طرب يا .. عرب !

[! غــريــب !]

يالله من زمان عن زر إضافة موضوع << إليكترو 2

صبحكم الله بالخير .. الموضوع أستأذنت من القيادة العليا لطرحه

لأنه يعارض بشكل جزئي أحد قوانين المنتدى وبيكون

تثقيفي للي ساحبين على الطرب العربي

أمثال سنكوح أبو هيفي نهي مدري وش اسمه خخخخ

.. سالفة ثانيه .. ماودي ينحرف الموضوع

عن إتجاهه الأصلي وندخل متاهات تحريم وتحليل ..

عزيزي العضو إذا أنت موافق على هالكلمتين الصغينونتين تفضل كمَل الموضوع

وإن شاء الله يكون خفيف .. ( بالنسبه لروابط الأغاني فممكن الواحد يلاقيها

في أي موقع بغيت أسدحه بس قالوا لي تبطي عظم ممنوع ياسي غريب )

الموضوع على شكل سلاسل والجزئيه الأولى منها

لـ مملكتي الحبيبه ( صورة قلب منفضخ ويطربق )

.

.

عندما نتليقف ونجلس نفكر في الطرب في السعوديه أول مايتبادر إلى الذهن

صورة محمد عبده لابس بلوزه كروهات وكرفته وجالس يدندن : أيـَوووه قلبي عليك ألتاع

الصوره ذي صحيحه جزئياً اللهم ينقصها المرحوم طلال مداح و

الرائع ( طارق عبدالحكيم ) بالإضافة لـ عمر كدرس و سامي إحسان

ولطفي زيني وسراج عمر والشاعر الكبير إبراهيم خفاجي وطلال باغر

طبعاً هالأسماء أبتدت من خلال فترة الستينات ..

خلال كل تجربه فنيه في كل دوله إن شاء الله بنركز على أبرز أثنين أو ثلاث فنانين فيها :

ومن لنا إستفتاحيه غير أبو نوره ؟

ولد في جيزان سنة1949 ــ على فكره دايم يتعيرون أهل جيزان

مع إن معظم المبدعين منها مثل رئيس تحرير عكاظ والكاتب عبده خال وغيرهم ــ

وأنا شفت البيت اللي انولد فيه في منطقه إسمها الـدرب ..

طبعاً ماكان فيه الا طلال لحاله في الساحه ويسوي علينا فنان وإنه قوي

بزغ نجم أبو نوره خلال فترة الستينات وكان عمره تقريباً 14 سنه

وكانت بداياته من خلال أغنية لنا الله .. اللي سوت صجَه موب طبيعيه في ذاك الوقت

وكانت أتوقع من ألحان عمر كدرس الداعم الأول لمسيرة ابو نوره

بعدها توالت نجاحات أبو نوره من خلال تعاونه في فترة السبعينات

مع الأمير خالد الفيصل في عدة أعمال يشهد لها التاريخ ( أيَــووه -سافـر وتـرجـع )

.. رغم هالنجاحات وإمتلاكه صوت أسطوري قليل نسمعه في هالزمن

أبو نوره جنَط أم المجال الفني والشهره وسافر إيطاليا يدرس السفن << يا إنه كان رايق بشكل

بعد مارجع شاف إن ماحد يسوي سفن وأكل هوا قال مالي الا الغنا

ودخل تجربه جديده وهي التلحين .. ولحن العديد من الروائع

مثل الأسطوره الوطنيه اللي يحبها ثريول ( فوق هام السحب ) والبراقع ومجنونها

وغيرها واجد ..

