السلام عليكم
انا يااخوان انصكيت باند من اللعبه , الحين راح احاول ارجع من جديد وبقوه و يا انا او بليزرد
يااخوان انا بقدم لكم نصايح يمكن تفيدكم و كوني انسان مسكين مظلوم كل شوي مصكوك باند و خسران كل الذهب والقطع اللي كنت اكنزها و اعرضها للبيع وقت الحاجه
انا بكون صريح معاكم
انا استخدم بوت , لأني تركت اللعبه وما العب و تقريبا 99% من وقتي باللعبه اهو البوت مو انا
و لو مو البوت كان اعتزلت اللعبه من زمان لكن اللي مصبرني عليها اهو البوت والمتعه من اني اشوفه بين فتره وفتره مطلعلي شي جديد
قطع epic , مونتات , جير من رايدات او دنجنات , غير طبعا الmining و الherbs
البوت هذا لحد يكلمني عنه او شلون يستخدمه , انا مو بصدد تعليم الناس عليه , لكن بقولكم شنو خدمني فيه , بعطيكم امثله يعني للي مايعرفه
افتح اللعبه وادخل بالشخصيه و افتح برنامج البوت
اشوف رايد لفل 70 واللي اسمه tempest keep او the eye كيفكم اختاروا الاسم الصح , لكن الرايد اللي يطيح منه هالمونت
ملف مرفق 361757
المهم افتح صفحه الرايد واللي اهي لما اضغط داخل اللعبه على حرف O ولما يفتح الصندوق اروح تحت على كله raid ولما افتحه اروح فوق على raid info
اشوف هل انا مخزن الرايد , يعني ذابح البوسات كلهم و مقفول لازم انطر اسبوع او وقت انتهاء الصيانه عشان ادش مره ثانيه او لأ
انا بأكاونتاتي مسوي شخصيات مكرره خاصه للأمور هذي , و افضل شخصيات شفتها مفيده اهي الديث نايت تانك و الوورير
الهنتر زين لكن مشكلته مع الpet لأن ساعات بعض البوسات "بوسات يعني bosses مو يعني قبلات مثل قبلات الملك الحاره اللي يرسلها لكم"
المهم ان بعض البوسات لما تكون بروحك معاه مايسوي بعض حركاته القاتله , لكن لما تكون مع شخص ثاني او انتوا 3 يسويها وتفشل مهمتكم بالرايد
مثلا بعض البوسات عنده تحكم mind control ويتحكم ب8 لاعبين , طبعا هذا التكتيك للبوس مخصص ل25 لاعب , يتحكم ب8 لاعبين والباقيين يتصرفون
لكن ان دخلت انت ومعاك 1 او 2 راح يتحكم فيكم البوس كلكم , لأن مثل ماقلت يتحكم ب5 او 8 او 10 , وانتوا 2 او 3 راح يتحكم فيكم كلكم وبالتالي لما تصيرون كلكم متحكم فيكم من قبل البوس راح يبتلش الsystem
والبوس مايدري الحين منو العدو اللي راح يضربه , فيحصل الreset ويختفي البوس و تعيدون من جديد , وراح تتعلقون بالمكان هذا على طول
لكن ان كنت بروحك ماراح يمشي التكتيك هذا وراح يضطر البوس يسوي الحركات العاديه , لكن ان كنت هنتر و معاك الpet راح يشوف البوس شخص منكم تانك , يا انت او البت مالك
وراح يسوي الحركه معاك ويتحكم فيك و يخلي البت او العكس وهذا الغالب انه يتحكم بالبت ويخليك انت , وانت طبعا مع البت راح تتضاربون واهو قاعد يضحك
عموما ان حصلت معاي عده مرات مع الهنتر الى ان اوقفت نشاطي فيه و اتجهت الى الوورير والديث نايت
-
انتهى الفصل الاول
-
انا عندي اكاونتين فيهم كل الشخصيات مع شخصيات مكرره وظيفتها farm
ادخل the eye عشان المونت و اشغل البوت واهو يروح من نفسه يدخل ويقتل كل البوسات وبالنهايه يروح للبوس الاخير اللي اهو :
