السلام عليكم ورحمة الله وبركاتة
اليوم وانا داخل الحمام شفت نحله غرقانه قلت هاي شكلها من الشله الي دوم يدشون علي
الله يسلمكم تذكرون رويتكم صورة خلية نحل
هذي الخلية فوق غرفتي بالضبط
وهذيلا النحل يوم يشوفون نور لمبة الحمام الفجر يتحرونه الشمس
ف يحاولون قد ما يقدرون يدخلون الحمام
وبالتالي ينصدمون بالليت الي موجود
وييلسون يطيرون عند الليت ويصقعونه لين ما يموتن شو السبب ماا ادري هل من تاثير الضو او كهربه مستهم او من حرارة التيوب ×_× لين الحين مااعرف
مره شفت نحله كانت تيي مستنه وتضرب الليت بدرجه انها تطير الغبار عن الليت
لو معاي عدسه اقوى عن عدستي لكنت اللتقطت صور من عالم الخيال منظر الغبار وهو يطير
عموما هذي النحله شكلها غلب عليها العيا وطاحت في البانيو وكان في ماي
وتبللت جناحاتها وتمت هناك
وتوني يوم يت الحمام شفتها تزحف
قلت الا اصورها وبعدين انقذها
ولكم صورها وهي غرقانه وتحاول تنقذ عمرها وشوفو جناحاتها المبللـه
طبعا صورت صور وايد بس تهتز الصوره وهي تتحرك بسرعه وكانت اعدادات الكيمره مب شي
عقب غيرت حطيت ع الرياضيه ويبت صوره كشخه
مديت لها العنقليه الي ينظفون فيها الاسنان
وشوفو سبحان الله فهمت علي وتمسكت فيها
والسموحه هذا الي طلع وياي
ملاحظه كنت ماسك الكيمره بأيد والعنقليه والنحله بأيد
وبالقوه اصور ماشي توازن كيف بدوس الفص وكيف بثبت وغيره
بس حمدالله طلعت الصوره حلوه
ملاحظه : بخصوص النحله الحمدالله وانا ماسك العنقليه قدرت تحرك جاحاتها وطارت
لكن ردت طاحت ورفعتها وحطيتها برع عشان تنشف جناحاتها وتروح عند ربعها
وللمعلومه .. النحل من الحشرات الي منهاي قتلها
روى أحمد وأبو داود بسند صحيح عن ابن عباس رضي الله عنهما قال: ( نهى رسول الله صلى الله عليه سلم عن قتل أربع من الدواب : النملة، والنحلة، والهدهد، والصرد ) .
وتوني عرفت هذا الحديث عن الاغراق بعد ما انقذت النحله
وقال صاحب كتاب الكافي في فقه الإمام أحمد: و لا يجوز تحريق النحل، ولا تغريقه، لأن النبي صلى الله عليه وسلم نهى عن قتل النحلة، و قال أبو بكر: لا تحرقن نحلاً و لا تغرقنه. اهـ
والحمدالله اني انقذتها وما تركتها تغرق
نتريا تعليقاتكم
وشكرا