رأيك فى الايفون الجديد

[PS Player]

بالنسبه لنوكيا e7 ماجربته ولا اعرف عنه شي بصراحه

لكن انا شخصيا مع الايفون ماواجهت مشاكل مع اللمس


بالنسبه لجلكسي اس 2 ماجربته
لكن جربت الاول ومقارنه مع الايفون كجهاز بنظري متساوين تقريبا
لكن الايفون يتفوق بدعم الشركه من ناحية التطبيقات حاليا وصل عددها اكثر نص مليون تطبيق


مشكلة الايفون عندنا اهي السعر وانا معاك بهالنقطه لكن اذا عندك فيزا تقدر تطلبه من برا (بريطانيا تحديدا) بسعر 180 دينار كويتي تقريبا ( يزيد 5 او ينقص 5 ) 16GB

واما بالنسبه للآيفون الجديد تطمن ابل ماتنزل جهاز جديد الا بعد سنة من الاصدار الحالي

وصدقني اذا بتشيل هم الجديد بتتعب حتى مع سامسونج لانه بعد فتره بينزل جلكسي نوت ( مادري يمكن نزل بعد )

ونصيحه لاتاخذ جهاز بناء على اراء الغير انت جرب الجهاز بنفسك واذا اقتنعت فيه اخذه
روح اي شركه وجرب الاجهزة عندهم واللي ترتاحله نفسك اخذه

انا ياما سمعت كلام الناس وتعبت مع اجهزة اعتبرها ضياع وقت ومال


افضل نصيحه راح تاخذها من نفسك لم تجرب الاجهزه حتى لو تجربه بسيطه عند اي شركه وياكثرهم بالكويت

[Heartbeat]

بخصوص جهاز النوكيا من وجهت نظري
هو يتفوق على جلكسي وايفون من ناحية مزايا الهاتف
وسهولة التعامل معه

جلكسي وايفون يتفوقان على نوكيا بخدمة النت والبرامج

حسنا ابل لا تطرح الجهاز الجديد الا بعد سنة ولكنه غالي كما ذكرت سابقا
جلكسي ليس غالي ولذالك انا اشتريت جلكسي حاليا

انا ذهبت الى اكثر من محل
وكنت اقول لهم انا اريد ان اشتري مهما كان السعر ولكني اريد الافضل
وجميعهم ذكرو لي جلكسي
مع انهم لو قالو ايفون كنت اشتريته وهو الاغلى ومربح لهم
ربما لا يكون ماحصل دليل على تفوق جلكسي على ايفون
ولكني اعتمدت على هذا السبب والان اقولها وبكل صراحه
حين اشتريت جلكسي
اخذت اقارن بينه وبين هاتف صديق لي واعجبني جلكسي اكثر
شكرا لك اخي على تفاعلك

[OLD SNAKE 19]

بصراحــــه

الجهـــاز سئ جدا ... بالنسبه للساحه الفنيه المطروحه في الوقت الاهن !! خخخ

نستعرض المواصفات

qHD ........ هههه مضحكه جدا وقديمه ... لدرجه ان htc HD2 نزل نفس الريزيلوشن قبل سنه .
HSDPA +14 ......... الاجهزه وصلت الــى +21 من قبل 6 اشهر تقريبا
شاشه 3.5 .... تختلف حسب الاذواق , بس اراها اجحاف بحق سمارت فون
كاميرا 8 ميجابيكسل ...... طبعا نظرا لان الكامير من شركه سوني فأرى ان جهاز ARC او سوني اريكسون بشكل عام اقوى ﻻحتوائها Exmor R ... بدون التطرق الى كاميرا SENSATION XL
بلوتوث 4 .... ههههههههههه هذه اكثر ميزه اضحكتني , الشركات الاخرى بدأت بتقنيات NFC وابل توهم حطوا بلوتوث !!!!!!
siri .... طبعا دعائيه اكثر من ماهي عمليه , بدون ذكر ان google voice search تفوقت عليها بالوحش SGS II

طبعا هذا مختصر نظرتي ما ودي اكمل ﻻني تعبت

Since we're talking about smartphones
have you met ....ANDROID
<< كنت بكتب الجمله الاخيره بالعربي .. بس طلع شكلها استفزازي , فاعذروني

[ALmerzaGrsh]

شباب ، عشاق الأي فون أنا اود ان اشتري اي فون ، لكن محتار هل اشتري اي فون 4اس او انتظر 5؟ هل في خبر عن نزوله قريب؟ سمعت او قرأت لا أعلم بأن هناك احتمال نزوله خلال الـ 12 شهر القادمة واحتمال ما ينزل الا بعد 24 شهر.

