تحليل Analysis

السلااااااام عليكم
احم.. كحح كح... عفوا
هذا اول موضوع لي في منتدى الانيمي.. لي مشاركات ثانيه في قسم الرسم..
من حوالي اسبوع كنت ناوي افتح هالموضوع لكن الحين فضيت عشانه..
ومن الاسم.. هالموضوع عباره عن تحليل... تحليل!!! ل شنو بالضبط؟!

من خلال هالموضوع راح احاول اني احلل بعض قصص مسلسلات او افلام الانيمي التحليل المنطقي والصحيح لها.. واوضح بعض النقاط...

وقبل ما أبدا بغيت اقول ان يمكن ردودي تخرب على بعض الاعضاء اللي ماشافوا المسلسل او الفيلم المعين اللي راح اتكلم عنه...

وانشالله راح ابدأ في ردي القادم.. مع مسلسل.... Neon Genesis Evangelion

باي

مرحبا رانما ^^ long time no see ... انشاء الله مرتاح :)

هههههههههههههه سبقتني :" كنت بسوي نفس هالموضوع بس عاد مو نفسك !!! انت بتحلل تحليل !!! :! لا مالنا نصيب بهالسوالف مو قدها ترى :6
و الله موضوعك شيق اخوي ^^ و حمستنا ... و الاكثر روعه انه ايفانج ليون بيكون اول مسلسل للتحليل ...

شاكرلك مقدما عالموضوع اللي واثق من روعته ^^ و انشاء الله ردي يكون ما سبب اي خلل بالموضوع ...

موفق ;)

اخيرا فتحت الموضوع يا رانما ^^

يللا.. بانتظار التحليل على احر من الجمر

انا انصدمت لما عرفت ان في احد راح يكتب تحليل للانمي
لان هذا شي رائع
و انا كنت انتظر موضوع مثل هذا من زمان
يلا اخوي احنا في انتظار تحليلك

;-) ;-)

امممم....
مع اني ما اعرفك عدل بس شفت لك مشاركة وحدة":" .....



و آنه سمعت عن هذا الانمي بس ما اعرفه...

و ان شاء الله نشوف تحاليلك للانمي;-)

السلاااام عليكم
مشكورين على الردود..
هعهع اورنج رود ايه اخيرا فتحته.. i'll make u and all the drawing montada proud :D

اليوم راح اتكلم عن المسلسل المشهور.. وخل اقول الاسطوري إيفانجليون.. اللي يعتبره الكثير من النقاد والمحللين انه افضل مسلسل انيمي على الاطلاق..
اللي ماشاف المسلسل انصحه انه مايقرا الكلام لأنه راح يخرب عليه.. راح انشالله اشرح بعض النقاط عشان تكون قصة المسلسل اوضح بالنسبه للاشخاص اللي مافهموه....
ملاحظه: كلامي غير منسوخ من اي موقع او مصدر آخر.

نبدأ:

مسلسل إيفانجليون والفيلمين التابعين له مكملين لبعض..
يحكي المسلسل قصة "شنجي" ابن الدكتور "إيكاري" وهو مدير شركة "NERV" المنبثقه من "SEELE"..
the 2nd impact حدث بفعل البشر في الحقيقه.. وحسب ماذكر في المسلسل ان SEELE هم اللي احدثوا الimpact لأنه راح تكون اضراره اقل مقارنة باللي ممكن يكون لو ان الانجيل اللي شافوه في القطب الشمالي تم ايقاضه.. ومهمة NERV ومن فيها انهم يحمون طوكيو 3 ويمنعون حدوث the 3rd impact كما هو مسجل في سجلات SEELE التاريخيه..

انا متأكد ان الكثير مستغرب كيف ان الدكتور ايكاري يعرف كل هالمعلومات عن الانجيلز واللي ممكن يصير في المستقبل.. طبعا لأنه قائد NERV فهو على علم بما تحتويه سجلات SEELE التاريخيه.. ويعرف بالضبط ماذا حدث في ال 2nd impact.. دكتور إيكاري قام بكلللل اللي قام به عشان يكمل الحلم اللي كانت تبي تحققه زوجته الدكتوه إيكاري.. ودكتور ايكاري كان على علم بكللل شي راح يحدث في المستقبل.. حتى لو لاحظتوا ان مساعده في بعض المشاهد يقول له: this is wasn't in out plan.. ان هذا ماكان ضمن مخططاتنا.. ببساطه اشرح وضع الدكتور ايكاري بالحكمه الغربيه اللي تقول: "الظروف لاتصنع الرجال، الرجال هم اللذين يصنعون الظروف".. فالدكتور ايكاري كان مخطط لكل صغيره وكبيره عشان في الاخير يحقق ماكانت تتمناه زوجته الدكتوره ايكاري.. كل تصرفاته توضح هالشي.. وراح اقول لكم شنو حلم دكتورة ايكاري في نقطة قادمه..

