المساعد الشخصي الرقمي

مشاهدة النسخة كاملة : اول حفلة جامعية..آآ آ اقصد يوم جامعي


RPG_master
21-09-2002, 09:27 PM
تحس من اسم الموضوع جايب العيد:#

جود إمبخ ترنووون..

احبائي اليوم كما انتم عارفين كان اول يوم جامعي لي..


قمت الصباح الساعه 7 بعد ما نمت اليوم الي قبله كل ابوه

وديت اخواني المدارس ورجعت على النت لعبت كم جيم مع عماد وأليكس وهزأتهم كالعاده..

كانت عندي محاظرة الساعه 1..

يوم كنت طالع اجيب اختي جاء الفلبيني الي بيركب الخط الجديد:#


طبعا طرررت من الفررحة متشــــقق ولا تسعني الحارهhttp://www.plauder-smilies.de/square/yellowbiggrinsqr.gif

جاء الفلبيني:انا حسب انتا باباhttp://www.plauder-smilies.de/square/confusedsquare.gif

واقوم اتله مع راسه..علشان كذا مركب الخط بسرعه يا شبية الضفدعhttp://www.plauder-smilies.de/square/madsquare.gif

ويمسكني خوباج قبل لا اتفلت عليه ويفهمني انه يقصد انه يحسبني انه(مسك خط ) اني رجال شيبه:# (مسكين..ما يدري اني شوشة الي ما عمري صرت اكبر من اي احد ودايمن الصغير ومنب صاير اكبر من احد)

وركبه ابو فلبن وقلت بنفسي خلاااص يومك حلو يا شوشة وبتبدع بالجامعه..

واركب السيارة واروح اجيب اختي..يووووه زحمة مدرستها..وانلطع هناك ربع ساعه لين خذيتها ونطلتها البيت ورجعت عند خوباج..

هاه بشر جربت الرقم يدعم الدي اس ال ولا لا؟

خوباج: لا..:-)

وززززززز طخ سطرته دقيقتين(اي هين:# )

الحين يالجزره لنا سنتين ننتظر هالخط وآخرتها ما تجرب الرقمhttp://www.plauder-smilies.de/square/madsquare.gif؟؟؟

وندخل الموقع ونجرب الرقم..طبعا ما ابي اطول عليكم انتم عارفين جملة شركتنا بتاعت الأتصالات..لو يعلقون لوحة بأول الموقع مكتوب عليها ضفوا وجيهكم ما فيه دي اس ال لو تطامرون كان ريحونا وما ضيعوا وقتنا..


عاد قلت مالهم داعي خربوا بدايتي الجامعيةhttp://www.plauder-smilies.de/square/sqsad.gif

واركب السياره واتجة للجامعه محطم القلب..

يوم قربت من الجامعه..

انا: يا ســــلام اول يوم ان شاء الله ببدع..

؟؟؟ : اقول يبو الشباب تعرف اماكن محاضراتك؟؟

انا: ايه وش دعوه كلها بالجدول..:cool:

؟؟؟ :ممكن اشوف الجدول؟

انا: الجدول:# ...بالبيت:0) !!

؟؟؟ :http://www.plauder-smilies.de/crap.gif
RPG_master
21-09-2002, 09:27 PM
انا: الا من انت؟؟

؟؟؟ : انا فهد..

انا: من فهد؟?:

فهد: انا انت يا حمارhttp://www.plauder-smilies.de/square/madsquare.gif

انا: اها:#

طيب والسوات؟؟

انا&فهد: سب واي:0)

واسحب على ام الجامعه واروح اشتريلي غداء:#

طبعا صرفته ذا فهد يوم جيت اتغدى فاضيلة اغدية على حسابي بعد:!

وارجع البيت واستعد بدري للمحاظره الثانيه..بالنومhttp://www.plauder-smilies.de/square/sqmellow.gif

يوم جاء وقتها انقز للشارع مره ثانيه ابي الحق حتى من زود العجله خذيت الجدول وانطلقت بالشارع اركض..نسيت اني بروح بالسيارهhttp://www.plauder-smilies.de/square/sqgroggy.gif

والحمدلله وصلت الجامعه وقلت ما عليك شوش وصلنا وهانت..

