مطبخ أبو لبن للوجبات المتنوعه :)

سلام الله عليكم و رحمته و بركاته .. بناءً على طلب الأعضاء افتتحت هذا الموضوع .. طبعا كل الطبخات اللي بستعرضها هنا مسويهم بنفسي .. يعني ما جبت أي شي من كتاب أو ورقة خارجية ... بس تعلمتهم من أختي مع الوالدة الله يحفظهم انشالله .. و انشالله نفيد و نستفيد

تقريبا بحط طبخة كل أسبوع .. يمكن أقل من أسبوع أو أكثر .. على حسب الفراغ و دخولي النت .. و هذا للمعلومية

ببدأ اليوم بطبق صينية المكرونة بالجبن و الزعتر .. هذي من طبخاتي المفضلة
ملحوظة : يمكن يكون تعبيري زفت شوي فإذا عندكم استفسار اسألوا

الخضروات: 4 حبات طماطم متوسطة الحجم
2 أو 3 بصل من أي نوع و يفضل الأبيض منه و تقدرون تزيدون على حسب الرغبة
2 أو 3 فلفل أخضر و برضوا على حسب الرغبة
تقدرون تضيفون خضروات ثانية على حسب شهيتكم .. بس عندي هذول هم الأساس .. طبعا تقطع الخضروات على شكل شرائح متوسطة الحجم

اللحم: صدور دجاج مشرحة بشكل جيد و متساوي بالكمية التي ترونها تكفي

المكرونة: أي نوع مكرونة تحبونها بس أنا افضل مكرونة الديك

خلطة الجبن: عبارة عن قشطة مخفوقة مع جبن كاسات (مثل كرفت أو بوك) طبعا الخلطة لاتخلونها سميكة كثير و لا تخلونها خفيفة .. الوسطية زينة

أما البهارات فلكم حرية التصرف فيها على حسب الذوق

وطبعا تحتاجون الى فنجان ملح خشن أو الكمية المطلوبة اللي تحتاجها المكرونة أثناء السلق

يجي دور الطبخ .. المكرونة توضع في قدر لوحده و يوضع عليه ماء مغلي مجهز و يترك للسلق مع إضافة الملح .. و تجهز صينية فرن مستطيلة أو مدورة على حسب الموجود .. و يجهز أيضا الفرن بدرجة حرارة مناسبة لوضع الصينية فيها
أما الدجاج مع الخضار .. أولا نحمي قدر و نحط شوية زيت عليه .. و نحمي الزيت بس من غير ما تحرقونه .. نحط البصل الى ان يصبح ذهبيا أو قبل ما يستوي عشان ما نبيه يصير محروق .. و نحط الطماطم مع الفلفل الأخضر الى أن يذوب الطماطم .. و الحين نحط الدجاج و نضيف البهارات مع الملح حتى ينضج الدجاج و ننتظر الى أن تنضج المكرونة .. ثم نخلط خلطة الدجاج مع المكرونة نحط الخليط في الصينية المجهزة مسبقا .. و نغطي المكرونة بخطلة الجبن و القشطة تغطية متساوية و مرتبة .. و نحط فوق الخليط شوية زعتر لإعطاء طعم لذيذ .. و توضع الصينية الى ان تستوي خلطة الجبن في أعلى الصينية

انشالله تكون الطبخة بسيطة و سهلة .. بالهنا و الشفا .. و مثل ما قلت .. إذا واحد أو وحدة عنده أو عندها استفسار يسألني .. و انتظروا الطبخة القادمة

السلام عليكم .. عدت اليكم من جديد مع مزيد من الطبخات و المنوعات الحلوة و اللذيذة ..

ببدأ اليوم بكم نوع من السلطات اللي يحبها العقل .. و المحتوى فيها المكرونة << أموت على المكرونة

هذي أول وحدة و هي ( سلطة المكرونة بالتونة ) .. المكرونة اللي يستحسن تحطونها معه هي المكرونة اللي تشوفونها مجوفة و متوازية أضلاع و طولها متوسط بعض الشئ << ناسي اسمها

المقادير : علبة من المكرونة المذكورة .. نص كوب من مايونيز .. ملعقة شاي من مسحوق الزعتر المجفف .. كرفس المقطع مكعبات .. علبه تونة بيضاء .. جزر وطماطم مقطعه إلى مكعبات صغيرة

