السالفتووووووووووووووووو الثانيتوووووووووووووووووو
سلمكم الله هك السنة العرب مربعين ومعينين خير و مرجهنين والحلال يبرك الضحوية من كثر العشب.
ودك انك بس تصنت لأم سالم بهك الريضان.وام البهم ماخلت طبعهاماغير تزورق بينهن والورعان يطاردونها هذا طبعهم بعد , وخطات راعى يومى بشوشته لياهلحين يضحك عليه ملهى الرعيان وتضيع غنمه بسبة طوير , وهك النهار سواريح الغنم مدوا بحلالهم وعزلوها جلد و رغث وعزلوا بهمها ثم ساقوها مغير تسمع أجراس المراييع وعجتها للسما.
واهل البل اللى ذيدانهم قريبة راحوا يشوفون اباعرهم و يدورن الصبوح .أما اللى يطردون حرش العراقيب ويعطونهن على هواهن هم اللى عايشين صحيح .
وفيه رجاجيل على شبة الشيخ مجتمعين ولهم لجة وقدامهم شلقة عيال حاطين نيشان ويثورون . مدرى لو اللجة على شانهم.
وحريمهم من حليلهن ماغير تشوف عبيهن تتطارخ من الهوى , هذى مسيرة وهذى موديتن غريفة لجارتها وهذى حطابة وهذى رواية .. وفيه ثلاث بنيات وحدتن منهن عرجا المسكينة راحن يتسابقن يم الغدير , تراه دفيعة .. هناك عن اهلهن وهن يلعبن ويضحكن ومكيفات باالما الا وتجيهن ذيك العجوز وتسلم عليهن وتحبهن وتقوم تلعب معهن مرة تسوى نفسها فرس لهن ويركبنها وهن لهن ضحك ومرة تسويلهن نوم العزب ومرة تسويلهن نطو الرفلا.
سألتها وحدة من البنات عن أسمها
قالت أسمى تريتره عمتكن تريتره
يوم شافتهن أمنن لها.
قالت لهن : يابنياتى ليه ماتسيرن على وتدلن بيتى أنا عجوز مسيكينة ولاعندى بنات ويومنى شفتكن حبيتكن عدكن بناتى.
وحدة منهن عيت وقامت تعذر
قالت تريتره: يابنياتى ودى أسويلكن عشا وعندى تميرات شايلتهن للغالين مثلكن وبيتى تراه قريب حيل , شفتن هك الجال بيتى وراه.
وافقن وراحن معها .. يوم تعدن الجال .
قالن : وين بيتك ياتريتره
قالت : ورا هك الجال هذاك
ثم تعدنه
وقالن : وين بيتك ياتريتره
قالت : ورا الجال هذا
وجال ورا جال ليما تعبن من المشى وبغن يرجعن
قالت لهن تريتره : يابنياتى مابقى عليكن شى , وصلنا , هذاك بيتى أشوفه ورا هك الجال وان مطلع حتسى صحيح ابد ارجعن وتراكن معذورات .
المهم انهن طاعنها ورقن الجال وشافن بيتها وتدحدرن يمه
بسنها الشوفة القشرا يوم شافن بيتها الا رواق البيت مسويته من جلودالبنات والاطناب مودعتهن من قصبانهن والاوتاد من عظامهن و البيت من شعر البنات
التفتت تريتره عليهن وهى تمطق وقالت:
مسكتكن ياالملعونات بغيتن ماتجن و تحرمنى عشاى أنا ووليدى مير جابكن حظى لى شهر ماذقت لحم الاوادم.
وهى تقلب صورتها سعرة لياجلدها أسود مثل الصاج وعيونها مثل الجمر وشعرهاتقل تسدادة وسنونها حديد ويتطاير منها هوايش شى يزحف وشى يطير شى مثل الدود وشى مثل العقارب وشى مثل الذبان .
صاحت تريتره تزهم ولدها وهو يجى الا شكله أقشرمن شكل أمه لكنه صغير و طوله بطول البنات .
قالت تريتره لولدها: أسمع أنا سنونى مصديه مايقطعن من بطا اللحم أباروح أسنهن وأعود أنتبه على عشانا لاينحاشن منك عفيه ولدى سعران.
راحت تريتره تسن سنونها وبقن البنيات مع ولدها يحرسهن.
