نسيت اقولكم ترى في مسابقه اجمل بروفايل مو شرط شنو البروفايل المهم ان في مسابقه لأجمل بروفايل يعجب لجنه التحكيم
شاركوا فيها يمكن تحصلون شي
انا عرفت اني انسان شرير متى ؟
لما نزلوا مسابقه اجمل بروفايل خاص بالانمي , تصدقون محد شارك لأن مو هوايته او من المعجبين بالانمي , انا لما شفت جذي قلت هذا 100% فرصه لي اني اشارك واكسب ال10 جوائز ومحد يشاركني فيهم
لكن قبل ان يقفل الموضوع و يتكنسل بساعات فكرت فيها وقلت معقوله كل الناس مافيهم شرير ؟ معقوله كل الاعضاء طيبين و اذا شي مو من اهتمامهم مايشاركون فيه ؟
انا لو يحطون مسابقه مكياج اشارك فيها , لا و ادش بقوه بعد و اجيش الجيوش عشان افوز وبالنهايه ما اجيب الا صوتي
بس قلت فشله اشارك بروحي , الناس راح يقولون ولد بطنها انت منافق , عمرنا ماشفناك بالانمي ولا شفناك حاط صوره بالتوقيع او الرمزيه او الملف الشخصي صوره تتعلق بالانمي
انا بصراحه ايدي تحكني , ودي اشارك بس متردد , مو حلوه بروحي اللي مشارك وانا نصاب والكل يدري اني نصاب
احرجوني الشرفاء اللي مايشاركون الا باللي يهتمون فيه , اما الاشرار واعتقد اني الوحيد الشرير بالمنتدى واللي يشاركون بكل شي يعني من اهتمامهم و هم نصابين ماشفت احد مشارك
بالحاله هذي ترددت وقلت اشارك او لأ
ولما بالنهايه شهواتي الشريره غلبت الطيب فيني و قررت اشارك تم قفل الموضوع و الغاء المسابقه
قلت اشوه ما شاركت جان فضيحتي صارت بجلاجل ويمكن يكتبون تحت اسمي بدل عضو متواصل الابداع يكتبون النصاب
لكن الحين المسابقه لكل شي , المهم الملف يكون جميل و مرتب و الكتابه واضحه فيه , انا ملفي وردي و الكتابه واضحه فيه يعني راح اخذ نقاط على وضوح الوان الكتابه و الخيارات الموجوده و اسماء الزائرين كلهم واضحين ماشاء الله فوق ال15 الف زائر
لو كل واحد يعطيني 10 دنانير ماراح تضره بشي راح اطلع
لحظه احسبها بالاله الحاسبه
10 دنانير * 15 الف = 150 الف دينار كويتي
يعني اسدد قرضي و اشتري ماطور كهربا و ايباد ميني 64 جيجا wifi+4g و اشتري سياره صالون للديره اخذ كيا كوندليزا مادري قودزيلا شي جذي بس اعلى وحده و اروح اتعشى و اتغدا واتريق في مطعم فرايديز مده اسبوع و اسافر تايلند اقعد 3 شهور و اذا عارضت زوجتي اطلقها واعطيها نفقتها مقدما
وبعد شنو
عقليه محروم , شنو ماطور و ايباد , والله ياجماعه حد تفكيري جذي . انسان بسيط مابي شي
المهم اني راح اطلع مبلغ دسم من الجمهور الكريم
نرجع لمحور حديثنا
المسابقه حسب ماسمعت باقيلها شهر , يعني بيوم واحد او ساعه او نص ساعه تضبط الملف و تاخذ صوره واذا ماتعرف شلون تاخذ صوره سو نفسي . ادخل اليوتيوب واكتب شلون اخذ صوره سكرين شوت وراح يعلمونك
وبعدين حطها بالموضوع وانطر حظك
6 سنوات ناطر حظي مع البنك اني اربح الجوهره و ماكو فايده . يمكن نربح هني