حياك الله أخ مبارك وبإذن الله تتحقق أمنيتك
أنا ماني شخص خبير في التغذية ولا أقول لك أملك عصا سحرية يحقق لك أمنيتك
لكن بنقل لك (تجربة شخصية وتجارب أشخاص حولي) يعني يقول لك "اسأل مجرب ولاتسأل طبيب"
صدقني لعبة كمال الأجسام (بحر) والشخص يبغى له تجارب ثم تجارب ثم تجارب لين يفهمها ويكتشف أسرارها
وهنا أقول لك ترى (المنتدى) اللي احنا فيه, هذا أقدر أقول عنه إنه أفضل منتدى يحتوي على (قسم كمال أجسام)
لو قلت لك على الشبكة العنكبوتية كلها, ماراح أكون (بالغت) وشخصياً أتكلم عن نفسي مافهمت أسس اللعبة والمعلومات القليلة اللي عندي
الا بفضل من الله ثم (الشباب الموجودين في قسم كمال الأجسام) في منتدانا الغالي, والخلاصة من كلامي هذا شغلتين
أولاً كلنا وأي شخص يدخل رياضة كمال الأجسام لازم يستمر فيها (سنوات) لين يستوعبها بشكل كامل أو على الأقل بشكل سليم
وثانياً إذا الواحد منا عنده شخص حوله سواء كان مدرب في صاله او شخص له فترة في اللعبة وينصحنا واحنا بدورنا (نتقبل النصيحة ونعمل بها)
هنا الواحد يختصر عليه المشوار لأن فيه شخص (ساعده واختصر له الطريق وعطاه معلومات جمعها بعناء وتجارب سنين)
وهنا أقول لك إن أي شخص ينصحك بالمنتدى إذا قال لك (المكملات مجرد مكمل) وماهي عصا سحرية تحقق لك أمنيتك بسرعة البرق!
اقتنع بكلامه وصدقه لأنها حقيقة, والمنتدى هذا بالشباب اللي فيه ماشاءالله تبارك الله أعتبر المنتدى (نعمة وكنز ومرجع) لكل شخص يمارس كمال الأجسام.
والحين بتكلم عن هدفك وأمنيتك
وأحب أقول لك مو إني احطمك لا بالعكس أنا أحس فيك وأتمنى إنك تحقق أمنيتك اليوم اليوم
بس راح أكون صادق معك وأقول لك إن (المكملات وحدها) ماراح تعطيك نتيجة أو على الأقل نتيجة مرضية
والمطلوب منك إنك (تقوي عزيمتك وتتوكل على الله وتبدأ) إنت لما تبدأ إن شاء الله مع مرور أول أسبوعين راح يسهل عليك التمرين
وراح تحب اللعبة وتتحمس لها وراح تحس بالتغيير كل فترة (مابين شد جسم واحساس بالنشاط ولياقة ونفسية مرتاحة وحماس)
وإنت ممكن شايل هم الشهية عشان كذا تركيزك على بديل نتيجته فعالة وسريعة وجاء في بالك (مكملات)
شيء طبيعي إنت معدتك ماراح تتقبل التغيير المفاجيء ولاراح تقدر تاكل زيادة عن المعتاد بس يبغى لك صبر وإرادة
لازم تكون متحفز وفي بالك إنك ناوي توصل لهدف معين والهدف هذا من شروطه إنك تاكل ونسبة اكلك راح تزيد لاشعورياً
بمجرد ما انت تمارس الرياضة وتحرق سعرات ووقتها راح تجوع وجسمك يجبرك على الأكل وراح يزيد وزنك تدريجيا كل فترة
وبالنسبة للمكملات فيه اشياء كثيرة غير البروتين بودر والمكملات ماهي مجرد بودرة بروتين فيه أشياء كثيرة وكل مكمل لغرض معين
وانت مبدئياً تدور (بروتين يزيدك وزن) طيب هنا فيه بروتينات الجينر اللي هي مخصوصة لمساعدة الزيادة في الوزن وهذي ممكن تزيدك وممكن لا
وممكن تجيب نتيجة سريعة مع شخص ومع شخص ثاني يطول لين يجيب نتيجة يعني في كل الأحوال انت مطلوب منك (صبر وعدم استعجال)
وفيه بروتينات بودرة كثير شباب استخدموها وزاد وزنهم بس ماتدري زاده دهون ولا شحوم ولا صار عنده احتباس سوائل!
يعني ايش الفايدة إذا زاد وزنك مثلا 10 كيلو ونصها دهون وكرشت؟ إنت أساساً داخل رياضة عشان جسمك يكون رياضي وجميل ومتناسق
وهذي الأنواع من البروتينات اللي أعتبرها مجرد مضيعة وقت ومال وضررها يمكن يكون أكبر من نفعها.
الخلاصة
إنت تقدر تستخدم مكملات عادي ماراح نقول لك لاتجرب شيء بالعكس جرب والتجارب مفيدة وراح تكتشف كل شيء بنفسك
وفيه شركات معروفة تقدر تستخدم منتجاتهم وإن شاء الله ماراح تضرك إذا ماحققت هدفك, بس الأهم من هذا كله المطلوب منك اشياء أعتبرها أهم من المكملات
الصبر قبل كل شيء لازم صبر لأن فيه ناس تستمر في اللعبة سنتين ومايوصلون لهدفهم وعادي يتحمل ويكمل لأنه يملك عزيمة واصرار
(الأكل الصحي+راحة البال+نوم الليل+اراحة الجسد بعد التمرين+التمرين بشكل جيد) وأخيراً نقدر نقول نكمل اللي ناقصنا بالمكملات.
وما أحبطك بالعكس أنا معك وفي صفك وأقدر أضمن لك بإذن الله تغيير في هيئتك وشكل جسمك كل 3 شهور
لدرجة انك راح تنبسط من نفسك بعد 10 شهور, بشرط تكون الفترة هذي التزمت باللي ذكرته فوق, وبعدما يتغير شكل جسمك
انت بنفسك راح تتحمس وراح تحاول تحافظ على التغيير اللي وصلت له.
بالنسبة لسؤالك (أي مكمل يعتبر الأفضل بعد التمرين)
ترى الغالبية يستخدموا (وي بروتين) لأنه سهل وسريع الإمتصاص لهذا السبب فقط
مو انهم يستخدموه لأنه يزيد كتلة عضلية ولا وزن والخ
وإنت ممكن تستخدمه وبنفس الوقت تستخدم بروتين يكون جينر مع الوي بروتين بحيث يصير استخدامك لأكثر من بروتين بودر باليوم عادي
ملاحظة: فيه قسم مخصص (للمواضيع المميزة) في قسم كمال الأجسام
تقدر تدخله وتتصفح المواضيع وراح تستفيد منها كثير إن شاء الله, وإذا تدور شخص يفكر ويخطط عنك وإنت بس عليك التنفيذ؟
عندك الكابتن راشد فاتح موضوع من كم يوم عبارة عن (تدريب شخصي) تقدر تتواصل معاه وإن شاء الله إنه راح يفيدك في (التمارين والتغذية)
وللعلم ما اعرف الكابتن راشد ولا اني بسوي له دعاية لا والله هو في غنى عني بس انا قلت لك من باب اني اساعد قدر المستطاع وأتمنى انك توصل لهدفك
وموفق إن شاء الله تبدأ اللعبة وتستمر فيها وتوصل لهدفك ويجي يوم نشوفك فاتح موضوع تحكي فيه عن تجربتك والتغيير اللي حصل في جسمك وتفيد غيرك.