طلب تجميع جهاز جديد

[JaRa7oO]

السلام عليكم ورحمة الله و بركاته



الصراحه شباب انا ناوي اجمع جهاز جديد لتشغيل الالعاب
عليه و اللي بغيته منكم النصيحه والارشاد لاني قفل صراحه
بالشغلات ما اعرف الا القليل و منكم نستفيد بشنو تنصحوني
و شنو يتطلب الجهاز من قطع حتى يكتمل و شنو الافضل اني
اجمع او اروح للبائع و اقوله اني محتاج الى جهاز للألعاب
و جم يكلف الاثنين علشان احسب احسابي و اخلص شغلي
مره وحده بلا مشاوير بلا بطيخ وانا طبعا من الكويت
فاذا ممكن احد منكم يقولي وين احصل احسن شي بالسوق
و شاكر لكم حسن مطالعتكم و اسف على الاطاله سلام

[Gentleman]

اهلا اخوي

انا ايضا بالكويت

وانصحك انك تشتري جميع قطعك من الانترنت ارخص واحسن

حيث انه ببلدنا الكويت للأسف قطع الكمبيوتر غاليه جدا جدا

ايضا توفر السلع في الانترنت بشكل كبير حيث انه هناك قطع للكمبيوتر لم تنزل بالكمبيوتر بعد ولكنها نزلت بالاسواق الاوروبيه من 3 شهور او يمكن اكثر ( يمكن تحصلها ولكن هذا نادر جدا جدا )

تصور سعر كرت الشاشه ( اي نوع من انواع كرت الشاشه) بالكويت تقريبا ما تحلصه بأقل من 70 دينار ( اذا حصلته ارخص فهذي فرصه ثمينه ) وهذا الكرت بالانترنت بالراحه تلقاه تقريبا 45 دينار ويمكن تلقاه ب 40 ( شفت الفرق)

وذا اشتريت جميع قطعك من الانترنت فراح يصير ارخص بوايد


هذا الي انصحك فيه

والقطع راح ينصحونك فيها الشباب انشاله وشكرا

[WE Vll]

والله اذا ما كان عندك خبرة خذ القطع من السوق المحلي وريح بالك...
أولا ضمان... ثانياً أن السعر مقارب!

حيث سيكلفك الشحن والضريبة و الوسيط.... ثمنا قريب أو أغلى من ثمنها عندكم!!!

بالنسبة للمواصفات فضع ميزانيتك وسأضع لك المواصفات....

[BIG-M]

اخي متوسط قيمة جهاز العاب من الفئة المتوسطة بالسوق السعودي 1800$ .

"طبعا القطع تجميع"

[WE Vll]

متوسط !!

ظلمت السوق كثير....

لأني شاري جهاز عالي الأداء بسعر 1700$!

[JaRa7oO]

اخوي gentelman113
مشكووور على المعلومه و وايد ناس قالولي انه ارخص و فعلا ارخص بس مثل
ما اخونا WE Vll الشحن و جذي راح يأذيني فما افكر اني اشتري من النت او
يمكن اسويها


اخوي WE Vll
المييزانيه موجوده والحمدلله بس مو معنى هذا اني اصرف على الهبل لا قال
رسول الله صلى الله عليه و سلم : (( ان المبذرين اخوان الشياطين )) صدق
رسول الله صلى الله عليه و سلم


اخوي BIG-M شكرا على الافاده بس هل انت تقصد السعر بالدولار ولا بالريال
السعودي لاني الصراحه ما اعرف باسعار الاجهزه لان كل ما بغيت جهاز قلت
حق الوالد يبا بغيت جهاز يديد قالي انشاءالله و يروح يبيلي اخر موديل من DELL
لان الوالد يشتغل في مجال الكمبيوتر في وزارة العدل الكويتيه مدير قسم النظم و
المعلومات فعلشان جذي انا موليه ما اعرف بقطع الكمبيوتر ولا مريت بتجارب معاها



آسف على الاطاله القصه الطويله و يا ريت اخوي gentelman113 تساعدني
في ايجاد الجهاز المناسب دامك بالكويت و اذا ما فلحنا فهم الاخوان WE Vll و
BIG-M اظن ما راح يقصرون معاي في القطع و تجميع جهاز جديد سلام

[BIG-M]

اخي اختار من الفئات التالية :-
من 150 دينار الى 300 :
Intel Celeron or P4
VGA ATI9600PRO or Geforce NX6600
Ram 512
HD 80Gb
---
من 300 الى 500 :
AMD Atholn64 Or Intel EE
VGA Geforce 6800GT Or Ati X800 XT
RAM 1GB
HD120Gb
---
اكثر من ذلك :
AMD Athlon64 X2 or Intel D
VGA Geforce 7800GT or ATI X1800XT
RAM 1GB
HD200GB

---

المذربورد يعتمد على اختيارك لـ Intel او AMD

يفضل استخدام AMD في مجال الجيرافكس و الالعاب
و Intel في البرمجيات

[Baraa]

