية الموازنة في كل شيء واصلا ماراح تقدر توصل لهالمرحلة الا اذا اخطيت كثير وتعلمت كصير وبنيت مدن كثير وقفلت معك اكثر بعد .

فيه امور اهملتها وهي مهمة لكن مافيه مجال اذكرها الان .!!! مثل الاستفادة من مشاريع الشركات ...(شركات المواد الكيميائية او طلب جهة معينة ببناء مصانع او منشأت لها علاقة بالاشعاعات ّ!! وهذي فيها دخل رهيب ... لكن المشكلة انها غير مرغوبة من الناس والمشرفين لانها مشاريع مضره بالابيئة والصحة .. مؤقتا الى ان ابين هالكلام بشكل كبر انشاءالله ... اسمح لهالشركات بمزاولة عملهم وطنش المشرفين والناس وخلك (دكتاتوري) واهم شيء كرسيّك وفلوسك وطز بالشعب هههههه!! وبيكون لك مصدر دخل شهري كبير ... وبعد فيه اساليب الجمارك في الطرق وهذي بعد مصدر دخل رهيب جدا ممكن تستغله نناقشة في وقت ثاني انشاءالله .

راجع اي معلومة تبيها من الشرح واذا مافهمت او ماوجدت حل لمشكلتك حاول تتعمق في حل مشكلتك بنفسك مع المعلومات اللي في الشرح بتطلع بحل انشاء الله

اتمنى اني افدك بهالشيء في الرد !!