الدمعة بطيح !

[Mada Mada Dane]

الاسم خالد بن هشام بن عبدالطيف الحملي


النسبة 89.94 التقدير جيدجدا


لاتعليــــــــــــــــــــــــــــــــــــــــــق علما باني طالب ثالث ثانوي وخافسيني بالمشاركة والحاسب عملي
لاتعليق لاتعليق لاتعليق لاني لو بعلق بكفر بكم مدرس نقصني بدون سبب

لي عودة اذا رجعت من السفره الغبيه


سلام

[smigle]

أولاً: ألف مبروك على النجاح

ثانياً: (قل لن يصيبنا الا ما كتبه الله لنا) صدق الله العظيم. ترى هذا اللي مكتوب لك أرضى فيه وأحمد ربك عليه، ودايماً حط في بالك أنك مهما فعلت، وحتى لو نحت الصخر بأصابعك، ما راح تاخذ الا اللي أنكتب لك.

ثالثاً: بالعكس أنا أشوف أن 89% وايد حلوة،

خلني أقولك أنا أيش صار فيني......الله يسلمك أنا واحد فقير الله بلاني بأخ حكيك أو مثل ما تقولون (دافور) نجح في الثانويه بمعدل 96%، وطبعاً الأهل كانو حاطين الأمل علي أني أجيب مثله أو فوقه، لكن في الأخير كانت نسبتي 79% تخيل شكل الأحباط اللي عشته.:jap015: ، بس عموماً في الأخير الحياة لازم تمشي وأنا دخلت الجامعة (وعلى فكرة في الجامعة كل الموازين تتغير، يعني في مواد أنا كنت فيها أحسن من طلاب كانت نسبهم وايد أعلى مني) والحمد لله تخرجت والحين شغال شغلة محترمة ولو تسألني إذا رجعت بالزمن لورا أيش راح أسوي؟؟؟

بقول لك ولا شي لأني الحمد لله راضي باللي أنكتب لي.

الزبدة يا صديقي.....لا تزعل بالعكس أنا اللي أشوفه أنك ابليت بلاء حسناً وبالعكس حاول أنك تكافئ نفسك والأهم هو حمد الله على كل شي، حتى البلاء.

ومبروك وعقبال البكالريوس.

[التنين الاسود 3]

السلام عليكم ....

كيف حالكم ...

ما ادري اذا كلامي ينفع او لأ ....

بس يا خوي 89.94 والله العظيم ممتازة ...

وكثير من الطلاب يتمنونها ....

ولا تزعل ولا يجي في خاطرك ...

ترا الدراسة كلها ما تسوى زعل عليها ... اهم شي الصحة ...

والنتايج تتعوض بإذن الله ....

اهم شي قل الحمد لله على كل حال ...

وبعدني اشوف 89 ممتازة :)


ومبروك على النجاح و النسبة المشرفة :)

وان شاء الله نشوفك متخرج من الجامعة بمرتبة شرف ثانية <<< لاتطمع خخخخخخخخ :)

[Angel whisper]

مبروك عليك والله :)

وبعدين الـ89 حلوه ترى ..

مراقبتكم الحلوه كانت نسبتها 66 وما اشتكت ^__________^

[smigle]

مراقبتكم الحلوه كانت نسبتها 66 وما اشتكت ^__________^

:jap024:YOU MUST BE KIDDING

Girl Now I liked you more than ever:biggthump

[Angel whisper]

:jap024:YOU MUST BE KIDDING

Girl Now I liked you more than ever:biggthump
I'm not kidding ..
I swear it was 66.9 exactly ..
انقبلت في الكلية بس لانه درجة الانقلش عندي عالية ولانه درجات امتحان القبول كانت عالية ..
عشان جيه اقوله يعني الحمدلله نسبته ممتازة .. وان شاء الله بيقدر يدخل التخصص اللي يبغيه

[Electro M]

هو الاخ ما اشتكى بخصوص ان نسبته راح تأثر عليه جامعيا
لكن عندنا الجامعات تقفل التسجيل في التخصصات المهمة على نسبة 90%
و ان بقت مقاعد اضافية فتحوا التسجيل لاقل