وادخل الجامعه..

وقفت بنصها وفوق الشوشة علامه استفهام وتعجب كبيرة؟!

وكل شوي مطلع الجدول اناظر الأرقام الي يشوفني يقول ماسك خريطة الكنز كل شوي اناظر الإحداثيات..

وعاد ما تشوف الا شوشة يتسكع بأسياب الجامعه(والله اني قايلها من قبل لا تبدأ الدراسه بأسبوعين:( )

وادور هالقاعه الي مدري وين متوزية

عاد وقتها جا الفزعه فهد..

فهد: وش بلاك يالأثول ضعت كيه كيه كيهhttp://www.plauder-smilies.de/laugh1.gif

انا: اقول يا ساعدني ندورها ولا انطم:"

فهد: طيب ما عليك بس امش امش..

وامشي وراه ابو الشباب الا ويوصلني لقاعه فيها حول ال20 واحد

فهد: خلاص يالأثول لقيتها..شفت كلها لفتين يمين ويسار يا..دلخhttp://www.plauder-smilies.de/laugh.gif

انا:آآه امسك اعصابك يا اناhttp://www.plauder-smilies.de/square/sqgroggy.gif

وادخل القاعه..

الدكتور: خش بش كيش هاكان شوكور أمين خرتش ..بخش؟

انا: هاااااااهhttp://www.plauder-smilies.de/sad/confused5.gif
RPG_master
21-09-2002, 09:28 PM
اخبر اننا رايحين محاظرة دينية يالحمار يالـ#$%^!#%^http://www.plauder-smilies.de/square/madsquare.gif..موب لغه تركيةhttp://www.plauder-smilies.de/square/sqstressed.gif

ومن يومها والحمار ذا فهد منحاش

واطلع مره ثانيه اتسكع كالعاده..والقالي ذاك الإعرابي:6

السلام عليكم..

الإعرابي: مرحباً..

اقول وين قاعه السلم 101:# ؟

الإعرابي: انها هناك لكنك تأخرت كثيراً وانا أتيت قبلك بخمس دقايق ولم ادخل القاعهhttp://help.microsoft.com/!data/en_us/data/messengerv46_xp.its51/$content$/devil_smile.gif >>بيدشرني الحمار:!

عاد هنا تحطمت وقلت شكله اليوم ماهنا جامعه ولا خرابيط بس خلني ارجع السياره..

وارجع السيارة خائب (كالعاده) وانا اردد عبارة : ( الجامعه موب احسن من الثانوية اغيب هناك..أغيب هناhttp://www.plauder-smilies.de/square/sqmellow.gif)

وامر المطعم الأيراني علشان اخذ عصيرهم الرهيب (تبريز):#

وارجع البيت ولا الماما بوجهي..

ماما:اخبار الجامعه؟؟

انا:http://www.montada.com/images/icons/icon14.gif

ماما: وشلون يعني ابهام فوق؟؟

انا حسيت اني انحجرت قلت مالها الا ان الدكتور مريض اليوم وسحب علينا وغاب:#

والصراحتا النصبة الى الآن ماشيه

يتبع(مقتطفات من اليوم الجامعي الأول)
RPG_master
21-09-2002, 09:29 PM
مقتطفات جامعية..

1-عندما علمت شركة المواصلات السعودية ان شوشة بيداوم هالسنه قاموا صلحوا طريق الجامعه الي له سنتين حفريات لأنهم يتوقعون ان شوشة (تطن) براسة يداوم مره بالأسبوع:6 ..