هل من نصيحة؟

سمعت ان اي فون 5 موصفاته مدمرة.

[IL C a p i t a n o]

جلسكي اس 2 واقطع

الاي فون شغل تجار ونصب على الامه اليوم ب200 باجر ب300 اللي عقبه 250 بعدين 280

بورصه مو تليفون هههه

خصوصا انه

تليفون يعلق بشكل مو طبيعي بعد مده

خاصية اللمس سخيفه التصوير اي كلام

التصفح مثل وجهه

استقبال الانترنت والله زباله يعني ما تفرق مشترك 13 دينار ولا 5

كل بطيء مع الاي فون ههههه

البرامج اللي فيه اغلبها شغل تهكير

وليست الاصليه

على عكس الجلسكي اللي فيه فلاش بلير يعني قزرها على اليوتيوب

لو بتكلم ما راح اخلص

عيب تقارنون الايفون مع الجلسكي

حتى الامريكان اللحين بالمقارنات يقولون جلكسي اس 2 افضل بمراحل

غير هذا الاي فون حساس بشكل مو طبيعي

اي طيحه خلاص بيعه

الجلسكي اس 2 حذفه لي باجر الامر طبيعي

وبرامج اكثر ببلاش واصليه طبعا مو شغل تهكير مثل اليوتيوب اللي بالاي فون والسوالف هذه هههه

وما يحتاج لزقه سوده على الشاشه علشان ما تزلغ ومدري شنو

هذا غير الشاشه وحجم التليفون والتحكم ..ألخ

حجي ما عليك من الارقام اللي يحطونها لك بالجمله والله التحديث رقمه جذي ويملك جذي وجذي

اهم شيء الجوده

ما ابي اعور راسك ادخل يوتيوب وشوف المقارنات

اقوى واحد رفيجنا الكويتي اللي يقارن بين الاي فون والجلكسي اس 2

اول ما تبدي المقارنه يحذف الاي فون تسمع صوت ضربته ويقولك لا نزل ايفون جديد تعالوا قارنوا

اللحين نزل اي فون 4اس مافيه تقدم كبير مجرد حدثوا برمجتوا وحطوا فيه النظام الصوتي + ضبطوا كاميرته

ومع كل هذا الجلسكي احسن

عموما اذا ما شريت تليفون لا تشتري لا هذا ولا هذا

شهر 11 بينزل نكسوس من سامسونج يشفط للجلسكي اس 2

وسعره المعلن 2500 ريال يعني حوالي 200 دينار كويتي

بس قول ينزل 240

انطر شهرين يصير 160 واخذه هههه

لن الشعب ضارب على الاي فون دون اي تعقل والتجار مقزرينها

حطوا تحديث على الاي فوون 4 اس التحديث هذا تقدر تحطه على الاي فون العادي

الفرق بس الكاميرا زادوا سعره 160 دينار XD

والشعب يشتري

غيروا الكفر من اسود الى ابيض

زادوا اول ما انزل حوالي 40 دينار

الشعب منصوب هههه

[IL C a p i t a n o]

ايضا اذا كنت مهتم

شركة اندريود اللي برنامج التشغيل في جلسكي

شرت البلاك بيري

يعني التليفونات الجديده ان شاء الله راح تشوف فيها بلاك بيري مسنجر + نظام تشغيل اندريود يعني اثنين في واحد ^_^

وهذه مقارنه شوفها اتمنى تفيدك

شوفها كامله شوف النظام الصوتي والتصفح وسرعة الجهاز والتصوير وكل شيء فيها ^_^



وهني مقارنة عبيطه مسوينها ناس ما شاء الله فلوسهم زايده :P

لكن شوف النتيجة ^^

[ALmerzaGrsh]

صحيح بس لقيت ميزة في موقع ابل ، وهو لو اشتريت منهم جهاز ايفون تقدر ترجعه لهم وقت ما ينزل اي فون 5 وتدفع الفرق عن طريق موقعهم. هذه احد الميزات اللي عجبتني. وسمعت OS تبع الاي فون افضل بمراحل.

[OLD SNAKE 19]

شهر 11 بينزل نكسوس من سامسونج يشفط للجلسكي اس 2

+1
احسن نصيحه ..

