جيجز يتحدث عن حياته الشخصية و أصدقائه(لا يفوتكم لأن كلامه مسلي جدا جدا) + فيديو
السلام عليكم ،،
حبيت أنقل لكم كلام جيجز عن حياته الشخصية و عن اصدقاءه المفضلين في المان و هو يتحدث بكل صراحة عنهم..
اعذروني الكلام طويل لكنه مسلي جدا لأبعد الحدود اقرا و ما راح تندم .. و على فكرة باحط الكلام باللهجة العامية لانه بيطلع مسلي اكثر و باكتب الكلام على لسان جيجز يعني كأنه هو اللي كاتب الموضوع زي ما هو كاتب هالكلام بنفسه في صفحته الشخصية.. و بتكون ترجمتي الخاصة بدون برنامج ترجمة
نبدأ بالحديث عن حياته الشخصية:
*أعظم هدف حققته: بالطبع هو هدفي قدام ارسنال في نص نهائي كاس انجلترا 1999 و كان احلى هدف جبته في حياتي لانه حساس و زاد املنا بشكل كبير في حصولنا على الثلاثية هذيك السنة.
يوم قطعت الكورة من فييرا ما استوعبت اني في نص ملعبي مو في نص ملعبهم و توقعت اني على بعد 35 ياردة بس من المرمى و تقدرون تقولون كانت زي الفطرة و كان محد قدامي يوم قطعتها فحطيت عيني تحت عالكورة و اتجهت نحو المرمى و كان مستحيل اني امررها بوقتها.. عديت فييرا بعدين ديكسون بعدين فييرا مرة ثانية و ما لقيت نفسي الا بين ديكسون و كيون اللي ما حب يتزحلق علي لاني كنت قريب من المنطقة و يوم عديت منهم صرت قدام الهدف و قدام سيمان حارسهم و فكرت اني اضربها بأقوى ما عندي و بس.. و احتفالي بالهدف بين كثر فرحتي فيه و الهدف حتى سبب غزو الجماهير للملعب تصوروا اني لقيت اثنين من زملائي ايام الثانوية يحضنوني و يبوسوني .. و كان الجمهور يسحب فيني و انا متمسك بالتيشيرت اللي شلته يوم سجلت الهدف.. تخيلت اذا احد قدر ياخذه من ايدي بالعب المباراة مفصخ بدون تي شيرت..
*اسوأ لحظة: كانوا شوي .. لكن اسوأهم كانت في انفيلد سنة 1992 يوم فازو ليدز الصبح فعرفنا اننا لازم نفوز الليلة على ارض ليفربول عشان نبقي املنا بالدوري لكن للاسف خسرنا 2-0 اللي اكد فوز ليدز باللقب.. و كانت الاحتفالات في انفيلد بفشلنا.. بعد المباراة جوني اثنين من جماهير ليفربول يبون توقيعي و ما قلت لا ووقعت لهم .. لكن للاسف بعد ما وقعت شققوا التوقيع قدامي.. و من يومها فيرجي يذكرني باللي صار في كل مباراة نلعبها قدام ليفربول كدافع يحفزني اني العب احسن قدام ليفربول بالذات..
*اسوأ مباراة: كانت مباراتي قدام اليوفي سنة 1996 .. ما اتوقع احد لعب زي الناس في ذيك المباراة الا بيتر شمايكل المنقذ.. خسرنا 1-0 بس بهدف الان بوكسيتش.. و كان المفروض النتيجة اكبر بكثيييير في استاد ديلي البي.. تجمدنا في ذيك المباراة مع اننا جينا واثقين بعد فوزنا بالثنائية و اننا ممكن نسوي شي في اوروبا.. عالعموم بعد هذي المباراة اكتشفنا انه قدامنا الكثيييير نتعلمه.. اليوفي لعبو فينا لعب و كانو محاصرينا من كل مكان كاننا فريق درجة ثالثة.. لكن الشكر الوحيد لبيتر شمايكل اللي انقذنا من المذلة..