Kael'thas
واهو اللي يعطي المونت هذا , وانا ماشاء الله عندي الشخصيات الكثيره و ماعندي اي هدف باللعبه سوى التفريم على كل شي مميز باللعبه
يعني حظي مرتفع بسبب ان عندي مايقارب ال25 شخصيه او اكثر
في دنجنين تدخلهم نورمال ويعطونك مونت ايام cata
واحد اسمه the stonecore وهذا بداخله بوس تنين يكون ثاني بوس بالدنجن ويعطيك chance ان يقط مونت يشبه , طبعا تدخله نورمال وتحصله بعد لأن النورمال تدخل ورى بعض عكس الهيروك اللي باليوم مره
و دنجن ثاني اسمه the vortex pinnacle وهذا نفس اللي قبله هم ثاني بوس تنين ويحذف مونت نفسه او يشبه لكن الحظوظ قليله و ايضا تدخل نورمال وتفرم عليه
اذا دخلت النورمال اكثر من 5 مرات يمكن ينقفل ويقولك انت دخلت دنجنات كثير و ماتقدر تدخل بالوقت الحالي
لكن من شفت من البوت و طريقته ان ينتظر 15 دقيقه بين كل مره يدخل , الظاهر ان اذا انتظرت 15 دقيقه بين كل مره مايطلعلك القفل هذا
المهم ان البوت يقوم بكل هذي الامور عني , اختار الشخصيه وافتح البوت و اختار الرايد و اضغط start واهو يروح
طبعا كل رايدات لفل 70 يروح لها , و يروح molten core اللي حق لفل 60 و يروح دنجنات الا الخاصه بلفل 90 , يروح لها لكن مع قروب ويروح رايدات لفل 90 مع قروب , يعني جماعي مو بروحه
المهم ان يقوم بكل شي وهذا اللي خلاني اعتمد عليه و اخليه يلعب عني , مع ان جابلي المشاكل والتوقيفات بس ما اتوب المشكله
-
انتهى الفصل الثاني
-
اذا كنت من عشاق اللعبه لا تفكر تستخدم البوت , لأن انا كنت من عشاقها وكل شخص اعرفه بالنت وخارج النت استخدم البوت قال نفس كلامي
البوت يخليك تترك اللعب و تعتمد عليه بشكل كلي وكل شخص اعرفه يستعمل البوت قالي انه 24 ساعه البوت شغال وان اهو بس متفرج
وهذا ما يحصل معاي , من بعد الادمان توقفت عن اللعب واذا لعبت ماتتجاوز الربع ساعه و ازهق اقول خل اشغل البوت احسن
اذا انت من اهل المشاكل باللعبه او راعي بوت و تاخذ باند بين فتره وفتره انصحك بالجيلد الخاص
انك تروح تسوي شخصيه لفل 1 و تروح للمدينه الرئيسيه تكلم الجيلد ماستر اللي تسوي عنده جيلد و يطلب منك تدفع 10 سلفر و يعطيك رساله تحصلها بالشنطه ويقولك خل 4 اشخاص يوقعون على الرساله وتعال عشان يصير عندك جيلد
اذا سويت كل هذا وفتحت الجيلد خل شخصياتك بس بالجيلد ولا تدخل اي شخص ثاني
اذا عندك اكاونت ثاني وثالث ورابع سو فيهم شخصيات لفل 1 او شخصيات لفل اعلى بس مو داخلين بأي جيلد ودخلهم بالجيلد مالك و عطهم صلاحيات انهم ياخذون اغراض و فلوس بغير حد
لأن في حد معين مثلا يقولك حدك تسحب 10000 جولد باليوم او الشهر , ماادري بالضبط لكن انت افتح اللمت كله وخلهم ياخذون وقت مايبون والمبلغ اللي يبون
و حط كل الاغراض الepic اللي BoE اللي يصيرون سول باوند لما احد يلبسهم و كل الجولد بكل الاكاونتات فيه , عشان لا سمح الله انصك اكاونت من اكاونتاتك باند يكون اقرع , يعني مافيه ولا فلس وكل الاموال بالبنك مال الجيلد
ماتتحسف عليه بعدين