لكن كلمة ان بقت مقاعد معناتها لازم يكون عندك واسطة
لذا الله يكون بعونك

تعال للقصيم و بيقبلونك بدقيقة خصوصا انهم بيفتحون عندنا كلية حاسب جديدة و المواد تقريبا صارت بالانجليزي :09:
على فكرة ترى جو القصيم جو مذاكرة من قلب
لا اسواق و لا اماكن تفتح النفس ما غير روحة للبر في الشتاء هذا اطلق شي فيها
يعني اضمن لك جو المذاكرة بقوة :31:

[snorlax]

خالد لا تزعل ...
هو صحيح التخصصات المهمة يمكن تكون صعب انك تدخلها .. لكن ربك كاتبلك اللي فيه الخير .. لازم ترضى بقدرك
ان كنت شاعر بهم أو حزن انصحك تقرى هذي الادعية مفيدة دايما اكون شايلهم بمحفظتي :

عند الكرب والشدة :
الا اله الا الله العظيم الحليم , لا اله الا الله رب العرش العظيم , لا اله الا الله رب السماوات ورب العرش الكريم.
ويقول : لا اله الا أنت سبحانك اني كنت من الظالمين , ويقول : ياحي يا قيوم برحمتك أستغيث.

عند الهم والحزن :
اللهم اني عبدك , ابن عبدك , ابن أمتك , ناصيتي بيدك, ماض في حكمك, عدل في قضاؤك, أسألك بكل اسم هو لك سميت به نفسك, أو أنزلته في كتابك , أو علمته أحد من خلقك , أو استأثرت به في علم الغيب عندك , أن تجعل القرآن العظيم ربيع قلبي , ونور صدري , وجلاء حزني , وذهاب همي .

اخوك سنور :)

[Rory]

كانت نسبتي في ثانوية 89.6 ..
وما تتخيل كيف كنت مستانسه عليها ..

المهم الحمدالله .. نجحت وبنسبة حلوة.

وإن شاء الله تقدر تدخل الجامعة إلي تبغيها وتختار التخصص إلي مفكر فيه.
وحاول تكافىء نفسك لأنه بها النسبة والله تستاهل ..

[ODIN]

خالد من جدك والله زعلان ؟!!!



اسمعني

انا ما اهون عليك ولا اخفف عليك ولا اقولك الله يعوضك خير ولا اقولك الطريق ما انتهى لك ولا من خرابيط ذا الكلام الي يطمن !!!




يا خااااالللد انا استغرب لحد الان فيه ناس تفكر بالنسبة !!!



النسبة الحين صار شي شبه رمزي .. كل الجامعات بالشرقيه مثلا ما تعترف بشي اسمه نسبه



يكفي انك تجيب فوق الثمانين وخلاص ما تشيل هم !!




الحين السالفه سالفة اختبار القبول هو الي يحدد .. السالفه سالفه اختبار القدرات هو الي يحدد



التبرول مثلا ما يطالعون شهادتك اصلا


يهمهم اختبار الرام 1 والرام 2


لما تخسف بواحد منهم يحقلك تزعل وتنقهر بعد !!


بس على نسبة صراحه لا راحت ولا جت الحين .. ماصارت تسوي شي




انا بكون واقعي معاك .. يحقلك تزعل الحين لو انك كنت تبي طب .. لانهم ما يقبلون الا تسعين وفوق



وانت ما اتوقع انك تبي طب صح ؟


خلاص معناتها مافي شي تشيل همه





انا بثالث ثانوي ... كنت اذاكر بليلة الاختبار .. والرياضيات الوحيده الي ذكرتها بيومين .. يعني انواع الدجه


واخرتها جبت نسبة 80 %



والحمدلله الحين دخلت بالتخصص الي ابيه ومتفوق فيه بعد !!



المهم انسى سالفة النسبة واقتنع انها ما تسوي شي .. كل الي يحق للانسان انه يزعل ويهوجس فيه اختبارت القبول .. شد حيلك فيها وبس

[antonio]

بالعكس ياخي نسبتك حلوه :) الف مبروك...

لكن بعض الجامعات داخل المملكه صار اعتمادهم على اختبار قياس القدرات اكثر من نسبة الثانوي :33:

على فكره انا ثالث ثانوي علمي >> لسه مطلع النسبة و فرحان فيها بعد 87 % ~.~!

