يالله من زمان عن زر إضافة موضوع << إليكترو 2
صبحكم الله بالخير .. الموضوع أستأذنت من القيادة العليا لطرحه
لأنه يعارض بشكل جزئي أحد قوانين المنتدى وبيكون
تثقيفي للي ساحبين على الطرب العربي
أمثال سنكوح أبو هيفي نهي مدري وش اسمه خخخخ
.. سالفة ثانيه .. ماودي ينحرف الموضوع
عن إتجاهه الأصلي وندخل متاهات تحريم وتحليل ..
عزيزي العضو إذا أنت موافق على هالكلمتين الصغينونتين تفضل كمَل الموضوع
وإن شاء الله يكون خفيف .. ( بالنسبه لروابط الأغاني فممكن الواحد يلاقيها
في أي موقع بغيت أسدحه بس قالوا لي تبطي عظم ممنوع ياسي غريب )
الموضوع على شكل سلاسل والجزئيه الأولى منها
لـ مملكتي الحبيبه ( صورة قلب منفضخ ويطربق )
.
.
عندما نتليقف ونجلس نفكر في الطرب في السعوديه أول مايتبادر إلى الذهن
صورة محمد عبده لابس بلوزه كروهات وكرفته وجالس يدندن : أيـَوووه قلبي عليك ألتاع
الصوره ذي صحيحه جزئياً اللهم ينقصها المرحوم طلال مداح و
الرائع ( طارق عبدالحكيم ) بالإضافة لـ عمر كدرس و سامي إحسان
ولطفي زيني وسراج عمر والشاعر الكبير إبراهيم خفاجي وطلال باغر
طبعاً هالأسماء أبتدت من خلال فترة الستينات ..
خلال كل تجربه فنيه في كل دوله إن شاء الله بنركز على أبرز أثنين أو ثلاث فنانين فيها :
ومن لنا إستفتاحيه غير أبو نوره ؟
ولد في جيزان سنة1949 ــ على فكره دايم يتعيرون أهل جيزان
مع إن معظم المبدعين منها مثل رئيس تحرير عكاظ والكاتب عبده خال وغيرهم ــ
وأنا شفت البيت اللي انولد فيه في منطقه إسمها الـدرب ..
طبعاً ماكان فيه الا طلال لحاله في الساحه ويسوي علينا فنان وإنه قوي
بزغ نجم أبو نوره خلال فترة الستينات وكان عمره تقريباً 14 سنه
وكانت بداياته من خلال أغنية لنا الله .. اللي سوت صجَه موب طبيعيه في ذاك الوقت
وكانت أتوقع من ألحان عمر كدرس الداعم الأول لمسيرة ابو نوره
بعدها توالت نجاحات أبو نوره من خلال تعاونه في فترة السبعينات
مع الأمير خالد الفيصل في عدة أعمال يشهد لها التاريخ ( أيَــووه -سافـر وتـرجـع )
.. رغم هالنجاحات وإمتلاكه صوت أسطوري قليل نسمعه في هالزمن
أبو نوره جنَط أم المجال الفني والشهره وسافر إيطاليا يدرس السفن << يا إنه كان رايق بشكل
بعد مارجع شاف إن ماحد يسوي سفن وأكل هوا قال مالي الا الغنا
ودخل تجربه جديده وهي التلحين .. ولحن العديد من الروائع
مثل الأسطوره الوطنيه اللي يحبها ثريول ( فوق هام السحب ) والبراقع ومجنونها
وغيرها واجد ..
على نهاية السبعينات وبدايات الثمانينات << ركزوا حطها كلام موب أرقام لأنه يدري العالم
تحوم كبدها من الأرقام الكثيره
بدا أبو نوره يكتسح الوسط الفني وبشهادة المرحوم طلال ( أنا وراء خـروج عـبادي وعبـد المجيد
لمنافسة محمد .. ) .. كل العالم العربي كان يشهد موجة محمد عبده
في المغرب الأقصى يشغلون أغانيه مع إنهم مايدرون وش الطبخه
في مصر أكثر ماكانت منتشره هي الجلسات لأبو نوره اللي يغني فيها الروائع
المصريه مثل الأطلال لأم كلثوم وغيرها
كان شئ معروف ( ولازال ) أي إسم أغنيه ضاربه لأبو نوره
يتحول لمنتوج تجاري مثل العطورات وغيرها
~~~~~~~~~
مسمى فنان العرب من مين تتوقعون جاء وأبلشونا فيه ؟
الرئيس التونسي الحبيب بو رقيبه كان حاضر حفل لأبو عبده
وبعد ماخلص الحفل قلَده وسام وقاله أنت فنان العرب ..!