على نهاية السبعينات وبدايات الثمانينات << ركزوا حطها كلام موب أرقام لأنه يدري العالم

تحوم كبدها من الأرقام الكثيره

بدا أبو نوره يكتسح الوسط الفني وبشهادة المرحوم طلال ( أنا وراء خـروج عـبادي وعبـد المجيد

لمنافسة محمد .. ) .. كل العالم العربي كان يشهد موجة محمد عبده

في المغرب الأقصى يشغلون أغانيه مع إنهم مايدرون وش الطبخه

في مصر أكثر ماكانت منتشره هي الجلسات لأبو نوره اللي يغني فيها الروائع

المصريه مثل الأطلال لأم كلثوم وغيرها

كان شئ معروف ( ولازال ) أي إسم أغنيه ضاربه لأبو نوره

يتحول لمنتوج تجاري مثل العطورات وغيرها

~~~~~~~~~

مسمى فنان العرب من مين تتوقعون جاء وأبلشونا فيه ؟

الرئيس التونسي الحبيب بو رقيبه كان حاضر حفل لأبو عبده

وبعد ماخلص الحفل قلَده وسام وقاله أنت فنان العرب ..!

ومن بعد ذاك اليوم والصحف ملغيه إسم محمد عبده وأبو نوره ومستعملة

لزمة ( فنان العرب ) .. طبعاً هاللقب ماجاء من فراغ << لاياشيخ

لا جد فيه ناس واجد يمغصهم أبو عبده ويقولون يااااي تراه قديم ومغبر ومدري وش ..

الخامه الصوتيه لحالها ( من غير الأداء المتميز ) يمكن نصنفه فنان مافوق بشري

بعض الأغاني تحس أبو نوره يغنيها بصوتين ..!

من المواقف اللي تشهد لفنان العرب خلال حرب الخليج توقف عن الغناء

واستمر توقفه بعدها لـ يمكن 8 سنين ..

إستخرج كل أنواع التراث السعودي ( الحجازي والنجدي )

لا لا .. إستخرج وإستنفذ كل أنواع الفنون في الجزيره العربيه

على فكره دايم أبو نوره طرف ثابت في المقارنات صح ؟

غصب عنك تحبه وتقدر صوته ..

أبوي مستحيل يسمع لأحد غيره هو وعبد الكريم عبد القادر

ودايم يقولي ( الآه من أبو نوره غير ..! )

له عدة روائع التاريخ يوقف بنفسه ويصفق كل ما أنذكرت :

مجنونها , على البال , شبيه الريح , مذهله , وهم , مجموعة إنسان , ماعاد بدري ( تتصنف لحالها )

مهما يقولون , هلا بالطيب الغالي , وينك يادرب المحبه , أشوفك كل يوم ..

وآخر الروائع كانت الرائعه ( الأماكن )

وكثير كثير .. ويقال أن رصيد أبو نوره 2000 أغنيه 200 منها وطنيه

محمد عبده إعذرني إذا قصَرت في سرد سيرتك بس وش اسوي للأسف

ماكانت في شئ إسمه دنيا يوم أنت جالس تنثر إبداعك يمين ويسار ..

فوووق هام السحب يا أبو نوره ..

.
.
ــــــــــــــــــــــــــــــــــــــــــــــــــــــــــــــــــــــــــــــــــ

صوت الأرض ( طلال مداح )

الأب الروحي للأغنيه السعوديه .. ولد في مكة وأنتقل للطائف

وصار يغني للمصطافين في الحفلات الصيفيه << ماهوب مثل الناس في منتزه

في عمر الـ 20 قرر طـلال مداح إحتراف الفن وسافر إلى لبنان

لتسجيل أول ( إسطواناته ) لأن لبنان في ذاك الوقت كان مشهود لها

بالعديد من العملاقه .. وأبتدا يقتحم الفن بـ ( وردك يـازارع الورد )

أشتهر طلال بتلحينه العديد من الألحان الضاربه وخصوصاً

للمرحومه ذكرى حيث كان طلال يعشق صوتها

تعاون صوت الأرض مع العديد من الشعراء أبرزهم خالد الفيصل ــ كالعاده ـ

وبدر بن عبدالمحسن اللي كتب له عز الوطن التي ’غنيت في مهرجان الجنادريه

ويذكر إن طلال هو بلحاله شارك في هالمهرجان .. ومن المناسبات اللي غنى فيها

طلال كاس العالم للشباب يوم استضافته المملكه أتوقع 1989 ــ إذا كنت غلطان صححوا لي ما أخبر بالضبط متى ــ

توفي أبو عبدالله في أحد البرامج التلفزيونيه عندما كان ممسك بالعود

( يالله إنك تحسن خاتمتنا وترحمه )

[! غــريــب !]

بعد جيل أبو نوره وطلال ظهر جيل الأخطبوط عبادي اللي كانت أغلب روائعه مع عبدالرحمن بن مساعد

ومحمد عمر .. وغيرهم كثير بس مايحضرني أسماء << طيب إنطم

بعدها ياساده

ظهر أقوى جيل في الأغنيه السعوديه

جيل راشد الماجد وعبدالمجيد عبدالله وخالد عبدالرحمن ورابح صقر..

وبما إني عاصرت هالجيل بتكلم حته حته عن راشد

لأنه وبكل صراحه يصنف في المرتبه الثانيه مع عبدالمجيد بعد أبو نوره

