مرحبا! ..
** تحذير الموضوع طويل ويحتاج قرائه كاملة قبل الرد ، حتى تكون عندك درايه كاملة عما فعلته وافعله**
وانا قاعد اتصفح المنتديات من الواجهة الرئيسية عالبطيء اليوم لاحظت وجود هالمنتدى.. اول مرة اشوفه! (لأن من زمااان ما دخلت منتدى المنتدى) ، فكرته رائعه ، لأن في هذة الايام الرياضة او الGym اصبح جزء لا يتجزء من حياتنا اليوميه ،، واعتقد ان احنا وصلنا لمرحله اذا الشاب ماكان ذو قوام رياضي (او عالاقل صحي) ، يصبح شكله مزعج للعين!
المهم انا مشكلتي (او هي ليست بمشكلة اصلاً!؟ ، مجرد تساؤل او خلني اكون صريح وسواس! لول) .. اني اخاف شكلي بالاخير يكون ليس بما كنت متخيله انا .. وبالتالي جهدي بكون اكبر حتى اصحح ما وصلت له او حتى اوصل لما اريد من جديد بعد ان قطعت شوطاً كبيراً ولم احصل على ما اريده ، اصلاً يمكن هذا بروحه يسبب لي اكتئاب وعدم مواصله!!
انا اشتركت بنادي رياضي قبل 4 اشهر تقريباً : ) .. في البداية -اول شهرين- (لول كل هذة بداية تخيلوا!!) .. كنت اداوم 5 ايام في الاسبوع class سويدي معده وخواصر .. مع ساعه اخرى عالآلات .. اللي هي آلة مشي ، Cross Trainer ، الدراجة (مادري شسمونها! صح اسمها؟) ، وفيه آله اللي كأنك تصعد سلم فيه مكان للرجل وتصعد وتنزل فيهم (مره رجلك اليسار ومرة اليمين) .. كنت اوزع وقت الساعه بينهم بطريقه منتظمة : )
خلال هالشهرين ، لاحظت نقص في قياسات جسمي من جميع النواحي .. حتى وزني لاحظت انخفاض فيه ، طبعاً فرحت فيه النتائج .. وللعلم انا طولي 185 و وزني قبل لا اشترك بالنادي كان 83-85 تقريباً ، وبعد اول شهرين اصبح 79
الترهلات الموجودة بمنطقه الفخذ قلت ، منطقه البطن لاحظت انها تغيرت .. اصلاً قياس ملابسي كله تغير!! مثلاً كنت البس العادة قياس M او L (بعض الاحيان) ، بعد الشهرين اصبحت البس معظم الوقت S او M (قليل) ، وبالنسبة للبنطلونات من قياس 36 (نعم تخيلوا كنت البس 36!!) الآن اصبحت البس 32 : ) .. طبعاً انا كنت فرحان ومبسوط لأخر درجة..
لكن نرجع لأساس الموضوع! ، انا كنت ابي "اقسم جسمي" ، وانا اصلاً نوعي اخاف من صالة الحديد (لول بسبب خزعبلات الاهل وغيره) .. بس كنت قايل لنفسي ان "يا عبدالله ترى لما يجي الوقت اللي بتكون انت مستعد لصاله الحديد لازم تروح ، فاهم؟؟" <- هذا كلامي لنفسي P: .. وفعلاً! بعد شهرين قررت ان حان الوقت لدخول تلك الصالة المرعبه ..
المدرب قالي "شهرييييييييييييين فوق تلعب سويدي" (< القصد من فوق ان نادينا 3 ادوار لول فـclassـات السويدي بالدور الاول) المهم كان منصدم ان لي شهرين سويدي بدون حديد .. يقولي العادة الناس من بعد اول اسبوع او اسبوعين يبدون حديد انت اخذت شهرين؟ .. قلت له كنت انتظر اللحظة اللي احس فيها اني بحاجه لبناء عضلات ،، عموماً! عطاني جدول شامل للمبدئين لمدة يومين (او 4 ايام مع راحه بالنص ما اذكر عدل!) ، وبعدها دخلت جدول الشامل المتوسط لمدة اسبوعين : ) .. كانت فكرة الجدول المتوسط يوم لتدريب النصف العلوي من الجسم بعدين اليوم الثاني للنصف السفلي بعدها راحه يوم وتعيد الكره ..