ومن بعد ذاك اليوم والصحف ملغيه إسم محمد عبده وأبو نوره ومستعملة
لزمة ( فنان العرب ) .. طبعاً هاللقب ماجاء من فراغ << لاياشيخ
لا جد فيه ناس واجد يمغصهم أبو عبده ويقولون يااااي تراه قديم ومغبر ومدري وش ..
الخامه الصوتيه لحالها ( من غير الأداء المتميز ) يمكن نصنفه فنان مافوق بشري
بعض الأغاني تحس أبو نوره يغنيها بصوتين ..!
من المواقف اللي تشهد لفنان العرب خلال حرب الخليج توقف عن الغناء
واستمر توقفه بعدها لـ يمكن 8 سنين ..
إستخرج كل أنواع التراث السعودي ( الحجازي والنجدي )
لا لا .. إستخرج وإستنفذ كل أنواع الفنون في الجزيره العربيه
على فكره دايم أبو نوره طرف ثابت في المقارنات صح ؟
غصب عنك تحبه وتقدر صوته ..
أبوي مستحيل يسمع لأحد غيره هو وعبد الكريم عبد القادر
ودايم يقولي ( الآه من أبو نوره غير ..! )
له عدة روائع التاريخ يوقف بنفسه ويصفق كل ما أنذكرت :
مجنونها , على البال , شبيه الريح , مذهله , وهم , مجموعة إنسان , ماعاد بدري ( تتصنف لحالها )
مهما يقولون , هلا بالطيب الغالي , وينك يادرب المحبه , أشوفك كل يوم ..
وآخر الروائع كانت الرائعه ( الأماكن )
وكثير كثير .. ويقال أن رصيد أبو نوره 2000 أغنيه 200 منها وطنيه
محمد عبده إعذرني إذا قصَرت في سرد سيرتك بس وش اسوي للأسف
ماكانت في شئ إسمه دنيا يوم أنت جالس تنثر إبداعك يمين ويسار ..
فوووق هام السحب يا أبو نوره ..
.
.
ــــــــــــــــــــــــــــــــــــــــــــــــــــــــــــــــــــــــــــــــــ
صوت الأرض ( طلال مداح )
الأب الروحي للأغنيه السعوديه .. ولد في مكة وأنتقل للطائف
وصار يغني للمصطافين في الحفلات الصيفيه << ماهوب مثل الناس في منتزه
في عمر الـ 20 قرر طـلال مداح إحتراف الفن وسافر إلى لبنان
لتسجيل أول ( إسطواناته ) لأن لبنان في ذاك الوقت كان مشهود لها
بالعديد من العملاقه .. وأبتدا يقتحم الفن بـ ( وردك يـازارع الورد )
أشتهر طلال بتلحينه العديد من الألحان الضاربه وخصوصاً
للمرحومه ذكرى حيث كان طلال يعشق صوتها
تعاون صوت الأرض مع العديد من الشعراء أبرزهم خالد الفيصل ــ كالعاده ـ
وبدر بن عبدالمحسن اللي كتب له عز الوطن التي ’غنيت في مهرجان الجنادريه
ويذكر إن طلال هو بلحاله شارك في هالمهرجان .. ومن المناسبات اللي غنى فيها
طلال كاس العالم للشباب يوم استضافته المملكه أتوقع 1989 ــ إذا كنت غلطان صححوا لي ما أخبر بالضبط متى ــ
توفي أبو عبدالله في أحد البرامج التلفزيونيه عندما كان ممسك بالعود
( يالله إنك تحسن خاتمتنا وترحمه )