~~~~~~~~~~~~

وصفه مره الصحفي تيسير عبدالله ( راشد الماجد ؟ من يقول إنه من سكان الكرة الأرضيه ؟ )

راشد الصوت القادم من المريخ صاحب الطله الساحره والتعامل الذكي مع الإعلام

واللي إفتتح موقعه الرسمي قبل يمكن أقل من شهر ..

التواريخ والأرقام في حياة راشد مبهمه

لكن تقريبياً هو بدا الغناء قبل 20 سنه وأول أغنيه حسب

العديد من المصادر من التراث الشعبي ( لي بنت عم )

مايميز راشد بالإضافة لصوته الخرافي هو مثل ماقلت

تعامله الرهيب مع الإعلام يعني ماهوب مثل عزازي

مسوين لقاء معه وهو يآكل أيسكريم ويقول ( أنا أحب الآيسكريم

لأنه بارد والجو حار ) دايم الكلمات اللي يغنيها راشد

تكون خفيفه ومفهومه بشكل سريع للمتلقي ورغم بساطتها

إلا أن راشد يمنحها لمحه مميزه فتصبح رائعه صعب أن تنسى



وزياده على كذا تكيفه مع الأجواء المحيطه << دب قطبي هو ؟

فيه .. يعني على أيام 96 يوم كانت قصة الأسد دارجه

وكان الرهيب والكشخه هو اللي يتصور فيها وهو جالس عند كابينة

التليفون وماسك نوتة حقة الأرقام << قد سواها أخوه الكبير

كان ماشي .. ويوم دخلت الألفيه واستوردنا الحلاقين

اللي جابوا السكسوكه معهم شفنا أبو طلال مسكسك وكاشخ



البعض يشوفها موضه سلبيه .. أما أنا أشوفها إيجابيه جداً

لأن جمهورك يتغيرون فما بالك لو جلست تناظر فيهم وماتغيرت

مثلهم .. أكيد بيجنطونك

راشد أشتهر بالإضافة لمواكبته التقليعات الجديده

بفيديو كليباته المثيره للجدل .. وكلنا نذكر

سنة 2002 وكليب مشكلني اللي جنن أم العالم

عشان فيه مدري كم بنت لابسين جنز .. وطبعاً اللحين

الجنز ولاشئ قدام اللي تسويه هيفا ودومينيك خخخخخخخخ

راشد في فترة التسعينات كان هو وعبدالمجيد و خالد

ماسكين الساحه السعوديه وأنواع المنافسه

راشد ينزل ألبوم بعدها بـ أقل من كمن شهر عبدالمجيد يصقع بألبوم جديد

( هالفترة كانت أيام إبتعاد أبو نوره مثل ماقلت لكم بعد حرب الخليج )

لكل فنان أغاني يفتخر فيها في مكتبته ويطلبها الجمهور أكثر شئ

ومن الأساطير اللي تغنى فيها راشد ( المــســافر )

.. وهل تخفى أعظم روائع التسعينات ؟

كانت من كتابات البدر الرائع \ بدر بن عبدالمحسن

آخر ألبوماته ( الحل الصعب ) كان رائع بدرجة يصعب معها تقييمه

.
.

