مساعدة يا اخوان بالرجيم ..

السلام عليكم ورحمة الله وبركاته ..

راح اقولكم القصة كاملة علشان تعرفون الوضع شلون معاي ,,

من سنة تقريبا كان وزني حول الـ 130 .. كنت دايما اكل فاست فود وماكنت العب اي رياضة

بعدها حبيت رياضة التنس وبديت امارسها والعبها وايد بس ماكنت اوقف الأكل مثل ماهو لكن الفرق بس اني قمت العب رياضة ..

نزلت تقريبا 4 كيلو .. ومن قبل شهرين بالضبط وزنت وكان وزني 126 كيلو ..

لياقتي صارت احسن واحسن وصرت اروح مشي سريع 3 كيلو واحيانا 6 كيلو ( رياضة بدون تخفيف الأكل )

فجأة شفت نفسي مسوي رجيم وقلت لنفسي دامي قاعد اسوي رياضة ليش ماخفف اكل علشان اضعف اكثر ..

قعدت اكل من مطاعم سبوي السندويتش الطويل براون وكل شي دايت وكل يوم انوع واحياناً اكل مشويات كباب او دجاجة مشوية .. (وجبة وحدة فاليوم لا غير )

وعقب الوجبة مباشرة اشرب لبن اكتيفيا المهضم قليل الدسم .. وبعدها بنص ساعة اشرب شاي خضر لآنه يحرق الأكل ..

قعدت على نفس الحال اسبوعين تقريباً وشفت روحي خفيت ووزني نزل صار 120 (بعد ماكان 126 قبل ما ابتدي بالرجيم)

بعدين حسيت وزني ثابت على 120 او 119 .. قلت خلني اخف بالأكل زيادة وقمت اكل نص سندويتش من سبوي واحط في بس مرتدلا وبابروني لا غير .. وماكل شي غيره باليوم ..

مر اسبوع وشي وشفت الفرق طبعا مع رياضة واشتركت بنادي رياضي وصار وزني 116 (وزني الحالي وانا اكتب الموضوع)

المساعدة الي ابيها اني ادور على منتجات تساعدني في فقدان الوزن .. وابي حلول حق النفسية التعبانة الي صايدتني من الرجيم

احيانا احس اني بخرب الرجيم لكن اروح ارقد نفسي بالغصب .. وما اكل ولا شي غير الوجبة الرئيسية باليوم

لآن انا من النوع الي احس اذا كلت اي شي غير معناتها خربت الرجيم وماعرف اواصل ..

اي مساعدة ياخواني؟

أخوي رجيمك قاسي

والوزن اللي ينزل بالرجيم القاسي يرجع بسرعه

رجيم قاسي بس بطريقة اقدر عليها ..

رغم اني احس اني قاعد اضعف ببطىء ما ادري ليش ..

اي مساعدة ؟؟

لازلت مواصل لكني وقفت الرياضة

اخوي كثر تمارين الكارديو

الي هي المشي والهرولة والركض
ابعد عن الكربوهيدرات والدهون
ويفضل تاكل خبز اسود , ابتعد عن الخبز الابيض


وسجل بالجيم وصير ارفع اوزان متوسطة وخفيفة بتكررات كثيرة لانها رياضة كمال الاجسام بتحرق سعرات حرارية ممتازة وبعدها العب كارديو لمدة 45 دقيقة
وحاول تبعتد عن الكربوهيدرات والدهون بعد التمرين , وتاكل اكل مليء بالبروتين

ماشاء الله نزلت وزن حلو بس عندك خطأ جوهري جدا وهو نظام الوجبة الواحدة فقط
يا اخي خلفي وجباتك 5 باليوم طبعا وجبات صغيرة علشان ترفع معدل الأيض وحرق الدهون وانا اشوف ما تحتاج اي منتجات تخسيس بصراحه

أخوي مشكـلتك مثل ما ذكروا الشباب ، حاول تغير من نظام أكلك، وجبة واحدة باليوم تقـتل عملية الإيض عندك، تجعلها بطيئة جداً جداً و جسمك راح يبدأ يتعود على النظام هذا و مع مرور الوقت يحرق أقل و أقل.

على الأقل 3 وجبات باليوم أو 5 وجبات خفيفة كل ساعتين، مع العلم إنه وجبة الفطور أهــــم وجبة و أكبر وجبة باليوم.

بالإضافة إلى ذلك، حاول في معظم الأوقات أن يكون تمرينك في الصبح، كل ما كان تمرينك أبكر كل ما كان أفضل لإنه يسمح لعملية الإيض انها تكون شغالة لفترة أطول.