شنجي.. هذا الولد.. ابن الدكتور ايكاري الوحيد.. طول المسلسل وهو يعتقد ان الكل يكرهه.. او ان الكل مايهتم فيه.. حتى انه ماكان يعرف ليش يقوم بقايدة الايفا.. لكن في الاخير قال انه يقود الايفا عشان يثبت وجوده في الحياه.. لأنه كان يعتقد ان محد ينتبه له الا لما يقود الايفا.. مافي احد يهتم فيه او يمدحه الا لما يقود الايفا.. كل تصرف يحدث حوله يفسره بطريقته الخاصه الا وهي ان الناس مايهتمون فيه.. وانه مهمل.. حتى لما استدعاه ابوه كان بسبب انه محتاجه.. ولكن...... كل هذا خطأ.. في الحلقتين الاخيرتين من إيفانجليون المسلسل يتم التركيز على شخصية شنجي.. والله عورني راسي وانا اركز على الكلام اللي يقولونه.. شنجي كان يتخيل العالم على الشكل اللي هو يبغيه.. نظرته للحياه كانت غلط×غلط... كان مايهتم لو مات او عاش.. لكن كان ممكن تكون حياته مختلفه تماما.. لو غير طريقة نظرته للحياه.. وهذا ماتم شرحه في الحلقة الاخيره من المسلسل..

البنت راي.. هذي البنت نقدر نقول انها اساس المسلسل.. هذي البنت ليست طبيعيه.. وانما تم تهجينها او ممممم نقدر نقول صناعتها.. ولكنها بشريه.. راي تم داخلها زراعة الdummy system التابع للإيفا.. وذكر في المسلسل ان داخل كل إيفا في مثل راي داخله.. داخل الكور ماله.. حتى لما الدكتورة "رتسوكو" دمرت المكان اللي فيه نسخ راي.. هذا يعني ان NERV ماتقدر تتحكم في الايفا او تحويله الى الdummy system.. عشان جذيه كان راي هي اهم وحده بالنسبه لدكتور إيكاري.. وفي المسلسل كان هناك 3 راي.. كل ما ماتت وحده طلعت وحده ثانيه.. وحده ماتت لما خنقتها ام الدكتورة رتسوكو.. والثانيه ماتت لما فجرت الايفا وهي داخله عشان تدمر الانجيل.. والثالثه طلعت بعد موت الثانيه.. وكل مره تطلع وحده تكون مدركه لما حولها اكثر وتكون قادره على التخلص من تحكم الدكتور ايكاري فيها اكثر.. حتى لما طلب الدكتور ايكاري من راي 3 انها تنفذ اللي يبيه في الحلقه الاخيره في الفيلم end of evangelion رفضت.. وسوت اللي هي تبيه.. اهمية راي تبان في الفيلمين التابعين للمسلسل..

خل نتكلم الحين عن سبب كلللللل هالقصه.. السبب وراء وجود كل هالشخصيات انهم مايبون للجنس البشري انه ينتهي.. شلون؟ لو حدث اتحاد بين Adam وهو الانجيل الاول وبين اي انجيل ثاني.. هالشي راح يؤدي لهلاك البشرية.. عشان جذيه تم احداث the 2nd impact لأنه كان ممكن ان انجيل يتحد مع Adam.. وعلى الاقل الانفجار ما أدى الى هلاك البشريه.. والحين يحاولون ان يمنعون حدوث 3rd impact..
المخلوق اللي كان موجود في شركة NERV اللي مصلوب كانوا يعتقدون انه آدم.. حتى لما تم ارسال الولد الخامس اللي في الحقيقه كان انجيل وتم ارساله من SEELE كانت مهمته انه ياخذ Adam الى SEELE لكنه اكتشف ان هالمخلوق مو Adam.. هو Lilith (والله ايكاري لاعب عليهم) هو مقتبس من آدم.. عشان جذيه طلب الولد الخامس من شنجي انه يذبحه وينهيه.. ليش SEELE طرشت هالانجل.. لأنها ماكانت واثقه من مبتغى الدكتور إيكاري.. كانت تبي تحصل على Adam الانجيل الاول عشان تمنع بنفسها ال3rd impact..
دكتور ايكاري كان واثق كل الثقه هو ومساعده الدكتور Fuyutski ان الامباكت الثالث واقع لا محاله.. تم انتاج الايفا لأنه الوحيد اللي يقدر يتصدى للانجيلز... وسبب ثاني مهم جدا... انه الوحيد اللي يقدر يتحمل ال3rd impact:واو:... عشان جذيه كان هو و الدكتور فويوتسكي طول الوقت هادئين..
لما تم في النهاية.. في فيلم end of evangelion.. القضاء على مؤسسة NERV.. وامساك إيافا 01 ومعاها شنجي.. وظهر Lilith اللي اتحدت معاه راي واتخذ شكلها.. حدث ال3rd impact.. حتى الدكتور ايكاري قال لراي.. "هذا ماكنا ننتظره".. لكن راي راحت عشان تساعد شنجي.. وطبعا في النهايه حدث ال3rd impact وكان ممكن تكون نهاية العالم.. كان القرار في يد شنجي.. لأنه هو اللي اتحد مع Lilith او نقدر نعتبره 1st angel... طبعا حدث ال3rd impact لأن الايفا في الاصل انجيل (كما ذكر وتم شرحه في المسلسل.. ماراح اتطرق له الحين).. وتم اتحاد ايفا01 التابع لشنجي مع ال1st angel اللي اتخذ شكل راي.. الحين القرار كان في يد.. هل ينهي البشرية.. العالم اللي يكرهه.. اللي مايهتم فيه.. مو مهم القرار اللي اتخذه.. المهم الكلام اللي انذكر خلال هذه اللحظات... وهو ماقالته الدكتورة ايكاري..
"انا قمت بصناعة الايفا لكي اثبت وجود البشريه.. لأنه عند حدوث 3rd impact لن يعيش اي بشري على الارض.. إلا الايفا.. لكي اثبت ان البشريه في يوم من الايام كانت موجوده.. وستبقى الى الابد"..
الحين عرفتوا ليش تم صناعة الايفا :)..
شي اخير.. لماذا الانجيلز كانوا ينزلون للأرض ويبون يدمرون البشر؟!!
العلم يتطور بسرعه.. والبشر مهما كان دايما يبون يوصلون لتكنولوجيا وعلم متطور اكثر.. لدرجة ان العلم يتطور لدرجة كبيره ان بعض العلماء المختلين يحاولون يستخدمون قدرة العلم الهااائلة في فعل اشياء لايستطيع حسب اعتقادهم إلى "الإله" انه يفعلها.. والعلماء دايما يحاولون انهم يصنعون اشياء تفوق قدرة "الإله".. او كما يقولون "تتحدى قدرة وارادة الإله".. لذلك ايضا تم صنع الايفا لكي يثبت ان الانسان كان موجود ومهما حصل لن يختفي اثره.. وهذا ماكان يريدة "الإله" ان يمحي وجود البشريه لكي لاتصل لمستوى علمي يفوق التوقعات.. لهالسبب كان يتم الهجوم من قبل الانجيلز.. ليدمروا البشرية.. ويمسحون وجودها.. وعشان جذيه NERV او نقول العبقرية الدكتورة ايكاري قررت انها تصنع الإيفا لكي تتحدى "ارادة اللإله" وتثبت وجود البشريه..


