أود أن أطرح عليكم موضوعي مع زوجتي لأنني في الحقيقة أعجز عن التفكير وأرغب بمشورة ونصح ذوي الخبرة منكم وأرغب أن أعرف من هو المخطئ في الموضوع كله ...
تزوجت منذ سنة ونصف من إنسانة أعجبتني، فهي على قدر من الجمال، طيبة القلب، متسامحة، متعلمة ومثقفة ومتحدثة وطموحة، شخصيتها قوية، نظيفة ومرتبة في جميع أمور المنزل وكذلك في هندامها، مرحة جدا، تحب الحركة، دمها خفيف، تحافظ على صلاتها. وفي كثير من الأشياء المشتركة بيننا.
ولكن على الرغم من ذلك فيها صفات ماقدرت أتحملها أبداااااا، فهي عصبية جداا، وعنيدة، وصوتها عالي لما تعصب، وتثور بسرعة لما ما يعجبها شي معين وأحيانا يكون كلامها جارح، ومرة من كثر عصبيتها قامت وطيحت الصحن كسرته، ومرة ثانية رمت المخدات علي ... فمديت إيدي عليها. ومرة لما مديت إيدي دزتها بعيد وجن جنونها ليش أمد إيدي عليها.
وترفض المشاركة في المنزل وتقول تبي تشارك بمزاجها من دون أن أفرض عليها مبلغ معين. هي تشتري لبسها وأغراضها الشخصية ومصروفها وسيارتها على حسابها الخاص، بس هذا ما يمنع إنها أيضا تشارك معاي بالبيت عشان تحس شوي بالمسئولية وعشان أحس أنا إنها واقفة جمبي !!! مو صح؟
عندها داء الخصوصية. قبل لا أتفق مع أهلي يزورونا لازم أقولها أول. وتتنرفز إذا أهلي جوا يدشون المطبخ والغرفة الثانية وتقول ما أحب أحد يدش المطبخ والغرف ويتعبثون. (طيب أنا يعني اشلون أقولهم لا تدشون؟؟؟ هذيلا أهلي)،،، وما تحب أحد يدش البيت بالنعال (تكرمون). أحس ما تحبهم كثيرا وأعتقد أن ذلك بسبب بعض المشادات التي حدثت قبل الزواج وفي البداية بينهم. وكلما سمعت شيء لا يعجبها من أمي جاءت تتشكى وأهلك قالوا وقالوا وأنا ما أحب أحد يتدخل في حياتي لا أهلك ولا أهلي. هي ما تدخل ولا تحشر نفسها في أهلي. وأحسنت إستقبالهم في كثير من المرات وتقوم تطبخ معاهم وتسولف وتضحك معاهم، ولكن ما تحب زيارتهم الكثيرة. ولما تكون تعبانة ما تطلع تسلم. وأنا ما أحب هالطريقة أبداااا وأعصب عليها وأضايق منها.
وما تحب ينام عندنا أحد على أساس إنها تتعب بدوامها وتبي هدوء وراحة. صحيح أن بيت أهلي قريب وبيتنا صغير بش وين المشكلة ؟؟ بيتي هو بيتهم !! ومرة جه أخوي يبيت عندي أسبوعين ثارت وجنت وقالت ما يصير وعيب أخوك كبير وخصوصيتي وراحتي وعلت صوتها وتركتلي البيت وقالتلي لما أخوك يرد بيتهم أنا أرد بيتك. صراحة صرخت عليها وقلتلها هذا بيتي وأنا حر وبيتي هو بيتهم وأي حد يبي ينام عندي حياه الله.
المهم أنا زهقت حيااااااتي من هالأسلوب وأحس تبي تمشي البيت على كيفها وبديت أحس إني كرهتها ومابيها مهما تحاول إرضائي . واتبعت معاها أسلوب المعاملة الجافة والهجر والتجاهل عشان تتربى شوي وتقلل عصبيتها وما تمشي كل شي على مزاجها.
