السلام عليكم ورحمة الله وبركاته .
قمت بتجربة سبعة من منتجات الطاقة , كل واحد منها على حده ولعده ايام مع مراعاة التالي :
اولاُ: لم استخدم مع اي منتج طاقه مع اي مكمل اخر حتى لايحصل تعارض او تاثير غير مباشر على تقييم المنتج. فقط بروتين بعد التمرين وليس قبله وملتي فايتمن في الصباح.
ثانيا: جميع المنتجات التي تمت تجربتها استخدمتها على معدة فارغة.
ثالثا: استخدمت اقصى جرعة مسموح بها وفقا لتعليمات كل منتج.
رابعا: التقييم تم بناء على القدرة على رفع الاوزان و اكمال التكرار المطلوب لكل تمرين وانهاء التمرين كامل بدون تعب. اما الطعم والسعر وشهرة المنتج فلم تدخل في اعتباري عند تقييم اي منتج .
المنتجات التي تمت تجربتها:
Animal Pump من شركة Universal
Assault من شركة Muscle Pharm
Animal Rage من شركة Universal
Neurocore من شركة Muscletech
Supercharge من شركة Labrada
N.O. Xplode (بدون كافيين) BSN
WhiteFlood من شركة Controlled Labs
لماذا اخترت هذه المنتجات من بين منتجات الطاقة الكثيرة؟
بعد ماقرات كثير في منتدانا وفي منتديات اجنبية عن تجارب الاعضاء مع منتجات الطاقة صرت ابحث عن المنتجات اللي يتكرر اسمها كثير من حيث اعجاب الاعضاء فيه وفي ناحيه ثانيه
وهي اني حاولت تجنب منتجات مشهوره لكن معروف عنها خطورتها او انها تستخدم مواد محظورة على الرياضيين (سيتم التفصيل لاحقا).
وقبل اتكلم عن تجربتي مع هذه المنتجات ساذكر معلومات مهمة تتعلق بمنتجات الطاقة :
* معظم منتجات الطاقة تعمل بشكل رئيسي على ناحيتين : النظام العصبي و النظام العضلي .
المقصود بالنظام العصبي: مانسميه بالتركيز او شعورك بطاقة ونشاط ورغبه في التمرين. والمكونات اللي تدخل تحت التاثير على النظام العصبي كثيرة اشهرها الكافيين , لكن كثير من الاحماض تستخدم في منتجات الطاقة لتحسين اداء وعمل النواقل العصبية.
اما النظام العضلي: مانسميه بالقوة او التحمل او حتى البمب. مع ان كل واحد منها له مكون ياثر فيه بشكل اقوى من غيره. مثلا البمب اشهر مكون يستخدم له هو الارجنين والتحمل يستخدم له بيتا أليناين. لكن طبعا توجد مكونات كثير وليست هذه فقط لكن ذكرت هذه كأمثلة.
ومعظم منتجات الطاقة تحتوي على مايدعم النظام العضلي والعصبي لكن بنسب مختلفة وكفاءة متفاوتة.
*لايوجد منتج طاقة مجاز من هيئة الغذاء والدواء الامريكية , بمعنى انت تستخدم منتجات عليها دراسات لكن لم ترقى الى درجة الجزم بنتائجها. ولا حتى تاثيرها على المدى الطويل. طبعا هذا يختلف حسب كل منتج ومكوناته . مثلا الكرياتين وهو موجود في معظم منتجات الطاقه جرت عليه اختبارات كثيرة ودراسات موثوقه ويعتبر امن جدا باذن الله ومعروف تاثيره على جسم الانسان ونتائجه. لكن للاسف هذا لاينطبق على كثير من المواد التي تدخل في منتجات الطاقة. فقط كمثال مادة (Picamilon) لم تجرى عليها دراسات كافيه حتى يقال انه امن تماما ومعروف كل اثاره, ولذا لايقال امن تماما ولا يقال ضار.
*عدد كثير من منتجات الطاقة تكتب لك مكونات المنتج ولكن لاتذكر الكميات بالتفصيل. يعني مثلا يذكر لك (power blend: 3000mg) بمعنى مجموعة من مكونات طاقة مقدارها 3000 ملي جرام وبعدها يذكر لك هذه المكونات فيذكر مثلا (كافيين - عشبة الجورانا - جنسنج ... الخ) لكن كم كميه الكافيين ماتعرف فقط المجموع هو 3000 ملي جرام . وهذي مشكله لان بعض الشركات مايهمها الا الربح المادي وممكن تتجاوز النسب المسموح فيها لكل مكون وهذا اكيد له تاثير على المدى البعيد واحيانا تشعر فيه مباشره.
*أسوا مافي منتجات الطاقة واللي كثير يغفل عنها هو احتواء بعضها على مواد محظور استخدامها من قبل الرياضيين وان الجهات المسووله عن كشف المنشطات او الممنوعات تعتبرها مخالفة ولايعذرك انك ماتدري, انت مسوول عن اي شي تدخله في جسمك. في كثير يقول انا مااشارك في منافسات رياضية ولايهمني وجود مواد ممنوعه او منشطه . طيب هل سالت نفسك ليه ممنوعه ؟ الكرياتين يعطي العضلة قدرة احتمال لكنه مسموح لكن في مواد ثانيه ممنوعه. المنع بسبب ضررها على جسم الانسان. وضررها المثبت والاكيد. المكونات اللي ماثبت ضررها مامنعت ولا تم تاكيد سلامتها . لكن اللي منع فهو تاكد ضرره.
