السلام عليكم ورحمة الله وبركاته ، شلونكم وشخباركم ؟؟ الحين بحط لكم أول درس لي ، وهو طريقتي في التلوين في برنامج الرسم الشهير الفوتوشوب ، (( عاد أول مرة تحط درس ، فمارح تفهمون شي )) ، ورح أطبق الدرس على إحدى رسماتي الي رسمتها بالرصاص ، والحين ، نبدي الدرس وبسم الله .
* الخطوة الأولى :
سو سكان لرسمتك طبعا ، وعدل فيها ونظفها من شوائب قلم الرصاص المزعجة ، وعدل تدرج قلم الرصاص حسب رغبتك
* الخطوة الثانية :
حط طبقة يديدة وسمها (( ألوان )) ولون رسمتك تلوين عشوائي بدون وضع ظل أو لمعة أو أي تأثيرات ثانية ، وبعدها نظف الرسمة باستخدام أداة ((Polygonal lasso )) وحدد الأماكن إلي طالعة فيها الألوان خارج حدود الرسمة وشيلها بالفرشاة العادية
* الخطوة الثالثة :
حط طبقة أيضا يديدة وسمها ((ظل)) علشان تسوي للرسمة ظل ويعطيها حياة وبروز أكثر ، واستخدم أداة ((Burn)) علشان تسوي فيها الظل ، وحدد عليها أماكن الظل إلي تبيها في الرسمة بشكل شبة عشوائي
* الخطوة الرابعة :
استخدم أداة دمج الألوان ((Smudge)) وحجم فرشاة الدمج (( 23بكسل)) ، وللأماكن الصغيرة خل حجمها (( 12 بكسل )) ، واليحن وزع الظل إلي حددته بأداة الدمج بكل حذر وحرص علشان لا تخترب الرسمة ، ولما تخلص توزيع الظل ، صغر من حجم الفرشاة وسو تأثيرات السحب بنفس الأداة إلي هي الدمج علشان يطلع الظل كإنه مكسر وحاد وخصوصا في الأماكن إلي فيها تجاعيد للوجه ، مثل ما أنا موضحة في الرسمة في تجاعيد الشخصية ... وبجذي نخلص الظل
* الخطوة الخامسة "
حط طبقة يديدة بعد طبقة الظل وسمها (( لمعة )) علشان نضع اللمعان للرسمة ، حط اللون الأبيض بالفرشاة العادية وخل الشفافية للون (( 100% )) في المكان إلي حاب تحط فيه اللمعة ، وطبعا مع تغيير حجم الفرشاة حسب المكان إلي تختاره ، وبعدها استخدم أداة الدمج من يديد وخلها بحجم (( 8كسل )) وقوة الدمج مالها بـ (( 80 أو 91 % )) وحرك الأداة يمين ويسار وفوق تحت ليم تحس إن اللمعة صارت خشنة وقاسية ومنكسرة ... وبجذي ننهي اللمعة بهذا الشكل
* الخطوة السادسة والأخيرة :
حط طبقة يديدة وسمها باسم (( خلفية )) علشان تشتغل في الخلفية على حسب ذوقك ... رح أخلي الخلفيات عليكم ، مال داعي أشرح شلون لإن الكل أكيد يعرف
وهذي هي الرسمة بعد أن وضعت لها خلفية ومؤثرات أخرى ، أتمنى تعجبكم
هاه ؟ شرايكم في الدرس ؟ حلو ؟ جيكر ؟ مفيد ؟ مو مفيد ؟ يالله أنطر ردودكم الحلوة على الموضوع ...