انا خبرتي بالامور هذي من زمان , اخر سياره سبورت عندي كانت سنه 1996
لكن احاول اتذكر , وانا بصراحه مااعرف كثير عن سيارات الدودج بس اعرف ان في مكاين عاديه و مكاين هيمي اللي تكون اقوى , وبشكل عام اعرف الامور اللي تركب على المكاين من هوائيات و لغمات
لكن تأكد ان الامريكي بالذات 50% قطع و 50% برمجه , يعني ماكو شي تركبه وتمشي , الا ليتات و تبديل الستبه اذا بنشرت
لكن اذا ماعندكم ناس تعرف تبرمج لاتروح لأي احد ويلعب بالسياره لأن البرمجه لازم خبير دودج , يعرف عيارات الكمبيوتر كلها و يعرف شنو يزيد و شنو يخلي على وضعه
لكن تركب سستم شوته "انتيك" هذي تعطي المكينه هواء اكبر عشان تساعد على حرق البنزين , لازم يبرمجلك المبرمج عشان يحدد كميه الهواء اللي راح تسحبه المكينه
سستم القزوز عادي مايحتاج برمجه الا اذا ركبت هدرز لأنك راح تشيل الاكسجين سنسر و اذا شلته راح تعلم معاك علامه check engine , اذا الدودج مثل الشفرليه تشغيل عن بعد ماراح تقدر تشغل السياره عن بعد اذا هذي العلامه مولعه
المبرمج يلغي الكود مال الاكسجين سنسر ويطفي العلامه ومنها يلغي الفصله اذا كانت سيارتك تفصل على سرعه معينه
هذا الاكسجين سنسر و تلاحظ انه راكب على الهدرز , يعني اذا تبي تركب سستم اقزوز "شكمان" عادي , لكن اذا تبي تركب هدرز راح يبلشك السنسر هذا و اذا شلته راح تعلم علامه check engine لذلك تحتاج برمجي عشان يلغيها لك
هذي الهوائيات , سستم شوته انتيك , هدرز + سستم اقزوز
تعطيك بحدود 30 او 40 حصان زياده
في انواع كثيره من الهدرزات والقزوزات , الاشهر واللي كل الناس تركبه هدرز امريكان ريسنغ American racing وسستم القزوز عندك flowmaster , magnaflow , corsa
تقدر تدخل اليوتيوب وتكتب اسمائهم وتسمع اصواتهم
هذا حلو صوته كات باك
شوف من الثانيه 35
وميزه الهوائيات ان تعطي عزم و تخلي سيارتك استعمال يومي , عكس لما تلغم السياره وماتكون استعمال يومي , يعني تشيلها بالونش توديها الحلبه تسابق الناس و تشيلها مره ثانيه البيت بالونش
وما تهلك المكينه بعد و تقصر عمرها
عندك بلاكات و وايرات تساعد على زياده الشراره للبساتن وتحرق البنزين اسرعه , بعد ماتركب هالامور مع مبرمج مضبوط يعدل من برمجه السياره الاصليه ويزيد عزم المكينه شوي و يسرع تباديل الجير "اذا السياره تماتيك" و يزيد من الهواء المدفق للمكينه
راح تحس بالفرق وتشوف سيارتك تغيرت عليك
الكلام كثير وانا احس اني كثرت بالكلام , لكن نصيحتي لك لاتلعب بالسياره خصوصا اذا عند ناس غير متخصصين
لو انك بالكويت كان ارسلتك لشخص راعي لغمات و برمجه واهو نفسه عنده ترانز ام مسويه للسباقات و عنده محل يضبط الشباب , وهذا الشخص رفيج اخوي يعرفه معرفه شخصيه يعني مايغشني
لكن مااعرف بجده احد الا بوحا , وبوحا ماادري هل عنده سياره او مازال يسوق قاري
عموما اذا ناوي تسوي شي بسيارتك , لاتسوي غير الهوائيات لأن امرها سهل , لاتدخل باللغمات والسوبر شارج و الكرونا و الغاز وهالخرابيط
المشاركة الأصلية كتبت بواسطة Karazhan
