لا انا مسلم سني
-
الحين شهر 4 مثل ماانتوا عارفين
و هذا الشهر في اكتمال البدر واهي ايام 14 و 15 و 16 و قبل وبعد
ولما تكون الرياح شماليه خفيفه الى معتدله السرعه و السماء صافيه او بعض الغيوم مثل قبل امس كان غيوم و رذاذ المطر ينهمر علينا
هذا الوقت اهو وقت عبور حمام البر كما نطلق عليه بالكويت
او القمري
وانا من محبين هذا النوع من الطيور المهاجره بل مغرم به لحد الجنون
هذا النوع هو افضل انواع الطيور المهاجر طعما
يعني ان سألوك وقالوا شنو افضل الطيور من ناحيه الاكل يعني , قولهم القمري
مشهور انه من اجود انواع الطيور المهاجره بالطعم
وانا اتعنى للنوع هذا تحديدا واروح لكل مكان اسمع انه يعبر منه , الا الاماكن الممنوعه مثل شاليهات النويصيب و بنيدر , مع ان الصيد كله هناك او اغلبه
لذلك اقول
حاليا اهو موسم الحمام القمري من بدايه شهر 4 و الكثره بمنتصف الشهر لما يكتمل القمر وتكون الرياح شماليه
على فكره
الطيور اذا كان في احد يهوى صيدها لا يخرج للصيد الا اذا كان الهوى شمال , غيره لا يروح ويتعب نفسه لأن الطيور لاتخرج او تعبر الا ان كانت الرياح شماليه او شماليه غربيه\شرقيه
ان كان الهوى جنوب لا يطلع ويضيع الجهد والمال والوقت
طبعا انا اتكلم من الكويت و الطيور المهاجره , يعني مو يشوف زرزور فوق بيتهم يقول كرزان نصاب ماعنده سالفه , هذا زرزور والهوى جنوب
انا اتكلم عن الطيور المهاجره وخصوصا خصوصا حمام البر "ألقمري"
المهم
الحين اخر موسم للقمري والبدايه كانت شهر 9 ويستمر الى شهر 10 وبعدين يتوقف , وهذا العبور يكون من افريقيا مرورا بجيزان جنوب المملكه ويمشي يروح منطقه في السعوديه اسمها ام الحمام , مااعرفها ولا عمري رحت لها لكن من كلام الشباب السعوديين اللي اعرفهم يقولون هالمنطقه مشهوره بالحمام
المهم ان يعبر من افريقيا مرورا بالسعوديه والكويت والعراق الى اوربا و غرب اسيا
والعوده من اوربا الى شمال افريقيا من المغرب خصوصا و ينزل الى دول افريقيا ويروح السودان بعد لأن الشباب يروحون السودان و يصيدون القمري بكثره
احنا فقارى مانقدر نروح السودان ولا المغرب , لذلك ننتظر الشي القليل اللي يعبر علينا
لذلك انا هالايام اروح البر واشوف اذا يمر علي او لأ , اهو ماله وقت معين , يعني تروح اليوم الصبح ماتشوف ريشه و ترجع بيتكم , يكلمونك ربعك يقولولك مر علينا العصر
او تروح يوم وماتحصل شي ترجع بيتكم و من باجر تسمع ان ضرب الحمام اليوم
يعني ماله وقت معين , اللي يبيه لازم يقعد بالبر اكثر من يومين في موقع العبور وينتظر
مثل القناص اللي يختبئ في مكان عده ايام ينتظر الهدف بدون كلل او ملل
انا امس رجعت من البر واللي قبله هم رحت
واليوم الساعه 4 الا ربع بتوقيت الكويت بروح و انتظر قبل شروق الشمس اكون مستعد تحت الاثل و اشوف اذا يعبر علي
والسلام عليكم ورحمه الله وبركاته