يبقى انت أكيييييييييد العربي !!!
تعرف تتكلم غربي وتزود همي وكربي؟
تلوح صوتك أفرنجي وحياتك مسخ اوروبي
يبقى انت اكيد العربي
تعرف تستنكر جامد وتهيص واقف قاعد؟؟
وتغمي عيونك خالص بين انك مش حاسس
يبقى انت اكيد العربي
تبعث وتجيب في مبادرة وآراء دايما متصادرة
تعمل لك قمة مريحة بتشع باعفن ريحة ؟؟؟
يبقى انت اكيد العربي
تحرق ف رموز اجدادك بقى بوش وبلير اسيادك
وتبيع في اخواك واولادك وتغير جلدك دوغري
يبقى انت اكيد العربي
جعجع واتكلم وانبر وأكدب هيص أو أفشر
أشجب بغبغ استنكر وأعمل نفسك متاثر
يبقى انت اكيد العربي
لا تجيب ولا يوم ح تودي عايش في الحلم الابدي
وشارون بيطبل وانت ع الوحدة بترقص بلدي
يبقى انت اكيد العربي
أشجب ندد ما تونش وأنت في الاصل مطنش
دا القهر في مخك عشش إن ندى وطنك ماتردش
يبقى أنت اكيد العربي
عامل نفسك مش شايف وتغني انك مش خايف
مع إنك كائن هايف بلونة عليها شفايف
يبقى انت اكيد العربي
فالح تضرب في اخواتك وتغني سيرة امواتك
والجبن اهم سماتك وحياة الذل حياتك
يبقى انت اكيد العربي
ومالكش ايها قيمة ولا نافع حتى في سيما
وأنت في ضمير العالم يا دوبك حاجة قديمة
يبقى أنت أكيد العربي
تعمل طوابير تستعرض وتغني في ندوة و معرض
والعالم شافك زود في كلامة وقال متعود
يبقى انت أكيد العربي
كل واشرب واسكر طينة فاكر كم مرة صحينا
على ناس بتدوس أهلينا سرقوا حتى حكاوينا
يبقى انت أكيد العربي
حسك عينك تتكلم أفضل تنح واتبلم
أحضن أعدائك سلم و اشنق ولدك واستسلم
يبقى انت أكيد العربي
عمال تلحس في كلامك ومصدق جهل علامك
عمال تجري لي قوامك على وعد يهودي اوروبي
يبقى انت أكيد العربي
العالم عايز قوة مش بس كلام من جوة
عالم محتاج لفتوة مش واحد يضرب غنوة
يبقى انت أكيد العربي
والله لو كان بايدينا ومالكش يمين علينا
لو كان الامر بايدي لاتبرى من الجنسية
أصلي للأسف انا عربي
بقلم عمرو ابراهيم منقول
قصيده متشاءمه شويه لكن اصل هوه ده المووود بتاعى الايام دى
