والله ودنا بذا القصص رهيبه.............
ويكون احسن لو تكتبها الحين............. والقرار راجع الك( احلى ياجورج قرداحي):).
عرض للطباعة
والله ودنا بذا القصص رهيبه.............
ويكون احسن لو تكتبها الحين............. والقرار راجع الك( احلى ياجورج قرداحي):).
الله يبارك فيك ويسلمك:)
شباب مب انتم تدورون فاس..........
اذن لديكم الخبر ادخلو موضوع هل اشتري لعبة بانجو الجديده على الn64؟( افيدوني الله يرضيكم)
وتشوفون رد فاس ومشاركاته 3336
يارب انه يرجع ولا يطلع................ يارب.
يا اخ wario شوف تاريخ الموضوع بتشوف انه 2000
يعني المكوضوع مطروح قبل سنتين
انا ادري ان الموضوع قديم بس شف مشاركاته اكثر من 3000.............
اذكر انه قبل مايطلع كانت مشاركاته 2000 وشوي..... وشلون خلاها ثلاث آلاف....?:
حلللللللللللللللللللوه سعد
والله مت من الضحك.........
الصراحه عندك روح فكاهيه رهيبه وياريت تكمل القصه بسرعه:)
ماري:
ردت؟ ماري؟
هلا و الله بصديقتنا القديمه ماري:) و الله ايام عنك في المنتدى..و لا تسوين نفسك معجبتك هذي القصه و الا انها زينه.لانه لو فيه الفنتازيا حقتك ما احد رد علي هنا(احتكار ) بس انتي اسمعي
ما نبي رد كل مده و الثانيه تسكتينا ...نبي رجعه كامله(ما ودي اقول رجعه كامله و الا بلا اخاف تحسبني اهاوشها و لا ترد ابد)
لا صحيح و الله
نبتس(اذا قلت نبيتس او تس في اي كلمه فهي صدق طالعه من القلب)
تجين هنا بالمنتدى بشكل دائم.و الله ان المنتدى بوجودتس شيء ثاني و بقصص الفنتازيا بعد(يعني اكذب و اقول بوجود ماري بس؟:)) بيصير حاجه تانيه خالص.
و اسألي واريو هالايام في موضوعه قعدت اسولف بك و عن ايامنا انا و انتي و فاس.
الشباب:الحين الجزء الرابع جاي.و لا تنسون تردون على موضوعي الجديد بعد:)
بسم الله الرحمن الرحيم.
gan-non international presents: (جميع الحقوق محفوظه لسعد)@
اجل وصلنا الحين للجزء الرابع و انتم ما بعد مليتوا:)هذا انجاز صراحه...لا تناظرون مهوب انجاز لي انا.انجاز لكم انتم اللي صابرين كل هالوقت على خرابيطي:)صحيح و الله.و اذا مليتوا بس قولوا لي و انا اوقف.لان القصه لكم عشان كذا الانجاز اللي تو تكلمت عنه انجازكم.و انشاء الله يعجبكم هذا الجزء .خاصة اني استقعدت عليه.لكن مهوب كل شيء يتعب به العبد يحصل النتيجه اللي يبي.الا اذا كان شغله للاخره.و اذا لقيتوا نقطه ما تعجبكم بس قولوا لي.
الجزء الرابع:اعضاء في مهام رسميه:الحياة اجزاء الثواني.
ونمنا امس متأخرين؟لكن و لانها قصه(يعني نصب)قمنا مبكرين من بكرى بدون ما احد يصحينا ...
اول ما قمنا شمينا ريحة طبخ في البيت.طبخ في البيت؟ لكن انا ما رحت اطبخ.و ننتندو هنا(حتى و لو
كان في المطبخ ما فيه امل هذا الزول يسوي شي)و احمد ما يطبخ لو هو في المطبخ كان سوا لنا حمص
ما يحتاج طبخ...غريب.رحت للمطبخ و لقيت بوشي قاعد يقلي بيض و مجهز نواشف.التفت و قال:سويت
لك خبز بجبن .
قلت انا :مشكور.
بوشي:و دهتنه بيديني برضه.
انا:بيدينك و الا الملعقه؟
بوشي:وين الملاعق اصلا؟
انا:وععع خلاص ما ابيه.
بوشي:بكيفك بس ترى يديني تزيده ملوحه و حلا.
رحت الى الشباب و قلت:تصدقون بوشي قاعد يطبخ؟
ننتندو:لكن كيف طلع من الباب؟
احمد:انا شفتو يكسرو للباب.
