مذكرات عصقولة
الله يعينكم على القراية
---------------------------------
زواج عصقولة 1
موضوع اليوم يا حلوين ... عن ليلة عرسي !! وما ادراك ما ليلة عرسي !!!
(ايه يالله هذاكم دريتو اني معرسه خلاص فكونا لحد يعلق!!)
... في ذلك اليوم المشؤم وفي الصباح بالذات (لاتفوتكم الفصحى) ...استيقضت الساعه الثانيه بعد منتصف الظهر .. واطلع من حجرتي ...( ايه هين حجرتس معتس ثلاثن غيرتس وتقولين حجرتي!) ... والا هاك الهدووووؤ اللي يخيم على البيت وهو شي غير معتاد البته البته في بيتنا يعني مالك امل اصلا تنام لين تسع من صجة المبزره ومقامزهم فوق راسك خل عاد اليوم يوم العرس وانواع المبزره اللي مشرفين مع اهلهم عشان يحضرون العرس!
المهم قعدت ادوج في البيت حجرتن حجرتن حماما حماما حوشا حوشا ... والا والله ماهنا احد!
عندها اسقط في يدي ..( اروح وطي يا الفصحى).. يا ربيه وين اهلي وين طسو... وعندها صعقت بالامر الواقع!!!!!
اكيد انهم انحاشو عني وخلوني لانهم عارفين اني بفشلهم مع اهل المعرس وبصير رفلا طملا وخبلتن قاعده ...(ويـــــــن !! ولا خيال ولدي عبسي في زمانه حمد لله والشكر بس)
المهم قعدت على عتبة باب المدخل صنة القايله افكر .. لانهم يمدحون التفكير في القايله يقولون يساعد الانسان على التركيز ( ايه ميخالف !).. قعدت افكر همممممممممم... همممممممم.. همممممممممم... وين راحو يا ربي وين راحو يا ربي ؟؟؟؟؟؟؟؟
وفجاءه وبمساعدة القايله ذكرت انهم راحو للفندق عشان يرتبون العرس ...( لا تصدقون مغير قصر ابو خمسمطعش الف بس تبي تشخص)
مير معصي !!!! يروحون لعرسي وانا لا!!!! والله واقوم والبس عباتي وجزمة الرياضه حقتي ... عندي من الابتدائي ما أفلت بها ( أفلت = فرطت للأمريكان) ... وهات يا ركضي وعباتي تهفهف وراي ما شدها الا هامتي وركض وركض لين وصلت الفندق !!!- انواع الفقش
وادخل عليهم والهم مثل خلية النحل يشتغلون اللي يرتب الكوشه واللي يهوش البزارين حقين الزفه واللي يتطاق مع الصبابات على التليفون ... محدن جاب خبري اني جيت مير... واقوم وارجع من اول البوابه وأجيكم مسفحه تقل سنوكا يديني طايرتن بالهوا ..وانا لما الحين لابستن العباة لاحظو.. واجي اركض طـــــــــــايره " ياااااااااااااااااااااااااااااااااااا ..... من أنااااااااااااااا" ومع الركض مير ما قدرت اوقف الا بعد ما صكيت لي بزرين وثلاث كراسي على طريقي ---- يقال لها تمزح الحين
والله يوم ارتاعو اهلي ويجونك اخواني يتراكضون وهـــــــــــــــات يا تسطير وتدحيج وبقوس يحبها قلبكم.. على بالهم احد داخل على محارمهم وبالاخير واحد منهم فكر انه يفتش وجهي ويوم فتش والا والله هذي عصعص!!!! (بدري! )
ويقومون يسمون علي وياخذوني لغرفة العروس ويغسلون وجهي من السواد اللي فيه ما درو انها بقوسهم الزرق عيت لا تروح
" وش جابتس يا الخبله؟!" ... وارد وانا اصفق صفقتين بيديني هم احطهن على خصري ( تسن به خصر اصلا ).." لاااااااااااا والااااااااااااااااه... تبون تحضرون عرسي وتخلوني؟؟؟؟ .....معصي !! والله ان احضره غصبن على اللي يرضى واللي ما يرضى " .... والا والله يوم تضاحكو وقامو يتحمدون ... هقوتكم ليش ... مدري المهم قالو يا بنت الحلال تركدي حنا مخلينتس ترتاحين وبعدين بنجيبتس لبيت العرس .. يؤ لاااا قصدي للفندق!!