واختبار قياس 73% يعني مش ولابد بس الحمدلله لابأس :p

مع اني مااشجع الدراسه الوطنيه والافضل بالخارج :biggthump

N.B. : اقول بدر توسط لي عماره وتخطيط ترا مالي بالرسم >.<!

[Trapped Inside]

مبروك ..

ويا رجال ..

[ثريول]

كلام أودن صحيح, النسبة دامها فوق الثمانين –على الأقل عندنا- الأبواب تتفتح لك وللي جايب 99% , والأفضلية تطلع في امتحان القبول والتوفل والسات وهالطخة .

يعني بالعربي لا تشيل هم, ركّز في تفكيرك هاليومين, وتأكد أنك بتحط رجلك في أرض ثابتة وتصلح لك مادياً ومعنوياً. أهم شي تكون أرض ثابتة عشان ما تنصدم أو تكسرك الأيام, ناس وايد ضاعوا في دراستهم مع أن مجاميعهم فوق التسعين, والسبب "الأرض غير الثابتة" !.

_________

ترابد:
شيل التوقيع الله يصلحك :).

[Trapped Inside]

ما شلت التوقيع ..

احد شاله ..

[Mada Mada Dane]

شباب منتوا فاهمين , ياليتني جبت 85% ولا اجيب هذي النسبة

الي يقهر هو ان الحاسب منقصني 5 درجات بالعملي , وبالمشاركة درجتين بالادب , وكم نص من هنا ومن هناك =_=

بس تصدقون , يارجال الي كاتبه ربك بيصير , طنش تعش تنتعش ...

انا بقدم للبترول ان ماانقبلت الوالد قال نق الجامعة الي تبيها وانا حاضر :p



وعلى فكره بدر , وش رايك اني بيوم الامتحان نفسه ادخل النت ساعتين على الاقل =_= , هع هع هع


يارجال وداعا للثانوية , عموما انا مخطط على الهندسة الكهربائيه حاط عيني عليها من زمان وان شاء الله ادخلها اذا كان المكتوب


:D

سنور مشكور على الادعيه و ثريول لقيت الارض الثابتة :D


الله يوفق الجميع , خصوصا طلاب ثالث , شدوا الهمة شباب :p

[BOOOB_2002]

اول شي مبروك أخوي لك النجاح وأنا بخالف الجميع الصراحة وبنفس الوقت ما أبي احطمك الصراحة لو بدالك أنا وكنت حاط ببالي نسبة معينة مثلا فوق التسعين وجاتني 89% فالصراحة بزعل جدا جدا

هي مب قليلة أخوي وكثيرين يحلمون فيها لكن بالنسبة للمتوفقين وأنا متأكد انك منهم قليلة بنظرهم لأن طموحك كبير

ومع كذه لا تهتم ولا تحتار اذا ناوي على تخصص براسك وفي قدرة مادية فالهنسبة ماراح تقدم ولا تأخر اقصد جامعة بفلوس وكل شي ممكن يتعوض سواء عدت السنة او دخلت جامعة خاصة بالتخصص اللي تبيه

أما اذا زعلان بس لأنك كنت متوقعها أكثر من كذه فأنا أؤيدك والزعل يؤكد انك شخص يهمه التفوق مب النجاح بس

ولا تهتم كثير كله قدر ومكتوب لك قل لن يصيبنا الا ما كتب الله لنا ويمكن تكون هالنسبة فاتحة خير عليك وتكون بداية جديدة وقوية لك


سلام وألف مبروك خيو ..

[Mada Mada Dane]

ماكان ودي ارفع الموضوع قرب يروح الصفحه الثانيه , لكن في Update شوي مهم

جبت 7/30 في الرياضيات

>_< lOoOooOoOl


ما كانها قوية شوي :p

[BOOOB_2002]

يا نهارك منيل <<<< مصري :p


من جد هاذي اللي خسفت النسبة :afraid:


على العموم الله يوفقك وخبرنا وش بيصير معك بعدين

[Angel whisper]

مب كأنك يعني رسبت في الرياضيات o.O

ههههههههههههه يحليلك x_x

[Mada Mada Dane]

لووول BOOOB_2002 ان شاء الله بخبرك :p


لا ماسقطت , الفصل الدراسي الاول شفع لي , بس والله نسبتي زينه اذا كانت الرياضيات 7/30