وكلامك عن التجار والمستهلكين هههههههههههههههه اعجبني بصراحه وصادق والله

[Heartbeat]

عجبتني المقارنه والحمدالله اني اشتريت جلكسي
لكن بخصوص نيكسوس ينزل شهر 11 عندنا ولا هناك عندهم
مادري ليش ماسمعت عن نكسوس الا منك الان

[OLD SNAKE 19]

^^^

عندهم بـــ 11

عندنا ممكن اخر 11 او اول شهر 12 , يعني ما يطول

عالعموم , مبروووووووووووووووووووك الجوال الجديد تستخدمه بالعافيه , ومرحبا بك في عالم الاندرويد

[Heartbeat]

الله يبارك فيك اخوي اولد
لكن انتظر نكسوس اذا كان يستحق كما يقول الكابيتانو
راح احول عليه

[ALmerzaGrsh]

بالنسبة لسعر الاي فون فسعره ثابت في الموقع ، يعني بدلا من ان تشتريه من بلدك جديد توه نازل وتخسر الكثير عليه ، اشتريه من الموقع نفس سعر القديم لمن كان موجود.

اما بالنسبة للتجار اكيد حيحولون الاجهزة الى بورصة.

[IL C a p i t a n o]

السلام عليكم

اسف على التأخير انشغلت شوي مع الاختبارات ^_^


اول شيء مبروك التمييز اخوي تستاهله بكل جداره ^^

+

مبروك التليفون زين سويت ما راح تحسف ان شاء الله ^_^

بالنسبه ل Nexus Prime



اهو احدث تليفون راح ينزل من الاندرويد

لأنه راح ينزل بنسخة الايس كريم او نسخة اندرويد 4.0 الجديدة

مع العلم ان جالكسي اس تو رقم نسخته 2.3

واقوى نسخه كانت للسامسونج تاب والموتريلا 3.0

لكن جلكسي نيكسوس راح يقضي على الجميع بإذن الله

يقولك حتى بعد التجارب تفوق على الIos للأيفون بكل شيء الايفون كان يتميز بخدمات السحابه

اللحين جوجل قاعده تطوره وراح تنزله على الاندرويد

اللي يميز نسخة الأيس كريم ساندويتش انها سريعه جدا في التنقل بين البرامج والتصفح

وايضا جلكسي نيكسوس لو تشوفه راح تشوفه واهو مسكر راح تشوف ان مافيه ازار تحت مثل جلكسي اس 2 وجلكسي اس اللي هي زر التراجع والخيارات وHome

وهي كانت ميزه حلوه في الاندرويد اذا ما السر وراء اخفاءهم <<< حسيت اني مذيع تلفزيون ههه

الله يسلمك خلوا الازرار داخل الشاشه بدال ما تكون اسفل الشاشه علشان الشكل الجمالي للتيفون وبصراحه صاير اجمل

ايضا ملاحظه حلوه وشيء جميل في هذه النسخه انها نزلت باللغه العربيه اللي هي نسخة ايس كريم ساندويتش

ايضا على هذه النسخه كل التطبيقات راح تكون معانا تمام التمام وتدعم اللغه العربيه ان شاء الله

ايضا راح يغيرون الكيبورد بكيبورد افضل في هذه النسخه حيث ان الحروف تم استبدالها بأحرف جوجل من نوعية Roboto

ايضا راح يكون صاحب اكبر واحسن شاشه في الهواتف الذكيه لي اندرويد

ايضا بتكون الالوان فيه بشكل غير طبيعي في حين ان جلكسي اس تو تميز بالوانه الحاده والجميله الا ان جلكسي نيكسوس راح يتفوق عليه

لو بتكلم ما راح اخلص ما شاء الله على التليفون

لكن الخبر الجميل ان هذه النسخه تقدر تنزلة على نسخة خبز الزنجبيل

اي راح تنزل على الجلكسي اس تو والجلكسي اس

يعني لا تحاتي ان شاء الله

من الاخبار الحلوه ان اللحين انت بما انك مستخدم اندرويد لك برامج تطبيقات اكثر من مستخدم ابل من البرامج والتطبيقات الجديده

لأن التطبيقات الجديده شركة ابل اذا كثرت منها حييل تملك منها ب31%

اما اندرويد اتاحت لمستخدميها تطبيقات اكثر بنسبة 44 %

ايضا اللحين البرامج في الاندرويد وصلت الى نص مليون تطبيق تقدر تحمله

ومن الاخبار الحلوه ايضا العاب البلاي ستيشن راح تنزل على كافة اجهزه اندرويد يعني شغلك تمام اذا تبي الالعاب