ــــــــــــــــــــــــــ

*نبذه صغينونه*

عبدالمجيد عبدالله

يستحيل أن ينشز هالإنسان

خامة صوتيه رائعه وذات إحساس مميز ..

رهيب والله رهيب .. من روائع ماغرَد به عصفور الفن

وكانت بداية بزوغ نجمه من خلال الوطن العربي كله

لأن قبلها أشتهر عبدالمجيد بجلساته اللي تغنى فيها بـ أغاني

أبو نوره .. آخر ألبوماته حليو نوعاً ما بس عيبه

كل شوي فيديو كليب كان احد حالف عليه كل شهر يسوي واحد



راشد الفارس ..

برز في أغانيه الحماسيه مثل من قدنا و شموخ .. ألبومه الأخير كان كله على بعضه روعه

لكن في أخر أعماله للمنتخب السعودي سرق لحن أغنية للشاب خالد وعادي ولاكأنه سوى شئ

عباس إبراهيم

يراه الكثير خليفة أبو نوره .. صوت خلاَب بمعنى الكلمه أشتهر في رائعة خالد الفيصل ( ناديت )

مستعجل على السكسوكه لدرجة إنه رسمها بقلم كحل خخخخخخخخ

أصيل أبو بكر

شفتوا إسم أبوه ؟ يسمونه في اليمن أبو الفن .. مشكلته دخل المجال الفني

مو كـ أصيل .. لا كـ ولد الأسطوره أبو بكر سالم فعشان كذا حورب من عدة جهات

صوت قوي وصاحب كمن أغنيه روعه ( بذمتك – شمس بيني وبينك )

أشتهر اكثر شئ في الخبر نفس الخبر

جواد العلي

البعض مايعتبره فنان .. والبعض مايعتبره رجال أصلاً

ماحد ينكر له كمن أغنيه زينه بس فيه كم ملاحظات على .. ولا بلاش

ساره

بإختصار .. حرمة

صوتها كويس بس من جانب ثاني زلابه بكل المقاييس

أنواع المشاكل والهوشات على غير سنع

وأنواع التفاهه في الكليبات

مانتشرف إنها سعوديه ..

طلال سلامه

قيثارة السعوديه .. يعيبه إنعدام تواجده الإعلامي

ولا صوته يستحق يكون في مرتبة راشد وعبدالمجيد ..!

نايف البدر

يمدحونه ويقولون صوت شاب رهيب ومدري وش

أنا بالنسبه لي عادي وأكثر من عادي وأغنيته محسودين يمكن تكون حليوه نوعاً ما


وعد

أفضل صوت نسائي سعودي حتى اللحين

وكفى باللي يسمع جنون عشان يصدق هالكلام

[! غــريــب !]

( فن... رمادي ..! )

تتسائلون ليش رمادي ؟

لأنه طبعاً ماهوب واضح ويقولون لهم فنانين الظل ويقولون لهم ( شبه فنانين )