JaRa7oO :
أخي نحن لا نقصد أن تبذر ..
ولكن نريد ميزانيتك ..
أي ما تريد دفعه للجهاز , حتى نختار لك قطع تناسب ذلك ..
أخي BIG-M , بالنسبة للجهاز من الفئة الدنيا فالمعالج سيئ جدا وبالإمكان ايجاد أفضل بكثير :
AMD Athlon 64 Sempron ..
------------------------------------------------------------------------------------

[Gentleman]

اخوي jaRa7o0 راح اساعدك انشاله

عندك طبعا محلات حولي ( شارع بن خلدون )

انا اقول اتبع التعليمات التاليه وانشاله ما راح تخسر

1- حدد ميزانيتك لنا

2- سوف نعطيك القطع المناسبه

3- سجلهم بورقه

4- اذهب لحولي لشراء لقطع وطبعا لا تنسى انك تسأل محل محل واحد ورا الثاني للقطع لانه مو كل محل عنده القطع المقصوده


واذا تبي نصيحتي اخذ كل قطعه من محل بروحها

يعني كل قطعه كاسر سعرها مع راعي المحل

لانه محلات الكويت عندنه ما يرخصون وايد للأسف

يعني اذا لقيت البروسسر ب 70 دينار حاول تكاسره ب 50الى انه تصل الى 62 او 65

وذا لقيت الرام ب 20 دينار حاول تاخذها ب 15 حتى تحصل عليها ب 17 او 18


وهكذا في كل القطع

لانك لو رحت تشتري الجهاز من محل و احد راح يطلع على سبيل 400 دينار راح تحن على راسه نص ساعه ويالكثير را ينزلك فيه 10 دنانير فقط ؟؟


الله يكون في العون ومبروك الجهاز مقدما

[JaRa7oO]

مشكورين و ما قصرتوا واذا على الميزانيه فانا كل اللي
املكه الان 500 دينار و اذا الشغله محتاجه اكثر فلازم
ابيع جهازي الحالي و انا ما عندي اي اشكل في هذا كله

عندي سؤال هل هذي هي القطعه المطلوبه فقط او في اكثر :
معالج
مذربورد
كرت شاشه و كرت صوت
مودم
رامات
هارد ديسك
دي في دي روم

[Gentleman]

ما خليت شي اخوي هههههه

اخوي لكي يشتغل الجهاز يحتاج الى كل الي ذكرته بدون المودم ولكنه ضروري طبعا للإنترنت وايضا كرت الصوت يأتي مع اغلب المذربوردات اذا ما كان جميعها بسسس وسلامتك وطبعا لا تنسى الشاشه و الكيبورد وو.. الخ

بس ممكن استفسار شنو مواصفات جهازك

[Baraa]

ولا تنسى الباورسوبلاي أخي !
فهو من أهم القطع الضرورية لعمل الجهاز بشكل سليم ..
يجب أخذه بشكل يتناسب مع القطع لديك ..
إن كان لديك كرت شاشة جبار (6800Ultra) , اقتني باور يناسبه وهكذا ..
-------------------------------------------------------------------------------------

[Gentleman]

ولا تنسى الباورسوبلاي أخي !

فهو من أهم القطع الضرورية لعمل الجهاز بشكل سليم ..
يجب أخذه بشكل يتناسب مع القطع لديك ..
إن كان لديك كرت شاشة جبار (6800Ultra) , اقتني باور يناسبه وهكذا ..
-------------------------------------------------------------------------------------

شكرا للتذكير

لا نسى البور سبلاي ايضا

[JaRa7oO]

حاليا مواصفات جهازي كالتالي :
1-المعالج انتل بنتيوم 4 2.8
2-الرام 256×2
3-كرت الشاشه تكرمون زباله للالعاب ( ياي مع الجهاز و طبعا من انتل )
4-طبعا الباجي ما اعرف عنه اي شي ولكن كل شي بالجهاز بلت ان ما عدا المودم
5-انا الحين راح ازيد الرام بس لو سمحتوا تقولونلي شنو اقصى حد للرام
مع العلم اني اقدر اركب 4 رامات على الجهاز في نفس الوقت و شنو كرت
الشاشه اللي يشغل لعبة بشكل جيد او ممتاز

وطبعا هذا كله اسوي بالوقت الحالي لين اييبلي جهاز يديد لاني بسوي نت وورك
ان ماي هوم و يعطيكم الف عافيه تعبتكم معاي وطبعا اليوم رحت منطقة حولي
و دورت ولقيت ارخص جهاز للالعاب بـ 208 و افضل جهاز ما يتعدى 350
دينار كويتي طبعا و هذا السعر ما يشمل الشاشه و الماوس و الكيبورد ...الخ

[JaRa7oO]

5-انا الحين راح ازيد الرام بس لو سمحتوا تقولونلي شنو اقصى حد للرام
مع العلم اني اقدر اركب 4 رامات على الجهاز في نفس الوقت و شنو كرت
الشاشه اللي يشغل لعبة بشكل جيد او ممتاز

سوري نسيت اكتب اسم اللعبه طبعا اللعبه اللي اقصدها هي لعبه واو اونلاين
World Of Warcraft
يعطيكم الف الف عافيه و الصراحه ازعجتكم وايد و ما قصرتوا حقيقه يعني