طـــــــــريقة عــــــــــــمل
صينية الخضار والنقانق المدخنة بصلصة الألفريدو
بسم الله الرحمن الرحيم
السلام عليكم ورحمة الله وبركاته
هذا أول موضوع لي في هذا القسم وبصراحه هاي الاكله الوحيده الي سويتها
بحياتي واستوحيت فكرتها من خلال مساعدتي لاراشي في المطبخ
أولا: الأدوات
1- قدر المندي : هو الي راح نستخدمه عشان نسوي حمام مائي للخضار والنقانق
اذا ماكان متوفر تقدرون تجيبون جدر ومشخاله. الجدر تحطونه على النار وتترسونه ماي وفوقه المشخاله الي راح تحطون عليها الخضار والنقانق .. لازم الماي مايلامس الخضار لان احنا نبي نطهيه بالبخار ..
صورة المشخاله
2- بايركس بالحجم الي يناسبكم
3- ادوات القياس
ثانيا: المقاديـــــــــــــــر
( الكميه بحسب حجم البايركس)
1- بطاطــس
2- مشروم طبيعي
3- نقانق مثلجه (سجق)
4- بروكلي مثلج او طازج
(مقادير صلصة الألفريدو)
5- ملعقتين طعام زبده
6- بصله صغيره مقطعه لشرائح صغيره
7- 4 اكواب whipping cream
8- ملعقتين شاي جبنة البارميزان
9- ملعقة شاي جوز الطيب
10- نصف ملعقة شاي ملح
11- نصف ملعقة شاي فلفل اسود
12- ملعقة طعام ونصف صلصلة طماطم
13- نصف ملعقة طعام بودرة الثوم
الطــــــــريقـــــــــة:
*ندهن البايركس بالدهن ونخليه على جنب
- نقطع البطاطس شرائح سميكة ونحطهم في الحمام المائي ونغطيه ونجيك عليه كل 5 دقايق .. البطاطس لازم نجيك عليها اول بأول .. اضغطوا عليها شوي بشوكه لو صارت وايد لينه راح تتنتف ... اول ماتبتدي تصير لينه شوي نشلها ونصفها في البايركس
- نقطع المشروم ايضا شرايح سميكه ونفس الشي نحطه في الحمام المائي ونغطيه .. المشروم بيصغر حجمه شوي مع الطبخ وبيصير لونه اغمج شوي
- النقانق نقطعهم دوائر سميكه شوي ونحطهم في الحمام المائي ونغطيه ... لين فتحتوه وليقتوه منتفخ حده معناته استوى
- اخيرا البروكلي نقطع كل قطعه من النص ونحطهم في الحمام المائي ونغطيه .. البروكلي لو ضغطوا عليه وحسيتوه صار لين شوي في منطقة الساق معناته استوى .
اذا عندكم نفس جدر المندي الي في الصوره تقدرون تطبخون اي نوعين او ثلاث من الخضار مع بعض ما عدا البطاط
بعد ماصفينا كل المقادير المذكوره فوق في البايركس نبدأ بعمل الصلصله
(اراشي تقول ان نسوي الصلصه قبل احسن عشان نخليها على جنب لين تستوي ثقيله ... انا احب اسويها لما اوصل عند النقانق والبروكلي )
طـــــــــريــــــقة عمل صلصلة الألفريدو:
- نجيب جدر ونضيف عليه الزبده ونحمر البصل في حرارة متوسطه
- اول مايتغير لون البصل ويتحمر نضيف عليه 4 اكواب whipping cream .. نرفع على النار ونحركه لين تظهر فقاعات صغيره على الاطراف ( دلالة على ان بدأ يغلي)
- ثم نضيف عليه باقي المقادير المذكوره فوق ونستمر بالتحريك من حين الى اخر وثم يترك على نار هاديه لمدة 5- 10 دقايق
أخيـــــــــــــرا
نصب الصلصله فوق الخضار وندخله في الفرن على درجة 180
ونخليه في الفرن لين يصير السطح لونه غامج نفس اول صوره
وبالهــــــــــــناء والشــــــــــــفاء ان شــــــــاء الــــــلـــــــــه