السلام عليكم شباب الوقت الضايع ورحمه الله وبركاته
شلونك شباب ووركرافت عساكم بخير , طيبين
بما ان الموضوع قديم و اهميه الرفع لابد منها لأن الموضوع يتكلم عن المواصفات التي تناسب اللعبه وغيرها من الالعاب , وبما ان الالعاب في تطور مستمر و ايضا الاجهزه في تطور فلا مانع من رفع الموضوع كلما جاء تطور من اللعبه من ناحيه الجرافيك و الاجهزه من كروت الشاشه
بختصر عشان مايزعلون بعض الناس
انا شخصيا لي تجربه مع الاجهزه , خصوصا واني ساكن بالملحق , مااقدر اشتري دسك توب لأن ياخذ مساحه عندي و نقل الديسك توب يتطلب جهد من مكان الى اخر
لذلك كنت اكتفي بأجهزه اللابتوب وابحث عن كل جديد , معاشي كان ضايع على اجهزه اللابتوب , الحين انا استقريت على IMac وحاليا املك جهازين لابتوب غيره واثنينهم جدد حاطهم بالزوايه مااستخدمهم
تعبت وانا ابحث عن جديد وقوي بأجهزه اللابتوب ولكن ما يكونون زي ابو شنب , يعني ينحط على يمناك
رفيجي ابو شنب اخذ جهاز ايام كانت الاجهزه جديده ب250 دينار , اهو جمع جهاز كلفه 600 دينار , نهايه الفيلم باعه على ولد اخوه ب90 دينار , ولما ولد اخوه اخذ الجهاز مااشتغل معاه طلع خربان , تصليح الجهاز ب75 دينار , قاله شلون تبيعني وتغشني
المهم رفيجي دفع ال75 للتصليح و بالحاله هذي طلع باع الجهاز ب15 دينار
واخذ جهاز جديد ايضا تجميع , والحين يقول انا تعبت من التجميع كل يوم يطلع شي جديد , قلتله انت لما تجمع قطع فرديه من كل شركه بالحاله هذي جهازك مايكون متناسق مع بعض , ولا يعطيك الجوده المرجوه , صحيح ان يكون قوي لكن عمره قصير لأن مو متوافق هذا مع هذا
المهم اهو قالي تبي جهاز اخذ من apple وانا سمعت نصيحته واخذت جهاز من هالشركه اسمه imac واللي اخذته من الجديد بعد لأن الشركه عندهم مستعمل وانا شريت منهم واحد مستعمل ومكتوب متى طلع من الشركه , يعني تاريخ لما اشتراه صاحبه الامريكي , وكان وقت قريب يعني الجهاز جديد تقريبا
المهم الجهاز i5 او مادري شنو بالضبط , لأن في 3 و 5 و 7 الجديد , انا اخذت 5 والجهاز يعتبر ديسك توب لكن كل شي بالشاشه , الهارديسك والشاشه مع بعض والكيبورد وايرلس والماوس بعد
المهم قلتله يقولون التحكم صعب بالماك قالي بسيطه انزلك وندوز 7 بشكل رسمي لأن شركه ابل يعرفون ان الناس على الوندوز لذلك حطوا هم الشركه مكان للوندوز يعني مو تروح لبنغالي بحولي يركبلك وندوز ويلغي الماك
يعني شغل رسمي من الشركه
المهم ركبت الوندوز ودخلت ووركرافت تدرون اول عمل قمت فيه ايش ؟
البكاء
اي من بعد اللابتوب والتعليقات واللاق وكرت الشاشه مايتحمل الحين يعطيني fps 120 بوقت الذروه وماينزل عن 70
من بعد ماكان يعطيني 12 , الله يرحم ذيك الايام , ايام المذله
واللعبه اصلا 60 حدها الاقصى
يعني لاتفكر انك تشتري كرت شاشه يعطيك 10000 لأن ماتستفيد شي , هذا للأفلام ياخذونه مو العاب نفس ووركرافت وغيرها لأن هالالعاب يقولولك انها 60 فريم , يعني ان صعدت اكثر ماتحس بشي
يعني ان شريت جهاز وعطاك 60 يعني جهازك قوي خلاص لا تطوره بعد , واذا عطاك 50 40 هم زين مو شرط 60
المهم ياجماعه الخير انا بوصل رساله للملايين
اذا تبي جهاز العاب , وانت ساكن بالملحق او بغرفتك وكلها اغراض ماكو مكان تاخذ ديسك توب , لا تفكر تاخذ تجميع لأن التجميع قوي بس عمره قصير وكل يوم قطعه محترقه عليك
اخذ imac لأن شركه apple تعطيك جوده , وتظامنا مع القدس لازم تشتري من ابل لأن صاحبها سوري
للعلم ان صاحبي قالي الحين انت وندوز واللعبه طالعه عندك بالشكل هذا , تدري لو تشغلها على الماك تطلع اقوى بعد
قلت انا راضي بالشي هذا , اول مره بحياتي اطقها صح , واول مره بحياتي اشوف الfps فوق 60
لذلك انا انصحكم بالجهاز هذا , والتنقل بين الماك والوندوز سهل , اول ماتشغل الجهاز خلك ضاغط كوماند و كنترول , ماادري اذا صح الازرار هذي , المهم يقولك تبي ماك او وندوز , وتروح وتقدر تقسم الذاكره انا ذاكره جهازي 1 جيجا , تقدر تخلي 500 لكل وندوز
والماك ولا اكبر راس يقدر يخترقه , انسى شي اسمه فيروز او ملفات اختراق او اي شي من هذا القبيل
اما الوندوز نصابين , وندوز مسوينه وفاتحين البروتلات كلها عشان يستقبل المخترقين والفيروزات عشان تشتري منهم برنامج حمايه او مضاد للفيروزات
يعني ماكلينك من الصوبين
شركه ابل تعطيك جوده بالصناعه وكل شي , واذا نزل وندوز جديد تدخل موقعهم تنزله وتمشي , واذا كان بفلوس راح يطلع عليك ب2 دولار
اما وندوز يقولك في وندوز جديد اسمه اكس بي سعره ب80 دولار وانت تدور رفيجك عشان تنزله كوبي
بعدين يطلع وندوز 7 وسعره 120 دولار اصلي وتقعد تبحث عن كوبي ب5 دنانير عشان تركبه
وفوق هذا شغلهم تجميع , يعني تشتري قطع من شركات مختلفه وبالنهايه تركب وندوز من ماكروسوفت , يعني كأنك متسلف قطع من هنا وهناك عكس شركه ابل اللي كل اجهزتها من تطورهم وصناعتهم واذا عندهم شي من شركه ثانيه يكون موافق لأجهزتهم 100%
عرفت السالفه الحين , عشان يكون الجهاز كل القطع مناسب ومكمله لبعض يعطيك جوده قويه وعمر طويل
عموما كل واحد حر بلقاليقه , وانا جربت كل شي وعرفت ان ابل هي اللي تستاهل تقط فلوسك عليهم وتقعد بالظلال
والسلام عليكم ورحمه الله وبركاته