اتمنى اني قدرت اشرح بعض النقاط الغير مفهومه... ادري ان هناك نقاط ثانيه غيرها للحين مو مفهومه.. وانشالله باذن الله في القريب العاجل راح احاول اشرحها واحللها تحليل مثل المكتوب في الاعلى..

اتمنى ان يتم فتح نقاش في النقاط المذكوره عشان نفهم المسلسل اذكر..

واتمنى ان مايدخل عضو ويقول: "انا اكره ايفانجليون" - "هالمسلسل فاشل".. هالنوع من الاعضاء اتمنى انه مايخرب علينا الموضوع..

وارحب بأي تحليل لمسلسل افانجليون هنا.. وانشالله اشوف ردودكم ونتناقش كلنا عن هالمسلسل الاسطوري..

واعذروني عالاطاله..
باي :)

ما كنت عارفة هالاشياء اللي ذكرتها رانما...

هالمسلسل بالذات لازم الواحد يجوفه اكثر من مرة علشان يجمع القصة عدل...
والمشكلة اني ما جفت الأفلام.. علشان جذي النهايات مب عارفتها...

حبيت اضيف شي.. يمكن يكون بسيط وتافه في هالتحليل حق المسلسل..

كانوا دايما يقولون ال second impact واللي وصلهم فيه آدم..
طيب شنو هو ال fisrt impact؟؟ هو اللي قضى على الديناصورات قبل لا البشر يوجدون على الارض
(أدري تفاهة.. بس لأني لما كنت اجوف المسلسل كنت ابي اعرف شنهو الفيرست ايمباكت)

الحين انت تقول ان الحلقة الاخيرة في المسلسل كانت تراوينا ان لو كان شينجي بشخصية مختلفة وطريقة تفكير غير كانت حياته بتتغير...
بس هل هاي هي النهاية خلاص.. والفيلمين كانوا يوضحون نهاية كل واحد منهم؟؟؟
ممكن تتكلم اكثر عن النهاية يا رانما... (مشكلة اذا الواحد ما جاف الفيلمين الباقين)

كمل التحليل... شكلك لميت بجوانب القصة ^^ واذا كانت عندي اسألة ثانية باسأل...

اجابة على كلامج اورنج رود..


اول شي مادري عن الfirst impact.. يمكن له دخل بالديناصورات او شي.. لكن صج ماتذكر ان ذكروا اي شي عن الامباكت الاول..
انشالله انا ناوي اكمل المسلسل مره ثانيه على نهاية الويك اند عشان افهم اكثر بعد..