2-وقالت الشركة بعد انها صلحت طريق الرجعه لأنها ان (طنت) براس شوشة يداوم فأكيد انه اذا شاف المواقف مليانه بـ(تطن) براسة انه يرجعhttp://help.microsoft.com/!data/en_us/data/messengerv46_xp.its51/$content$/bowwow.gif

3-يوم دروا عيال الحارة ان شوشة ما داوم اليوم اصابتهم حالة استياء شديدة لدرجه ان احد عيال الحاره اليوم العصرية اول ما رجعت سحب جلنط وقش له شجرة وجدار الجيران:# (ذكرني بكازنوفا النخل سنيفر:6 )..

4-بعد اربع ساعات وانا طالع صلاة العشا اشوف الجيب الي سحب السياره الي صدمت واقف بنص الشارع (وبنفس مكان الي صدم فيه حق العصر)وجنبه فان..الفان مصدومhttp://www.plauder-smilies.de/square/jw004.gif!!!


يااا وليـــــــــه حتى سواقين الحارة مستائين:#


واقوم اطلع فوق السيارة واجمع عيال الحارة وسواقينها واقولهم يا شباب اوعدكم وعلى هالشنب اني بداوم بكره وبشد حيلي..ولا اقولكم شيلوا سالفة الشنب..لين طلع عطيتكم خبر:#


-5ادخل البيت واشوف خوينا القطو السباح يخزني بعين وامسك الكورة وامزعه بوجهة..ما بقى الا انت تستاء بعدhttp://www.plauder-smilies.de/square/madsquare.gif

وبكذا انتهى اول يوم جامعي لي..وهو فعلاً!! يبشر بكل خير..

على فكره سالفة الحوادث (حقيقة) والله ما اكذب عليكم:"
Anima
21-09-2002, 09:41 PM
منت احسن من ولد خالي

والله ذاك كلمة زاحف قليله عليه




واقوم اطلع فوق السيارة واجمع عيال الحارة وسواقينها واقولهم يا شباب اوعدكم وعلى هالشنب اني بداوم بكره وبشد حيلي..ولا اقولكم شيلوا سالفة الشنب..لين طلع عطيتكم خبر


هههههههههههه

شكرا يالشيشه

اول حكايه اسمعها كلها:p :D
ابو.....
21-09-2002, 09:44 PM
ايت واحد يا انما



عساه المحشش;-)
RPG_master
21-09-2002, 09:55 PM
الرسالة الأصلية كتبت بواسطة ابو.....
ايت واحد يا انما



عساه المحشش;-)

احب راسك لا تبدأ تشات:6
MoaeD
21-09-2002, 10:06 PM
خخخخخخخخ والله انك توحفه يا شوشه


اجل احد ينسى الجدول بالبيت :!



وبعدين ما فاتك شي كل اللي فاتك محاضره عند واحد خبل :p



والله مدري وش يبي بس قاعد يقرى :p



لا والمذكره من كلية غير كليتنا :!


ويجيك القهر اذا الدكتور يشرح وانت قاعد تستهبل بالرسايل مع اخوياك :p




هذا اول يوم عندي بحمد الله :p


والمرات القادمه سوف لن يكون هناك الا محاضرات


<----- وش بقيت :p
memy
21-09-2002, 10:23 PM
انت توحفه خارقه:D

فشلتنا من اول يوم:D



اقول يبو الشباب تعرف اماكن محاضراتك؟؟

اللى على راسه بطحه يحسس عليها:cool:



ضفوا وجيهكم ما فيه دي اس ال لو تطامرون كان ريحونا وما ضيعوا وقتنا..

يعني كلوا سلوفكم :p


الله يعطيك العافيه ضحكتني:D
Undine
21-09-2002, 10:35 PM
الرسالة الأصلية كتبت بواسطة RPG_master
-5ادخل البيت واشوف خوينا القطو السباح يخزني بعين وامسك الكورة وامزعه بوجهة..ما بقى الا انت تستاء بعدhttp://www.plauder-smilies.de/square/madsquare.gif



:أفكر: انا موصيته

:D

ماشالله مبدع

الله يعطيك العافيه شوشه :-)
RPG_master
21-09-2002, 11:33 PM
اجل احد ينسى الجدول بالبيت

انا:#

memy :حلوه تحفه خارقه:6

بس ما فهمت سالفه اللون الأحمر:أفكر: ؟!

