ذا جيت أوي في الرياض

[Tha prince]

ابشركم يا شباب ذا جيت أوي نزلت اليوم في الرياض اللعبة المنتظرة من

اول ما نزل السوني بالتحديد شريتها امس يوم الخميس من محل اسمه

نهار على شارع المدينة بالرياض في ظهرة البديعة 4242745

أول شيء تحسه اول ما تشغل اللعبة : يجي استعراض شركة سوني يدل

بإخراج حلو مجرد انك تظغط ستارت تجي اختيارات نيو جيم لود جيم أوبشن

====> لا يوجد طور حر تقتج تستهبل في المهام بس

اول ما تبدأ اللعبة تبداها بمطاردة اذا كنت من منتظرين اللعبة بشوق منذ الاعلان عن اول صورة لها
<== نفس الحالة

اول شيء بتحسه بخيبة امل كبيرة لأن رسوم الخلفيات سيء جدا لكن

الشخصيات رسوماتها حلوه بل رهيبه و اسلوب القتال عجبني بإمكانك

تصوب تصويب اتوماتيكي على اقرب عدو و تقدر تصوب تصويب حر ( مثل

ميتل جير ) وفيه امكانية الالتصاق بالجدار و الظهور المفاجيء للأعداء

( ميتل جير ) وايضا تقدر تآخذ رهينة مثلا تاخذ واحد من الاعداء تشوف كل

الاعداء رافعين يديينهم وتقدر تاخذ من الابرياء فيه حركة الدحرجة سرقة

السياراات تقدر تسرق أي شيءو تقدر تطلق على الكفر او اي جزء من

السيارة ( جراند ثيفت ) و الحوادث القوية تعدم السيارة بسرعة يعني ما
عاد تتحرك طبعا و الشوارع مأخوذة من لندن ( معروف )

والسياراات كلها مشهورة حتى الآن افضل سيارة وجدتها لكزز بأنواعها

على ماظن يوجد ثلاث انواع السواقة اكثر من رائعة ( التفحيط ) ظابطينه

لكن السيارة الي حتكون معك في اول مهمة راح تخليك تكره اللعبة من

بياخة سواقتها كأنك تسوق سيارة من لعبة في سوني ون علشان كذا

تحمل و حاول تفوز المهمة الاولى بعدين بتعجبك انشاء الله


اما القصة فما اقدر اتكلم عنها شكلها قصة رهيييييييبه في البداية تبدو قصة عادية لكن كل مالها و تتعقد



ولو سوينا لها مقارنة مع جراند ثيفت أوتو اقدر اقول

المستوى الاجرامي : جراند ثيفت أوتو

المطاردة خارج السيارة : جراند

المطاردة داخل السيارة : جيت أوي


القصة : جـــيـــــت أوي بدون منازع

رسوم الخلفية : جراند بلا منازع

رسوم الشخصيات : جيت أوي

اسلوب القتال : جيت أوي

الرجة والهبال : جراند طبعا

تجنين الحكومة : جراند

الاطرقة والمدن : على حسب إذا كنت تحب الطرق الصغيرة والزحمة

وتنظيم الي اقدر اسميه عمل فني طبعا حتكون جيت أوي في لندن

اما تبي شوارع فاضية وواسعة و سياراات شوية جراند

السواقة ( التفحيط ) : جيت أوي


الرسوم عامة جراند احسن لكن في رسم الشخصيات جيت أوي افضل
يمكن


الصعوبة : جيت أوي المهمة ألأولى يالله فزتها ترى والله اللعبة صعبة جدا اما جراند ثيفت أوتو كلها اركب السيارة و سو الي تبي



أما العيب الرسمي جدا جدا والي خلاني احقد على شركة سوني فهو
عدم وجووود أي شيء على الشاشة شاشة فاضية

لا عداد سرعة ولا طاقة للاعب

ولا كم بقي ذخيرة يعني يخلص المسدس وانت ما تدري لازم تعد كم

طلقت من طلقة :0) ولا ي شيء بالمرة بس لاعبك و انت تراكض وتسوق

الشاشة فاضي حاولت سويت كل شيء بالأوبن ما طلع لي ولا شيء
للأسف والله قهر

في الاير اقول اللعبة ما عليها كلام حلوه لكن خربووها بعيوب بايخة كانو

يقدرون يصلحونها علشان كذا اقدر اقول اللعبة مخيبة للظن و محبطة

لمنتظريها و تسوي صدمة ه:!


