تمرين لتضخيم الباي و التراي (عن تجربه)
السلام عليكم يا وحوش المنتدى
في خلال مشواري في ممارسة كمال الاجسام جربت جداول كثيره و منها فادني و منها ماسوا معي شي... و تعلمت من اكثر من مدرب... بس كانت عندي مشكلة ما قدرت احلها...
الباي و التراي مهما مرنتهم احسهم ما يكبرو ولما اضطر اتوقف عن التمرين اول شي يصغر عندي الباي و التراي.. بالاضافة كانت مشكلتي مع التراي اني ما اقدر ازيد في وزن...
المهم كنت في نقاش مع صاحب الصالة و قاللي انا بعطيك جدول استمر عليه اقل شي 6 اسابيع و لازم تشوف فرق.. المهم انا استمرين 6 اسابيع تقريبا و لاحظت ان اليد عندي زادت حوالي 3 سم بعد ماكانت ثابته بالاضافه اني صرت اشيل اوزان حلوه في التراي ... صراحه استانست و حبيت اني انقل هالتجربة للمنتدى اللي انا صراحة استفدت وايد فيه ... و نشوف ردود اهل الخبره
الجدول عباره عن تدريب دائري مثل السوبر ست يعني تمرن رقم 1 بعدين 2 بعدين 3 بعدين ترجع رقم 1 مره ثانيه و تعيد .. يالله نقول بسم الله...
تمرين الباي
1- تبادل داملبز 3 مرات في خمس عدات (لازم تزيد الوزن قد ما تقدر)
2- بار مستقيم 3 مرات في 10 عدات (كمان لازم تزيد وزن و انا كنت استخدم البار حق الصدر)
3 بار متعرج مسكة ضيقة جالس 3 مرات في 18 عده (مو مهم الوزن)
تمرين التراي
1- بار متعرج نائم مسكة واسعه 9 عدات + مسكة ضيقه 9 عدات
2- ضغط بنج نائم 3 مرات في 5 عدات (لازم تزيد وزن)
3- دمبل خلف الراس مفرد جالس 3 مرات في 10 عدات (كمان لازم تزيد)
لما تخلص التمرين تقدر تتمرن سواعد و بعدين خلاص... انا لما شفت الجدول صراحه ما عجبني لكن لما جربته 6 اسابيع الكل لاحظ كيف كبرت ايدي...
ان شاء الله تعجبكم المشاركه و لاتنسوني من دعائكم...
المشاركة الأصلية كتبت بواسطة كل شئ ببلاش