Undine:انتي ما خليتي احد الا ووصيته علي ذابحتني بكل مكان:"

ويعافيك:-)
Akasuna No Sasori
21-09-2002, 11:35 PM
الرسالة الأصلية كتبت بواسطة RPG_master
وندخل الموقع ونجرب الرقم..طبعا ما ابي اطول عليكم انتم عارفين جملة شركتنا بتاعت الأتصالات..لو يعلقون لوحة بأول الموقع مكتوب عليها ضفوا وجيهكم ما فيه دي اس ال لو تطامرون كان ريحونا وما ضيعوا وقتنا..


:[img]



هههههههههههههههههههههههههههههههههه:p

والله قلت لك :6
بس انت قاعد تقول لا انا متاكد :6

خلي الرقم ينفهكم:-)

اقول قدم على اشتراك اوربت احسن لك مدام مافي dsl هو صح وراءك الفاتوره بس على الاقل هذا سريع الا سوبر سريع;) ;)








واطلع مره ثانيه اتسكع كالعاده..والقالي ذاك الإعرابي

انا مرسله لك":" :p


ومشكورين على اليوم السعيد:6 :6
Arsene Lupin
22-09-2002, 04:38 AM
الرسالة الأصلية كتبت بواسطة king_kubaj
ما اقول الا من يوم جانا السباح وامورنا مختبصه ..:"


it must be a cursed cat
العمدا
22-09-2002, 05:38 AM
هههههههااااى ..
وش ذا الدجه يا اخى :D

الناس عاده فى اول ايامها تكون ماشيه صح همن تخربها ..
لكن انت خربان من البدايه :6


وندخل الموقع ونجرب الرقم..طبعا ما ابي اطول عليكم انتم عارفين جملة شركتنا بتاعت الأتصالات..لو يعلقون لوحة بأول الموقع مكتوب عليها ضفوا وجيهكم ما فيه دي اس ال لو تطامرون كان ريحونا وما ضيعوا وقتنا..

يا اخى انا قلبى تقطع انت وش صارلك :6
Akasuna No Sasori
22-09-2002, 09:29 AM
الرسالة الأصلية كتبت بواسطة king_kubaj
ما اقول الا من يوم جانا السباح وامورنا مختبصه ..:"



طيب مين الى جابه:! :!


وليش اسمه سباح:6 :6
عماد 18
22-09-2002, 11:29 AM
الرسالة الأصلية كتبت بواسطة RPG_master
الإعرابي: انها هناك لكنك تأخرت كثيراً وانا أتيت قبلك بخمس دقايق ولم ادخل القاعهhttp://help.microsoft.com/!data/en_us/data/messengerv46_xp.its51/$content$/devil_smile.gif >>بيدشرني الحمار:!


خخخخخخخخخخخخخخخخخخخخخخخخخخخخ :0) ..
الله يرجك ..
منتب صاحي :6 ..
و الا خش بش هاكان سوكور :" <== من الضحك و الله ..
الا اقول ..
عطني موقع الاتصالات خل اوريكم ان رقمي ينفع عليه الدي اس ال ":" ..
RPG_master
22-09-2002, 11:41 AM
السباح اصلن صاير يخاف مني..كل ما شفني ينحاش ويتنحى عن الطريق..



عطني موقع الاتصالات خل اوريكم ان رقمي ينفع عليه الدي اس ال ..