بعد 3 سابيع تقريباً بالحديد ، اضطريت للسفر للخارج (الى الولايات المتحده) لمدة شهر ونص سياحه مع الاهل! ..
عموماً رجعت من السفر وكملت بالنادي .. عطاني المدرب تسخين جدول المتوسط مرة ثانية 4 ايام فقط بعدين دخلنا بجدول او بالاحرى (هو بدون جدول اي بدون شي مكتوب مثل ماكان بالجدوال الشاملة السابقه -حيث كانت مطبوعه جاهزة توزع بالنادي-) هذة المرة كان النظام غير .. 5 ايام في الاسبوع مع يومين راحه انت تزوعهم على كيفك ، انا اخترت ان من السبت - للاربعاء حديد + خميس وجمعه راحه .. اليوم الاول: صدر + باي ، الثاني: بيطان + تراي ، الثالث: اكتاف + مثلثات + سواعد ، الرابع: ارجل + بطات ، الخامس: صدر + باي (مكرر) < تصدقون مادري ليش الصدر + الباي مكرر مرتين في البداية والنهاية؟؟
يعني الحين سؤالي او الهدف من موضوعي ،، انا حالياً نظامي استقريت عليه صارلي 3 اسابيع وهو على هذا المنوال:
ساعه: سويدي (معدة وخواصر)
ساعه ونص: حديد (كل يوم على حسب الجدول)
نصف ساعه: العب تمارين معدة بصالة الحديد.. 200 عده توزيعهم: 100 حر و100 العب بوزن (اخف وزن)
نصف ساعه (مو كل يوم اسويها): اوزعها على الآلات اللي ذكرتها فوق باستثاء الدراجة (اللي مو متأكد من اسمها!) ، والجهاز اللي يشبه السلم .. صرت ما سويهم
الحين السؤال ، انا لما رجعت من السفر وزني قل بشكل غريب ، غريب لدرجة ان الكل (واقصد بالكل هنا فعلياً الكل!) اشاد بانخفاض وزني .. الآن وزني 76 .. بصراحة حاب ان وزني قل لكن مو حاب ان شكلي اصبح انحف قليلاً! الفكرة من دخولي للنادي كانت اشد جسمي وابني عضلات بشكل مرتب ما ابي اكون مثل كمال الاجسام (ذو الاشكال المرعبه!) ، ولا ابي ابني عضلات بشكل مبالغ فيه بحيث اكون على شكل رقم 7 بالعربي زيادة عن اللزوم! ، او اكون معوق بشكل ما في اني ابني عضلة اكثر من الباقي مثل الاكتاف ويكون شكلي مقوس!؟ .. << قلت لكم فوق فيني داء الخوف من صاله الجديد لول!
وانا نظامي غذائي ،، كل يوم لازم فطور (ما اقدر اكمل يومي بدونه!) .. وبالفطور اكل على راحتي ، بعدها بـ3 - 4 ساعات يكون الغداء .. اكل فيه الطبق الرئيسي .. او لو كان اكل بالخارج احاول اكل المشوي حتى اقلل من الدهون! .. بالنسبة للعشاء يكون بعد الغداء بـ7 - 9 ساعات!!! وبين فترة الغداء والعشاء يكون وقت ذهابي للنادي .. يعني احس ان الفترة طويلة بينهم!؟ .. شنو لازم اسوي؟ اكل بينهم وجبه زيادة؟ (لو الجواب نعم ، شنو اكل؟)
بالنسبة للبروتين ، المدرب قعد يتكلم على راسي ويشحنه بأنه مفيد والخ الخ الخ! وانا طبعاً خزعبلات صالة الحديد للحين مؤثره فيني ،، لكن بالاخير رضخت لأمر مدربي وشربت البروتين على مدى 4 ايام او 5 تقريباً وبعدين وقفت .. ليش؟ فيه واحد بالنادي وانا قاعد اتدرب على تمارين المعده سلم علي وقعد معاي سوالف (فوق الـ45 دقيقه!) تخيلوا اول مرة اشوفه وسلم علي وقعد هو يسولف معاي 45 دقيقه! عن المعدة والتمارين والخ الخ .. قالي ان البروتين البودر هذا مو زين ، اكل بروتين طبيعي احسن في السمك واللحوم والخضروات وغيره (وللعلم انا ما اكل اييييي نوع من الخضروات! ما اقدر معدتي ما تتحمل اكله واقوم بتفريغه!) عموماً انا صدقته! (مثل ما قلت لكم انا فيني خوف من الحديد!) و وقفت اشرب بروتين وقلت بعوض عنه بالاكل بالعشاء لما ارد من النادي اشياء فيها بروتين .. وفعلاً هذا اللي قاعد اطبقه! (نوعاً ما P: ) .. وقالي معلومه جديدة علي (لكن حسيتها منطقيه!) قالي لا تحط وزن كبير وتلعب معده لأن جذيه انت قاعد تكبر المعده لأن بالوزن الكبير ما تقدر تسوي إلا 10 او 15 عده فقط .. بينما لو تحط وزن خفيف (اخف وزن مثلاً) تقدر تلعب 50+ عده .. بالتالي انت تشد العضلة وما تكبرها .. لأن بتكبيرها انت في المستقبل (البعيد طبعاً) راح توصل لمرحله وتوقف او تقلل من النادي بشكل كبير لانشغالك بامور الحياة .. وقفتها العضلات (اللي انت كبرتها) بترتخي وبالتالي بتكون عندك كرشه خفيفه ومع الوقت يتكون فوقها دهون! وتصير كرشه بالنهاية!!!! ..
الحين شنو بالضبط اسوي؟ هل انا ماشي صح؟ .. وهذا مخلص للي وصل لنهاية الموضوع وحس ان مو فاهم شي من اللي كتبته لول! لأني 1) دايخ 2) اسلوبي في التعبير مش ولا بد!
- وزني اصبح 76 مع طولي 185
- العب سويدي ساعه (معده وخواصر) - خمس ايام بالاسبوع ، يومين راحه
- العب حديد ساعه ونص تقريباً (كل يوم جرء معين من الجسم) - خمس ايام بالاسبوع ، يومين راحه
- العب معده 200 عده. توزيعهم 100 معده حر 100 مع وزن خفيف - خمس ايام بالاسبوع ، يومين راحه
- استخدم الآلات (مشي ، Cross Trainer) نصف ساعه تقريباً - خمس ايام بالاسبوع ، يومين راحه
واسئلتي:
- هل احتاج بروتين لبناء عضلات؟ - انا ابي جسمي يكون معضل لكن مو بشكل غلط ، او زيادة عن اللزوم .. تعرفون الـModels ؟ جسمهم مشدود ومعضل قليل (مقارنةً مع كمال الاجسام!) .. انا ابي مثلهم!
- هل حبوب الملتي فايتامن تفيدني في بنائي لجسمي؟ خصوصاً اني ما اكل خضروات ابداااا ، تسبب لي غثيان لما اكلها واحتمال كبير اني افرغها بعد الاكل مباشره!
- هل جدولي المذكور فوق بالتفصيل وباختصار بالاسفل ، مناسب؟ ام احتاج اكثر ام انا مبالغ اصلاً بالرياضه؟
- نصائح مني مناك لي ممكن استفيد منها .. مثل سمعت عن نظام الـ5 وجبات باليوم .. او اي شي ممكن استفيد منه؟
وللعلم انا اشرب ماء باليوم تقريباً فوق الـ8 اكواب .. مادري هل هذا يؤثر علّي؟ .. انا من قبل دخولي النادي وانا معروف اني اشرب ماء كثير .. (يسموني "تنكر ماي" بالبيت لول!!) ونسيت لا اذكر لكم عمري .. انا عمري 19 سنه وقريباً 20
ادري مصختها بالكلام الزايد .. لكن فعلاً احتاج مشوره .. مع اني كلمت اكثر من مدرب ، اكثر من شخص .. إلا اني مصر على معرفه اكبر قدر ممكن من وجهات النظر .. وقريباً (الاسبوع القادم ان الله احياني) راح ازور دكتور تغذيه! حتى اشوف ما عنده من معلومات طبيه .. وابي بعد تحليل دم ، كوني ما اكل خضروات ابداً .. دايماً يحسسني بأني عرضه للخطر اكثر من غيري :S
وشكراً على حسن القراءه!