وعن النهايه:
المسلسل 26 حلقه.. الحلقه الاخيره من المسلسل تذكر عن شنجي.. بالضبط انه في حلم يراويه شلون ممكن تكون حياته.. another possibility of his life مثل ماقالوا.. حتى بعدين لما توقظه Asuka من النوم وانهم يروحون المدرسه.. بعد هذي يظهر احتمال ثاني كان ممكن تكون حياته جذيه..
بعدين تنتهي الحلقه:! انا استغربت.. مايصير.. هذي هي النهايه.. لااااااااع:"

لــــــــــــــــكــــــــــــــن... الفيلم الاول Death and Rebearth وبعد الفيلم الثاني End of Evangelion كل واحد مقسم جزئين..
القسم الاول من الفيلم الاول يحكي مختصر لأحداث المسلسل من الحلقه الاولى لين الحلقات الاخيره (حسب ماتذكر).. والقسم الثاني هو الحلقه 27 ;)اللي بعدين تكمل احداث المسلسل لما SEELE اهجموا على NERV.. مابي اقول لج شنو صار بالضبط.. شوفي الفيلم احسن..
ويمكن اذكر الاحداث لكن في ردود قادمه عشان اوضح بعض النقاط :)

القسم الاول من الفيلم الثاني يحكي بالترتيب اختصار لقصة كل واحد من شخصيات المسلسل.. والقسم الثاني هو الحلقة 28;) وفيها نهاااااية سلسلة إيفانجليون.. وتكمل قصة الهجوم على SEELE وغيره من الاحداث

لازم اللي شاف المسلسل لاااازم يشوف الفيلمين لأن فيهم نهاية القصه..
:)
انشالله في القريب العاجل بحاول اشرح بعض الاشياء الثانيه بعد
بااااي

أهلا أخوي رانما تحليلك وايد ممتاز و معليش دوبي أنتبه للموضوع جدا تحليل روعة... ..^_^

مشكور اخوي... فعلا فيه اشياء اول مره ادري عنها... مثل وجود 3 راي في المسلسل...

شكلي ابشوفه ثانيه و احاول افهم اكثر...



بس عندي سؤال... من قتل كاجي... و ليش؟

مشكور على الموضوع :)

مشكور رانما على التحليل القوي ..

الحين اخذ حبة بندول وحدة مو ثنتين بعد كل حلقة ?: ?: ....

لكن ليش ايكاري ذبح زوجته زي ماأذكر؟؟ (والله قليل خاتمة):غضب:

ومرة ثانية مشكور

مشكووورين اخواني على الردود...

Shin Kyo:
مشكور على الرد شجعتيني ان اكتب اكثر :)

Arsene Lupin:
اللي قتل كاجي هي ميساتو Misato لكن ليش؟ هالشي اللي ابي اعرفه.. انا ماشفت المسلسل الا مره وحده وناوي اشوفه مره ثانيه عشان افهم بعض النقاط اللي مافهمتها.. بس لما ميساتو ذبحت كاجي.. كأن كاجي كان متوقع هالشي.. هالنقطه بالذات عقدتني لأن كاجي وميساتو يحبون بعض.. كاجي كان يعرف معلومات واايد عن NERV وعن SEELE واتذكر على اخر كم حلقه تم فصله من عمله لأن تم اكتشاف انه جاسوس.. ماتذكر شلون السالفه بالضبط الحين.. لكن لازم اتكلم عنها قريبا..
وشخصية ميساتو واايد احبها.. تقريبا الشخصية المفضله عندي.. وانشالله بعد ناوي اكتب عنها بتفصيل :) لأن بعد لها قصه بروحها..

alk:
مشكور :)

Black00Knight:
العفو... انشالله بعدين ماتحتاج حتى تاكل ولا حبة بندول :D
و بخصوص استفسارك..
ايكاري ماذبح زوجته.. زوجته ماتت خلال اول تجربه للإيفا.. حتى فشلت التجربه وماتت.. كان هو حاضر التجربه وحتى شنجي كان حاضر معاهم..
و ايكاري طلع انه يحب زوجته وايد (او عالاقل حسب ماعتقد) بدليل انه سوا كل اللي سواه عشان في النهاية يحقق حلمها ويجتمع معاها..


الحين المشكله فترة امتحانات.. من اول ماخلص امتحانات (بعد بكره).. بتفرغ للموضوع.. الحين راسي مشغوووول ?:

واذا عندكم اي استفسار ثاني عن ايفانجليون انا حاضر :)
باي

كاجي ؟؟؟

هاي من؟ اللي يحب ميساتو؟؟؟

اعتقد انك غلطان رانما.. مب ميساتو اللي قتلته...
حتى اهي ما كانت تحاول انها تتصل فيه وما تلقاه يرد عليها...

على ما اذكر اني بعد ما خلصت المسلسل دخلت مواقع على الانترنت ادور على شرح وتفسير للقصة..
اذكر انهم كانوا ذاكرين من اللي قتل كاجي.. بس ما كانت ميساتو

بعد ميساتو تحبه.. شلون تقتله؟

ممكن تتأكد من هالنقطة رانما

مشكووور على الموضوع
مشالله تحليلك ممتاز جدا

سلاااام

مشكور martial artist على ردك :)

اورنج رود رد على كلامج..
هعهع صح كلامج انا غلطان.. وبقول لج شصار بالضبط الحين..