<=== منقهر على الاخير
ارجو أن اكون افدتم واي استفسار انا حاضر





تحياتي ;-)

[bir9]

كلامك صحيح
معقدة مرة بعد
و التصويب الاتوماتيكي (ابي اعرف كيف)
و مشكووور على الموضوع

[محب الأجهزة]

افااااااااااا أجل طلعت مخيبة للآمال ؟؟
طيب في اللعبة في صدق انك تدخل كل مكان وأي مكان ؟؟؟
واللعبة كثيرة التعليق مثل gta vice city ولا ماتعلق ؟؟
والشرطة قوية في اللعبة ؟؟ وهل يجيبون إمدادات وجيش ولا بس دوريتين ؟؟
وكيف نظام الشرطة يعني مثل جراند ولا غير ؟؟
وهل في تنسيم كفرات؟؟

وآسف للإطالة ..

[Tha prince]

التصويب الاوتوماتيكي بالظغط على زر R1 اما التصويب الحر بالظغط على زر R2

----------------------------------------------
محب الأجهزة :

افااااااااااا أجل طلعت مخيبة للآمال ؟؟
-------------------------------------------
ايه والله ياخوي شفت آخرتها ننتظر سنتين وفي الاخير لعبة عادية او عادي مرتفع المهم موب مثل ما توقعنا





طيب في اللعبة في صدق انك تدخل كل مكان وأي مكان ؟؟؟
-----------------------------------
ايه كل الاماكن تقدر تدخلها مثل درايفر 1
ما فيه ولا مكان تقدر تدخله إلا المكان الي تسوي فيه المهمة فقط لا غير بتة بتاتا
<=== حسب معلوماتي





واللعبة كثيرة التعليق مثل gta vice city ولا ماتعلق ؟؟
============
لا ما تعلق جيت أوي ابدا
لكن جراند ثيفت أوتو انا شريته ولا قد علق علي إلا اول مرة لعبت فيه بعدها ماشي معي زي الفل والله ولا دي في دي أصلي وانا شاريه من نفس المحل ( نهار ) قل له ابي نسخة ما تعلق ويعطيك انشاء الله








والشرطة قوية في اللعبة ؟؟ وهل يجيبون إمدادات وجيش ولا بس دوريتين ؟؟

حلوه دوريتين لا موب دوريتيين بس المسألة ان العصابات والشرطة تطاردك يعني كبسة العصابات تلقى معهم لكزز وسيارات و سواقتهم احسن من الشرطة و يطلقون عليك رشاش ومطارداته اقوى من جراند ثيفت أوتو لأن الشوارع ضيقةو زحمة سياراات تحتاج لواحد طارة علشان تضيعهم و الشرطة بس تحدد و تحاول توقفك بس اذا عصبت سوت لك حاجز فقعت كل كفراتك و بن امك تحرك
اما عن الجيش ما حتى الآن ما جاني شيء ومثل ما قلت اصلا اللعبة موب مثل جراند ثيفت أوتو يعني تلعبها علشان تسوي مهام موب استهبالية
يعني انا اذا لحقتني الدورية علشان مخالفات مرورية من الاستعجال واصلا مطاردة العصابات لك تخليك تتنرفز و تعكس ام الدنيا

وكيف نظام الشرطة يعني مثل جراند ولا غير ؟؟


لا نظام الشرطة يختلف اختلاف تام يعني في جراند متى تلحقك الدورية ؟؟؟ بس اذا قتلت احد قدام عيونهم او صدمت الشرطة في جيت أوي نظام واقعي جدا يعني لو يشوفك شرطي قاطع اشارة او معاكس الطريق على طول يمشي وراك و واحيانا اصلا تكو نمطارد من اول المهمة من الشرطة والعصاباات والشرطة اذا قربت عندك ولا قدرت تقتل الشرطي و نزل من السيارة وقرب عندك خلاص يكلبشة و يمسكونة

وهل في تنسيم كفرات؟؟

تقدر تطلق على جميع اجزاء السيارة مثل جراند تنسيم كفرات و تكسير جزاز و تشوف اذا جت طلقة وحدة على جزازة تسوي تشوف اثرها يعني الجزاز ما ينكسر كله مرة وحدة



وآسف للإطالة ..