المسكينات غدالهن صياح ويبتسن ولهن نحيب
قالت لهن العرجا: ياخوياتى ما ينفع البتسا وش الحيلة وشلون ننحاش ؟
ماردن عليها ولا هن يمها ماغير لهن مشاهق من البتسا ومن الخوف منفضختن قلوبهن .
فكرت العرجالحالها وقالت مالها الا الذهانة بعدين قربت عند ولد السعرة وقامت تهرج عليه وهو له ضحتس وصوته تقل رغا حاشى . ماهمها طيرة شلوى ودلت تسولف عليه وتعطيه من المهيلات الا ان سكت وقام يراددها بالحتسى . وقامت تبرق بكلامه وتروز عقله عرفت ان ماش ما بالحمض أحدوانه دبشه .
قالت له : سعران ما اشوف فى بيتكم حطب و شلون تطبخون بليا حطب . ياويلك يا سعران ان جت امك وشافتك منت حاطب .
قالها : صحيح بس وشلون أروح وأخليكن أخاف تنحاشن
قالت وين نولى وأهلنا بعيد ولاحولنا والى وناشبته الا ان صدقها و أقنعته انها تحرس البنات بداله وأخذ فاسه وراح يحطب
يوم شافنه ابعد كل وحدة عضت شليلها وانحاشن
وهن لهن ركض وركض وركض والعريجا وراهن ماتقدر تلحقهن ..تصيح وتنخاهن ولها صياح :
ياخيااااااتى أتننى يا خيااااااتى لاتخلنى
وهن ماهمهن سبقنها وخلنها وراهن .
جت تريتره ودريت انهن انحاشن وهى تطلبهن لها جمح ما تسمع الا وحيفتها ليا مرت بجنب شجرة او قشعة يوم قربت عند العرجا التفتت العرجا الا وتشوفها وراها. دريت المسكينة ان السعرة تبى تلحقها وتطرحها . الا ويجيب الله ذاك الجحر بطريقها كنه مراغة ضبع وهى تجحر به .
وتقوم تريتره تحفر الجحر .
مروا بها ناس واجد وهى تحفر وكل يسالها
ياتريتره وش تحفرين
تقول : أحفر ضب ماله رب ولاله عكرة تقضب
مروا بها أهل المجاهيم . ياتريتره وش تحفرين
أحفر ضب ماله رب ولاله عكرة تقضب
مروا بها المظاهير . ياتريتره وش تحفرين
احفر ضب ماله رب ولاله عكرة تقضب
مروا بها أهل المغاتير . ياتريتره وش تحفرين
أحفر ضب ماله رب ولاله عكرة تقضب
مروا اهل الشياه . ياتريتره وش تحفرين
أحفر ضب ماله رب ولاله عكرة تقضب
مروا بها العقيلات. ياتريتره وش تحفرين
أحفر ضب ماله رب ولاله عكرة تقضب
مروا بها اهل الخلا . ياتريتره وش تحفرين
أحفر ضب ماله رب ولاله عكرة تقضب
ماطولها عليكم مروا بها أهل الوضح والشقح والحمر والصفر وألوان البل كلها
وردها واحد
وهناك
مروا بها أهل الخيل . ياتريتره وش تحفرين
قالت:احفر ضب ماله رب ولاله عكرة تقضب
سمعت العرجا الصوت وعرفته هذا صوت اخوها تخبره غزاى من حروة شهر .
ثم صاحت بطول صوتها
لاوالله ياخييى تحفرنى .. نخيتك لابتسيتك ياخييييى فكنى
انتخى وثنى عند اخته شوق المخبيات بنات الشيوخ
سحب سيفه وضرب تريتره لهو مطير راسها
حضن خيته و حت التراب عن قصتها وحبها على راسهاواردفهاعلى الفرس. وقام يهيجن وهى ترد عليه:
أشرب الما وكن يرده عود ... وأتقلب وكنى على ملة
عريجا ما يقربتس كود مقرود ... أدفعه للموت يشتله
يباريهم ذود كسبه من حلال القوم
جيتكم منها مادرى عنها
المشاركة الأصلية كتبت بواسطة Angel whisper
<<<<كل هذا وبلا فخر أجل
<<<<قليل خاتمة 
<<<<وفخور هو و خشته
>>>>طالب ليل 
>>>>اقول انكتم 