يعني ناقصتني 23 درجه , تنضرب بعدد الحصص ... يعني تنضرب بـ 6 =_= اووف كثير

المهم درجتي النهائيه 70/100

بالتراكمي 444/600

:31: كثيره كم نقطه ناقصه , حول 150 =_= وجع

[snorlax]

لووول BOOOB_2002 ان شاء الله بخبرك :p


لا ماسقطت , الفصل الدراسي الاول شفع لي , بس والله نسبتي زينه اذا كانت الرياضيات 7/30

يعني ناقصتني 23 درجه , تنضرب بعدد الحصص ... يعني تنضرب بـ 6 =_= اووف كثير

المهم درجتي النهائيه 70/100

بالتراكمي 444/600

:31: كثيره كم نقطه ناقصه , حول 150 =_= وجع

لنك بي وش سوا ؟ :06:

[Mada Mada Dane]

لينك . بي يدرس بجامعه الملك فيصل , هندسه معماريه =_= تراه اكبر مني بسنه

[Rain Drop]

نظامنا بالامارات يختلف عنكم...نحن كل اللي سويته بهال12 سنة مب مهم..

الشي الوحيد المهم هو درجة الاختبار النهائي وبس..

الدرجة اللي تيبها بالورقة هي درجتك بهالمادة..

وتنجمع درجات كل الاختبارات النهائية وتطلع النسبة -_-

يعني اختبار الرياضيات مثلاً من 300 درجة وعلى ورقتين

:196:

[Angel whisper]

/me pats

يلا ما عليه .. الا هي 150 نقطه ..

غيرك نقص 300 ان ما كان اكثر ..

*cough*NaziMod*cough*

[Mada Mada Dane]

لووول , طيب حتى احنا مو مهم 12 سنه كلها تضيع سدى , ولا إنا طول عمري امتياز وين راحت ... ماادري =_=

اهم شئ اخر سنه , ودرجة الرياضيات عندنا من 600 نقطه

هي 6 حصص بالاسبوع , والمادة 100 درجة

6*100 = 600

لووووووووووول 300 نقطه =_= , احم ... الحمدلله الحمدلله

=_= كيف نقصتي 300 نقطه , انا لو جبت 0/30 ماتطلع علي 300 نقطه :p

شئ خرافي درجتك :09:

[Angel whisper]

احنا نظامنا غير ..
كل اللي درسته طول السنة ما ينحسب .. بس الامتحان النهائي محسوب ..
ويكون في كل اللي درسته .. منهج الفصل الاول والثاني ..
عشان جيه يكون مثل السم وتكون حالة طواريء في البلاد كلها -___-
فبكل بساطة كل شي يعتمد على هالامتحان .. سويت زين .. شاطر .. ما سويت زين .. انقع :p
فعشان جيه انا درجاتي منتهيه .. لاني ما قدرت الصراحه استوعب هالكمية كلها في امتحان واحد .. مع اني الين ثاني ثانوي كنت اطلع من الاوائل ..
بس في ثالث ثنوي نسبتي كانت 66% .. فممكن تحس بالفرق ^^

[Mada Mada Dane]

نظام غبي ==__==


Banned NaziMod الموضوع قلب شات :p <<< متاثر من كثر المواضيع الي انحذفت له اليوم

[لوسي]

احنا نظامنا غير ..
كل اللي درسته طول السنة ما ينحسب .. بس الامتحان النهائي محسوب ..
ويكون في كل اللي درسته .. منهج الفصل الاول والثاني ..
عشان جيه يكون مثل السم وتكون حالة طواريء في البلاد كلها -___-
فبكل بساطة كل شي يعتمد على هالامتحان .. سويت زين .. شاطر .. ما سويت زين .. انقع :p
فعشان جيه انا درجاتي منتهيه .. لاني ما قدرت الصراحه استوعب هالكمية كلها في امتحان واحد .. مع اني الين ثاني ثانوي كنت اطلع من الاوائل ..
بس في ثالث ثنوي نسبتي كانت 66% .. فممكن تحس بالفرق ^^


مثل ما قالت اينجل..حالة طوارئ
والهم انه شهر 5 "مايو" كله اجازة للمذاكرة
بس تكفي شو ولا شو -_-
وشهر 6 هم الاختبارات..فنعيش شهرين من الهم المتواصل
والاختبارات في كل اللي خذناه بالسنة للفصلين
أعمال السنة كلها مب مهمة :196:
باختصار الثنويه بالامارات مأساة

