تبي الصج
تستاهل
واحمد ربك ان الشباب صايرين حليمين معاك زياده وله كان صاكينك توقيف منذ مبطي
كوني احد المشاركين في هذا الموضوع و متابع المشاركات كلها و منهم مشاركاتك قبل الحذف , بصراحه ماشفت اي فايده
يعني كلامك طلاسم , تشرق و تغرب ولا تتكلم عن موضوعنا بشي الا بعض التلميحات وبعدين ماادري شنو تقول و شنو تبي توصله
كلامك غير مفهوم وحتى لهجتك ماادري من وين مجمعها , الا اخر مشاركه لك فوق تتكلم بلهجتك الاصليه وكأنك كويتي
وكذا مره سألتك من وين وماجاوبت ولا تعطي اي معلومه لك , ماادري والله ليش متعب نفسك وتشارك وانت ماتبي احد يعرفك ولا تشارك عشان توضح امور او من اجل مصلحه
يعني خلني اكون صريح معاك
انا قبل في بداياتي بالمنتدى كنت ماخذ الموضوع غشمره و ضحك , لكن مااستمريت على هذا الوضع على طول , كنت يوم اضحك واتغشمر و استخف دمي و اليوم الثاني اتكلم بجد
في بدايتي كنت اشارك بقسم ووركرافت , وكنت في موضوع الاستفسارات اتكلم بجد و ابين للناس اللي خافي عنهم و اي استفسار ارد عليه , وبنفس الوقت تشوفني شخص ثاني بالقهوه و مواضيع بوحا
لكن بعدين صرت اشارك بالقسم العام و غيره و تقريبا مشاركاتي جديه , ماقدرت اعيش على الاستعباط طول عمري
انت عكس , انت بدأت تستعبط من كم سنه ومازلت على نهجك الاستعباطي , ماادري متى راح تتغير او تمل من نهجك هذا
انا مااقولك لا تستعبط ولا تضحك , مثلا روح قهوه ووركرافت واستعبط واكتب اللي تبي , وانت اصلا موجود هناك وكتبت مشاركات عبيطه و عطيتك انا عبط بعد و الامور ماشيه ولا احد تعرضلك
لكن مو معقوله يااخي انك تعيش كل عمرك بالمنتدى على الاستعباط , وين ماتروح بين الاقسام اشوف مشاركاتك غريبه وغير مفهومه
انت تذكر ايامنا في قهوه ووركرافت و تشوف مشاركاتي الاستعباطيه وكم مره حذروني بتوقيف او وقفوني فعلا . لكن تلاحظني اني بالاقسام الثانيه اشارك حسب علمي بالامور , مثل القسم العام لما نتكلم عن اي موضوع تشوف مشاركاتي بنفس الموضوع , ماادش استعبط او اتكلم بأمور بعيده عن الموضوع المطروح
ثاني شي ماتدري عن الناس اذا كانت تتقبل طريقتك او لأ , يعني تدخل قهوه ووركرافت وشفت الناس يضحكون معاك وكل شي تمام تروح لقسم ثاني وانت ماتعرف احد فيهم ولا يعرفونك وتبدأ تشارك وتستعبط يمكن يصكونك توقيف لأن نظامك مايعجبهم ولا هم مثل جوك
يااخي لازم تراعي الناس وتعرف طبايعهم , تقول نكته يضحكون ناس ونفس النكته تقولها لناس ثانيين محد يضحك او يقولولك قديمه
مو كل الناس تقدر تكسبهم بالطريقه هذي , او نهج معين تسير عليه في قسم و يعجبهم وتفكر ان راح يعجب المنتدى كله , لازم تسايس الناس بالبدايه وتعرف مزاجهم شنو , شنو يحبون وشنو يكرهون بعدين ابدأ معاهم
اذا ماكان يعجبك اللي يعجبهم محد راح يجبرك تشارك معاهم وتقرأ مواضيعهم , روح للقسم اللي تشوف ان اللي فيه على نفس مزاجك
