السلام عليكم ورحمة الله
قد كتبت في هذا الموضوع مكملات جيده .. مكملات سيئه .. مكملات مضيعه للوقت .. بإن ال BCAA مضيعه للوقت ولايوجد له فائده .. عارضني البعض وخاصه لمن يستخدمه بشكل كبير ومؤمن فيه .. فحبيت اكتب موضوع عنه وخاصه اني كتبت في نفس الموضوع السابق المعلومه التاليه
"ال BCAA بالذات ممكن اتقبل فكرة استخدامه للشخص المحترف اللي مسوي جدول غذائي مضبوط بالكالوري .. ويبي يستفيد من خصائص البروتين ولكن بدون كالوري اضافي .. فيستخدم ال BCAA من اجل تلك الميزه .. ولكن شخص مسوي تخسيس ومايحسب الكالوري ماراح اشوف له داعي لاستخدام ال BCAA .."
فراح اشرح مااقصده هنا .. واذكر عيوبه ومميزاته مقارنه بالبروتين ..
ال BCAA باختصار يحتوى على اهم الاحماض المسؤوله عن بناء العضلات .. تقدر تسميه بروتين بدون كالوري ..
ماهي مميزات ال BCAA بالمقارنه بالبروتين :
1- بدون كالوري :
وهذي اهم ميزه واللي اشوف انه الواحد المحترف ممكن يستغلها بشكل ممتاز وقت التخسيس .. يعني اذا الواحد ياخذ يوميا 100 غرام من البروتين البودره فيها 400-450 كالوري .. يقدر يستبدلها بالـ BCAA وياخذ نفس الفايده تقريباً ويخسر 400-450 كالوري يومياً ..
2- سعر اقل :
تقريبا سعر ال BCAA يساوي نص سعر الواي ..
3- كميه وسكوب اقل :
علشان تاخذ نفس الاحماض الموجوده في سكوب من البروتين (25 غرام ) اذا حبيت تاخذها من ال BCAA راح تكون الكميه اقل بكثير ماتتجاوز 8-9 غرام بالكثير .. وهذا يخلي تناولها للبعض اسهل ..
4- يوجد منه حبوب (كابسول) :
وهذي ميزه للبعض .. مثلي
طيب الان ماهي عيوب ال BCAA مقارنه بالواي بروتين :
1- مافيه كالوري :
طيب كيف عيب وميزه في نفس الوقت .. يعتبر عيب وقت التضخيم لانك محتاج كالوري كبير .. فعندما يصبح مصدرك الاساسي من الاحماض بدون كالوري يصبح عليك ان تاكل اكل اكثر حتى تعوض النقص ..
2- طعم اسوء:
طعم ال BCAA سيء .. الواي فيه نكهات جميله ومختلفه عكس ال BCAA .
3- صعوبة ذوبانه مع الماء :
ال BCAA تجد صعوبه في تذويبه مع الماء .. وتجده على شكل طبقه فوق الماء لاتذوب
4- لايحتوى على الكالسيوم والفايتمن :
الواي يحتوى على كميه ممتازه من الكالسيوم والفايتمن عكس ال BCAA والذي لايحتوي على أي شيء في غالب الانواع .. وهذا عيب كبير وخاصه ان غالبية مصدرنا من الكالسيوم يكون من الواي ..
اذا فكرت تشتري ال BCAA .. انصحك تستفيد منه وقت التنشيف وخاصه عندما تكون شخص يحسب الكالوري اليومي ولو بشكل تقريبي حتى تستفيد منه استفاده كامله ويكون اضافه مهمه وتستفيد من اكبر مميزاته ..
اشتر ال BCAA اللي يحتوي على الاحماض L-Leucine L-Valine L-Isoleucine فقط .. وخاصه ان تكون النسبه الكبرى من حمض Leucine .. وابتعد عن المنتجات اللي تخلط معه اشياء ثانيه ..
اشتر كميه بسيطه وجربه لانه ممكن مايعجبك طعمه او ماترتاح مع عدم ذوبانه مع الماء ..
فكر بالكابسول (الحبوب) اللي يجي منه .. اسهل واسرع بالتناول ولكن شوف حكمه الشرعي بسبب وجود الجلاتين في كثير من المنتجات ..
لاتشتريه بسبب انه اسرع للامتصاص او انه افضل او يوجد فيه ميزه غير موجوده في البروتين غير المذكوره في الاعلى .. كذا راح تستفيد منه بشكل خاطئ
بالتوفيق للجميع