اذا ماحصلت 4 يوقعون على الجيلد دزلي رساله بالخاص وانا ارسلك 4 اشخاص يوقعون و تسوي الجيلد , مو مهم اي سيرفر ولا الفاكشن
عندي ناس مستعدين يسوون اي شي عشاني خصوصا داخل اللعبه و انا عملت جيلدات بأكثر من سيرفر و فاكشن بيوم واحد بفضل مساعدتهم لي , عكس الانجليز اللي قعدت شهر اطر منهم التوقيع طراره ووصلت المبلغ الى 250 جولد عشان توقيع ومحد راضي
-
انتهى الفصل الثالث
-
بعد ان تشاركوا شخصياتك بالباتل نت كلهم وصاروا يستخدمون المونتات نفسها , واذا انت من محبين جمع المونتات انا اقدملك اقتراح , انا مسويه شخصيا و اكيد في ناس مسويته بعد
الا وهو انك تسوي شخصيه وحده في سيرفر normal وشرط يكون فاضي يعني new player عشان مايصير حسد بينك وبين اللاعبين الثانيين , يعني مثلا تروح بشخصيتك الرئيسيه في سيرفرك الرئيسي المزحوم تدور مونت مثلا time-lost
تروح للأماكن اللي يفتر فيها او يطلع منها تشوف 10 الاف شخص منتظرينه غيرك , راح تكون فرصتك 00001% انك تحصله
لكن لو تروح سيرفر فاضي و نورمال بعد و تقعد هناك تنتظره , مايهم السيرفر شنو طالما ان المونت ان حصلت عليه راح يتشارك اكاونتك مال الباتل نت كله فيه , يعني لو عندك 10 حسابات في الباتل نت كلهم راح يحصلون المونت ويستخدمونه
وانا كنت انتظر time-lost في مكانه اللي يطلع منه و عطاني الاحداثيه احد الاصدقاء وقالي شفت الجبل هذا ؟ قلت اي , قال منه يطلع المونت
انا بصراحه ماصدقت , لكن وضعت الشخصيه بالمكان اللي يطلع منه و السيرفر نورمال يعني محد يجي يذبحك , يعني انا هورد مايجون الاينس ويذبحوني وانا لاهي عن الكمبيوتر او مشغل البوت , وطبعا البوت في ميزه صيد المونتات وقتلهم
وانا كنت مشغله و حاطه بالمكان هذا وناطر بس يطلع لأن ان طلع البوت راح يذبحه وياخذه , وبما ان السيرفر نورمال محد من الضد يقدر يسويلي شي ويخرب التخييم اللي مسويه للمونت
و طبعا يجي 1 او 2 عندي ينتظرون معاي لكن يزهقون ويمشون وانا قاعد "لأني بوت" وهم يعتقدون اني انسان فاضي 24 ساعه مجابل المكان ناطره يطلع بس
المهم وانا قاعد بالمكان و صدفه كنت موجود عالجهاز شفت المونت طلع من الجبل , مع بحث باليوتيوب شفت مقطع هم يتكلم ويقول عن المكان و مصور اهو المونت واهو يطلع
ترى الموقع صحيح مو فبركه او شي , وانا شخصيا مجرب الموقع هذا وطلع جدامي التنين الازرق و تايم لوست
انا كنت واقف بشخصيتي مكان ما طلعلوا بدون يعني ما استخدم مونت نفس صاحب المقطع هذا , عشان لما يطلعون اقتلهم على طول قبل ما يجي احد العذال وياخذهم مني
لكن انصحكم ان تكونون بسيرفر فاضي new player عشان يكونون الناس قله وماكو حسد و سيرفر نورمال عشان توقف مكان مايطلعون و تنتظر بدون مايجي شخص وانت لاهي عن اللعبه يذبحك ويمشي
-
انتهى الفصل الرابع
-
كلمني احد الاشخاص الموثوق فيهم خارج المنتدى
بخصوص الناس اللي يقولون نسويلك boost في الرايدات وال pvp
ومثل اللي تشوفونهم عندنا هني في موضوع البيع والشراء اللي يقولك نسويلك بوست للرايدات والبي في بي وهم اجانب طبعا
