هلا ميكافيلي الله حيه
نورت مو القسم بس نورت المنتدى كله
وادري السنه الجايه راح ترد علي لأنك تكتب مشاركه و تختفي ، ترجع بعد سنه
لكن المهم اننا شفناك
ترى انا ما عطيته التفصيل ، تحديدا ايام المصبنه
ماقلتله ان اخوي اللي اكبر مني ب٨ شهور دخل الجيش وعمره ١٧ ، واخوي هذا هوايته جمع السيارات ، يشتري سيارات يطيب خاطره منهم ويبيعهم ، مو شريطي لكن يحب يجرب كل سياره يشوفها
وايام المصبنه الحقيقيه وقبل اشتري الكمارو كنت استعمل اي سياره اشوفها بالبيت و اخوي هذا شرى او كانت عنده سيارتين
الاولى زد موديلها ٨٢
والثانيه جيتي موديلها ٨٠
وكنت اخذ الزد اكثر لأنها عاجبتني و بالتقحص او مثل ما يسمونه اهل الرياض التفحيط كانت عند وجهك
وبعدين اخذت كمارو لأن شفت ان اغلب الشباب قاموا ياخذون موستنغ و كورفت للتمشي ، الجيتي لازم تفحط و اذا فحطت لازم تراجع الصناعيه ، وانا شفت و رحت مع الشباب للصناعيه يصلحون سياراتهم و قلت شلي بعوار الراس
وكان اخوي اللي اكبر مني ب٤ سنين عنده جيتي بعد ، بس محافظ عليها حيل ، كانت جديده و شغله كله وكاله
كانوا المصبنه يحايلونه عشان يبيع و ما باع وكان يضرب فيها المثل بنظافتها ، كانت موديل ٨٦
لكن بدأت المآساه لما اخذها اخوي اللي اكبر مني ب٨ شهور
مدري ليش ولا اذكر بعد ليش كان يستعملها اهو لأن كان اخوي بو ٤ سنين مايعطيها احد ، والكل بالبيت يدري ان اخوي بو ٨ شهور يدمر السيارات
المهم و كنت معاه انا و معانا احد الربع منحاشين من دوريه في مزارع الوفره ، و كان ليل و اخوي طاير بدون ليتات و كان يشب الليت يشوف العداد مال السرعه كم ويطفي الليت و الدوريه ورانا
اخر مره فتحنا الليتات شفنا العداد ٢٤٠ كيلو ، واهو مشغل الليت وطبعا ليت السياره الامامي يفتح بعد ، شفنا نهايه الشارع
الشارع صار على شكل T يعني يا يمين او يسار
ما يمدي يمسك بريك ، حتى ان انا بنفسي ما يمديني اثبت نفسي بشي الا طايرين بالهوى ، احاول امسك الجير عشان بس اثبت نفسي مو قادر ، مع اني اشوفه قريب لكن مو قادر اوصله
و رحنا فيها ، ماابي ادخل بالتفاصيل لكن الموتر انعدم
لما شاله اخوي على الونش و وداه للبيت وشافه اخوي بو٤ سنين ماصدق
ولما استوعب الصدمه زعل حده ، طبعا اخوي بو ٨ شهور ماكو سياره استعملها بالبيت الا و عدمها
الحين سنه ٢٠١٣ عنده سيكويا بس صار تكانه و ما قام يعدم السيارات
المهم انتهت اخر جيتي عندنا بالبيت
لأن اخوي ابو ٨ شهور كانت عنده جيتي و زد وباعهم وماعنده سياره وقتها واخذ جيتي اخوي بو ٤ سنين
و عدمها اخيرا
انا اخذت كمارو لأن احد الاسباب كنت مرافق حضر وقتها ، يعني هالنقطه مااقدر اخفيها ، انا كوني احد المصبنه بالمنطقه ومع اكبر تجمع مصبنه بالمنطقه بقيادتنا الحكيمه رفيجي ولد بطنها
كانوا كل العيال يخافون مننا ، كانوا عيال منطقتنا ما يجرأون يحطون عينهم بعين اصغر واحد فينا
انا كنت ميال للكشخه بيني وبينك ، وتعرفت على شباب حضر عندهم شاليه بالنويصيب و سياكل و جت سكي و طلعات عالكورنيش شبكت معاهم ، هم بعد يبون يكسبوني بأي طريقه لأني احد الرموز المعروفه و خلفي مصبنه ما يهابون الموت
عشان جذي ان صرت من ربعهم راح يضمنون حريتهم بالمنطقه بدون يتحرش فيهم احد ، لأن اعترف ان كانوا ربعي حقيرين بعض المرات ، مو كلهم البعض منهم ، اذا ماعنده شغل يجمع ٢ او ٥ معاه ويروحون يتحرشون بأي مخلوق ، والمسكين اللي يتحرشون فيه مايقدر يسوي شي
ان كان بروحه او معاه ١٠٠ مايسوون شي لأنهم يدرون ان ال١ او ال٥ هذوله اذا طقيناهم راح يجيبون ١٠٠٠ واحد ، والمشكله مو واقفه عالعدد ، المشكله انهم بلا اي رحمه
لو يدخل بيتهم ويقعد خلف امه او ابوه يدخلون وراه ويشقونه واذا ابوه او امه حاولوا صدهم يحطونهم فوق ولدهم ويضربونهم