انا:هاه؟كسر بابي و انت تناظر؟الله ياخذك.
ننتندو:و الله هذا الولد ما فيه جنون.
دخل بوشي و هو شايل الفطور و حطه عندنا و قعدنا نناظر ما اكلنا.
قال بوشي:كولوا؟خير انشاء الله شيعي ببول في اكلكم؟
سمينا و اكلنا.قال ننتندو:بوشي.فين اهلك؟
بوشي:انا...ما لي اهل...
احمد:كيف؟
بوشي:كنت عايش مع ابوي و امي.لكنهم راحوا في حادث سياره.و اخذني عمي.لكن مل في النهايه
و حطني في المصحه و انا ما فيني جنون...
بعد كذا ناظر على فوق و ابتسم.
انا:لكن...انت احيانا تتصرف ...ما ادري.
بوشي:بهبال؟الدكتور شلبي قال اني اذا تعرفت على العالم برى و لقيت احد يعوضني الحنان الناقص
كل شيء بيتحسن...عشان كذا انا احب العنود...عيونها تذكرني بعيون احد اعزه مره.
ننتندو وهو متأثر:يعني يا بوشي عيون العنود ...مثل عيون امك؟
بوشي:لا...مثل عيون شغالة عمي...سمياتي.
انا:هاهههههههههه...
احمد: :)
ننتندو: لحظه فين واريو؟
انا انادي:وااااااريوووو يا دب تعال افطر.
ما احد يرد.احمد:تعال هون يا دب(يحسبها مدحه)
انا :واريو قم قمت عصبك و بسن ياكل ذنبك!(بس=قطو بالقصيمي)
و رحت الى فراشه اتأكد و لقيته حاط محله وساده!قلت بصوت عالي:واريو اختفى!
قمنا على طول نشوف الفلوس و لقينا الشنطه مفتوحه.عدها ننتندو(خبله قصدي خبره) و لقينا 1500 ناقصه(يلعن ام الطموح
الخايس الحين قدامه 20 مليون و ما اخذ الا 1500؟)
-
انا:الحيوان....كيف وثقنا فيه؟ |
|
ننتندو:و الله خليني امسك الورع هدا(بدى يتعلم نجدي)اقسم بالله افصفص عظامه. |
بوشي:حيوان مهوب قد الثقه.الحين لازم نعيد الحسابات عشان نتقاسم.
|
احمد:يضررب الحب شو بيزل.
(شلة قعاطى) _
بعد كذا قلنا اوفر بعد خله يضف وجهه بدل ما يلهف كم مليون معنا.
قعدنا نسولف الى الظهر و بعدين:بوشي:شباب وش رايكم نتغدى برى؟
ننتندو:ايوه صحيح؟
احمد:بدي اذوقكم المنساااااف
انا:لا شباب محد ذاق الاكل القصيمي منكم!
بوشي:شبعنا منه.
انا :هين انت.بس الباقين؟
ننتندو:ايوه انا ما عندي مشكله.
احمد:يعني شو اصيني؟(يقصد وشلون يعني قصيمي؟)
رحنا لمطعم نجدي في حلة العبيد.و هناك اول ما دخلنا لقينا واحد قصمنجي قح قاعد يبيع.
ننتندو:اقول عندكم تبنياكي؟(اكله صينيه يحبها ننتندو و انا بعد.)
البياع:لا عندنا تبن بس... تبي؟
ننتندو:ايوه ماهوب مشكله ادينا واحد يابويا(ما فهم الدلخ و مسوي نجدي بعد ماهوب)
انا للبياع:هاههههههههههههههههه ما عليك منه يابن الحلال سفيه...
البياع:تكفى يالعاقل؟
بوشي:اقول احترم نسفك!
البياع:هي نفسك يا جلمه(سبه قصيميه)بعدين اصبر ما شفتك انا قبل تسذا؟
احمد:يمكن كنت زميلو في المصحا؟
البياع:اقول اتزلب(اقلب)وجهك يا ابو شكيم.ما لك دخل.
انا:اقووووووووووووول؟تراه طالت و شمخت؟
ننتندو:مين اللي طالت و شخت؟
انا:شمخت مهوب شخت يمل اللي.السالفه يا غبي هي اللي طالت و شمخت.
ننتندو للبياع:ايوه انتا يا قوسمانجي تراها طالت مره!
انا:ننتندو خلني انا احكي تكفى و ترى الرجال قصمنجي مهوب قوسمانجي.
احمد:و كمااااان اصيني و عمال تحكي من اليوووووووم؟غوووووور من وشي!