اللحين يقولك جوميز اللي في ابل هههه

معصب يتعهد ان راح يقط كل فلوس وميزانية ابل من اجل ايقاف اندرويد هههههههه

بس الغريب ان قدر يوقف مبيعات جلكسي تاب في كل من استراليا والمانيا

طبعا الحجة اللي قاعد يستخدمها جوميز ان نظام اندرويد مسروق من Ios للأي فون

وذلك لأن رئيس جوجل كان عضو في اي فون عام 2009 الا ان بعدين طلع من اي فون وسوا بنظام خيالي اللي هو الاندرويد اللي يدعي جوميز ان مسروق

الحين نجيب على اسئلتك الله يخليك

التليفون ينزل شهر 11 في بريطانيا ان شاء الله

صعبه ينزل عندنا بالكويت خصوصا ان الموزعين انقرصوا من الجلسكي اس تو

لأن كانوا مسوين له دعاية قويه ان بينزل وبيكسر الاي فون

وهو طبعا افضل من الاي فون

لكن انصدموا انهم شروا كميات كبيره لكن القبول عليها كان قليل جدا

والسبب ان الشعب كل ضارب على الاي فون ما يشوفون تليفون غير الاي فون

مثل واحد ذاك اليوم يسألني عن تليفوني جلكسي يقولي ليش شاريه

قلت له احسن من اي فون بالنسبه لي

قالي وين احسن اي فون فيه واتس اب فيه تانغو فيه مدري شنو

ضحكت عليه وما رديت عليه

فيعني اغلب الشعب عباله هذه التطبيقات فقط موجوده بالاي فون ويشوفونه تليفون خارق ومستحيل ينزل احسن منه ، بالرغم ان اللي عندنا مطوره واحسن من اللي عندهم !

فاللي صار ان الجلكسي اس تو ما لقى اي اقبال له وهذا ادى الى ان سعره يطيح بشكل مو طبيعي

يعني طاح يمكن 80 دينار !!

اللحين سعره 150 تقريبا

فأعتقد صعبه جدا ينزل قريب راح ينتظرون الى ان يصرفون الجلكسي اس تو ويبيعونه

وبنفس الوقت يكون سعر النيكسوس صار ارخص

فينزلونه بسعر غالي وهم شارينه رخيص وراح يربحون على افانا << تجار مقزرينها الله يخسهم ##

فإذا انت هامك التليفون تقدر تطلبه

خصوصا ان مافي اي مشكلة من ناحية اللغه العربيه لأن فيه عربي اصلا

اطلب فقط نسخة الشرق الأوسط وامورك طيبه

فوق هذا كله راح تاخذه ارخص من انك تشتريه من بريطانيا اساسا

وذلك لأن لما تطلبه ما راح تطلع عليك ضريبه فقط فلوس الشحن

اتمنى اني افدتك اخوي واسف على الاطاله ^^

[Heartbeat]

وعليكم السلام

لا لا معذور اخوي كابيتانو

الله يبارك فيك

على التلفزن , والتميز

بيض الله وجهك اخوي

صراحه بدأت اشك ان لك نسبة في جهاز نيكسوس
يا اخي كلامك خير دعايه له شوقتني والله اني اشتريه

بخصوص الايفون ماني عارف ليش ماحبيته
يمكن لأن الناس طاحو فيه ومن غير تفكير انا ماعجبني
حاولت ادور بديل في نوكيا وماحصلت
لكن والحين وبعد تجربتي لجلكسي
حتى بعض الاصدقاء ناوين يبيعون ايفون ويشترون جلكسي
لكن انا قلت لهم اللي قلته لي انت
عن نيكسوس وقلت انتظرو شوي

خلاص انا قررت شاريه شاريه نيكسوس
او انزل النسخه في جهازي

بارك الله فيك الكابيتانو على هذا الشرح
بصراحه انا متشوق لهذا الجهاز الجديد

وشكرا لك مرة اخرى

[Yoshi]

هارت حبيب قلبي ,, بعد ماتشتري الجهاز .. ياليت تنزل الصور حقته لان نفسي اشتري موبايل ومحتار انا ولا ابغى اشتري الأي فون لان كل الناس عندهاإأإأ

وقلنا رأيكـ بعد ماتستخدمه وتجاربكـ معه عشان اتوكل على الله واشتري مثلكـ ,,

موفق بكل خير