قلت وشو عشانه تخلوني ارتاح الله اكبر والله لو أني بروح للغزو عشان تخلوني ارتاح ---- انواع البراءه
المهم ... خلصو شغلهم وراحو العيال للبيت وبعضهم وقف عند الباب يحرس الحريم لا يجيهم احد!!( الله اكبر من هنا عاد... مير ما عندك احد مدري وش شايفين عيالنا فينا شي ينخاف عليه).. وباقي خواتي وبنات خالاتي قامن يتزينن وامي طقت شيلة المنيخل وتديرمت ومغير دوجان بها الصاله تسن به خبر والا علم!! ... وانا ما جت كوفيرتي وقعدت فاضيه لا شغله ولا مشغله ... واقوم لكم واجمع المبزره والعبهم حريم واخذ البودره والحمره والطط والديهم ... ونجيب القهوه ونقلط انا ويا هالمبزره وخذ من هاك السوالف الزينه.
ويوم دريت شوي.. والا خالاتي وبناتهم يتلافتون علي ويهزون روسهم .. لا .. وسوير من زين كشرتها تناظر السقف وتقلب عيونها الحمص ... " ايـــــــه اللي ما يغار ابوه حمار".... (وش يغارون منه يا حسره عزتي
لمن بياخذتس). وبعدين يوم اذن المغرب وتجي الكوفير وتاخذني في غرفتن صاده وتعيي احد يدخل علينا تقول ما تبي احد يعرف سر المهنه!!! الله اكبر عاد وشي بتسوي مغير تخط عيوني وتبودر خشتي!! ..( الله اعلم!) ويوم قعدتني على الكرسي وهي اللي تسمي تسنها بتذبح لها تيس!! وتقول استعنا عاالشئأ بالله!!!!!
------------------------
زواج عصقوله 2
ايـــــــــــــــــــــــــــــــه وين وصلنا؟؟؟
امممممممممممممممم...اممممممممممممممم....اممممممممممممم... وبعد امممممممممممممممممممم..
ايه وصلنا يوم تسمي الكوفيره تبي تذتسنيني ... والله ويوم شمرت المره ذرقت اخيتكم عصعص ... قلت وش تبي ذي.. ذا عرس والا مجاهد!! خبركم عاد البراءه اللي مقطعه بعضها ...
مالكم في طوالة السالفه ... والله يوم قامت المره تطلع من هالقواطي وتلطط في كشرتي .. عاد أول وهي تدهن بالسفنجه بس يوم استفحل الوضع وتحمست والله وتقوم تقحش بيدها من القوطي وهاك يا لط هاك يا لط ... لين معاد حسيت بوجهي .. يعني صراحه اللي يبي يدخل مضاربه احسن له يسوي مكياج عشان اي احد يزعله يطقه بوجهه .
والله الكوفيره طلعت بنت حلال لأني احتجت وجهي في مضاربه اخر الليل مع الطقاقات
ويوم خلص المكياج ويجي دور اللبس ... وانواع اللقافه ... خالاتي وأمي وخواتي اللي ما عمر الوحده مدت لي المنشفه اذا نسيتها وانا في الحمام كلهن اليوم سبحان الله يبن يلبسني (فيه شده هنا على النون بس مدري وشلون اطلعها)... مير مالهم امل ... يوم قلت بافتح سحابي والى والله يوم حضرو(شده على الضاد) في الغرفه...
طبعا تخيلو عصعص تلتفت على الباب وتلقى هاك الجمع الغفير من المتفرجين والمشجعين ... اوووووووووه هييييييييه عصعص عصعص ... !!!!..
خيـــــــــــــــــــــــر! ------و تزعق عليهم
نعم وش تبون انتم ... هيش ... ايه انتم وش تبون بلبس فستان العرس يالله تقلعو ...
" لا نبي نساعدتس" ... علي !! علي!! علي الكلام ذا!! ادري تبون تبلغون شفكم يا الملاقيف مير معصي يالله بررررررررررررا!
والله وتقوم امي وتكرشهم (ضامنه الدوري انها بتقعد معي) وتقعد تعذر لي من خالاتي وتقول معذوره مستحيه عصعص (تبي ترقع يقالها) ...