انا:احمد تراها قصيمي و الله مهيب قصيني.و انا تراني قصيمي فانتبه .
و كملت للبياع:اسمع يا حمار.شرف لك انت و مطعمك اللي ما درت عنه البلديه و لا ضفته اننا ناكل هنا.
البياع:اقول اها بس اطلع برى انت و اياو.
انا:سمعت يا بوشي وش يقول؟
البياع:لا و من زين الطبايع بعد اسمه بوشي؟يالله لك الحمد!
بوشي:تبوني اجلده يا شباب؟
البياع:مد يدك يا ثور و انا اكسره و احطه بقفاك.
و بسرعه مسكه احمد مع ياقة ثوبه و قال:غوووووووور من وشي و لااااا.
و طب عليه بوشي و تخوض في بطنه و ننتندو قعد يقبص(يقرص)ظهر البياع.
و انا قعدت اسبر(تم شرحها سابقا) لا يجيب احد الشرطه.احمد:بوشييي؟شو هايدا؟
بوشي:ما ادري بس الوكاد ان ريحته خايسه.
البياع:اويلااااااااااه.
ننتندو:شباب ما منا لعب بالمصران(مصران=امعاء) حقت الرجال!يلله دخلها بوشي محلها.
انا:يلله مشينا شباب.
و رحنا جري و الرجال طاح مغمي عليه.انا:اففففف اففففف ما بغينا نبعد.وش ذا اللي تلعب به يا بوشي؟
بوشي:................
ننتندو:يا وجع!ايش تبغى بالطحال يا مجرم؟
بوشي:و الله شكله حلو.و صوته زي البوري اسمع(طيط)
احمد:و الله؟هات لشوف؟
انا شت(ضربت برجلي) الطحال حق الرجال بعيد من يد بوشي و انا اقشعر و اقول:وووووععععععععععععععععووووه!
اخر شي دقيناها رجليه الى شقتي و يوم وصلنا...
انا:اوه هاهههه الله يلعن سواليفك يا احمد....اجل رحتوا تشوفون النور(الغجر) و بكرى عندكم اختبار؟؟لحظه شوي؟
وين المفاتيح؟
ننتندو:مهي معي!
احمد:و لا انا.
بوشي:دور زين يا رجال.
انا:لحظه كانت مع ننتندو و حنا راجعين؟
ننتندو:ايوه ايوه ضيع المفاتيح و لزقها فيني يا لوح!
انا:لحظه انت و خشتك تراك من اليوم اخذن راحتك في الكلام؟؟؟اقوووول قم طقني احسن؟
احمد:هدوا الوضع شباااااب.
قربت من ننتندو و حنا قدام الباب ابغى انفخ عليه لكن اذني ارتجفت كاني سمعت او حسيت بشيء.
وقفت فجئه و تغيرت تعابير وجهي و صارت حواجبي اطرافها مرتفعه كأني شكيت في شيء.
ننتندو:ايوه صرف سوي نفسك تذكرت حاجه يا خواف.
اشرت على الباب و انا ساكت لكن السبايك ما فهموا شيء.
احمد:شبنا سعد؟اتكلم ولااا!
و جيت افتح اثمي ابي اهمس لكني سمعت صوت عميق و بعيد وقريب بنفس الوقت من اتجاه الباب...طب طب طب.لكنه كان يقرب و يقرب الى ان قلت ابعدوووووووووووووو و جيت بطيح نفسي على الارض لكن قبل لا اطيح و انا مايل في الهواء
مديت يديني الثنتين و دفعت الشباب كلن في اتجاه بعيد عن الباب.و انطلق وابل الرصاص
الغريب الضخم.درررررتحتحتح...تشيو بننق.و الشباب كلهم تبطحو على الارض و كلنا صرنا نتشهد.فجئه وقف
الرصاص و ناظرنا بعض و المشكله اني انا الوحيد اللي كنت اسمع زين او على الاقل عقلي صافي في اللحظه ذيك.