كاجي يشتغل مع NERV.. وفي نفس الوقت مثل مايقول انه يشتغل لصالح الحكومة اليابانية.. لكن اشك في هالشي هو قال انه يعمل لصالح الحكومه لأن ميساتو صادته وهو يحاول يدخل الغرفة اللي فيها Lilith.. وطبعا محد مسموح يدخل هناك..
لكن كاجي.. في الاصل مايشتغل لحساب احد بالضبط... يمكن بس NERV لكن هدفه الحقيقي انه يعرف الحقيقه.. nothing but thr truth يبي يعرف حقيقة اهداف إيكاري و SEELE و NERV وEVA وكل شي..
و طبعا إيكاري هالانسان الداهيه كان يعرف عن كل حركه يسويها كاجي.. لكن قال مب مشكله.. خلنا نستخدمه ونستفيد منه لبعض الوقت..
وطبعا نعرف ان ميساتو تحب كاجي واللّزي منّه.. لكن المهم ان في الحلقه كأن 23 او 22.. تم توكيل مهمه اخيره لكاجي، وقال حتى في الحلقة this one seems like blood.. المشهد اللي بعده يطلع فيه مخابرات SEELE مع ميساتو ويقولون لها ان صارت مشاكل وايد والظاهر انه سببها كاجي، وبما ان انتي على علاقه معاه فلازم نخليج بعيد عنه.. مادري شنو بالضبط كانت مهمة كاجي.. لكن طلع بعدين داخل على الدكتور فيوتسكي (مساعد ايكاري).. وفكّ القيود عنه.. كان مقيّد لأنه كان تحت التحقيق من قبل SEELE وقال له يلاّ روح.. بعدين طلعوا مخابرات SEELE رجعوا حق ميساتو (لأنهم كانوا عازلينها في غرفه) ورجعوا لها بطاقتها و مسدسها وقالوا:"الحين كل شي اوكي خلاص".. وسألتهم: "وين كاجي؟". قالوا:"احنا مانعرف وين الحين".. بعدين طلع كاجي واقف وكأن في واحد جاه، وقال كاجي: "لقد تأخرت".. وبعدين سمعنا صوت اطلاق نار..
بعدها ميساتو داخله شقتها وهي حزينه وتكتشف ان في رسالة صوتيه على التلفون وكانت الرساله من كاجي ولما سمعتها بكت.
مادري ليش قلت كل هالقصه.. لكن في النهايـــــــــة..
الظاهر ان اللي قتل كاجي هم SEELE.. ومرات أشك انه إيكاري.. لأنه كاجي كان بمثابة مشكلة لإيكاري ولSEELE بعد لأنه كان وايد يبحث ويحقق بحثا عن الحقيقة اللي يبي يعرفها.. لكن اعتقد ان SEELE هم اللي ذبحوه هو الاحتمال الاكبر.

نقطة ثانيه:
هل قتل ايكاري زوجته الدكتورة يووي ايكاري؟
ايكاري من قبل مايتزوج من يووي كان يعمل لمصلحة SEELE.. وكان هو الثاني بعد عبقري.. لكن عبقريته خبيثه، والدكتور فيوتسكي لما تعرف على الدكتور ايكاري كان بعد الدكتور ايكاري في SEELE في هذا الوقت.. وكانت في شائعات وكلام وايد يطلع على هالمنظمه.. الدكتوره إيكاري عبقرية وذكية وايد.. يقولون ان الدكتور إيكاري تزوجها عشان يستغل ذكائها ومشاريعها لمصلحته وفي نفس الوقت مصلحة المنظمة SEELE.. لكن في نفس الوقت انا استغرب انه في كل مخططاته كان يذكر زوجته ويقول اني راح احقق اللي تبينه.. اللي انا وانتي كنا نبيه..
الدكتورة إيكاري ماتت خلال احدى تجارب تشغيل الايفا اللي فشلت نتيجة خطأ في الحسابات.. اعتقد كانت اول تجربه او من اوائل التجارب حيث كانت هالتجارب تفشل.. لكن في الصحف والكلام اللي طلع ان الدكتور إيكاري تسبب في مقتل زوجته.. لكن هل حقا تسبب في موت زوجته؟
هالانسان غريب جدا.. لكن ماعتقد انه راح يتسبب في موت زوجته.

هاي

من النقاط اللي احب اشرحها ويمكن تخفى على البعض:

- في جزء من القصة الخاص بأم آسكا ماقدرت افهمه.. لكن فهمته اخيرا..
أم آسكا كانت تعمل في احد أفرع NERV في ألمانيا اوكي، وكانت من النوع اللي يعمل على طول على طول من غير مايرتاح..
ومن شدة ضغط العمل عليها.. افقدت الاتصال بالواقع.. من شدة الضغط والعمل صارت مريضة عقليا، عشان كذيه نشوفها في المسلسل قاعدة تكلم دمية على انها بنتها آسكا وحاطينها في مصحة خاصه، لين في الاخير انتحرت..
طفولة اسكا كانت قاسية وربتها جدتها وعملتها انها ماتبكي ابدا.. وهذا اللي في الاخير انتج آسكا القاسية العصبية.