صحيح إنها تغيرت شوي عشان ترضيني، وصارت تتقرب مني وتحاول تضحكني وتكسب رضاي وتدلعني، وبعيد ميلادي وعيد الحب ما قصرت معاي ... بس أنا كنت خلاص زهقت منها وما صرت أبي أكمل حياتي معاها وصرت أبي أطلقها، بس المشكلة إن حاط مؤخر. فصارحتها بالحقيقة وإني خلاص وصلت حدي وأبي أطلقها. قامت تبكي وتصرخ وتقولي أنا أحبك وما أبي أتطلق وعطيني فرصة راح أتغير وإنت ساعدني وحاول تفهمني ومن هالكلام .... بس يااااا جمااااعة أنا خلالالالاص حاس ماني قادر أكمل. وتلقائيا أتحاشاها ومابي أقعد معاها وهاجرها طول الوقت.
المهم قالتلي خلاص راح أخلع. بس أبوها ما رضى واتصل فيني مسح فيني الأرض، وقالها ييبي أغراضك وتعالي بيت أهلك، وراحت سمعت كلام أبوها ومشت من البيت. اضطريت أقول حق والدتي إن الموضوع بيوصل حق الطلاق، بس أمي الله يهداها سوت حركة مو حلوة، جت البيت غيرت مفتاح الباب وما رضت تعطيها أغراض البيت اللي هي كانت شاريتها، بس أنا صراحة لما شفت زوجتي خذت كل هدومها من البيت، تنرفزت وما رضيت أنا بعد أعطيها غراضها لأن هي تركت البيت....
طبعاااااااااا زوجتي العصبية المجنونة مسحت فينا الأرض أنا و أمي وقالتلها يالحرامية إنتي وولدك، ولدك مو رجال يخليج جذي تسوين معاي وانتوا عايلة نصابين وانتوا تبون تطلقوني وتدمرون بيتي وتاكلون حقي وانتوا وانتوا وانتوا ... وجن جنونها
وبعدين تفاجأت إنها رافعة علي قضية طلاق للضرر ونفقة واسترداد أغراض، رحت أنا نقلت أثاث البيت كله إلى شقة ثانية ورفعت عليها قضية طاعة. والحين هي مأجرة شقة على حسابها وقاعدة فيها.
إليوم إحنا صارلنا شهرين ما نتكلم. بس هي دقت علي مرتين تبكي وتقولي أنا كنت أحاول أتغير عشانك وانت ما قدرت، وانت كان المفروض تتحملني مثل ما أنا متحملتك، و إنت كان المفروض توقف أهلك عند حدهم، وتيجي تصالحني وتردني البيت بس إنت ما تحبني ... أنا بصراحة متعمد أكلمها بجفاء وما أدق عليها لليوم لأن كل الخطأ عليها بصرااااحة ... يعني شنووو اللي خلاها تسمع كلام أبوها وتهد البيت وتمشي ؟؟؟؟؟ هي الغلطاني اللي خلت البيت. صح ولا لأ؟؟
الصراحة أنا ماني عارف شنو أسوي وهم ما ودي أخسرها ،، بس خايف حياتنا ترد مثل الأول إذا رجعنا ... بس فرضا إنها فعلا ندمت وتغيرت، اشلون أتنازل عن كرامتي وأروح أرجعها وهم رافعين علي قضايا ؟؟؟؟؟ المفروض هي لو تحبني ترجع عندي البيت صح ولا لأ ؟؟؟ طيب والحساسية اللي صارت بينها وبين أمي ؟؟ اشلون تتصلح وهي أصلا ما كانت تحبهم وايد من الأول ؟؟
أرجوكم أشيروا علي وأفيدوني ... كيف أتصرف ؟؟؟؟ بريكم هل الطلاق هو الحل في هذي الحالة؟
المشاركة الأصلية كتبت بواسطة في الإتحاد قوة