سمعت مره ثانيه:طب طب طب طب...و كان الصوت يقرب و يقوى اكثر و قلت انحاشوووووا.و قمنا كلنا
انا و ننتندو في اتجاه و احمد و بوشي في الثاني نركض بأسرع ما نقوى.و انكسر الباب فجئه.و اكتشفت ان الصوت الغريب
(طب طب)ما كان الا صوت خطوات جنديين بنعالهم الضخمه يتبعون تنظيم ما نعرفه(يعني لا شرطه و لا جيش و لا غيره)
الشاهد اننا عطينا و لا ناظرنا و رى الا لمم و كنا نحاول نركض بدون صوت.و كان الرصاص يمر بجنبنا.و لفينا بعيد و ننتندو يقول:يالطيف استر يالطيف استر بطريقه هستيريه
سمعت الصوت مره ثانيه و من خوفي كان مع كل صوت اسمعه من الخطوات الثقيله ينبض قلبي بشده بنفس الوقت.انحشنا مره ثانيه و حاولنا نضيع الجنديين في اسياب العماره الضخمه لكن المفاجئه اننا لقينا جنديين ثانين في سيب اخر.يعني ما نقدر ابدا نقدر عددهم.لكن المهم اني شفت بوشي من بعيد و اشر لي.و انا باليالله اطل من الخوف.فهمنا انا و ننتندو من اشاراته بأنه متورط و كنا نلاحظ احمد او اطراف ملابسه بين الحين و الاخر.قلت لننتندو بشويش:وش نسوي؟
ننتندو:لازم نوصل من هناك الجنود الثانين و رانا و بيلقونا بعد شوي.
انا:لكن كيف؟راح يذبحونا اللي قدامنا الان
ننتندو :اسمع انت شيل فنيلتك و لوح فيها بالهواء عشان يحسون و يجي واحد و نذبحه.
انا:ما فيه امل يحسون
ننتندو:سويها ما عليك هدولا مدربين.
انا ابعدت بعديد عن ننتندو مترين او 3 و لوحت.
سمعنا الجنود:الجندي الاول:وش ذا الصوت؟
الجندي الثاني:ما هنا صوت بس كمل وش كنت تقول تو؟
الاول:لا يا ابن الحلال تو سمعت صوت.
الثاني:طيب طيب .انا بروح الحمام و مره و حده اشيك على الصوت.
سمعناه يجي و ننتندو نشف زي التمثال. بجنب الزاويه حقت اللفه اللي بيجي معها الجندي من السيب الثاني.انا ابعدت.
اول ما جاء و مر من عند ننتندو وقف فجئه. انا خفت لكنه ما سوا لي شيء! ثانيتين و مال رأسه شوي يسار و انا كنت اناظر عيونه, ناظرت بشكل اعم شوي و بان القطع اللي
على جنب رقبته يمين.اقشعريت من المنظر.و تقدرون شباب تتخيلون انه كل شعره من شعرات جسمي اقشعرت لحظتها.لانه هذا اللي صار فعلا. طاح بدون اي صوت على ركبته و بعدها على وجهه.مسح ننتندو سكينته على ظهر الميت
و ناظرنا مره ثانيه الجندي الثاني .و الظاهر انه سمع صوت من عند بوشي لانه راح و عرفت بان هذي هي فرصتي.لحقنه و انا
امشي منحني و على جنب.خطواتي كل رجل تقريبا قدام الثانيه الا شوي تقريبا مثل السرطان لكن اقل ميلان و اول ما قربت منه و بقي متر قفزت خلفه قفزتين سريعتين جدا
(تك تك هذا كان صوت القفزات)و نشبت السكين في رقبته.و طاح و كان يشهق و يزفر انا خفت مره و ابعدت .جانا بوشي و قال.فيه اربعه خلفنا بس ينتظرون ظهورنا.ننتندو:طيب فيه طريق ثاني؟
احمد فيه لكن ما اتأكدنا من عدم وجود الجنود فيه.
انا:طيب وش تحترون؟يلله نتأكد. رحت و ناظرت شوي شوي.ما شفت احد.برضه احمد راح و قرب اكثر و لا شاف احد.مشينا كلنا بحذر الى
قبل نهاية السيب بشوي.السيب كان في النهاية ينتهي بشكل حرفT ...وقفنا انا و بوشي و احمد في النهايه حقت السيب بالضبط و رجعنا لقينا وجوهنا لننتندو اللي كان يمشي ما وصل.اول ما وصل قال:الحين وين نروح؟
احمد:في مكان انا لاحظتو في نصف العمارا ما اله سقف.احتمال لو ننزل هنيك نروح مع نوافذ الطابق الاول.
بوشي:يقصد المنور(المنور مكان في العماير السكنيه الكبيره و يكون في النصف ما له سقف.و تطل عليه نوافذ الشقق و عادة يكون ضيق) و الا يا سعد؟
انا:الظاهر ...هاه نروح هناك؟
احمد:طبعا.
انا:يلله مشينا... ... ... ... ... ... ... ... ... . . . . . . ننتندو انتبه آآآآآآآآآآآآآه !