- تعرفون شنو هو الAT Field?
من بداية المسلسل والفكرة اللي في بال الواحد ان الAT Field هو الحاجز اللي حول الانجليز و الايفانجليون ويحميه من الهجمات.. لكن في الحلقة ال24 لما يطلع ال5th child اللي في الاصل هو الانجيل الاخير ويتقاتل معاه شنجي.. يكتشف شنجي ان حول كاورو (الطفل الخامس) AT field ويسأله: شلون عندك AT فيلد؟؟ ويجاوب: انتوا يالبشر تسمونه AT فيلد لكن هو شي غير.. هالAT فيلد هو (((الروح))).. كل واحد عنده AT فيلد وقوّة الفيلد تعتمد على قوة روح الواحد..
وتوضيح لهالنقطه.. في فيلم إيفانجليون الاول، آسكا تخرج من قاع البحيرة و روحها القتالية من اعلى مايكون (لأنها حلمت بأمها وسالفة مافي داعي اشرحها) كان الAT فيلد عندها قوي وكانت تقاتل وتهجم بقوة لأنه روحها عالية وبالتالي واثقه ان الفيلد مالها راح يحميها.


انشالله يوم الاربعاء او الخميس انا في بالي رد راح يشرح محور مهم واساسي في القصة انشالله..
وفي نفس الوقت اشرح نهاية القصة المثيرة جدا والغامضة باذن الله..
لأن النقطتين مرتبطين ببعض.. وللأسف ماعندي وقت الحين لأن راح يكون رد طويل شوي..

اشوفكم قريبا :)
بااااااااي

واو:واو: ....
ما شاء الله عليك ;) ;-)
الموضوع رائع جداً:0)
مشكور وايد على هذا الجهد الرائع.....
شكرا مرة ثانية ونتمنى منك اكثر ان شاء الله:p :D ;)

مشكور على التوضيحات:D :D ....

لكن بالنسبة للي ربت أسكا ما أتوقع انها جدتها لأن في حلقة

تتذكر فيها نفسها و هي صغيرة ,و كان في رجال و مره ...

قالت المر ه للرجال : اسكا تقدر تتنازل عني لكن انت لا (شي زي كذا

لأني ما أذكر بالظبط)...

ياليت تصححلي إذا كنت غلطان...

ومشكور:D

صراحه موضوع خطير جدا والتحليل اخطر..اغلب النقاط اللي ذكرتها انا كنت شاكه فيها والان تاكدت وبعضها اعرفها ..من جد مسلسل ايفا رائع جدا ومن افضل المسلسلات التي لن تتكرر ..انا شفته كامل لكن للاسف ماعندي الافلام ابي اشوفها لانهي القصه بالنسبه لي ..هذا غير المانجا ايضا ودني اقتنيها لانه فيها توضيح اكثر..اتمنى لو تعود الايفا من جديد بصدور جزء جديد لها :)
بالنسبه لآسكا لو ماكنت غلطانه هي لما توفت امها قالت لن ابكي..وتربت مع والدها وزوجته الثانيه ..وفي احد الحلقات لو تتذكرون انه زوجة ابوها كلمتها ..وآسكا تخاطبها بالالماني ..وكانت تقول اني بس كذا اكلمها مجامله ...اذا ما كنت ناسيه فهي زوجة ابوها اللي كلمتها ..الواحد ينسى بسرعه :6,من كثر الانيمي وتداخل القصص :)

بس اشكرك اخوي على الموضوع الرائع ويله نبيك تكمل وتحلل اكثر من انيمي :),وابي اقول لك لو كملت راح ننقله للمميزه لانه جدا مفيد وملئ بالمعلومات :)

هااااي
اخباركم..
مشكورين على الردود الجميلة والمشجعه..

بالنسبه للنقاط اللي ذكرتوها..
صحيح انا كنت بذكر قصة آسكا بالتفصيل لكن تراجعت..
وبعد موت امها اول من رباها هي جدتها وهي اللي علمتها انها ماتبكي ابدا..
وبعدين ربتها عائلة.. بس ماعتقد انها زوجة ابوها.. اعتقد هي مجرد عائلة كلفوها ان تربي أسكا.. والسبب اللي يخليني اعتقد انها ليست زوجة ابوها أن لما آسكا راحت تبشّر امها بنتيجة اختبارها (ماتذكر شنو بالضبط) قالت آسكا "i don't need daddy anymore.. i will just tell u mommy" او كلام بمثل هالمعنى.. مادري ايش المعنى بالضبط لكن اعتقد ان أبوها ماكان معاهم او له دخل بهم ابدا..
وبعدين تم توكيل تربيتها لعائلة اعتقد نفسها تعمل في احد اقسام NERV ونظرا لكل الاحداث اللي صارت في آسكا.. عشان جذيه هي تكره امها الثانيه وشخصيتها بالشكل اللي نشوفه في المسلسل..
وبعدين جاتها مكالمه في احد الحلقات من امها اللي مو امها.. ومثل ماذكرت انه مجرد اجراء روتيني انها تتصل كل فترة..


مشكورين مره ثانية جميعا فرحتوني بردودكم..
اليوم اعذروني باخذ اجازة.. بكرة انشالله اتوقع راح يكون اخر يوم اكتب فيه عن إيفانجليون.. الا اذا كان في اسئلة بعد راح اجاوب عليها قبل مابدا في تحليل الانيمي الجاي..