هذاني عطيتك بالمسنجر وصدقني موب طالع يخدم:cool:
Chopper
22-09-2002, 07:17 PM
الله يرجك ياشيخ وشه هالأيام إلا وش سبت الفحيط والتصادم
كل ذا إعجاب ولا أيش?: ?: وسملمي على ذاك التافه اللي بيدشرك:6 :6 :6
Auron
22-09-2002, 07:24 PM
ذكرتني بالاعرابي الي كان يدرسنا السنه الي فاتت لغه عربيه:D



عليك زحف من اولها:o أثقل يولد:D





الجامعه موب احسن من الثانوية اغيب هناك..أغيب هنا

الاعتراف بالحق فضيله:6
ياسلام على الحكم":"
RPG_master
22-09-2002, 07:27 PM
مدري يا رجال واحد فحط بالعصر وصدم..والي سحب سيارة الي صدم نفسه صدم بالعشاء وبنفس المكان بعد:-)
silverpaco_101
22-09-2002, 07:38 PM
خخخخخخخخخخخخ و الله نصبه ماشيه كيف الجامعه ... كذاhttp://www.montada.com/images/icons/icon14.gif :p بس اشوفك المشاوير واجد باليوم:! وصل و روحه و جيه بس ذا الاعرابي تووحفه خخخخخ
سيلفي2065
22-09-2002, 08:16 PM
الرسالة الأصلية كتبت بواسطة RPG_master
وادخل القاعه..

الدكتور: خش بش كيش هاكان شوكور أمين خرتش ..بخش؟

انا: هاااااااهhttp://www.plauder-smilies.de/sad/confused5.gif


هههههههههههه اديللووووووووووووو :D

ايش الاحراج ذا..:D يدرسونكم ايراني بالجامعه؟

والله فله جامعه خمس نجوم :D

اما الاعرابي ذا فللللله....على ايش سميته اعرابي؟؟ لايكون ماشي معه بعير وقربه ماء مشقوقه؟؟ ماشالله كل الثقافات عندكم بالجامعه :o

بعدين فشلتنا هذا شوشه اللي حاطته قدوتي اقول بدخل الجامعه عشان اصير زيه ":"

نو نو نو طحت من عيني ":" المفروض ترفع روسنا مهب يقولون عيال منتدى القيمز ماعندهم الا الدجه :!

على فكره...تلبسون شناط بالجامعه؟؟ تشترون جزم سكتشرز للجامعه؟؟؟ تشترون اقلام ملونه ومقلمه وتجيبون معكم لنش بوكس ومطاره مويه؟ :6

ثقفني ياخي عشان مايطيح وجهي السنه الجايه :# <-----هذا اذا لقيت جامعه تضفني
RPG_master
22-09-2002, 08:33 PM
وصل و روحه و جيه بس ذا الاعرابي تووحفه خخخخخ

وش الي وصل وجيب تراي طالب جامعي موب سواق:!



ايش الاحراج ذا.. يدرسونكم ايراني بالجامعه؟

تركي موب ايراني بس هذا موب قسمنا :p



اما الاعرابي ذا فللللله....على ايش سميته اعرابي؟؟ لايكون ماشي معه بعير وقربه ماء مشقوقه؟؟ ماشالله كل الثقافات عندكم بالجامعه

سميته لأن الضرورات تبيح المحظورات:# ?: ؟

مدري صراحة..كذا شكله..اعرابي:#

مع اني مدري وشو الأعرابي من جد:#


عاد قدوتك ولا موب قدوتك وش اسوي ضعت:!

بس داومت اليوم وكل شي تمام بس يوم داومت غابوا الدكاتره?:



المفروض ترفع روسنا مهب يقولون عيال منتدى القيمز ماعندهم الا الدجه

ارفعه بعد وشو..قد جاب العيد خوباج بالسمعه:6

ههههههههه اقلام وشنط?:

الي اعرفه اني اردد look my deeeeeaaaaar:#

وما معي الا دفتر (جامعه:cool: ) ازرق ومقطوع غلافه:-)
انجلينا17
22-09-2002, 08:34 PM
:D :أفكر: من الحماس نسي الجدول :6
MoaeD
23-09-2002, 11:05 AM
الرسالة الأصلية كتبت بواسطة RPG_master





سميته لأن الضرورات تبيح المحظورات:# ?: ؟

مدري صراحة..كذا شكله..اعرابي:#

مع اني مدري وشو الأعرابي من جد:#


عاد قدوتك ولا موب قدوتك وش اسوي ضعت:!