طيب .. نجي لطريقة التقديم .. هي سهلة و ما تاخذ وقت .. ضعي المكرونة في ماء مغلي لمدة 11 دقيقة. صفيها من الماء واتركيها حتى تبرد. في إناء كبير. افرغي محتويات علبه التونة بعد تصفيتها من الزيت. اهرسيها هرساً ناعماً. أضيفي الجزر الطازج وقطع الطماطم والكرفس ومن ثم اخلطيها جيداً مع المايونيز حتى تتمازج. ضعي المكرونة في طبق تقديم السلطة واخلطيها مع المزيج حتى تتجانس. زينيها بقليل من الزعتر المجفف
تقدم باردة .. لا تنسون هالشي

السلطة الثانية هي برضو سلطة مكرونة بس بطريقة ثانية .. المقادير ..
كيلو مكرونة صغيرة بشكل نص دائرة .. كوب مايونيز .. ملعقة طعام خل تفاح ... نص ملعقة شاي سكر .. نص ملعقة شاي ملح .. نص ملعقة شاي فلفل اسود .. كوب كرفس مقطع صغيرات .. 3 حبات فلفل رومي مقطع صغيرات .. طماطم للتزيين
ألحين نجي لطريقة التحضير .. اسلقي المكرونة لمدة 8 دقائق دون اضافة ملح .. بعد كذا نشفيها في الصفاية مع اضافة ماء بارد كي تبرد المكرونة .. بعد كذا نشفيها تماما .. و في وعاء كبير اخلطي المايونيز و الخل و السكر و الملح و الفلفل الاسود و اخلطيها زين .. بعدين ضيفي المكرونة و الفلفل الرومي و الكرفس و اخلطيهم عدل .. للإضافة زيني الطبق بالطماطم و بالهناء و الشفاء .. في حالة رغبة بعضكم بتقليل كمية الدهون في هذه السلطة بامكان الواحد يستخدام المايونيز قليل الدسم او الخالي من الدسم

انتهينا من السلطات .. نجي للطبق الرئيسي و الأخير لي في هذا اليوم .. بصراحة احترت و انا أختار الطبخة .. بس من قريب أهلي سوو تنور بيتي .. و الطريقة سهلة و حلوة .. بس أبي أنوه أن كمية الرز اللي بتحطونها على حسب الموجودين .. بس أتوقع أن غرفتين كبار تفي بالغرض .. عموما .. المقادير :
الرز على حسب العدد و المكيال .. 3 حبات بصل أبيض كبير .. 3 حبات طماطم و فلفل أخضر أحجامها متوسطة .. طبعا مع البهارات اللي تحبونها مع الرز .. الشي المهم أنكم تحطون صحن حراري وسطه سمن و مع حبات فحم عشان يعطي نكهة التنور في الرز ..
التحضير سهل جدا هو أنك تغلي ماي وتحط البصل و الطماط و الفلفل الاخضر المشرح بأحجام متوسطة الطول و تسلق مع الرز في قدر كبير .. اذا شفتوا الرز قرب يستوي .. حطوا الصحن فوق الرز ( لا تسكبون اللي فيه مع الرز ) .. الفكرة هو أن البخار بياخذ ريحة الفحم مع السمن و تتشربها خلطة الرز مع الخضار ..

و لا تؤاخذونا على النسيان .. لأني من زمان ما طبخت رز .. و نسيت بعض المقادير .. فإذا صار فيه تعديل بحطه .. و أتمنى أن حازت الطبخات على رضاكم ..

اليوم بعرض لكم شوربة حلوة و لذيذة .. إنها ..

شوربة الفطر ..

المقادير ..
3 ملاعق كبيرة من الففطر المفروك
بصلة مفرومة
ربع اصبع من الزبدة
3 ملاعق زيت
ملعقة دقيق
كأسين كاء ساخن
حبة ماجي و أخيرا كأسين حليب .