هذا الشخص انا اعرفه شخصيا ومن الناس اللي بدأنا نلعب ووركرافت مع بعض , من زمان يعني واهو معاي باللعبه لكن اهو بسيرفر وانا بسيرفر , قليل جدا نجتمع بسيرفر او نسوي شي مع بعض
اهو تخصصه باللعبه pvp مايحب شي اسمه رايدات و دنجن , لا تكلمه الا عن الarena وهالسوالف , وانا عكسه تماما , وظيفتي التجميع للأسلحه والجولد والمونتات و اي شي rare
المهم هذا الشخص جاني في احد الايام تقريبا الاسبوع الماضي و قالي فهد انا شفت العجب
قلت شلون ؟
قال انا الحين تأكدت ان بليزرد فيهم جيم ماستريه متعاونين مع ناس مسويت مواقع متخصصه للعبه و التفريم ويتاجرون من وراها
قلت شلون يعني و انت شعرفك ؟
قال :
انت تدري اني اقعد في دوانيه روادها كلهم يلعبون ووركرافت , واحنا بالدوانيه كل واحد معاه كمبيوتره و مجابلين بعض ونلعب
واحد من الشباب اللي معاي بالدوانيه يبي مونت مال الpvp , وهذا المونت ما تاخذه الا لما تلعب الريت مال الباتل جراند مع جروب
وتلعب warsongs و لازم انت ياللي تبي المونت تاخذ العلم بنفسك وتوصله للبيت مالكم , ولازم تاخذ العلم 50 مره وشرط انت اللي تاخذه مو اي واحد من القروب اللي معاك
وهالشي صعب الا اذا اتفقوا اهل القروب انهم يلعبون 50 مره وكل مره انت اللي تاخذ العلم وفوق هذا شوف الخساره اللي راح تصير , يعني مو كله تفوزون انتوا بال50 مره وتاخذ المونت , احسب كم مره تخسرون بعد
اردف صاحبي قائلا
ان صاحبه اللي معاهم بالدوانيه يبي المونت هذا , وماادري اي موقع دخل بالضبط , اهو دخل المنتدى عندنا هني وشاف الاعلان اللي مسوينه الاجانب او دخل من جوجل على موقع يقول ان يعطيه المونت هذا
المهم ان كلم احد اهل المواقع واتفق معاهم على ان يدخلونه warsong و شرط انهم يربحون 50 مره وياخذ المونت , قالهم بس انا لازم اخذ العلم واوصله للبيت مالنا , قالوله نعرف كل شي لا تخاف
راح نخليك انت تاخذ العلم وتوصله بنفسك , قال انا يعني مو ذاك الزود باللعبه , يعني احتمال يفركوني اللي ضدنا , قاله صاحب الموقع لا تخاف , راح تاخذ العلم 50 مره و توصله بدون لا تموت ولا مره
صاحبنا هذا يقول انا شكيت انهم نصابين , يعني مو لهدرجه يسوي فيها جنغر ويقول راح نخليك تاخذ العلم 50 مره بدون تموت و 50 مره فوز بدون ولا خساره
يقول شك بالموضوع , ولكن لأنه غاسل ايده من المونت ان يحصله مع قروب عشوائي , قال خل ادفع واشوف
-
انتهى الفصل الخامس
-
دفع صاحبنا المبلغ و قالوله اليوم الفلاني خلك موجود وراح ندزلك دعوه
انتظر صاحبنا على نار وهو يشك ان الدعوه لن تصل ابدا
يقول بالوقت المحدد وصلتني دعوه من شخص مجهول , يقول استقبلتها وانا عارف انها منهم , وقلت بس الناس صادقين و دام طلعوا مو نصابين اكيد انهم ثقه وراح يخلوني افوز 50 مره
يقول لما دخلت القروب تفاجأت ان اللي بالقروب شخص واحد بس
يقول انا متوقع 10 لاعبين اقل شي او ال15 لاعب , بس يجيني لاعب واحد بس , يقول شكيت قلت يمكن مو اهو صاحب الموقع , هذا يمكن شخص واقف عندي ويبي يشوف الجير مالي وبالغلط ضغط انفايت
اكيد انصبوا علي , راحت الفلوس
يقول وانا افكر بالامور هذي جان اشوف اللاعب يقولي ready ?
