انا مستغرب من بعض الناس صراحه
ماادري احس مالهم معنى بالحياه او يعني ناس مالهم اي هدف
مثلا
يجي واحد عمره 30 سنه , تقوله تعرف بالكمبيوترات حتى لو معلومات بسيطه ؟ يقولك لأ
تقوله تعرف بالطبخ , يعني مثلا طلعت مخيم او مكان بعدين انت وربعك تعرف تضبط الطبخ ؟ يقولك لأ
تقوله تعرف للسيارات لأن عندي مشكله بسيارتي و ابي اي شخص حتى لو يفتيلي من عنده , تعرف انت ؟ يقولك لأ
تقوله ودي اسافر بس ماادري وين اروح , تعرف بلد جميل , اي بلد مو شرط بلد معين ؟ يقولك لأ
تقوله ابي اصيد سمك وماادري شنو استخدم طعم ولا عده الصيد , تعرف بصيد السمك ؟ يقولك لأ
تقوله ودي اصيد طيور , تعرف بصيد الطيور ؟ يقولك لأ
تقوله عندي مشكله عائليه ولازم اشكي لأحد عل وعسى يشوفلي حل , عندك خبره بالمشاكل العائليه وحلولها ؟ يقولك لأ
تقوله تعرف عن الالعاب ؟ يقولك لأ
تقوله تعرف شي من علوم الدنيا ؟ يقولك لأ
تقوله تعرف بالقانون لأن عندي مشكله وماادري شسوي او وين اروح ؟ يقولك لأ
ناس ماتعرف شي بالدنيا ابد , مايعرف الا يقعد في بيتهم ياكل ويشرب وينام ويشجع ريال مدريد او برشلونه او افرقه ثانيه ماادري شسمهم و دوري ايطالي ودوري انجليزي
بس هذا اللي شاطرين فيه
المشكله انهم يدخلون الانترنت و حياتهم بالانترنت stock مادري اذا الكلمه صح , يعني يدخل ويطلع بدون اي فائده اكتسبها , مايدخل مثلا جوجل يبحث عن علم او موضوع ولا اليوتيوب يشوف معلومات فيه
والمصيبه انهم متروسين بالنت , وتعرفهم بطريقه بسيطه , انهم اكثر ناس ينشبون فيك , يعني تكتب موضوع يكونون معارضه على طول بدون علم و درايه , وبالاخير يكتشف انه كان غلطان وينحاش , اسبوع و اقل بعد تشوفه مناشب واحد ثاني بموضوعه وبالنهايه هم غلطان
تكتب موضوع مثلا تقول
انا افضل جيب تويوتا او نيسان , لأن هالجيبين اشهر جيبين لمنطقتنا و تكاد تكون اعطالهم معدومه , يعني الواحد فيهم يعيش معاك 20 سنه
لو تخيرني بين جيب لاند كروزر او سفاري و بين رنج روفر راح اختار الياباني لأن اقوى واحسن ويعمر اكثر
يطلعلك ابو الشباب هذا طاق الرصيف و جايك مطفي الليت ويقول
انت مع وجهك تقارن السفاري برنج روفر ؟ مجنون انت ؟ صاحي ؟ وين السفاري ووين الرنج
ابك الرنج لو ابيعه اشتري 2 سفاري
تقوله يالحبيب انا مو قصدي ابيعه واشتري بفلوسه , انا اتكلم عن راحته البال و العمر المديد و السيارات اليابانيه معروفه عندنا بطول عمرها , يعني الان تطلع بالشارع تشوف جيبات يابانيه موديلات الثمانينات والتسعينات مافيهم الا العافيه وقاعدين الناس تستعملهم وتروح عليهم كل مكان
اما الرنج روفر صحيح انه فخم وغالي لكن مايصلح , ولو تبحث الان ماتشوف بالشارع لا قديم ولا جديد , لأن الناس تدري انه اعطاله كثيره ومايصلح , وماياخذه الا اللي فلوسه مايدري وين يوديها , و ياخذه يعيش عنده سنتين ويبيعه وماتشوف موديل قديم بالبلد
لا من الثمانينات ولا التسعينات , انقرضوا لأن حتى القديم وان قل سعره ايضا مايصلح لأن ان فتح حلقه مايسكره بعد
يجيك مره ثانيه ويقولك واهو مسكر الدريشه
ابك انت مو صاحي , ابك هذا مركب الملوك , تحط سفاري اللي تقول طراد و لاند كروزر عن الرنج , ابك هذا فخم و راحه و منظر و اغلى من السفاري واللاند كروزر
تقول يابن الحلال انا قلت انه غالي وفخم وكل شي لكن انا اتكلم عن استعمال
يجيك مره ثالثه ويقولك
ابك انت تقارن الياباني بالاوربي ؟ ابك هذا صناعه اوربيه
المهم ان نهايه الموضوع سبيت الشخص هذا وسبيت اهله فوقه و كبر الموضوع و صكوني باند من الموقع
هذا واحد من العينات اللي تعرف انهم حشو دنيا , مالهم اي معنى بالحياه , ولا يفهمون شي ويسوي روحه يفهم و يدخل بأي موضوع ويناشب العال
ملاحظ ان في ناس هني جذي بعد , ماعندهم اي شي ولا حتى هوايه غير ريال مدريد