في هذي اللحظه انا في الحقيقه ما شفت شيء.لكن لامس عيوني لمعة لخوذات الجنود المستقبليه.
قفزنا كلنا بأستثنا ننتندو اللي بقى محله يلتفت مذعور للجنود اللى خلفه الى السيب الثاني اللي يقاطع سيب الجنود هذا.سمعنا :آه من ننتندو
و ناظرنا بعض انا و احمد.كان لازم نخطط لشيء في هذا الجزء من الثانيه و نتفق عليه بدون و لا كلمه.و بما ان السلاح الغنيمه كان مع
ننتندو كان لازم يكون الوضع شبه مستحيل حله.لكن في الجزء الثاني من الثانيه بدينا الخطه و ننتندو كان طاير في الهواء و سلاحه ساقط امامه
برضه في الهوا ما بعد لامس الارض.جرينا انا و احمد بأسرع ما يمكن في اتجاه بعض انا متقدم شوي للأمام و احمد متأخر للخلف.انا قفزت و مسكت السلاحه و بديت اطلق على الجنود و احمد مسك ننتندو بدون ما يوقف كأنه التقط قماش من الهواء و جرى في عكس اتجاهي طبعا الى محلي سابقا و انا غطيته هو و ننتندو من الجنود.و سقطت عند بوشي اللي سحبني بسرعه بعيد عن الجنود.سوينا كل شيء في اقل من ثانيه.و بما ان ننتندو ما جلس في وضعه اكثر من ثانيه.و لانه جلس اقل بكثير.ما اكنت اصاباته الا شطفات من الرصاص لامسته فقط.اما انا فأخيرا عرفت كيف شكل الرصاص و هو يتحرك بالهواء لاني شفته بأم عيني.
وين بنروح الان؟ وش بنسوي ؟حرام نموت يعد كل هذي البطولات...و ما عاد فيه مجال للخيانه في هذا الوضع...الخيانه نفسها اللي شبعنا منها...
(رجاء شباب بعد هذا الجزء لا تقترحون شيء عشان ما تحرقون اي حدث محتمل,اما الاجزاء اللي بعدين نقبل اقتراحاتكم :))
مادري وش اقول؟
كل جزء افضل من الثاني:) والله قصص ياهي قصص رهيبه:cool:
بس نبي تكمله ودي اشوف وش صار بعد ماخذت الـ1500( والله غبي قدامي20مليون ولاخذت الا 1500) تراني رحمتكم قلت خلني أخلي كم قرش لهم( المليون صار قرش:)) ياكلون كل يوم خبز صامولي وجبن بوك وتشربون بيبسي( عاد ياكثر الغازات بلاوي) وتدبرون نفسكم فيها
بس مايحتاج اقول اقتراحات زياده ودي البي طلبك بس ودنا بالجزء الجديد وشكرا...
مع أجمل تحياتي
":" صديقكمwario2002 ":"
مشكور يا ganon0 على القصص الطويله.
مع تحياتي للجميع:
FIGO
ودي أقول رأيي في القصة لكن أخاف تزعل ...
بصراحة ....
القصة خربت وهذا الجزء مهو في المستوى أبداً ...
هذي الصراحة ...
وشكرا ...
ههههههههههه
عارف بأني رفعت ضغطك وجريتك على وجهك :p
القصة ممتازة ...
بس فيه ملاحظة الأحداث قليلة مرة في هذا الجزء ...
وشكرا
واريو:مشكووووور على الرد حبيبي...و الله يالغازات و الببسي مشكله عند حقين المتوسطه ذولا هاههههههههههههه
لويس:مشكور عزيزي لكن مهو مهم طولها المهم اعجبتك او قريتها على الاقل او لا.
بوشي.:مشكور على الرد و الملاحظات الحلوه يا حلو.و على فكره تراني ما تروعت لاني فتحت على الصفحه 3 على طول:p
ههههههههههههههههههههه
صراحة هذا الجزء خارج عن القصة بشكل كبير وصار كوميدي اكثر بكثييييييييير ننتظر باقي الاجزاء انشاء الله ...
ياخي ودنا بأجزاء جديده جديده جديده:)
وكلها ضحك ووناسه.... كم جزء للقصه؟ لحد الحين اربع الظاهر بتجيب العيد ياجانون( ذا العباره ذكرتني بالمدرسه اليوم قالي استاذ الفقه اقول درجتك قلتله لأ وفي نهاية الحصه قالي جبت العيد يا***** واريو)