*أول هدف أحرزته: عندي هدفين اعتبرهم اول هدف .. واحد ما دريت شالسالفة فيه و ما ادري اشلون جبته و الثاني اعتبره هدف حقيقي .. الاول اللي تسجل في رصيدي كان ضد مانشستر سيتي سنة 1991 يوم فزنا 1-0 بهدفي الغريب اللي صار فيه صراع على الكرة بانها ضربت فيني بالغلط بعدين ضربت في كولين هندري بعدين دخلت هدف .. كان المفروض اون جول لكن اللاعب رفض الهدف و المدرب عطاني اياه.. ادري اني ما مسكتها لكنه موجود في سجلي.. هدفي الحقيقي كان ضد نورويتش الموسم اللي بعده يوم عديت من الحارس و سجلت الهدف الثالث و انتهت المباراة 3-0
*أول مباراة لي مع المان: اول مباراة كانت ضد ايفرتون و اذكر ليس سيلي جاني يقولي المدرب قال اسمك بين الاحتياطيين و فعلا جلست على مقاعد الاحتياط و اصيب دينيس ايروين يومها و انحطيت بداله .. بعدها باسبوعين حطني المدرب اساسي مع الفريق ضد مانشستر سيتي اللي جبت فيها الهدف اللي ما ادري اشلون جبته .. و دايما يوم اتذكر هالمباراة اتذكر المدرب يقولي: "ريان، انت بتلعب على اليسار اوكي؟"
*أطرف لحظة: نيكي بات كانت مزحاته الثقيلة كثير.. مرة من المرات على المنحدر نيكي لف عينه بعصابة و حط عليها كتشاب و كان جالس بالغرفة الطبية و مافيه احد عنده و يصيح من الالم .. ركضت على المطعم و كان فيه الدكتور ياكل غداه هناك و اصارخ اناديه اقوله نيكي فقع راسه قام نقز الدكتور مفزوع يروح يشوف نيكي .. الا يوم شم ريحة الطماط قام يضحك.
*أول مباراة في حياتي: كان عمري 9 سنوات لعبت لفريق اسمه دينز و خسرنا 9-1 .. يومها اخذت احسن لاعب بالمباراة و ما ادري كيف و ليش!!!
*أول مباراة شفتها: أبوي اخذني مرة لمباراة مانشستر سنة 1981 و ما اذكر ضد مين و لا اذكر النتيجة كم كانت لكن كنت اذكر اللاعب الويلزي الوحيد بالمان ميكي توماس و كانت عيني عليه و بس طول المباراة..
نجي نتحدث عن رفاقه بالمان:
*جاري نيفيل: انتقدوه الجماهير الفترة الاخيرة لاداءه الهابط و نسوا اش سوى مع المان و يوم كانت عندنا مشكلة بالماضي بقلب الدفاع جا جاز (جاري نيفيل) و لعب بكل طبيعته كأنه عاليمين.. عدا عن نيكي بات كان جاز اعز اصدقائي.. عرفنا بعض سنوات طويلة و كان كل مرة يفتح فمه فيها يضحكني.. اقدر اسميه (سيد منظم) و اذا بغيت ترتيب اي شي ناد جاز و بيرتب لك اياه لانه ما عنده شي ثاني يسويه بحياته كلها!! كل اللي يسويه بحياته تصوروا انه يروح البيت و يحط شرايط فيديو كرة قدم و يجلس يتفرج.. و تراه يحب يتحلطم واجد(يتشكى) .. للحين يتشكى من المراوش في مكان تدريبنا يا يقول الموية باردة و يصارخ ولا يقول الموية حارة و يصارخ.. لكنه محبوب لابعد الحدود و احيانا اسميه (ممل) لكن اذا طلعنا سوى مع الفريق كان اخر واحد يرجع البيت بعد السهرة و عنده قدرة عجيبة على الجلوس لاوقات طويلة..