باي :) و have a nice weekend all

ما شاء الله عليك رانما ... ^^

ووفيت و كفيت بالتحليل لهالمسلسل ... انا منصدم من بعض الاعضاء يعتبرون ايفا مسلسل تافه !!! هالشي اكيد لانه ما فهمو القصه او واجهو تعقيد ... بعد تحليلك الي كان ماخذ فكره عن المسلسل اتوقع بتتصلح ^^ وضحت لي افكار كنت بحاجه لتوضيح لها او كنت اجهلها بالمره ^^الشكر كله لك ;)

بانتظار الانيمي الثاني اللي بتحلله :)

مشكور على المجهود:)

Thanks:)

السلاااام عليكم ورحمة الله
اخباركم.. انشالله بخير..

ببدأ على طول من غير مقدمات..

في الحلقة 22 او 23 بدأت SEELE تحقق مع NERV لأنهم بدأو يلاحظون بعض التغييرات في مخططاتهم.. والخساير كثرت..
فـــــ... طلبوا من إيكاري ان يحضر لهم قائد Eva 01 عشان يحققون معاه في اللي صار لما انفجر Eva 01.. لكن إيكاري رفض وخلاهم يسوون تحقيق مع رتسوكو بدل منها.. رتسوكو لما عرفت ان ايكاري اختارها مكان راي عصبت.. وقالت شلون هال(طووط) يحطني بدل من راي.. عقب كل الشسمه اللي بيني وبينه.. فاتصلت على شنجي وقالت له تعال اذا تبي تعرف حقيقة المخفي عنك.. وصادتهم ميساتو وقالت انا لازم اشوف بعد.. المهم اللي صار كالتالي:
دخلوا غرفة في اكثر من إيفا لكن كلهم غير صالحين وهو نفس المكان اللي ماتت في ام شنجي.. بعدين ادخلوا الغرفة اللي فيها أساس الdummy system.. ولما اضغطت على زر الا اشتغلت الانارة وطلع ان الغرفة مليااانة راي أيانامي :! شلوون.. شنو هذا..
قالت رتسوكو: هذيلا هم الcores للدمي سيستم.. هم اللي يخلون الدمي سيستم يشتغل. وكل هالاجسام مالت راي اللي في المكان هي مجرد أوعية.. و اجساد spare ل راي أيانامي.. (ركزوا الحين).. الانسان وجد إلة، والانسان حاول ان يتحكم في الإله ويخليه تحت سيطرته.. لهذا السبب تم معاقبة الانسان وهالشي حدث من 15 سنة (حسب تاريخ المسلسل).. والإله اللي وجده الانسان ضاع اختفى، لكن الانسان استمر في محاولة اعادة إحياء هالإله اللي هو Adam ومنه أراد الانسان ان يصنع انسان مثل الإلة نفسه.. وبالتالي طلعوا الEVAs..
يعني هل الايفا هم بشر؟!!!:واو: أيييوه بشر.. داخل كل واحد من الايفا توجد روح إنسان، يتم وضع داخل الايفا "mindless human souls" وهالروح تولد فقط داخل راي أيانامي هي الوحيدة اللي تقدر تحمل هذه الروح..
بعدين لأن رتسوكو كان معصبة كمّلت: هذي اللي هنيه في الغرفة مجرد اجساد من غير ارواح مايستحقون ان يعيشون.. وضغطت على زر ادى الى تحللهم (كانوا داخل سائل)..

واللي حصل لما فقدوا السيطرة على إيفا 01.. ذكرت رتسوكو انهم بشر.. وبعدين خلال هالحادثة قالت.. الوحش اللي داخل إيفا استيقظ... وان الحديد اللي حولة كان موجود عشان يقدرون NERV أن يتحكمون فيه.. لكن لما الانجيل اللي صارت معاه الحادثة كان بيدمر NERV وبيتخلص من إيفا 01، إيفا 01 استيقظ وتحرر من بعض القيود اللي كان حولة.. وتصرف مثل ماتصرف.. لكن لأنه ماتحرر من كل القيود فاستطاعوا ان يسيطرون عليه مره ثانيه :)
لكن ليش أكل الانجيل؟ بصراحه ماعرف.

يمكن من الشرح اللي ذكرته في هالرد عرفتوا بعض الاشياء عن آدم..
لكن وين راح آدم وشنو صار فيه؟
و شسالفة ليليث؟
شنو صار حق أيانامي؟
ليش الاهتمام الكبير جدا جدا ب إيفا 01؟
كللل هذي الاسئلة يجاوب عليها الفيلمين..
اللي المفروض ان اكتب عنهم اليوم.. لكن صدق: الوقت كالسيف ان لم تقطعه قطعك. و أنا الوقت قطّعني تقطّع..
بكره لااااااااازم :غضب: أنهي القصة لااااازم لأن مصختها بالتأجيل..

تحملوني معليش الوقت كله سابقني :#
الحين لازم اروح انام.. وراي دوام من الصبببح..

