قهوة WoW .. :P

[Dudette]

خلاص بسوي قروب وبنسوي جانج خخخخخخخخخخخ تعلمت هاي بعد جانج

[Karazhan]

اييييييييييي جانج

وانا على بالي اسم وزير صيني الحين فهمت

امس الصبح نفس الحزه رحت اورقمار ابتلشت بالشنط اللي عندي كلهم 6 خانات وكل شوي متروسين , وناطر يفتح حسابي من ستارتر ادشن لأني دزيت جولد للشخصيه من اكاونت ثاني عشان اشتري شنط اكبر

المهم وانا عند المزاد اللي يم غرفه هلزكريم كلمني شخص وسبر قالي first toon ?

قلت اي هذي اول شخصيه لي , انا جديد باللعبه

وانا ماادري وينه , ضغط الحركه اللي اشوف معلومات عنه بالشات , لفله و وين قاعد بأي مدينه , المهم شفته rogue قوبلن لفل 86

المهم جربت البريد بشوف اقدر اشوف الرساله مالتي اللي فيها جولد و ماحصلتها , رحت البنك بحط الاغراض اللي بالشنط عشان اسوي مساحه واكمل تلفيل

بس قلت هذا ليش سألني ؟ يعني يبي يعطيني فلوس مثلا ؟

المهم طلعت من البنك ووقف بره كأني شفت روج دش وراي البنك

المهم كلمني وسبر قالي انا حاولت اعطيك جولد لكن شخصيتك ستارتر ادشن مااقدر اسوي trade معاك

قلت اي انا توني مشترك وقالولي بعد يوم او يومين تفتح

قال خلاص ان فتحت كلمني عشان اعطيك جولد . انا راح اخزن اسمك عندي اوكي . قلت اوكي شنو وراي

ماادري الظاهر حبني من اول نظره , مع ان شخصيتي اورك اخضر شايب و وهنتر و البت مالي خنزير , يعني ماكو اي شي يفتح النفس

المهم قالي اخليك الحين والكلام هذا وراح


يحليل الامريكان طيبين , مو بالاوربي ينشبون نشبه plz 1 gold

بالامريكي الناس توزع جولد

---

موضوع شيق صح

-

اليوم الصبح الساعه 6 رحت الدوام عشان اوقع

شفت ولد عم رفيجي يداوم معانا , رفيجي ماخذ اجازه وهذا ولد عمه

المهم تكلمنا و انا مااعرفه يعني لكن اهو يدري اني رفيج ولد عمه . المهم قالي تدري عن دوام الشفتات راح يرجعونه ؟

قلت والله مدري ياخوك بس سمعت ولد عمك يقول لواحد معانا بالقروب بالواستاب يسأله يقول ها حولت عصر

بس مافهمت قصده , يعني الحين يبون يرجعون دوامنا اللي قبل ؟

قال اي واذا تبي تنقل روح قسم الاشراف اللي اهو قسمنا و عندهم اوراق مطبوعه وخالصه اكتب اسمك و تلفونك ويدقون عليك اول ما يفتحون النقل وتروح

ويرجع دوامنا نفس قبل يوم بشهر

بس قلت اخاف يحطونه عصر لكن نظام جديد , نداوم كل يوم , قال مدري لكن صعبه نداوم كل يوم لأن ماكو احد الا الموظفين اللي هم احنا , اما المسؤولين والاداره كلهم مسكرين مكاتبهم ورايحين , منو اللي يبي يجابلنا يعني

-

كلمت رفيجي توني قال اي بس انا ماراح انقل , لأن الاعمال الممتازه والامور هذي راح تروح علينا نفس قبل , قبل ماكنا نستلم اي شي من الوزاره بسبب اننا عصر فلاتي , ليش يخسرون على ناس مثلنا

دام ان الصبح نوقع و نمشي ونقدر نضبط بينا يعني كل واحد فينا يداوم يوم بالاسبوع ويوقع لخمس اشخاص و اليوم الثاني يروح غيره يوقع وهكذا

وناخذ البونص والاعمال الممتازه وعلاوات وكل شي , نصير اوادم يعني

قلت والله فكره يالقايد انا معاك

عاد يوم رحت اوقع شفت عالكشوفات اللي فيها اوراق التوقيع ملزقين على كل كشف ورقه تعميم ان دوام العصر راح يرجع واللي يبي يحول يروح الاداره يحط اسمه

المهم خلصت ووقعت و تصافحت مع ولد عم رفيجي ولد بطنها اللي عروقه بالماي و مشيت البيت

طبعا مارحت البيت على طول , رحت جمعيه الرميثيه لأن المدام دزتلي مسج واستاب عالصبح سد نفسي , تقول ماكو حليب للعيال مر الجميعه جيب حليب

"دقيقه صمت"