*فيل نيفيل: يكفي انه من عائلة نيفيل.. المحترف المطلق اللي يمشي في كل شي على القاعدة بدون استثناء.. و كان يقولي عنه المدرب انه بيصير زي اخوه جاري.. و فعلا اذكر اني لعبت ضده بعدين و سبقني في مرة من المرات
*سيلفيستري: ما زال شاب و قدامه الكثير يتعلمه.. لاعب قوي، لائق، و شجاع.. صحيح انه لعب بمركزين لكن احس انه يبدع اكثر عاليسار كظهير مو قلب دفاع مع انه ممتاز في قلب الدفاع.. اول ما جا ميكايل المان اهتم فيه دوايت يورك و حطه تحت جناحه.. هو بالفعل اهدى واحد بين الاصدقاء ما يتكلم واجد .. لكن شخص بالفعل طيب
*ويس براون: راقي جدا و يبدو لي انه يرتاح مع شي اسمه كرة .. و لا تنسون انه لعب للمنتخب و اتوقع انه راح يلعب مباريات كثير هالموسم مع المان و بيروح المنتخب مرة ثانية
*روي كين: الكابتن ، مصدر الهامنا, و بدون جدال افضل لاعب وسط في بريطانيا و في مرحلة سابقة اعتبره كان الافضل في العالم.. دايم يهاوشنا بالملعب و يعصب علينا تعرفونه، كين هذا.. و كنت دايما اتجادل معاه.. لا و يكمل الهواش داخل غرفة تغيير الملابس اذا ما لعبنا زين.. كان يطلع معانا حنا العزوبية كثير لكن ما عاد يطلع كثير الحين لانه صار رجل عائلة.. كين يمكن صورته دايما الرجل الخشن اللي دايما يصارخ علينا زي عياله في المباراة و يهاوش لكن قلبه ابيض.. طلعت عنه اشاعة ما ادري اذا هي صحيحة او لا .. يقولون عشان يحافظ على لياقته بالصيف ياخذ السيكل من مانشستر لمدينة تشيستر و يرجع بنفس الوقت.. ما ادري اذا هالكلام صدق لانه ما يقولنا..
*سكولز: في السنوات الماضية اثبت انه لاعب من الطراز العالمي للمان و انجلترا بانه ساهم في انتصاراتهم بشكل كبير.. كثير من اللاعبين هادئين لكن سكولز ملك الهادئين.. ما يحب يسوي مقابلات صحفية.. يحب يجي للتمرين و بعدين يرجع للبيت و يقعد هناك و ما يطلع..
*اولي سولشاير: يوم جا المان ما كنت اعرف مين اولي ولا سمعت عنه قبل كذا لكن بعد التمرين الاول معاه كنت داري انه بيحقق معنا شي عظيم.. مرة في صيف 1996 في التمرين تدربنا على الشوتات و صدمني بقدرته و كان وقتها افضل مخلص هجمات شفته بحياتي.. رحت يومها البيت و قلت لاصدقائي اننا وقعنا مع لاعب جديد بتشوفون اش بيسوي للمان و كم هدف بيجيب.. و فعلا انهى اولي هذاك الموسم كهداف الدوري.. يحب اولي يخلي نفسه لنفسه دايما لكنه يمتلك قدرة عالية من الحس الفكاهي..
و هذا يا اخوان كلام جيجز عن نفسه و عن اصدقاءه و ما اقدر اقول الا كبير يا جيجز و طول عمرك بتظل اسطورة و زي ما قالو من قبل " لو انك من دولة غير ويلز كان بنو لك التماثيل "
الاول المصدر
mu4arab.
رحّبَ فرانك لامبارد بأداء اللاعب واين روني، و قال بأنه "الوحيد" الذي سيقود انجلترا للمجد الصيف القدم.