الطريقة ..
يحمس البصل بالزبدة و يضاف عليه اليه الفطر و يقلب جيدا .. بعد كذا يرفع من النار .. يوع الزيت في قدر على النار ثم يضاف اليه الدقيق و يخلط زين .. بعدينيضاف اليه الحليب و يحرك حتى تتماسك الخلطة شوي .. بعد كذانضيف خلطة الفطر مع البصل والماجي و الماي الحار المهيأ سابقا .. نترك الخلطة تغلي لمدة 5-6 دقايق .. و انتهت على كذا .. للراغبين في الزيادة اعصروا بغض الليمون معه

الطبخة الجاية يمكن أتأخر فيها .. فحاليا استمتعوا بالموجود حاليا

السلام عليكم:D
أهلا بالحبايب الحلوين;)
شخبارك بولبن،عساك بخير ..؟!؟

بخصوص الأكلات والطبخات هذي صدقني انا يوعان:" ومشتهي آكل كل هذا:6 ،وماشاءالله عليك،كلامك سهل جدا في الشرح ;-)

انا لازم اخبر الوالده عن الطبخات هذي:6

ارجو عرض المزيد من الطبخات اللذيذه هذي،قبل لاتذبحني الوالده فهي تحب تجربة كل شيء:p

الى اللقاء;)

ابي جوعانه موت http://webpost.net/me/memy/mushy.gif <<< شمت الريحه من المنتدى الثاني


تسلم على الطبخات ..

واااااااااااااااااي



وناسة



أبي أتعلم اشلون أطبخ




ثانكس أبو لبن على المساعده :D



(ذوقك حلو بالأكل );-)

السلام عليكم :)
شاعر .. هذي طبخة جديدة عشانك :D

ميمي .. حياج معانا .. و أرجو أنك تتابعينا على طول :)

أميرة الخيال .. العفو :) .. هذا من ذوقك :cool: ..

أنا تعمدت أنزل طبخات سهلة عشان أشجع الموجودين على الطبخ :6

و هذي طبختي الجديدة من المقبلات :)

كفتة الدجاج مع الجزر ..

المقادير ..
نص دجاجة مسلوقة ومفرومة .. بصلة مفرومة فرما ناعما (العربي مقطعني هاليومين :D ) .. جزرتين مسلوقتين و مهروستين .. 3 ملاعق كسبرة مفرومات فرم ناعم .. بيضتين .. و بهارات مشكلة مع الملح :)

الطريقة ..
يخلط كل من لحم الدجاج و البصل و الجزر و الكسبرة و يحنون في الماكينة (لازم تكون عندكم ماكينة طحن و مزج) .. بعد كذا بخلط بالبهارات و الملح و البيض و يعجن جيدا ( معلومة عن البيض : يخلط البيض مع الخليط لأنه يساعد على تماسك الخليط أثناء القلي .. من غيره بتشوفون الخليط متبعثر في المقلاة :) ) .. يشكل الخليط على شكل أصابع و تقلى بالزيت و يقدم .. بالعافية :)

السلام عليكم

اهلا ابو لبن
الرائحة هنا قوية وتسيطر علي!!>_<

كل الطبخات اللي ذكرتها تعجبني

اول مرة اعرف ان الطماطم يذوب.. لكني من اشد المعجبين بالطماطم في جميع الاكلات... عكس توتو.

يم يم يم... ابو لبن ليش ماصرت في عصابتنا... كان الشومن والمجبوس روبيان والخثاق والدجاج والجريش... مابخلص T_T

على العموم شكرا على الموضوع الرائع... الا اقول.. ماتقدر تحط لنا صور للاكلات ;-)

السلام عليكم ...أحسنت يا بو لبن أختيار هالموضوع الجذاب اللي يجذب الكل ...

أنت فنان في الأكل ...والفنان في الأكل ...:p ما أقدر أتفلسف زيادة

...عجبني ويوعتني في نفس الوقت .....السلطة مع المعكرونة ...

أتمنى أشوف لك طبخات ألذ ...وأشهى ...و.وو

اقتباس:

---

الرسالة الأصلية كتبت بواسطة shaheen


اول مرة اعرف ان الطماطم يذوب.. لكني من اشد المعجبين بالطماطم في جميع الاكلات... عكس توتو.

