يبيلك تتدرب على الرسم والتلوين اكثر

حاول انك تنوع في الخطوط.. مثل ما قالت بطوطة انك تستعمل خاصية الحساسية حق القلم مدام انت ترسم على الفوتوشوب وحاول انك تبتعد عن الخطوط السميكة وايد اللي ترسم فيها... حاول تخليها اضعف..

حاول انك تتطلع أكثر على دروس تعليم رسم لاني لاحظت ماعندك تناسق في الاجسام اللي ترسمها، دايما ارسم الهيكل قبل بلون فاتح بعدين حبر عليه وبما انك تستعمل الفوتوشوب فهالحركة سهلة لانك بتسوي كل شي على لايرات منفصلة.. لا ترسم على طول الشخصية هاي اللي يخلي الجسم غير متناسق.. ابتدي بالهيكل ولا تقول انا متمكن ما احتاجه.. كلنا نحتاجه

الوجوه بعد لما ترسمها لازم تحدد مكان الملامح لاني لاحظت ان العيون عندك وايد متداخلة في بعض.. تعرف علامة الزائد اللي تنحط في الويه علشان تساعد على رسم الملامح، دايما استعملها

التلوين اطلع على دروس تلوين اكثر لاني لاحظت انك ما تنوع في تلوينك وغير هاي اسلوبك الحالي يبي له تطوير كبير، جوف الانيميات شلون يحطون الظلال وشلون يحطون اللمعات حاول تقلدهم
استعمل اللاسو تول وعب المنطقة بالظل..
ودايما حط في بالك مصدر الضوء علشان تعرف تسوي الظل لانك قاعد تسويه بطريقه عشوائية

حاول تنوع في الزوايا بعد.. شوي من فوق شوي من تحت، حد ماد يده في الكاميرا.. يعني هالحركات اللي تعطي رسوم الاكشن حيوية اكثر

يعني انت بديت بمستوى معين لكن ما لاحظت انك تطورت لحد الحين مع انك تعرض على النت من فترة

وبما انك في الديفاينت حاول تستغل الدروس اللي هناك لانهم عجيبين الصراحة ووايد نتعلم منهم.. وفي دروس حق كل شي ذكرته ابتدي امسكهم درس درس وطبق فيه لحد ما تتقنه

بالتوفيق