اي مستحيه يا أميمتي ... اقول خوذي الباب معتس بس الله لا يهينتس ---------> امحق عروس!!
المهم والله وأكرش ام عصعص وابدا معركتي مع النفاش حق الفستان ... الحين ذا من وين يلبسونه !! والله البلشه وش الله بلاني بالعرس بس!!
اجيه يمين يروح يسار اجيه من تحت يروغ عني... وش السواة!!... ما فيه الا طريقه وحده !!
والله وأجيب لكم الكرسي اللي كنت جالسه عليه يوم تزيني الكوفيره وارقى عليه وأجيكم "كأواكابنقــــــــــــــــــــــــا" وسوبلكس في وسط النفاش ... تمام !! لبسنا النفاش..
باقي الحين الفستان .... فغصت عمري في هاك الفستان (الله لا يذكر من خيطه بالخير) لين بغت تناقز عويناتي .. وتمت عملية اللبس.
والله وأجيكم وأطل على العالم اللي برا الغرفه ... والله لا يوريكم على الاشكال اللي برا... المهم ما علينا !! وأطل عليهم وانادي أمي "يمـــــــــــــــــــــــــــــــــــاه... قلطو المعرس" ... ( حسبي الله عليتس وين قالط على عروس والا مفطح)..
وتجيك امي تطامر الله لا يفضحنا فضحتينا يالله سترك عمرتس شفتي عروس تنادي على المعرس ؟؟!!! .. قلت لا يهمتس بس خليه ينجز علينا ابي اشوف العرس ومنتب مطلعيني لين يجي وش ازين لكم! والله وتطق على ابوي باب المقلط (مافيه جوالات ايام عرسي) "ابو عصعص ... البنت تقول قلطو المعرس!!!"
واللهي ويجيكم ابوي مسلفح هو ويا المعرس (عارفني ابوي .. فضيحه لو ما جابوه طلعت اناديه)... ويدخل علي ذاك المملوح اللي يتلاصف من الدهن ... (الله يديم النعمه بس).. ويجي يصافحني والله واسوي نفسي ما استحيت .. واعطيه بالكف على يده طرقااااااااااااع "يـــــــــــــــــــــا حيالله المعرس .. تصدق أول مره في حياتي اشوف معرس!! "( عسى ما شر !!)
"قم انجز علينا يالله ندخل عند الحريم فيني رقصه"... كل هذا والضعيف ساكت ما قال ولا كلمه ... اصلا معذور انبله في جمالي سبحان الخالق!!!
والله وتطمر لكم عصعص وتسحب المعرس من بشته ... تخيلو عصعص وهي تسحب المعرس من بشته من ورا وهو مقفي وجهه ما يبي!!...
وجع!! ... بلا وجع ... وراه معيي ذا؟!! ...
والله يوم شفت الرجال معيي واقوم لكم وأحط بشته من فوق كتفي واسحبه لين طاح على وجهه وقعدت اسحبه لين دخلنا على الحريم...
------------------------
زواج عصقولة 3
ايييييييييييييييه وين وصلنا؟؟
ايه ... ذكرت !! .....والله واقوم واسحب لكم المعرس من بشته والاه جايكم على خشته !!
ونطلع والا هاك البروق والعصافير والحمام والمطر والله يا زين الربيع ذاك اليوم (!!!!!)
-----> منسجمه مع الفقش ماشيه 180
والله ويتواسى المعرس ويتسكب ويقعد يمشي تكه تكه بزعمه الحين رزه ... والله والتفت عليه واقول في خاطري ... ماش الرجال راعي طويله كوهتس بس يا عصعص وخليه متى ما وصل ياصل!
والله وانطلق بمساعدت الاديداس حقتي ( تخيل معي عصعص زامتن فستانها اللي كبر كيس زبالتكم عقب عزيمه ... والدخان ينطلق من تحت الاديداسه حقتها) ... وما يمدي المعرس يرفع عينه الا انا مترنكزه على البست وكرايني تومي وحده فوق الثانيه !!
والله ياني ضحكت عليه ذيك الليله وهو مغير يفرك في بشيته ما وده يسرع لا يقولون مخفوع ... ومتورط بعمره وهو يمشي بلحاله!! (العبره باللي بيضحك بالاخير يا فالحه!!)