[Rain Drop]

احنا نظامنا غير ..
كل اللي درسته طول السنة ما ينحسب .. بس الامتحان النهائي محسوب ..
ويكون في كل اللي درسته .. منهج الفصل الاول والثاني ..
عشان جيه يكون مثل السم وتكون حالة طواريء في البلاد كلها -___-
فبكل بساطة كل شي يعتمد على هالامتحان .. سويت زين .. شاطر .. ما سويت زين .. انقع :p
فعشان جيه انا درجاتي منتهيه .. لاني ما قدرت الصراحه استوعب هالكمية كلها في امتحان واحد .. مع اني الين ثاني ثانوي كنت اطلع من الاوائل ..
بس في ثالث ثنوي نسبتي كانت 66% .. فممكن تحس بالفرق ^^

مثل ما قالت اينجل...حالة طوارئ
لانه شهر 5 "مايو" كله يكون للمذاكرة
بس يكفي شو ولا شو -_-
وشهر 6 الاختبارات وتكون بكل اللي خذناه بالسنة
أعمال السنة وغيره مب محسوبة
درجة الامتحان هذا وبس -_-
صج الثنوية بالامارات مأساة
بس مع ذلك معظم النسب تكون زينة
لان الاختبارات ما تكون صعبة وايد

[Mada Mada Dane]

اذا الاسئله مو صعبه كثير , وعندكم شهر مذاكره احمدوا ربكم =_=

انا ادرس يوم الامتحان بعد مااجلس على النت ساعه إلى ساعتين

الاسئله هنا معقوله ماعدا الرياضيات , ودفعتنا اصعب اسئله من 20 سنه يقولون

جابوا برنامج عن اسئله الرياضيات لهذي السنة في قناة السعودية الاولى , كيف انها صعبه وفيها ظلم وجابوا خبير رياضيات حل الاختبار بـ ساعتين و ربع , وفتره الامتحان للطالب 3 ساعات =_=

قالوا لو هذا الخبير حل الامتحان بساعتين وربع الطالب يبي له على الاقل 8 ساعات علشان يحله ...

اغلب الي خذوا درجات كامله , وهم قليل يدرسون بمدارس خاصه , يجون المدرسين يحلون عنهم الاسئله واعرف ناس كذا :31: ظلـــــــــم , ياليتني بمدرسه حكوميه تابعه لوزارة المعارف =_=

مدارس الهيئة الملكيه الله ياخذهم اصعب مدارس واكثرها تشدد , تلتفت في قاعه الامتحان , خلاص محضر هذا التفت , كيف التفت , مايستحي يلتفت , اكيد غشيت ... لا اكيد بدلتوا اوراقكم يوم التفت ... انت ساحر ... انت كافر =_=

شئ عجيب

[Rain Drop]

على العموم مبروك النجاح والنسبة الحلوة

وهذي مجرد خطوة أولى

المهم الحين تحدد مسارك صح

بالتوفيق

[Lena]

لالا خالد اشوى انك ماغشيت ..وين تبي تعيش طول عمرك في ذنب هالغش بيصير راتبك من شغلك فيه جزء حرام هههههه لا اشوى ربي حرسك

ثانيا اودين قال الي كنت ابقوله اخوي مثلك ثالث ثانوي طول عمره نسبته فوق ال96 وهالسنه نسبته 90 قريب مرة منك والسبب طبعا الرياضيات الجميل@_____@ ابو معدل تراكمي في 7..مدري 6

المهم يوم قدم عالجامعات وسال قالو يبون اختبار القدرات النسبه ماتهم

اصلا فكر فيها بمنطق..غباء جدا ينظرون لنسبه انسان
نسبه يمكن ظلمه فيها مرض او تعب او اي ظرف
وينسون قدراته وابداعه
ياما ناس نسبهم في العلالي وهم مرة duh لا شخصيه ولا روح ولا تفكير ابداعي

اخيرا صارو ينظرون لقدرة الانسان مب نسبته-_____-

انا نسبتي كانت 98% ومشالله معنا بنت نسبتها في الثمانينات
والله انها مثلي في البرمجه ويمكن عندها افكار ابداعيه اكثر مني
مب شرط النسبه


ياااااااارب بس تدخل القسم الي تبيه وتصير تحبه وتبدع فيه وبشرنا عاد حسبتك مثل اخوي ويهمنا مستقبلكXD

ja ne~

[aoks]

خالد ... انا ما الومك على 7 من 30

لأن الي حاط اختبارنا واحد معقد نفسيا :) ...