بس داومت اليوم وكل شي تمام بس يوم داومت غابوا الدكاتره?:




ارفعه بعد وشو..قد جاب العيد خوباج بالسمعه:6

ههههههههه اقلام وشنط?:

الي اعرفه اني اردد look my deeeeeaaaaar:#

وما معي الا دفتر (جامعه:cool: ) ازرق ومقطوع غلافه:-)



هع حنا جا كل الدكاتره :"


لا وكلهم عطونا كتب وخرابيط


لا وهذا لوك ماي دير اسمه د/ هرموش





على فكره...تلبسون شناط بالجامعه؟؟ تشترون جزم سكتشرز للجامعه؟؟؟ تشترون اقلام ملونه ومقلمه وتجيبون معكم لنش بوكس ومطاره مويه؟

ثقفني ياخي عشان مايطيح وجهي السنه الجايه


ايه نشتري اقلام وشنط وتنانير وشنط كتف وبلايز وبودره


<------ وين ابو الشباب قسم بنات :p


كلها دفتر اول السنه وقلم ازرق يوني بول


وهم يقولونلك وش يبون


على طول من قسم التصوير ولا من جرير ولا من المستعمل :p


واهم شي اكتب كل اللي يقوله :o


عشان ما يجيب اسئله من الكلام اللي قاله وتتورط بالإختبار النهائي :!


بس هذا كلش <----- ما قصرت :D
RPG_master
23-09-2002, 11:02 PM
خخخخخخخخخخ اليوم كملت الأبداعات:p

طلعت من البيت داااااااعس علشان لا اتأخر يوم وصلت السياره تذكرت اني كالعاده ما خذيت الجدول:"


زين ما مشيت..وانزل واروح الغرفه واسأل امي وينه تقول بالدرج..افتح الدرج واخذه وانقز السياره وادددددددددددعس..

يوم ناظرت فيه وانا توني بالحاره ولاه جدول خوباج:! :"


وارررررجع وادخل البيت واخذ جدولي اخيرا:#


يوم وصلت الجامعه ولقيت القاعه صارت اخر فشيلة..


افتح الباب:!

ما ينفتح!!:"

طلع لازم اسحبه بقوة:#

طبعا سحبته بعد ما تفشلت:#
Lena
23-09-2002, 11:09 PM
هههههههههههههههه شوشان نفس حالتي من ناحيه الضياع:p

انا مادري وين الله حاطني الله يعافي صديقتي الدافوره:#

اليوم بعد راحت علي محاضره المعمل وانا قاعده العب واكل واشرب ويا خواتي:D بس ولو لحقت الاخر وقلت لهم بوجه بريء جدا
:# ان جديده ومضيعه اسفه
على طول خنقتهم العبره ودخلوني ولا سجلوني غياب":"



حلوه مغامراتك شوشان يومك مليان مواقف وخاصه سالفه الهكه على ام هذي:": شكلي بجربها معها وش اسوي
RPG_master
23-09-2002, 11:16 PM
حلوه مغامراتك شوشان يومك مليان مواقف وخاصه سالفه الهكه على ام هذي شكلي بجربها معها وش اسوي

هااه?: ؟!
Lena
23-09-2002, 11:20 PM
الرسالة الأصلية كتبت بواسطة RPG_master


هااه?: ؟!
هاه?: وش السالفه:#
القــعـقـاع
23-09-2002, 11:32 PM
لا وهذا لوك ماي دير اسمه د/ هرموش

يا زين اسمه

فيه دكتور تبن النعلة تكرم عنده درسنا وحدة من مواد الرياضيات اسمه عماد زقية
RPG_master
23-09-2002, 11:50 PM
الرسالة الأصلية كتبت بواسطة Lena

هاه?: وش السالفه:#

ما فهمت اخر سطر من ردك..


