ذا جيت اواي .. اسخف اشرطة عام 2002 ..!!
في الحقيقه انصدمت في شريط ذا جيت اواي .. فقبل اشتريه سمعت عنه كلام كثير وانه شريط روعه وراح يغطي على فايس سيتي ودرايفر وغيرها من الاشرطه المعروفه والمرغوبه في مثل هالنوع من الاشرطه ..
ولكن وللاسف بعد مالعبت بالشريط ووصلت حاليا للمرحله 23 يعني ماباقي الا مرحله وحده فقط على نهاية الشريط اقدر اقول عن الشريط انه سخيف واعطي اكثر مما يستحق ومن ابرز عيوبه ..
الشاشه عند اللعب بالسياره مافيها خريطه تبين لك وين تروح واستبدلت باشاره السياره الغير دقيقه والمراحل لها وقت لكن للاسف غير موضح على الشاشه يعني تمشي على عماها الين يقولون لك عدالمرحله الوقت انتهى !! وغير كذا التحكم بالسياره سيء والشوارع ضيقه والحوادث غير دقيقه لانك احيانا تصدم او تحك في السياره اللي قدامك لكنك تعدي وكن شي ماصار والعكس صحيح احيانا تمر جمب سياره بدون ماتصدمها لكن ماتدري الا وسيارتك منعدمه ووجه السياره داخل !!
وبالنسبه للعب بالرجال بدون سياره فعيوبه اكثر .. فالشاشه مابين فيها كم الرصاص اللي معاك ولا قوتك الباقيه لك والتصويب بالبنادق مهوب دقيق يعني على المزاج مرات تصوب على اللي قدامك وما تصيبه واحيانا تصوب على واحد مابين في الصوره وماتدري الا وهو ميت !! وغير كذا التحكم صعب يعني اكثر من مره تلاقي نفسك محجور في ربعه وبطلعة الروح تطلع منها لانه مايوجه وجهه بسهوله .. ومن سخافتهم حاطين مرحله تحتاج دقه وهي مرحلة الليزر والشريط مافيه اي دقه في التحكم يعني الواحد يتشقلب يمين ومايدري الا الاخ متشقلب يسار والغاز مشتغل !!؟
والقصه على سخافتها يضطر الواحد يلعبها مرتين مره بهامند اللي انخطف ولده ومره بكارتر الشرطي يعني كل شخصيه 12 مرحله ..
وقبل هذا وذاك وعلى قولتهم ( زود على هم الليالي زغاغيل :) ) الشريط فيه مشاهد مخله بالادب وكلام سوقي شوارعي بذيء وكل جمله لازم يجي فيها كلمه منحطه ..
لذلك اقول هذا الشريط سخيف وصراحه مدري وشلون صبرت عليه الين وصلت الى المرحله 23 ( يمكن ابغى اشوف وش اخرتها ) .. عموما اللي حبيت اقوله نصيحه للي يبغى يشتريها ( مع اني ما ضنيت بقى احد ماشراها خصوصا بعد الدعايه القويه لها ) خل عنك وجع الراس ودور لك لعبه ثانيه اصرف والا العب ويننج الفن يكون افضل :) .. واحب اقول للي شراها عليه العوض ومنه العوض والله يصبرك على سخافتها ووسع صدرك ولا تضيق خلقك ترى كل الناس مثلك رفعت ضغطهم هاللعبه البايخه .
تحياتي للجميع . ..
