هاذي اول مره اكتب في العام فحبيت أكون موجوده هالشهر في القسم ^.^
أحب في البدايه اقول اني دايما أفضل اكتب بالعامي...ادري ان الاغلب هني عالفصحى...لكن المواضيع اللي فيها نقاش أرتاح أكتبها عادي
عشان اعبر بسهوله اكثر...ان شاء الله يكون كلامي مفهوم ^^
السالفه وما فيها اني اجوف عندنا ألف طريقه للتواصل: مسنجر - واتس اب - تويتر - فيس بوك - لاين............الخ
لكن الشي الغريب ان كل ماتطوّرت وسائل التواصل وكثرت الناس تبتعد عن بعضها أكثر @@
يعني لو نقارن معارفنا بمعارف امهاتنا واباءنا...هم يعرفون عيال المنطقه اللي ساكنين فيها كلهم
وعلى تواصل مع الاهل واهل الاهل واهل اهل الاهل ونسايب الاهل...الخ
اما احنا يادوب نعرف بيت جدنا وعمامنا وخوالنا وعيالهم لو مب كلهم
اباءنا ما كان عندهم الا تليفون ارضي....واحنا عندنا كل شي ولو تسأل عن احوال شخص السالفه ما تاخذ الا ثانيه ترسل مسج وهو يرد عليك متى ما يفضى
عكس التليفون العادي اللي يكون في الصاله مثلا تنتظر يرن وترد الام وتنادي لك على فلان ولازم يترك شغله ويجي يكلمك...ربع ساعه او نص ساعه عالاقل لين تخلص السالفه وتقفل التليفون
بس فعلا على كل هذا كانت الناس تسأل عن بعض...الحين لما تكتب مسج هذا بس اللي فيه الخير يرد...الاغلب ماله نفس ويترك الرساله تولي >_>
فأستغرب...شلون على كل هالتسهيلات اللي عندنا بدينا نبتعد عن بعض؟؟؟؟ @__@
يعني بالنسبه لجيلي...ايام اللي كان عندنا جوال ومسنجر كنا متواصلين مع ربعنا (اصدقاءنا) اكثر
وكل يوم سوالف نص ساعه ساعتين او اكثر O.o
عالواتس اب الحين ما نقدر نفتح موضوع...ولو فتحنا واحد ينقفل في سطرين
وما نرجع نتكلم الا بعد كم يوم >_>
شلون تجوفون حياتكم مع وسائل التواصل الحاليه؟