فيه دكتور تبن النعلة تكرم عنده درسنا وحدة من مواد الرياضيات اسمه عماد زقية

ههههههههههههههههههههههه:D :D

لا يكون عماد خوينا:#

على فكره هرموش...لبناني على هندي :p
Lena
24-09-2002, 01:37 AM
الرسالة الأصلية كتبت بواسطة RPG_master


ما فهمت اخر سطر من ردك..



:p

قصدي ان خطتك على امك بانك تقولها كل شي تمام وترفع الاصبع حلوه وتصريفه سنعه
بجربها على امي انا اذا توهقت فهمت:p
عماد 18
24-09-2002, 08:06 AM
عماد زقية ?: ؟!
هذا اسم و الا مسبة !؟
RPG_master
24-09-2002, 11:27 AM
الرسالة الأصلية كتبت بواسطة Lena


قصدي ان خطتك على امك بانك تقولها كل شي تمام وترفع الاصبع حلوه وتصريفه سنعه
بجربها على امي انا اذا توهقت فهمت:p
اهااا:D

لا امي ما تدقق كثير..يمكن امك بتنشب لك:-)
Gio
24-09-2002, 03:30 PM
يلعن اوم التفحيط من اول يوم :p <=== كل واحد يتكلم عن نفسه :":
RPG_master
25-09-2002, 10:38 AM
الرسالة الأصلية كتبت بواسطة D E A D
يلعن اوم التفحيط من اول يوم :p <=== كل واحد يتكلم عن نفسه :":

انت تحوب وانت ساكت":"
Guilty Gear X
25-09-2002, 11:56 AM
ماما:اخبار الجامعه؟؟

انا:http://www.montada.com/images/icons/icon14.gif


:D :D :D
RPG_master
25-09-2002, 03:57 PM
الرسالة الأصلية كتبت بواسطة Guilty Gear X
ماما:اخبار الجامعه؟؟

انا:http://www.montada.com/images/icons/icon14.gif


:D :D :D

اول مره ترد على موضوع ماله دخل بالجيمز:p
العمدا
25-09-2002, 04:06 PM
يا اخى انت لو تسمع شورى وتترك الدراسه وهمها .. :o



وش الله حادك :6
RPG_master
25-09-2002, 04:13 PM
باخذ اول مكافآه بعدين بسحب:cool:
MetalGear
25-09-2002, 04:38 PM
خخخخخخخخخخخخخ

اذا كذا اول يوم اجل كيف اللي بعده :6
باباسنفور
25-09-2002, 08:41 PM
لقب جميل كزنوفاا النخل:6

بكل فخر صناعه سعوديه":"

اجل حادث ثني عند بيتكم ..

راعي جيب صح؟؟

ضف الجدار غشيم
<... تكفى:0)

المشكله اخوه متوفي بحادث تفحيط وهو جالس يفحط لا وبجيب لكزس ..

ياحليلوووووووه":" ..

بعدين انت مغفل طول عمرك مغفل وتدربي راسك ..

احد ينسى جدوله خصوصا اذا صار واحد مثلك انسى يحفظ:p
RPG_master
25-09-2002, 08:47 PM
راعي الجيب موب هو الي صدم الجدار..

واحد راعي سيدرك قديم:o

مدري كرسيدا?:


وراعي الجيب سواق:o


انا مغفل:#

وما احفظ بعد:# :"
باباسنفور
25-09-2002, 08:56 PM
لا الكرسيدا مدري سيدرك مدري عنه ..

لكن واحد ثاني اسمه(...) معه جيب لكزس ضف جدار الجاسر قدام بيتكم على اليمين شوي..

كان يفحط وفخت ..":"

هذا وهو قدام بيتكم ماتدري عنوووه:D


لا انت مو مغفل انت الدلاخه ماخوذه منك:6

انا ماتحفظ فانا خلاص اسحب كلامي
<<... خاف:-)
RPG_master
25-09-2002, 09:22 PM
ايه شفت واحد قاشع جدار الجاسر


بس كان واقف الجيب حقه وجو سحبوه?: ؟!

هذاك مات يعني؟