واشهرها في منتجات الطاقه هي مادة : (Dimethylethanolamine) ولها اسماء كثير مثل (DMAE) وهي ضارة وانصحك اخي بالابتعاد عن اي منتج يحتويها.
*منتجات الطاقة تساعد شخص عنده عمل طول النهار ووقته ضيق فيضطر يتمرن بوقت جسمه اصلا مرهق , اذا انت تجي للنادي نشيط , او عمرك صغير , او مازلت في بدايتك في اللعبه فانصحك تتجنبها , او على الاقل تاجلها كم سنة قدام. جسمك اذا مازلت في البداية فبامكانه الاعتماد على نفسه و الغذاء الجيد اهم للطاقه وللبناء . ويصير اذا استنفذت كل الاشياء الطبيعية ووصلت لمرحله متقدمه ممكن تجرب منتجات الطاقة .
* معظم منتجات الطاقة تحتوي مواد تستخدم احيانا كعلاج لامراض اخرى , مع اختلاف النسب. مثلا تجد مواد في منتجات الطاقة مواد تدخل في علاج الاملاح - الزهايمر - مشاكل الاعصاب - نقص في الامتصاص - الهضم - الاكتئاب - .... الخ , فاذا كنت لاسمح الله تعاني من ضغط - قلب - سكر او اي مرض فضروري تحذر من منتجات الطاقة فبدون شك لها تاثير على شخص مصاب باي من هذه الامراض وغيرها. باختصار لاتستخدمها الا وانت متاكد انك سليم باذن الله . الله يحفظنا واياكم من كل سوء وشر.
*المكونات الرئيسية في معظم منتجات الطاقة : الكافيين - بيتنا الياناين - ارجينين - كرياتين بانواعه - فيتامينات لدعم الامتصاص لمكونات المنتج - جلوتامين- احماض امينيه مختلفه - اعشاب مختلفه.
طبعا الاختلاف من منتج لاخر هو النسب و المكونات . بعضها مايستخدم اعشاب او بعضها مافيه جلوتامين. لكن النقطه المهمه هنا هو ان كل منتج عادة يكون فيه مادة رئيسية او هي المكون الرئيسي للمنتج.
كيف تعرف المكون الرئيسي؟ المكون الرئيسي ليس دائما يكون واضح على العبوة لكن غالبا اذا فيه تفصيل للمكونات يكون واضح . فهو الاعلي تركيز من بين المكونات وغالبا مايذكر كاول مكون من المكونات بعد الفيتامينات.
*في شخص ياكل كربوهيدرات كثير او مثلا اكل دسم ومايشعر باي تعب , جسمه يتقبله بشكل جيد , وفي شخص ثاني اذا كثر من الكربوهيدرات او اذا اكل دهون تتعب معدته. في اشخاص حساس من الاكل الحار. مايتحمل الفلفل الاحمر مع انه نبات طبيعي . نفس الشي ينطبق على منتجات الطاقة , تقبل الجسم لها والتفاعل معها يختلف من شخص لاخر . مثلا : ماده البيتا الاناين تسبب لكثير من الناس اسهال اعزكم الله. الكافيين في اشخاص ينبهه لدرجه كبيره لحد يصل احيانا للتسبب بعدم انتظام ضربات القلب بسبب الكافيين. لذا اذا جربت منتج جديد لاتاخذ اقصى كميه مسموح بها ولا حتى اقل كميه. ابدا بربع او نصف الجرعه وشوف كيف جسمك يتقبله او لا. بعض المنتجات فيها اعشاب مثل الجورانا والجنسنج واليوهمبي وهذي الاعشاب بعض الناس تسبب له صداع وتوتر واجهاد بدل من نشاط وطاقة.
بعد المقدمة المختصرة قدر الامكان عن منتجات الطاقة ومكوناتها ساذكر لكم تجربتي (لاحظ انها تجربتي يعني ممكن اللي يعجبني مايسوي شي معاك والعكس صحيح) للمنتجات وبعدها كيف تختار المنتج المناسب لك:
Assault : هذا المنتج حائز على جائزة افضل منتج طاقه في موقع بدي بلدينج لعام 2012 , لكن تجربتي له اقول انه متوسط . البمب معدوم ماتشعر انك اخذت شي. في الاوزان جيد الى حد كبير.
Animal Rage معظم مكونات هذا المنتج موجهه للنظام العصبي , يعني يعطيك تركيز , هذا المفروض من هذا المنتج , عني انا ماسوى ولا شي معاي. وبالعكس اذا اخذته احس اني غير مرتاح في التمرين والمزاج مايصير كويس. حقيقة جربته اكثر من مره , ماضبط معاي. هم كاتبين يمكن استخدامه مع انيمال بمب, وجربته مع انيمال بمب وكانت النتيجه اسوا, انيمال بمب لحاله افضل.