عشان جذي الناس ماتبي الموضوع يوصل لهذا الحد ، امسكني طقني و هزأني و توكل على الله وخلاص
لذلك انا كان ميولي للتطور ، وشفت هذوله وشبكت معاهم و هالشله كل يوم بالليل يروحون مكاتب سيارات يشوفون شنو نازل و كم الاسعار وانا اروح معاهم
كانوا يشيلوني على كفوف الراحه ، لأن انا الحمايه لهم من ربعي المصبنجيه ، المهم شفت الكمارو وعجبني و اخذته
بعد ما كنا نروح شارع المطاعم واشوف الكماروات و الموستنغات والحياه الفله و ان الجيتي ما تطقها معاهم ، كان بخاطري اخذ جيتي ٧٧ بس اشوه اني مااخذتها
المهم شبكت مع الشله قبل اغدر فيهم ، كنا ٣ بس مع بعض وبعدين عرفوني على شباب قطعه ١١ و هذوله استانسوا حيل فيني لأنهم اكثر ناس تملطشوا من ربعي ، و اخذوني شاليهاتهم و من اهتمامهم حسيت اني شيخ يارجل
طبعا وانا معاهم تقديبا سنتين او ٣ سنين ، نسيت شي اسمه مصبنه ، نسيت ربعي ، لا امرهم ولا حتى تلفون ، قطعت العلاقه معاهم نهائى
لكن بعد السنتين او ٣ سنين صرت اقعد مع شباب قطعه ١١ ، طبعا في من مناطق ثانيه يقعدون معاهم لكن يعني الدوانيه و اغلبهم من قطعه ١١
قطعت علاقتي مع ال٢ اللي كنت معاهم اول شي واللي عرفوني على قطعه ١١ ، واحد فيهم من الاثنين اهو ماقام يجي معانا لكن الثاني كان معاي ٢٤ ساعه
كان يموت فيني تقول زوجتي مو رفيج
هذا انا فكيته من كذا مصيبه ولما شبكت معاه صار يلازمني بكل وقت ، المهم يوم ما قمت ادق عليه و كل وقتي مع قطعه ١١ ، دق علي يعاتب وقال شنو يعني تبي تنهي علاقتك معاي ؟
قلت يعني شنو انهي علاقتي معاك ؟ كلامك هذا كآنك بنت مو صبي وكأنك ...........
المهم ان قطعت عنه
عشت مع شباب قطعه ١١ مده سنيتين الى ٣ سنين لين تأذيت منهم و من استغلالهم لي ، طلعوا يستغلوني ويستغلون اسمي
طبعا قاموا ربعي القدامى يذكروني و يقولولي ارجع و اترك عنك العيال اللي تمشي معاهم
وكل يوم يمرني واحد من الشباب للبيت ياخذني معاه بالسياره نفتر بالمنطقه ويسولفلي ويطلب مني ارجع
لين جاني راعي الدوانيه نفسه وقالي ان مارجعت و تركت عنك العيال لا تعرفني ولا اعرفك
قلت خلاص راح اجيكم
المهم جيتهم وبالدوانيه قالولي ضايقوك بشي عيال قطعه ١١ ، وقاموا يسردون السوالف بعض الشباب اللي يقول مسكت اثنين منهم قبل و فركتهم واللي يقولي تعرف فلان فيهم ؟ قلت اي اهو صاحب الدوانيه مالتهم اللي يقعدون فيها
قال هذا كل يوم افركه بالمدرسه لين جاني يبي يكسب ودي وقام يجيبلي من بيتهم سندويشات
المهم قالولي فيهم احد ضايقك ؟ قلت والله اجرحوني وقاموا يستغلوني
والله ان السالفه صارها اكثر من ١٠ سنين ياجماعه ، الى اليوم ما شفت ولا واحد فيهم ولا حتى سمعت خبر عنهم مع انهم بنفس المنطقه
ماادري شنو سوو الشباب اللي خلو عيال قطعه ١١ ينقرضون
انا ادري يجي بوحا الحين يقول مسوي نفسك بايعها وانت اكبر ملطشه مو بالمنطقه بالكويت كلها
الله يسامحك يا بوحا او مهند بالعربي او بلاك سميث بالانجليزي
انا مندوب ولد بطنها اللي عروقه بالماي اصير ملطشه ؟
قويه هذي
لكن هذا كله من الماضي
بس الروح الاجراميه مازالت فيني و بربعي
قبل شهر صفط ولد عم رفيجي عند الدوانيه على جيتي نفس هذي
قلتله بسوقها جان يعطيني المفتاح ، وقعدت افتر بالمنطقه
وكانت بدون قزوز ، يعني شكمان ، وكان الصوت مزعج ، وقعدت افتر فيها واشوف العيال يطالعوني ويضحكون متحطمين فيني
رجعت وقلتله تبيع ؟ قال لأ
لو يبيع كان شريتها والله و رجعت ال٢ او ٣ سنين اللي ضاعوا من عمري
ولو اشتريها اركب بوحا على يميني وننطر المطر
في موسيقى
ومن هذا المنطلق اقول للكويتيين اذا عندكم مشاكل مع اي مصبنجي اصلي بالكويت يقولي وانا اكفيك شره ، بشرط مصبنجي اصلي مو ابو طقه ، كل مصبنه الكويت بالمخبه كبير وصغير
صلاه جمعه باي
المشاركة الأصلية كتبت بواسطة voicee