او ان كنت مهتم بلعبه معينه تروح تقرأ عنها او على حلولها وتمشي , مو مجبور تقعد معاهم وتشارك
مع اني مااشوف انك مهتم بلعبه معينه , حسب كلامك تقول العب امل الشعوب و دخولك كله من عرفتك للأستهبال
اعذرني اذا كان كلامي شوي قاسي عليك لكن والله اني ابي مصلحتك ولا ابيك تتوقف بسبب شي ماله معنى
حرام والله يااخي انك عضو مو جديد , لك كم سنه معانا ومازلت على نهجك اول مره بالاستعباط ماغيرته
او ان عندك عضويه معروفه بينا وتشارك بجديه و تدخل بالقزم من اجل يعني التغيير و الاستعباط على الناس , وانا اشك بهذا بعد
لأن مو معقوله سنتين او 3 سنوات تشارك معانا وملتزم بالمنتدى و تقول انك ماتعرف احد ولا مهتم بلعبه الا امل الشعوب اللي مالها موضوع عندنا و مشاركاتك كلها استعباط
اقل شي بقولك روح تويتر وسولك اشتراك و قزرها استعباط عليهم او استغرام , هذا اقل شي
اما انك تلتزم كل يوم وتقعد بالبيت تجابل الكمبيوتر و تدخل المنتدى و كم مره حصلت توقيف على عضوياتك ومازلت مصر تدخل المنتدى واخر شي تقول مو مهتم بأي قسم ولا لعبه او كمال اجسام
كلام غير منطقي
انا ماابي افتح تحقيق على هذا الموضوع , لكن اللي بقوله لك يااخي قزم ان الناس مو مثلي , انا تحملت الاستعباط و صرت عبيط معاك لكن في ناس ماتتحمل
الاعضاء مو كلهم مثل طبعي , انا طبعي وسيع بال و صدري رحب وماازعل و اجاري الناس حسب مزاجهم واخذ واعطي مع الكل , لكن في ناس شراره , من تقول كلمه زعل او تشارك مشاركه مالها معنى حذفها و ارسلك تحذير
انا عندي صلاحيات بقسم ووركرافت لكن ماحذفت مشاركات احد , الا مشاركه وحده لك حذفتها ومااذكر شنو كانت , لكن ماارسلت تحذير بتوقيف او غيره , احذف بس المشاركات اللي ماتصلح للنشر
فأنت يااخي لازم تعطي الناس حقها من الاحترام , انت الحين في القسم العام لازم تعطي احترام لأصحاب القسم والمشاركين فيه , لو ان المنتدى لي كان قلتلك اخذ راحتك , بس مو لي ولا لك
لازم نحترم الاداره والمراقبين والاعضاء
ويمكن انت تقول ياكرزان انت مااحترمت الاداره وتقول ثوره على صاحب المنتدى وتطالب بتوقيف دارك تب
انا ماقلت جذي الا لأني امون على صاحب المنتدى واهو لو تسأله الحين تقوله كرزان يقول يبي يوقفك راح يقولك يتغشمر
هذا لأني اعرفهم ويعرفوني , اما انت محد يعرفك , حتى انا مااعرفك ولا اعرف من وين انت , مع اني اكثر واحد يتكلم معاك
الناس ماتعرفك فلا تلومها لو تفهمك غلط خصوصا لو اي عضو يسوي بحث على مشاركاتك راح يشوف 99% منها استعباط ولا راح يعرف مايتك شنو او تفكيرك شنو
كل اللي راح يعرفونه من البحث انك شخص متضارب الافكار ومشاركاتك كلها يمين يسار فوق تحت , ماتثبت على شي معين وتتكلم فيه , تتكلم عن شي وبنفس اللحظه تلف على شي اخر وبعدين تروح يمين ويسار
ماينعرفلك بر
انا بكتفي بالكلام هذا , ادري طولت عليك لكن والله اني ابي مصلحتك
فكر بكلامي و راجع مشاركاتك وشوف انا اتكلم من واقع الحال او لأ
شكرا