يقول انا ضحكت , ابك جيف ريدي وانت بروحك ياابو الشباب وتقولي بالموقع راح اخليك تفوز 50 مره ورى بعض
شكلنا راح نتهزأ ونضحك القروبات علينا , يقول قلتله انت من صجك وله تتغشمر ؟
انا دافع فلوس عشان تجيني من موقعك معاك قروب كامل , تسويلي بوست كلاعبين محترفين وانا النوب بينكم وتفوزون واطلع منك وخلاص
قاله "مالك شغل"
انت جاهز الحين ؟
قاله صاحبنا اي جاهز . وقال بقلبه خلنا نشوف تاليها
يقول سجلنا الدخول ودخلنا warsongs
ولما انفتح الباب قالي يلا روح اخذ العلم وتعال انا ناطرك هني
يقول صاحبنا انا فتحت حلقي , هذا مجنون او نصاب قليل ادب , يعني ماخذ فلوسي ويبيني اتهزأ
قلتله شلون ؟
قال روح اخذ العلم وتعال حطه مكان العلم مالنا , اخذه 3 مرات ونفوز وندخل غيره وغيره لغايه نوصلها 50 فوز و تاخذ المونت واطلع من القروب وخلاص
قلتله انت تدري ان في 15 لاعب جايين الحين او ماتدري ؟ يعني انت على بالك احنا بروحنا هني ؟
قال اي احنا بروحنا هني , يلا روح لا تضيع الوقت
يقول صاحبنا سويت اللي قالي عليه , طلعت ركبت المونت و رحت اركض اخذ العلم مالهم , يقول وانا بالطريق لاحظت ماكو احد كلش , ولا الاينس موجودين
استنكرت , لكن قلت بشوف النهايه شنو , يقول اخذت العلم ورجعت اركض رجلي وماشفت احد من الضد , وصلت وحطيت العلم و اللي مسويلي بوست واقف ناطرني
يقول رحت المره الثانيه اخذت العلم ورجعت و رحت الثالثه الى ان فزنا
يقول طلعنا و دخلنا مره ثانيه , ونفس الطريقه
بروحنا بالباتل جراند اخذ العلم 3 مرات ونفوز ونسجل مره ثانيه , الى ان اخذت العلم ووصلته بنفسي 50 مره وحصلت على المونت
يقول هذا الشخص 100% يتعامل مع الجيم ماستر وان بينهم شراكه او ان اهو جيم ماستر ومسويله موقع بوست ويربح من ورى بليزرد وهو يعلم ان محد راح يطيح عليه لأن اهو اللي يطيح على الناس اهل البوتات وغيرهم من اهل الهكرز
يقول بعد حصولي على المونت مال الباتل جراند , رحت مره ثانيه وكلمته قلت ابي مونت من الفاير لاند , رايد لفل 85
يقول اخذته من اول دخول , كأن الشخص هذا مخلي الchance drop 100%
يعني ناس عندهم ثقه 100% , يقولك ادفع مثلا 40 يورو نعطيك مونت al'ar اللي حطيت صورته اول الموضوع
يعني انا لو اقول لأي شخص عطني 40 دينار واسويلك بوست للمونت هذا , راح ابتلش فيه , لأن يبيلي 100 محاوله وماادري يطيح او لأ , وفوق هذا شوفوا المده كم , يعني كل اسبوع مره و اهو الchance تقريبا 2% يعني كم اسبوع عشان احصله
استلم 40 دينار و ابلش الرجل معاي يقعد سنه عشان يحصله
لكن الغريب ان اهل البوست يقولك عطني مثلا 40 يورو او دولار و نسويلك بوست للمونت وتاخذه 100%
الواحد يفكر , شلون يعطونك كفاله انك تاخذه من اول دخول ؟
لو ما طاح , لو طاح بعد 70 محاوله , منو يضمن اني ما ازهق منهم واقول انتوا نصابين رجعولي فلوسي , صارلكم 50 مره تدخلوني ولا طاح , او شنو اللي يضمن انهم مايزهقون كل اسبوع مدخليني ومايطيح وبالنهايه يقولولي يبا اذلف
لكن الناس ثقه , يقولك تاخذه 100%
السالفه فيها جيم ماستر
-
بالنهايه اشكر الاخوه القراء , صحيح ما قلت شي جديد لكن حبيت احرك اصابعي شوي
ومو كل واحد تصدقونه , لا تشوفون كلامي اخر شي وتروحون تدفعون لأي شخص يقولكم اعطيكم المونت الفلاني
لازم انت تدخل بأكاونتك مو تعطيهم الاكاونت و يدخلون عنك , ولازم يكون موقع ثقه و عريق والناس تثني عليه
هذا اذا حبيت تسوي بوست , ولا فيها اي ضرر لو تعطيهم اكاونتك الا ان كانت البيانات كلهم عندك
والله شكلي بجربهم
عالاقل اعوض اللي راح من مونتات
شكرا لكم
شكرا جزيلا لكم جميعا