وجاي يتحدى الأخ ... ما علينا ... انا انسبتي انخسفت بسبب الرياضيات

اقل مادة عندي الادب والرياضيات ..


الادب عاد السؤال الأول اخترعت اشياء جديدة وبدعت .... خخخخخ

والكيمياء سؤال ال ABCD ;; فهمته غلط ... وحليته غلط ... وطلع غلط ..... غلط غلط غلط ; ;

يا رجال ... هم وانزاااااااااااااح xD

[Mada Mada Dane]

اصلا فكر فيها بمنطق..غباء جدا ينظرون لنسبه انسان


ja ne~

والله كلامك يحمس , عموما انا مرتاح الحين نسبتي مو شينه ودرجاتي حلوه بس الرياضيات خفستني , لا ان شاء الله اذا نقبلت بخبرا لشباب الي طلبوا مني وش الجامعه والله يكتب الي فيه خير

بس على طاري المنطق , لو نفكر فيها بمنطق زيادة , نلقى انهم أصلا ماعندهم منطق كذا يهتمون بالنسبه او القدرات للواسطه :p

الله يعين بس ويكتب الي فيه الخير :D


اوكس / او عبد العزيز << عسى مااكون غلطان >_<

والله انك صادق يارجاااال هم وانزاح :D تصدق احس ثالث ثانوي كلها مرت كانها يوم والله اتذكر اول يوم بالدراسه اش سولفت انا بالضبط انا وواحد من ربعي خصوص هذي السنه =_=

[Trapped Inside]

اشوف ان نظامكم " مصيفه " >.> .. احسن من نظامنا -_- ..

[Angel whisper]

عالعكس نظامنا تعيس برايي ..
يعني كل شي يعتمد على اسبوعين الامتحانات هاذيلا ..
ومثل هالسنه الطلاب اشتكو من الصعوبه ومحد سوالهم سالفه ..
ولو حتى شهر مذاكره .. كم الواحد بيراجع فيه اذا كان مطالب بمذاكرة منهج سنة كاملة فيه؟
يعني احمدو ربكم تاخذولكم كم درجة على المشاركة والنشاط وغيره وعندكم اكثر من امتحان تقدرون تيمعون فيهم درجات .. مب واحد اذا صابت فيه صابت واذا خابت خابت -_-

وباركولي ..
طلعت نتيجتي ..
امتياز مع مرتبة الشرف للسنة الثانيه على التوالي ..
too bad i'm not getting any awards though ..

[asf4ever]

"مصيفة" يابت إمتياز مبرووك

ولكن طلابنا هالسنة ما أعتقد إنهم إشتكوا من الصعوبة إلا في بعض المواد مع الفني والأدبي
أما العلمي فيقولون إنه هالسنة من أسهل السنوات
ووزيرنا نهيان قال إنه الإمتحانات هالسنة مب بالمستوى
يعني السنة الياية(that's me) بيقلعون عيونا:blackeye:
أما عن نظامنا ففيه مميزات وفيه مساوئ ..من مميزاته إنه ما بتتعرض لظلم الأساتذة وتنقيص الشفوي وهالأشياء ولك فرصة أكبر إنك تييب نسبة 99,9
ومن مساوئه إنك ما عندك درجات تستند عليها لو خبصت في هالإمتحانات
وأمس طلعت نتايج الثانوية العامة عدنا وأشوفها زينة..