رحت عاد جبت الحليب كأي زوج مضطهد مكسور الجناح ورجعت البيت و شفت البوت شغال على الوورير والهنتر

مسوي وورير الاينس بأكاونتي الاصلي والهنتر مسويه عشان مستقبلا اخليه للبوت 24 ساعه يجمع mining ويرسل لأكاونتي الرسمي , واكاونتي الرسمي اسوي فيه شخصيه لفل 1 واحطها يم المزاد و اشتري لها شنط mining بو 36 خانه ان حصلت يبيعون او 20 خانه من البياع

و استقبل من البوت واحط بالمزاد , ان صكو البوت او الهنتر باند مااتحسف عليه لأني ارسلت كل شي لأكاونتي الرسمي والهنتر ان راح سويت غيره

واشتري المزاد كله بالفلوس هذي اللي حصلت عليها بالغش

---

^^

اعجبتني سالفه الخطوط

---

عاد الحين الخلاصه يعني بشوف اذا يعطوني علاوات قعدت صبح واذا ماكو شي حولت عصر و وقتها اطيح بجبدكم صح

بس الصبح هم زين اوقع وارجع قبل الزحمه , لكن المشكله انا راح بر , واروح البر الفجر بعد صلاة الفجر ادق سلف واروح البر اوصل عالزراق قبل تطلع الشمس يعني

الفتره اللي طافت مارحت للحمام بسبب الدوام , الحمام يبيله واحد ينطره من الساعه 4 ونص . يعني انا متى اروح وشكثر اقعد هناك و الرجعه متى

عفسني الدوام وحرمني , لو عصر كان عالاقل اروح الفجر وارجع الساعه 8 او 9 الصبح وانام واقعد العصر اروح اوقع , مع ان التوقيع العصر مفتوح 24 ساعه , يعني مو شرط اقعد العصر مخصوص عشان اوقع قبل يروح علي

لا اروح المغرب او العشا او الفجر , الباب مفتوح على طول


كأني طولت واخذت راحتي ها

اخليكم عشان ماتزهقون مني ياجماعه , لا والله حبيبي لازم اخليكم عشان اعطي مجال لغيري مايصير انا مستلم القعده


بروح اسوي اكل بعد جعت على وجبتي اللي امس ماك رويال بدون طماط و جوانح

[Dudette]

انت شو تبي تقول بالضبط

المهم اكتب ترا ردووو الجماعه يقرووون بس تراك انت الملك على قولتهم وانت فيك الخير والبركه وانا بس اكتب خرابيط

[Karazhan]

والله مدري شنو بقول

قاعد اخربط

انا ادري ان في ناس تقرأ بس ماتشارك , ماعندهم حب الكتابه نفسي

انا يوم كنت بالمدرسه كان استاذ حسن يدرسي عربي من اولى متوسط الى 4 وكان معجب فيني حيل ويقولي انت احسن شخص مر علي بالتعبير

مو التعبير يعطونج ورقه فيها 20 سطر يقولولج حاولي تكتبين تعبير فوق ال10 اسطر و ياحبذا لو توصلينهم 20 سطر , انا لما اكتب التعبير اندمج و اكمل بظهر الورقه لأن الاسطر ال20 ماتكفي

كان يقولي انت احسن تلميذ مر علي بالتعبير

طبعا بالامور الثانيه فاشل

خصوصا لما يعطوني اسأله سخيفه , نفس الحين لما اروح امتحن بالاسبوع اللي فات كان في اسأله تبط جبدي , اللي يقول علل

مثلا يكتب سؤال مثل جذي

التويوتا سياره يابانيه , علل ؟

يعني شنو يبون بالضبط , ندري انها يابانيه بعد شنو تبون زياده

هالاسأله تنرفزني

يلا اخليج عشان ما انطلق بعد مره واكتب قصه

[Karazhan]

بس بصراحه شرايج بطبخي للزبيدي

مو احلى بالصور الزبيدي او انا , يعني انا اللي محلي الطبخه او لو مو انا كانت صارت الطبخه 100% بس انا خربتها

[Dudette]

تدري اني سرت السوق ودورت على زبيدي بس مالقيت كانو جدام وصغار

خخخخخخ كنت بقلدك وللعلم راويت امي وقلتلها هذا واحد يلعب الجيم ويطبخ شان تقولي عيل ما اشوفج تطبخين حقنا ههههههههه عاد شو يفكني الحين كل ما تشوفني تقولي ها متى بناكل من طبخج

قلتلها انا اصلا اخاف عليكم لا تتسممون من ايدي

المهم شنو اخر طبخاتك متى بتنزل شي جديد

[Karazhan]