Neurocore هذا المنتج يحتوي مادة من المواد الممنوعة وتعتبر من المنشطات. ولانها مكتوبه باسم مختلف مااكتشفت وجودها الا متاخر. لكن من تجربه والله سي جدا جدا . فيه قوه ويعطي طاقه لكن في نص التمرين تطفي , تبدا تكربن ويطلع منك دخااان, لا هذي من عندي . لكن بجد متعب ومنهمك للجسم , وترجع البيت المزااااج خرباااان , وعقلك مشوش ومافي تركيز . تجربه سيئه جدا
.
N.O. Xplode (بدون كافيين) : اخترت بدون كافيين من باب التجربة , واختبار جسمي للمواد الثانيه ماعدا الكافيين, اتوقع لو استخدمت المنتج العادي بالكافيين بيكون قوي وفعال
WhiteFlood هذا المنتج غير مشهور عندنا كثير لكنه مشهور في موقع بدي بلدينج , قبل اذكرلكم تجربتي معاه , فيه تحذير على نفس العبوة بانه يحتوي مواد تسبب السرطان . وجميع منتجات الشركه فيها هذا التحذير . لكن حاطين التحذير في مكان ماتنتبه له ابدا . حاطينه بعد التحذير التقليدي اللي هو لايستخدمه الاطفال لايستخدمه مريض كذا .... الخ , ولو انتبهت لهذا التحذير والله مااشتريه , جربته مرتين وحقيقه انه قوي ويعطي باور عالي , وخلاني اعرق بشكل غير معتاد , لكن الى حد ما اذا خلصت التمرين احس بتعب في جسمي واجهاد كبير. وقوي على المعدة . انصحكم لا احد يقرب منه . كاتبين لك على العبوة تراه يجيب سرطان يعني اخلاء لمسؤوليتهم مع علمهم بوجود مواد فيه تسبب السرطان.
Animal Pump : منتج جيد , عيبه انها حبوب وليست بودره , من حيث البمب نتائجه واضحه وتشعر بضخ الدم في العروق اما الاوزان والنشاط فبدرحة اقل بقليل.
Supercharge : خليته للاخير , لانه صديقي الصدوق, بمب عجيب. اول جلسه مافي شي , من الجلسه الثانيه تشوف البمب مضبوط . تركيز من البدابه للنهايه , مزاااج رااايق , تجي النادي مبسوط وتطلع مبسوط , حقيقة ابداااع , مافي تعب بعد التمرين , عيبه كميه الكافيين فيه عاااليه مقارنة باي منتج طاقة .السكوب فيه 225 ملي جرام كافيين والسكوبين واللي هي اقصى كمية مسموحة فيه 450 ملي جرام, هو اعلى من كل المنتجات اللي فوق في كمية الكافيين.العادة منتجات الطاقه يكون فيها 150 الى 200 ملي جرام كافيين , هذا فيه الضعف اذا استخدمت سكوبين, والحد اليومي الامن من الكافيين مختلف عليه لكنه بين 300 ملي جرام الى 500 ملي جرام .
اذا برتبهم الافضل للاسوء : سوبرشارج ثم وايت فلود (لكنه مسرطن) ثم انيمال بمب ثم اسولت , ان او اكسلود لو كان فيه كافيين بيكون حكمي عليه افضل , اما انيمال ريج و نيرو كور فمايستاهل ابدا.
كيف تعرف منتج الطاقة المناسب لك ؟
باختصار : اعرف انت تتاثر اكثر بالنظام العضلي او العصبي , هذا اول شي , يعني مثلا في شخص يشتغل معاه انيمال ريج بفعاليه كبيره , هذا يميل لانه تحفيز النظام العصبي عنده يعطيه نتائج افضل.
شخص اخر يحب ياخذ ارجينين لحاله قبل التمرين , هذا يميل لتحفيز النظام العضلي , لو قريت المقدمه في هذا الموضوع بيكون واضح المقصود .اذا عرفت جسمك يتحفز اكر باي منهما , ابدا ابحث عن منتج معظم عمله مركز على الجانب اللي ياثر فيك.
النقطة الثانية هي انك تعرف المادة الرئيسية في منتج الطاقه , هل هي كافيين او هل هي مثلا تورين او مثلا (Citrulline malate) , اذا عرفت المادة الرئيسية تقدر تقريبا تحدد هل المنتج هذا يفيدك او لا, يعني الارجينين مثلا يساعد في النظام العضلي ويعطي بمب , لكن في شخص ثاني مايتاثر كثير بالارجينين لكنه يتاثر اكثر بالكريايتن , ويعطيه تحمل وقوه في الاوزان فيبحث عن منتج مادتة الرئيسية هي كرياتين.
جميع ماذكر هو تجربة شخصية وراي شخصي من خلال تجربة واهتمام بمنتجات الطاقة حبيت انقلها لكم للفائدة وللنقاش , اذا اعجبك الموضوع دعوة في ظهر الغيب
المشاركة الأصلية كتبت بواسطة ابو علي 1