وش دعوة الله يحييك واي استفسار ثاني انا حاضر وفي الخدمة



بس شباب انا نسيت اقول شيء نسيت اقارن بين جيت اوي و جراند
من ناحية الاخلاق

انا اقول لك جراند ثيفت أوتو كل شيء فيه وسخ كل شيء تقريبا يعني وانت في الشارع تشوف بنات الشاطىء والبنات الخاصين بيـ... الله يلعنهم
و صور و لودينج البداية
اما جيت أوي مادري وش اقول كننت متوقع انهم بيعالجون هالمشكلة على الاقل يلقون شيء يتميزون به عن جراند
في بداية اللعبة كل شيء محترم و في الشوارع ما فيه بنات لابسين ملابس لك عليها
لكن يوم اني فزت المهمة الثانية فجأة جابو البطل يكلم على واحد من المرقص والمرقص وش فيه فيه بلاوي الله يآخذهم ويلعنهم قولو آمين يعني الي لعب ديد تو رآيت وشاف المهمة الثانية يقول ايه يمكن زي كذا انا اقول لا العن والله البنت لاببسة لبس من كثر ما يسترها ما تشوفه اللله يلعنهم يعني بهالمشهد غطو على جراند ثيفت وكل شيء لا و من زين الطبايع الكلام مهم في القصة ولا تقدر توخر العروض بأي زر يعني شايفها شايفها ( بالنسبة للي يبي القصة )
انا والله غمضت وقعدت اسممع الله ياخذهم الحين كل الاالعاب الرهيبه لازم يدسوون فيها هالاشياء و لو اني متحفظ على كلمة رهيبه شوي بالنسبة للعبة جيت أوي
<=== متحطم من جد :"
المهم ما طول عليكم اي خدمة انا حاضر


تحياتي ....;-)

[AL_7RBY]

مشكور اخوي البرنس اليوم انشاله ابشتريها ;-)




الى الان لا توجد لعبة تهز عرش الكبير G T A ":"

[Tha prince]

الى الان لا توجد لعبة تهز عرش الكبير G T A
------------------------------------
كنا متأملين في جيت أوي بس يا خسارة تصدقون انه ما ينفع تآخذ ذخيرة يعي تاخذ مسدس تخلص طلقاته يذبه و وتروح تدور لك مسدس ثاني والله بديت اشك ان اللعبة الي نزلت عندنا تجريبيية



:غضب:
تحياتي ...........;-)

[mum]

والله اللعبة حلوة لكنها صعبة.... وفيه حاجة ودي أعلمها لكم وانا توهقت فيها اول ما لعب وهي كيف تزود طاقتك.... ببساطة اذا تكفخت( اصبت ) اوقف وخله يرتاح شوي وتزود طاقته ... وشكراً

[Tha prince]

هلااااااا حبيب قلبي MSM
نورت الموضووع
تصدق عاد اني شاك في انك اذا ارتحت تزود الطاقة بس ما توقعت


اما عن اللعبة حلوه فهي حلوه و عن كونها صعبة هذا إلي محليها في عيني اكثر لكن بالله عليك لعبة من شركة كبيرة ولها سنتين تسويها تتوعد انها بتكسر السوق ومادري ايش في الاخير ؟؟ كسرت السوق بسمعتها فقط لكن اللعبة موب مثل ما توقعنا او علشان ما اوهق احد معي
ميب مثل ما توقعت انا على العموم اللعبة حلوه و ممتعة جدا والمهام ايضا حلوه و فكرتها جديدة ما تشبه لجراند ولا حاولت تقلدها في أي شيء
لكن المشكلة في الرسومات الخلفية تحس انك في درايفر 1 و مشكور على الرد

تحياتي ......;-)

[Tha prince]

MSM = mum


سوري حبيبي قلبي غلطة مطبعية

[mum]

العفو اخوي ... وترى الرسوم الخلفية مهيب سيئة لهالدرجة...

بس ودي اسألك وانت تدور بالمدينة ما لقيت ملعب نادي الأرسنال لأني دورت شوي ومالقيته ... واذا لقيته انت قلي لأن ودي أسلم على الشباب هناك

[solidsnake13]

هل اللعبة تستحق الشراء ولا هي لعبة عادية وتمشاية حال:0)
وكم تعطوها تقدير

[|*|The Ruler|*|]

تراك غلطان ..... ذا جيت اوي نزلت صح لكنها ديمو مهيب كامله ...
والدليل ادخل هنا تبي تلقى ان اللعبه ما حددوا لها غلاف اصلاً .. وانها راح تنزل 21\1\2003 يعني بعد شهر ونص تقريبا من الان;-)

[stuntman2004]

مشكوووور

[محب الأجهزة]

توقعت هذا الشيء .. لأني سمعت أن اللعبة بتنزل في 2003 مو الحين .. على كذا اللعبة صارت ديمو ..

[Dr-CuTe]

النسخه اللي نزلت هي النسخه الاوروبيه

و النسخه الامريكيه تصدر بعد شهر ونص