يم يم يم... ابو لبن ليش ماصرت في عصابتنا... كان الشومن والمجبوس روبيان والخثاق والدجاج والجريش... مابخلص T_T

---

توتو ما تحب الطماطم ....:أفكر: :6
ذكرني الشومن ....بأنيمي كبمارو :D
ويش ده هالأكله الجديدة الخثاق....*_*

اقتباس:

---

الا اقول.. ماتقدر تحط لنا صور للاكلات

---

إقتراح جيد منك أٍستاذ شاهين .. بس المشكلة أني أنا في الجامعه و مش في البيت .. و للا كان صورت لكم الأكلة اللي أنا مسويها لكل واحدة من الطبخات .. بس إذا شفت صور في النت للطبخات هذي بعرضها :) .. و شكرا على الإقتراح هذا و نتمنى وجودك معنا هنا دائما :6

اقتباس:

---

كان الشومن والمجبوس روبيان والخثاق والدجاج والجريش

---

بحاول أنزللك بعض الطبخات اللي طلبتها :6

الجني الرسام .. انت تامر أمر .. بس ما عرفت ايش الشغلات اللي تحبها .. سلطات .. مقبلات .. شوربات .. ال Main (الشغلات الضخمة :D ) .. و في حلويات برضوا :أفكر: .. انت عطنا نوع و انا أحط :cool:

بحط اليوم سلطة أتوقع أن تعجبكم .. و هي ..

سلطة الدجاج بالمايونيز ..

المقادير ..
نص دجاجة مسلوقة و مفرومة .. بصلة مفرومة .. ربع راس خس مفروم فرم ناعم .. 3 ملاعق مايونيز (للي يتبع حمية يقدر ياخذ مايونيز قليل أو منزوع الدسم :) ) .. ملعقتين بقدونس مفروم .. مع الملح والفلفل الأسود

الطريقة ..
يخلط كل من الدجاج و البصل و الخس و البقدونس .. يحل المايونيز بشوية موية (لا تكثرون ماي) و بعدين ينضاف المايونيز إلى الخليط و نحط معه ملح و فلفل و يخلط الجميع خلطا جيدا .. بالهنا و الشفا :)

الطبخة الأخيرة شهية><
تسيل اللعاب:6

وأحسن شي ان طبخاتك سهلة ،فعلا مثل ماقلت..
وشكرا على الطبخة الجديدة^_-

وانشاءالله نشوف المزيد..

اقتباس:

---

يم يم يم... ابو لبن ليش ماصرت في عصابتنا... كان الشومن والمجبوس روبيان والخثاق والدجاج والجريش... مابخلص T_T

---

:cool: :cool:

!!!!


!!!!!!!!

!!!!!!!!!!!

!!!
!!!!!!!

أشم ريحة أكل على بعد أميال ( أنا و صراصيري )

السلام عليكم ^^

ما شالله عليك يا روك .. الحمدالله أنها أعجبت صراصيرك برضوا :أفكر: .. عاد نبيك تتابعنا :)

أهلا بيك يا هداف .. ما شالله عليك .. انت متابع ممتاز :D

اليوم بحط لكم يوم شوربة .. يمكن تكون فيها بعض التعقيد بس بالآخر هي حلوة :cool: .. و هي ..

شوربة الدجاج بالذرة ..

المقادير ..
نص دجاجة
4 ملاعق أكل ذرة
5 ملاعق نشا (جربوا نشا الذرة )
ربع كأس ماي
ملعقة أكل صلصة الصويا
3 بيضات
الجزء الحار من المقادير : نص كأس خل أبيض مع ملعقة شاي فلفل أخضر حار مفروم.
و قريت في كتاب أنك تقدر تضيف ملعقة أجي نوموتو .. بس ما جربتها .. بس للي يبي يقدر يجربها :)

الطريقة ..
ينقع الخل بالفلفل و يترك .. تغمر الدجاجة بالماي << اعجبتني كلمة تغمر :lol: .. و توضع على النار مع اضافة الملح اليها (للي يبي أجي نوموتو يحط نص ملعقة منه) .. وتترك على النار حتى تنضج الدجاجة و ترفع من النار و تقطع الى شعيرات أو قطع صغيرة على حسب الذوق .. يخلط لحم الدجاج مع الذرة و نحط الخلطة في مرقة الدجاج و يوضع على النار .. يذوب النشا في ربع كاس الماي و يضاف الى المرق .. و يضاف بعد كذا صلصة الصويا مع البيض (للي يبي أجي نوموتو يضيف الباقي منه :) ) .. تترك في النار لبعض الوقت و بعدين يرفع و يقدم في زبدية و طبعا لا تنسون الشطة :)