نظراً لشهرتهم المحدوده في الجلسات .. بعضهم

نجح وخرج للوجود وأثبت نفسه وبعضهم مازال تحت ومستعد يسوي أي شئ

عشان الشهره حتى لو كانت النتيجه تخفيض من كرامته

من أشهر فنانين هالفئه \ خالد عبد الرحمن , رابح صقر

شقوا طريقهم بأنفسهم من خلال نجاحاتهم ويعتبرون اللحين من أعلام الفن السعودي

البعض مازال يتخبط في هالفئه ومن أشهر المتخبطين فارس مهدي .. صحيح إن صوته

مميز ( بس ماهوب حلو ) وثامر التركي وعزازي والعاهة الكبير جابر الكاسر

اللي سووا معاه مقابله بعد فيديو كليبه الفضيحه اللي فيه بنت تسطره وجلس يقول

( أنا واللهي أعتبر الكليب ذا نقطه سودا في تاريخي ومدري كيف سويته

بس بعوض جمهوري ) الله والجمهور أقص يدي إن ماكانوا عيال حارتك

يتميز هاللون الرمادي بجمهوره العريض اللي من القرى والحواري

لأنهم يعتبرون تمام المتعه في الأغاني المسرَعه اللي فيه ( اللي الأغنيه تشتغل

كأن الشريط مفروط )

وعلى العكس تماماً .. بشير شنان , عيسى الأحسائي .. رغم

شهرتهم المحدوده وبقائهم في الظل إلا إنهم يكسبون الإحترام

اليوم بعد الثاني من خلال تعاملهم الراقي ويكفي

إنهم شايلين شوفة النفس من حساباتهم

.
.
الموضوع جا مختصر وإن شاء الله يكون بادرة تعريف

كويسه بالفن السعودي .. الموضوع القادم إن ربي أحيانا

عن ديرة البرجين الكبيره اللي دايم يجيبونها في البرامج الخليجيه

ذات الإنتاج المشترك

ماعرفتوها ؟

ديرة حسين عبدالرضا << أخلص

الكويت ( صورة قلب يقرقع ويهز سامري )

قراءة ومشاهدة ممتعه ..

[Darkness withiN]

ديرة حسين عبدالرضا << أخلص

يخسيييييييييي!!!!مابقى ألا هالشيعي الإيراني (غريب يشد داركنس من شوشته ويشوته برا الموضوع)

أها..طلع عزازي مغني
(بسوريا ماسكين الصيني ويضغطونه بهذا اللقب 24 ساعة وفق شهادة مصدر رسمي موثوق )

عليك أنامل رهيبة ماشاء الله وأسلوب ممتع..بغض النظر عن الخامة الي ماتوكل ألا سم حافي لإنها بيع غير لازم بالشرع (غريب يستعين براعي الطيران موهوبيان ويرمي داركنس فوق ويعطيه موهوبيان دبل كيك تتبعها نطحة زيدان)


فدييييييتك فد و فد..بروح أكمل موضوعي,شسالفة الشباب ورا بعض موضوعات خخخ ماشاء الله

ايه صح..يسعد صباااحك ياعسل,ثوان بطب عليك بالماسنجر وأقلقك

[killer ss]

يخسيييييييييي!!!!مابقى ألا هالشيعي الإيراني (غريب يشد داركنس من شوشته ويشوته برا الموضوع)

هذا عيبنا.. لو انه توم كروز كان حطيته فوق راسك وهو نصراني انا ما ادافع عن الشيعه ولكن الحق يقال.

يعطيك العافيه يا غريب بس ضيقت صدري بجواد العلي لانه اصلا ما هو بسعودي

وشكرا...

[Darkness withiN]

القاتل..شيك ردي عليك بالخاص عشان مانخرج برا موضوع الرجال
وعالعموم توضيح للشباب بكلمتي الإيراني:قلتها لإن غريب ربط ذاك الممثل بالكويت وهو مو كويتي أصلاً
أما شيعي ماعليها كلام..ولا وش راي إلكترا:q


غريبوه ماشوفك كاتب عن حبيب قلبك ذاك الكثر
أنا ماسمعت له غير القصيدة الي غناها عن شمر<بدون موسيقى وبطيخ

وعجبتني مرره لإنها بدون موسيقى وفوق هذا عن الشمر فداهم أنا,ولا تعرف مالنا بالأمور ذي من سنتين خخخ

[Trapped Inside]

ولله كان ودي أشارك معك بس للأسف ما أسمع عربي كثير .. ومن بين الي ذكرتهم ما قد سمعت الا لراشد الماجد .. له كم اغنيه عجبتني وعبدالمجيد عبدالله صوته حلو ..