مبروك مادا على النجاح >>أدري متأخرة>.>

[Mista Koo]

هلا مادا ^_^ مبروووووووووووووك
ترى كنت كاتب رد وحسبته انرسل بس ×_×

المهم نرفع لك الموضوع زيادة شتبي بعد ~_^


مدارس الهيئة الملكيه الله ياخذهم اصعب مدارس واكثرها تشدد , تلتفت في قاعه الامتحان , خلاص محضر هذا التفت , كيف التفت , مايستحي يلتفت , اكيد غشيت ... لا اكيد بدلتوا اوراقكم يوم التفت ... انت ساحر ... انت كافر =_=
أحمد ربك والله أنا أهلية ومتقرف من الغش اللي قاعد يصير الأساتذة يدخلون وهذا القانون اللي موجود في الكتاب تحت على اليمين اللي في الرسمة هذيك
ولا في الرياضيات أول شي تجيب مساحة الهرم وتطرحها من نص الدائرة الخ (حفظنا هذا السؤال من كثر ما سألوا عنه)
واللي يكلم اللي قدامه واللي وراه وعادي مشي حالك


لالا خالد اشوى انك ماغشيت ..وين تبي تعيش طول عمرك في ذنب هالغش بيصير راتبك من شغلك فيه جزء حرام



اصلا فكر فيها بمنطق..غباء جدا ينظرون لنسبه انسان
نسبه يمكن ظلمه فيها مرض او تعب او اي ظرف
وينسون قدراته وابداعه
ياما ناس نسبهم في العلالي وهم مرة duh لا شخصيه ولا روح ولا تفكير ابداعي

I Agree ^_^
وزي ما قالوا لك النسبة مو مهمة هالأيام المهم اختبار القدرات

وكمشور ^_^ بالتوفيق ان شا الله وعقبالنا T_T

[Trapped Inside]

" مصيفه " >.> ..

أذاكر شهر ازين من اني اذاكر سنه .. >>>> أنت لو تذاكر ساعه يصير خير T_T ..

ومبروك الامتياز ^_^ ..

[hussien-11]

89 و زعلان ؟

طيب اتركني دقيقة أطلع لك من شاشة الكمبيوتر و :chairshot

أنا بقي لي امتحان واحد و بخلص ، لكن شبه ضامن الرسوب بمادة أو مادتين -___- ، على العموم احنا عندنا بالأردن أصعب ثانوية عامة بالشرق الأوسط ، تليها مصر ، تخيل بتاريخ المملكة و لا طالب قدر يحصل على نسبة كاملة أبدا ، و حتى عدد الطلاب اللي يحرزون فوق ال 95 % عددهم 300 أو 400 طالب تقريبا من 120 ألف طالب -__- .

[Trapped Inside]

حسين .. اخيراً واحد يعرف معاناتي من ذا المنتدى الي كله دوافير >.> ..

[hussien-11]

أنا و انت وجهان لعملة واحدة :196:

[SFS]

اتمنى تكون هالنسبه دافع وحافز للحصول الى نسبه اعلى
لاتكون سبب في الاحباط او تكون ان الدنيا انتهت والله يوفقك انشالله
وعلى فكره النظام عندكم يكون سبب في رسوب الطلبه من ناحية
الاختبار النهائي الي يكون النجاح او السقوط من عدمه :31:
اما عندنا بالكويت نظامين عامه مثل الي عندكم 3سنوات لعب
والسنه الاخيره هي المهمه والنظام الثاني هو نظام المقررات
والي انا كنت فيه وهو 4 سنوات كل سنه كورسين وكل كورس
5وحدات ومجموعهم 40 وحده يعني 4 سنين كرف وتعب
وهو نفس نظام الجامعه تختار مواد ومعدل تراكمي وهم وغم
وبعد نهاية كل كورس مخوخ الطلبه مثل الحصالات تنكسر
وتطير المعلومات واسف على التطويل وشكرا

[cubelover]

السلام عليكم


و الله أودين عطاك الخلاصه خاصه أنك الظاهر بالشرقيه

شف أ ذا درجتك بالقياس فوق 80

وشديت حيلك برام 2 أحجزك تخصصك بالبترول أن شاء الله

و الله يوفقك

[megaman]

تعال للقصيم و بيقبلونك بدقيقة خصوصا انهم بيفتحون عندنا كلية حاسب جديدة و المواد تقريبا صارت بالانجليزي :09:
على فكرة ترى جو القصيم جو مذاكرة من قلب
لا اسواق و لا اماكن تفتح النفس ما غير روحة للبر في الشتاء هذا اطلق شي فيها
يعني اضمن لك جو المذاكرة بقوة :31:

هذا إذا كنت ناوي تجلس بالسكن اللي جنب الجامعة :31:خخخخخخخ


ألف مبروك على النسبة ... وعلى العموم انت شوف وش ناوي تدخل يمكن تكون نسبتك كافية لدخوله