المهم قضت اغنية الزفه وجوك ملاقيف العائله تقل اول مره يشوفونك ... مغير تخميم وترعيص وهم البارح توهم شاذبين جدك الخامس طعش ... وأنواع تمطيط الخشش والترنكز للتصوير يقالهم الحين بيطلعون في ال بي سي !!
مالكم في طوالت السالفه ... والله ويبدون العبند يطقون ...طبعا كنا جايبين احلام قبل لا تصير مزيونه (وزززززززززز) وكان معها طاقم كامل من المساعدات اللي الحين شقو طريقهم في سماء الفن والشهره ... اذكر منهم على سبيل المثال وليس الحصر ...سعرانه و أم طفق وغيرهن الكثير !!(والله ياهو بيجيني خبري بعد ... تناوشت ال في اي بي)
طبعا انا يوم سمعت الطق قامت الرقبه تطق اتوماتيك حيث ان أمي مرضعينعا عبيد والعرق دساس ... افطنو لذركم لا تاخذون وحدتن امه مرضعينه عبيد. ويلتفت علي ابو عبسي (طبعا قبل ما يجي عبسي ) قال سلامات بتس شي !! قلت آآآآآآبدن سلامتك يا بعد روحي (ايه هين!! الله يذكر ذيك النزره بالخير)
المهم الوالده من شافت الرقيبه تومي وهي داريتن ان الوضع لا ينبيء بالخير ... وتجيكم تطامر من اخر الصاله وتدنق علي ... تكفين يا عصعص طلبه لا تفشلينا وانا امتس تصبري لين تروحون للغرفه وبنجيب الطقاقات لين حدتس ... وانا أومي براسي ايه ايه ... والموضوع اصلا طلع من يدي !!
جلسنا لنا نص ساعه همن قومتنا أمي على بالها تبي تستر الدعوا قبل ماانهبل عليهم مير هيهـــــــــــــــــــــــــــــــات!
سوير بنت خالتي ذيك النجسه ما غيرها ام عيون حمص !!.... راحت للطقاقات وقالت طلبيه خاصه من العروس غنو صبوحه.
والله ويوم توي رافعتن من الكرسي بطس لعش الزوجيه والى يوم سمعت صبووووووووحـــــــــاه... صبوحه!! ... والتفت على الطقاقات باندهاش مع فق الكشره ... والتفت على أمي مع بعض الأسى في عيني ... واقول في خاطري عز الله ما افوت صبوحه !!
وش صار!! مادرينا الا عصعص ناسفتن الشرعه ومكومتها فوق الكعكع وناطلتن الورد في خشت المعرس ...
و جمبلو جمبيليلي جمبلو جمبلو ... وادحدر لكم على الطقاقات والله مير وينهبلن العبند ويقومن يطبلن ويرفعن الطيران ... وقال وش تقول بانوه ... اطلع بانوه ...
واحلام من كثر الوناسه متشققه علي وعلى اخلاقي النبيله وتجيكم تاقف قبالي الدبيه وهاك يا طق رقبه وانا اطق اصبع وهز يا وز
والله مير وتتحمس السعرانه ... وتقمز هي والمطفوقه ويقعدن يجاكرننا انا واحلام مير مالهن أمل من زينهن هالعجوز وهالعانس!
سبحان من صور جمالنا انا واحلام !!!!!!!
كل هذا واخوكم ابو عبسي فاق الكشره ومتسمر لاهو اللي كمل قومته من الكرسي ولا هو اللي قعد ... مغير يناظر زوجة المستقبل (امحق من مستقبل!)
انا عاد رحمته من جد حيث اني حبيته والحب اعمى قلت هيش يا المعرس لا تتعطل عشاني شكل السهره صباحي رح وانا اختك (!!!!!!!!!) وانا الى سرو الشله سريت معهم.
-------------> انواع البراءه
والله ومير تمينا ليلتنا مغير تهييص ووناسه وحطوني عضوة شرف مع الفرقه وعطون طار اطقطق معهم واحلام خلتني ارد وراها في اغنية تمسو على خير ترا حنا سرينا... سرينا ... سرينا ... سرينا!
-- النهاية --- ترا را را راراااااااا
------------------------
أأخ تعبت ----- نصابة كلها نسخ و لصق-----
شرايكم بالقصة ؟؟
و شكرااا