و حاول تدخل برنامج حديد و أوزان خفيفة لإن الحديد يسمح لك بحرق سعرات إضافية حتى أثناء النوم.

بالتوفيق. :)

نصيحة أخي الكريم مني لك كمجرب

كان وزني 120 كيلو قبل 5 شهور والان 81 كيلو

مارس رياضة المشي على السير فقط لمدة ساعة يومياً

مع الابتعاد عن ( المقالي و الحلويات و السكر و كل ماهو دسم )

قم بالاكثار من الماء والالياف من فواكة و ورقيات وخضار و أرز بني مسلوق

وقسم وجباتك الى ثلاث وجبات بطريقة صحية لاتأكل حتى التخمة بل حتى يختفي الجوع

واي طلبات انا بالخدمة

جزاكم الله خير يا جماعة وماقصرتوا ..

اخوي سلطان حمد شنو كنت تاكل لمن كنت تسوي رجيم ..

شنو تنصحني حق الريوق ..

اعطر تحية

^^^

هلابك أخوي

بالنسبة للريوق أعمل على المثل الذي يقول ( أفطر فطور ملوك وتغدا غدا أغنياء وتعشى عشاء فقراء )

الريوق بالنسبة لي طوال أشهر الرجيم كان كالاتي

( بيض مسلوق& فول & فاصوليا & عدس ) هذه المأكولات غنية بالبروتين وصحية لاتخاف

( جبنة قريش & لبنة قليلة دسم & مربى منزوع السكر & زيتون & عسل طبيعي )

كوب حليب قليل الدسم مع عسل طبيعي نسبة السكروز منخفضة أو سكر دايت نباتي

3 أكواب شاي أخضر باليوم بعد الوجبات بساعة لكي لايمتص الشاي الاخضر فوائد الطعام بحيث يجعل تركيزه فقط على منع تأكسد الدهون

وركز على وجبة العشاء حاول أن تجعلها خفيفة مثل زبادي قليل الدسم و كوب لبن قليل الدسم و حبة جريب فروت و تفاحة و قطع أناناس و جرجير و خس

وان شاء الله فالك الوزن المثالي يالغالي

اقتباس:

---

المشاركة الأصلية كتبت بواسطة سلطان حمد

^^^

هلابك أخوي

بالنسبة للريوق أعمل على المثل الذي يقول ( أفطر فطور ملوك وتغدا غدا أغنياء وتعشى عشاء فقراء )

الريوق بالنسبة لي طوال أشهر الرجيم كان كالاتي

( بيض مسلوق& فول & فاصوليا & عدس ) هذه المأكولات غنية بالبروتين وصحية لاتخاف

( جبنة قريش & لبنة قليلة دسم & مربى منزوع السكر & زيتون & عسل طبيعي )

كوب حليب قليل الدسم مع عسل طبيعي نسبة السكروز منخفضة أو سكر دايت نباتي

3 أكواب شاي أخضر باليوم بعد الوجبات بساعة لكي لايمتص الشاي الاخضر فوائد الطعام بحيث يجعل تركيزه فقط على منع تأكسد الدهون

وركز على وجبة العشاء حاول أن تجعلها خفيفة مثل زبادي قليل الدسم و كوب لبن قليل الدسم و حبة جريب فروت و تفاحة و قطع أناناس و جرجير و خس

وان شاء الله فالك الوزن المثالي يالغالي

---

ماقصرت يالغالي ..

وابشرك وزنت ووصلت 113.1 ونسبة الدهون عندي قلت وكل هذا وصارلي اسبوع وشي بدون رياضة

طبعا كله من الرجيم القاسي الي امشي عليه .. ويعطيك الف عافية على المعلومات الي ان شاءالله

راح امشي عليها في القريب العاجل .. اعطر تحية

الحمدلله يا جماعة .. للحين صامد على الرجيم

ومن كم يوم وزنت وصار وزني 108.5 ..

اكل صدرين دجاج مشوي على الغدى .. واذا جعت اكل لي نص روتي براون مع مرتدلا وجبن لو فات ..

بدون رياضة << مدلع روحي ..

وان شاءالله لين وصلت 100 راح ابتدي استخدم ليبو 6 x وراح ابتدي رياضة بشكل جدي

لين ما اوصل الهدف الي ابيه ..

ياريت ارائكم ياجماعة بخصوص شنو ابتدي اسوي الحين