عسى بس ما خليتيها تشوف صوره وجهي

ترى استحي

ان شاء الله بسوي مرق شعوم , انا احب السمج و دايم يخطر في بالي واروح اشتري واسوي

انتي تحبين السمج او نفس نوعيه بنات الجيل هذا اللي ماياكلون شي الا دجاج , مايحبون اللحم ولا السمج ولا الطيور ولا الضبان , ماادري ليش عايشين , لا واغلبهم مشتركين في مطاعم خاصه شهريا يوصلولهم كل يوم 3 وجبات خاصه للرجيم

يبا نحن نعيش لنأكل

ان شاء الله بسوي مرق شعوم و عيش اصفر , احط كركم معاه يعني , تعرفين شنو كركم او ماتعرفين بعد

على فكره ترى الزبيدي الصغير احلى و الذ من الكبير , بس الناس قليل يشترونه لأن صغير ما يشبع , يبون الكبار عشان الوحده تكفي 2 اكلهم طبيعي , انا لا مايمشي الحال معاي

اذا كانت الزبيديه حجمها او طولها طول الخط هذا


-----------------------------------------

هذا الطول ادري صغير , بس الحجم هذا نسميه بسكوت , يعني نروح للبياع مال السمج نقوله عندك بسكوت ؟ اهو يعرف ان القصد الحجم هذا من الزبيدي , وزبيدي بالذات يعني مو بسكوت تطلق على كل السمج بالحجم هذا , بس عالزبيدي

امي تقولي كل مره اروح السوق اني اشوف اذا في الحجم هذا عشان تقولي اسويه مرق , ماعمري شفت امي تسويه بس تقول قبل كنا نشتريه ونسويه مرق , يمكن قبل اولد اخر مره سوتها

لكن الطبخ ترى وناسه و انصحج تتعلمين حتى لو تخترب الطبخه , خلي امج معاج و تكون مشرفه وانتي سوي , شوفي ترى نظري ماراح تتعلمين او من الكتب , لكن ان سويتي عملي راح تتعلمين وتحفظين افضل واحسن

وانا ابحث عن زوجه تعرف طبخ , مو 24 ساعه مجابله الايفون

فنصيحه تعلمي ترى راح تستانسين خصوصا انج مليونيره و بيتكم متروس خدم , يعني قوليلهم اذا تتضايقين من ريحه الثوم لا تطبع بأيدج انهم يقصصون الثوم والبصل , عشان انا عارف و مقدر حياتكم سيدات المجتمع انكم تتجمعون كل يوم وتسولفون بالتجاره والموضه وغيره ف الوحده ماتبي الريحه تطبع فيها

انتي قولي للخدم

واذا خدمكم بعد من سيدات المجتمع ومايرضون يقصصون ممكن انا اجي ماعندي مشكله بس تعطيني تذكره رايح راد الكويت و تحجزيلي فندق

اجيكم الصبح اقصص و اطلع الظهر اروح الفندق انام

شنو تبين بعد اجيب الملك يقصص معاي سلطه

مو حاله ترى ماتبون تسوون شي بحياتكم

[Dudette]

ههههههههههههههههه والله انت نكته

لا ما عليك انا احب اكل كل شي ونصيحه في مطعم في فندق جبل علي عندهم طبخع يكون اخطبوط صغير عجيب والنوع الثاني يكون حي ويتحرك تغمسه في الصلصه وتاكله والله اخواني يقولون عجيب بس انا ما احب شي حي واكله المهم انت جرب المطبوخ مع السلطه عجيب واحب الروبيان واللوبستر والمحار يعني كل شي بحري ، وخاطري اكل ضب بس ما لقيت حد يسويه

وعن الطبخ ترا اعرف اطبخ بس ما احب اطبخ فهمت يعني يوم ايي في خاطري اي شي انا اروح واسويه

وانت تقول بيتنا متروس خدم لا بو شنب بس عندنا بشكارتين وكفايه ولو علي اطرش وحده من صدعة راسها

المهم متى بتسوي لوبستر عشان اشوف اوكي الطريقه واسويها

[Karazhan]

ابي بشكارتين هذي كلمه صحيحه او بدليه ؟

بشكارتين كأن بالسياق للجمله تعني خدامتين

انا الحين ياله حفظت كندوره و ميهود و ماروم تطلعلي كلمه جديده

انا لما رحت تايلند جربت الاخطبوط الحجم الصغير بس كان بالشوربه و كنت حاط رجوله بحلقي عاض عليهم و النص طالع بره و مصور نفسي بس مادري وين راحت الصوره وله كان حطيتها تشوفينها

الضب حطي بالجدر و ماي وملح و لومي و خليه يفوح نص ساعه , بعدين غيري الماي و حطيه يفوح بعد نفس الوقت و خلاص

سبحان الله امس مصورين الربع بالدوانيه ودازيلي ياكلون ضبان مسوينهم بالغرفه مالت الشاي والقهوه طبعا هم متفننين فيه حاطين خضره معاه جزر و بطاط ومادري شنو