أذكر جتني فتره طحت بفارس مهدي وكم مطرب اماراتي .. بس بعدها سحبت عالعربي ..

المهم مشكور عالموضوع الطويل وسلمت يداك .

[Electro M]

عليك موضوع

مالقيت الا هالتحف عاد


المهم داركنيس
انت ابخص لان عندنا يرقعون له و يقولون حسين عبدالرضا
بينما عندكم اسمه عبدالحسين عبدالرضا
يعني شيعي من قلب بعد و كافر بنفس الوقت بما ان اسمه عبدالحسين و هذا كفر واضح

[Classic Evil]

ولد في جيزان و لا جازان ؟؟

على فكره دايم يتعيرون أهل جيزان

مع إن معظم المبدعين منها مثل رئيس تحرير عكاظ والكاتب عبده خال وغيرهم ــ

قابلت ناس منها, وحالهم مثل حال الصعيد, يضحكون عليهم وفيهم مبدعين, ولو إنهم يكونون مرات من جنبها ..

وأنا شفت البيت اللي انولد فيه في منطقه إسمها الـدرب ..

إياكم و تعظيم الآثار !
ويا حسرة.. آثار منو عاد (وجه الكلب اللي فوق مرة ثانية)

[! غــريــب !]

شيعي ماهوب شيعي

سعودي ماهوب سعودي

يجوز لامايجوز

جيزان أو جازان

هذا اللي طلعتوا فيها ماشاء الله من الموضوع ؟

وبيكون

تثقيفي للي ساحبين على الطرب العربي

داركنس .. كيلر إس إس .. إلكترو ..ترابد ..إيفل

مروركم ووضع بصمه لكم في الموضوع ـــ أياً كانت البصمه ــ يشرفني

[Electro M]

ياخي الموضوع لا يتوافق و هوا اللي ردوا حتى الان
لازم تستنسخ نفسك عشان تلقى واحد يرد عليك رد مناسب

يعني شيعي من قلب بعد و كافر بنفس الوقت بما ان اسمه عبدالحسين و هذا كفر واضح

تعديل بسيط و هي انه مشرك باسمه و موب كافر
الحماس و ما يسوي

[Son_OF_Liberty]

أشوفك ماخليت ولابقيت بمحمد عبده وكأنه الست أم كلثوم
قبل لا أترك الاغاني كانوا معظم ذولا المطربين اسمع لهم بأسثتناء كم واحد مثل جواد ووعد وساره
الي مدري من وين طلعوا أصلن

كنت مااطيق محمد عبده لكني كنت اسمع له كم أغنيه حلوه

وراشد الماجد كان أفضل مطرب سعودي عندي
أما لو انك تكلمت عن الغربي كان بأقولك ان Laura Pausini أفضل وحده عندي

[Trapped Inside]

لووول ما الومك قافله معك .. موضوع طويل وتعبت عليه وما لقيت تفاعل -_- .. للأسف زي ما قلت لك كان ودي بس مالي ابداً بالمطربين الي كتبت عنهم .. أعذرنا .

[smigle]

وين جواد العلي؟؟؟

[NsaN]

وعد
أفضل صوت نسائي سعودي حتى اللحين
وكفى باللي يسمع جنون عشان يصدق هالكلام

و عتاب وين راحت؟!

الله يرحم ايام الـ: هيه و هايو هيه..اااهااا..

بعدين بذمتك..سارة صوتها حلو؟؟
قمة النشاز و الاستفزازية بصوتها..

و اللي يقهر..انهم مسمينها ملكة جمال مطربات الخليج..على شو والله مادري