لوبستر ما اطولها غاليه شوي

عموما انا سوالف عيوش يعني عيش وسمج لحم , دجاج مااسوي لأني زهقت منه بالبيت لذلك ما اتعب نفسي واسويه , انطر الغدا وخلاص

بس ان شاء الله نروح هالعطله ونسوي مرق شعوم و بعدين صبور مشوي

تعرفين الصبور او لأ . افضل سمكه للشوي بدون منافس لكن عيبها الشرعي متروسه عظام

[Karazhan]

انتي بأي سيرفر الحين ؟

[Karazhan]

برق ورعد ومطر و هوى

تاريخ 8\5\2013

الساعه 1 ومن العشاء حسب كلام اللي كلمته توني يقول من العشاء والمطر موجود

ابشركم ياجماعه ان جزيره العرب راح تقلب خضراء مروج وانهار

الكره الارضيه انحرفت والظاهر اننا راح نرتفع فوق نصير نفس خط اوربا و اوربا ينزلون يصيرون نفس الخط اللي احنا فيه او انهم يرتفعون يصيرون على خط القطب الشمالي و تتثلج اوربا

واحنا يصير عندنا انهار و مروج خضراء تسر العين

[Karazhan]

توني دخلت رايد LFG بعد الباتش هذا وشفت شي توني اشوفه , مع اني دخلت قبل الباتش اللي توه وماشفت جذي

الظاهر توهم حاطينها



نظام اللوت عادي القطعه اللي ربحتها فوق طالعه , لكن تحت تشوفون roll في اختيارين واحد اسوي روول والثاني اسوي pass




هذي بروحها وانا حاط الفاره على النرد وطالعه كلمه رول , لما سويت رول تطلع اما جولد بحدود 30 جولد او تطلع ايقونه اللوت , اللي لما تذبح موب وتحط الفاره عليه تصير الفاره او السهم مثل الكيس , اهو الكيس يطلع معناته فزت بشي , انا فزت بنفس القطعه اللي طاحت من البوس

ولو تلاحظون مكتوب تحت cost الظاهر ان اللوت هذا لازم عندك الشغله هذي اللي يبون منها 1 عشان يطلعلك اللوت هذا اللي نفس ماتقولون بونص لوت

يبون هذي

http://www.wowhead.com/currency=697#icon

[Karazhan]

شكلي قديم ها

[darkitp]

ابشرك , ترى طلبي وصل لأرامكس ..
بس تفاجأت ان البائع قالي راح ترسل بتاريخ بين 8 إلى 9 ..
و هي وصلت بالامس 7 ..

أحلى شيء اني شريته بدون TAX
لو شريت الـ Elgato من امازون راح ادفع 180 دولار
لكن خذيتها بـ 165 دولار صافي ..
و الحمد الله , نظام الدعاية اشتغل معاي ... حصلت على نسبة كدعاية من بحث اي باي

شكلي فعلا راح ادمن على اي باي .. كله منك يا بوشنب !

[Karazhan]

فكني من شرك

انا قلتلك لا تطيح فيهم عشان ماتصير نفسي لكن انت ماتطيع ودك تقط فلوس بس مو عارف شلون

يعني عندك استعداد للخساره بس تبي اللي يوجهك و طحت فيني

اهو ترى يقولك بعد اسبوعين نرسله لك , عاد حسب المكان يعني اهو يقول جذي بس يطلع الشخص بأمريكا وانت بريدك بأمريكا فيوصل قبل

قبل تشتري اي شي , شوف الشبد من وين , يعني الشخص راح يرسله من وين , اذا من الصين او سنغافوره او هالدول الله يعينك , شهر يمكن عشان بس توصل امريكا و من امريكا اسبوع

فأنت بالخيارات يسار كاتبيلك تبي البحث في ايباي امريكا وكندا او مادري وين او العالم كله , انت اول شي ابحث بأمريكا وكندا عشان سرعه التوصيل واذا ماحصلت اللي تبي عندهم شوف العالم كله


نفس هالصوره , بعد ماتكتب بشريط البحث السلعه اللي تبيها انزل تحت بنص الشاشه يسار تشوف هذا

اختار امريكا اول شي دام ان بريدك امريكا , واذا ماحصلتها شوف كندا عشان ما تقعد شهر لأن اغلب البياعيين من الصين و اي شي تبحث عنه تحصله عندهم بس مشكلتهم شهر

او تحصل واحد من بريطانيا فأنت حط بالملف الشخصي مالك بريدك ببريطانيا بما انك ارامكس و حط الصين بعد بس الصين يعقدك شوي لأن بالخيارات تطلعلي كلمات صينيه ماادري شنو يبون