بااااي

مشكور رانما:D

أولا قبل ما أبدا آخر شرح لمسلسل إيفانجليون..
لازم اذكر بعض النقاط اللي ذكرها زميل لي وهو العضو Xero:

اقتباس:

---

الرسالة الأصلية كتبت بواسطة xero
اهداف منظمة الـSEELE لم تكن واضحة خلال حلقات المسلسل الا عند الفلمين الاخيرين

وكانت اهدافهم هي تحقيق نبوءة قديمة تحلم بتحرير البشر من مشاكلهم ومصائبهم وتحريرهم من هذه الحياة التعيسة الى حياة ارقى

حياة بلا مشاكل او موت...

كانوا يريدون الخلود...

ولهذا كانوا مصممين على تحقيق هذه النبوءة

والحين على AT-FIELD

وهي اختصار لكلمة ABSOLUTE-TERROR FIELD وهي المجال الذي يحمي الانجيلز من الهجمات والاذى

والبشر بعد عندهم هالمجال ولكنه مستخدم بشكل محدود حيث انه يفصل كل فرد عن الاخر...لو تشوفون الفلم الاخير بتلاقون انه الايفا سيريس استعملوا حقل مضاد للAT فيلد والذي تسبب بفقدان الكائنات شكلها وتوحدها بداخل REI ليصبحوا جسدا واحدا


وبعدين في كل ايفا CORE وكلCORE يحتوي على روح بشرية

مثلا عندك ايفا00 :روح ام المبرمجة
ايفا 01 : روح ام شينيشي
02 :روح ام اسكا

الاينجلز بشكل عام يستعملون تقنية تسمي بالـs^2 وهي ترجع لـsole solenoid اي بالمعنى العام التحرك الذاتي

---

السلااام عليكم..
هذي يمكن تكون آخر مره اكتب عن إيفانجليون..
راح اشرح الفيلمين والنقاط اللي ذكرت فيهم.. وانشالله هالشرح راح يجاوب على أسئلتهم..

نبدأ... (نفس عميق)

SEELE هدفها تحقيق النبوءة.. عشان يتم هالشي لازم يستخدمون Adam و Spear of Longinus اللي كان موجود معلق في ليليث طول الوقت.. لكن المشكلة انه آدم و سبير اوف لونجينس غير موجودين.. فالطريقة الوحيدة هي استخدام EVA 01 ليش؟ لأنه هو اكثر unit مشابه لآدم. (عرفتوا الحين ليش EVA 01 مهم جدا)..
عشان يحصلون SEELE على الايفانجليون لازم ياخذونه من NERV وطبعا إيكاري ماراح يسمح بهالشي.. فحاولوا الهجوم على نظام الكمبيوتر في NERV لكن الدكتورة Ritsuko اوقفتهم، فانتقلوا للخطة الثانية وهي الهجوم بالقوة العسكرية، لكن أيضا تم إيقافهم عن طريق آسكا اللي استيقظت من حالتها بعد ماعرفت أن روح أمها موجودة في EVA 02.. بعدين قرروا أنهم يستخدمون الحل الاخير وهو استخدام سلسلة إيفا للتخلص من هالمشكلة والحصول على الايفا.. ودار القتال بين إيفا 02 و سلسلة الايفا..

في هذي الاثناء كان القتال دائر بين القوات اللي اقتحمت NERV واللي داخل NERV.. وكانت ميساتو تاخذ شنجي للإيفا 01.. وقالت له ايش اللي حصل في الصدمة الثانية. الصدمة الثانية سببها الانسان لأنها كانت الطريقة الوحيدة لتقليل الاضرار اللي ممكن تصير و صغّروا آدم بهالصدمة الثانية إلى مجرد بيضة أو بذرة بحيث ان مايقدر يسوي شي.

نرجع مرة ثانية لآسكا اللي قدرت تتخلص من جميع الايفا خلال الدقايق اللي تبقت لها بعد انقطاع الكيبل عنها. لكن قبل ماتخلص من الايفا الاخير، انطلق نحوها جسم وصدته بالحاجز، ولكن تحول هالشي الى.. Spear of Longinus مع انه اصلا الحين في الفضاء الخارجي لكن بطريقة ما SEELE هالمنظمة الغريبة سووا واحد ثاني.. واخترق حاجز إيفا 02 وامسك بها وتوقف إيفا 02 عن العمل. هنيه ارجعوا سلسلة الايفا للعمل مرة ثانيه بالرغم من ان إيفا 02 تخلص منهم وقاموا ينهشون في إيفا 02 حتى تم القضاء عليه نهائيا، وهنا طلع شنجي مع إيفا 01 ولما طلع، انطلق Spear of Longinus اللي كان موجود في الفضاء الخارجي وتوقف إيفا 01. امسكوا سلسلة الايفا بإيفا 01 لكي يسخدمونه بدل من آدم لتحقيق نبوءة SEELE.. هنا بدأ الThird Impact. تم تكوين علامات تسمى holy signs مثل العلامات اللي تستخدم عادة في السحر، تم وضع مثل هذه العلامات على EVA 01 وقامت سلسلة الايفا بتشغيل الS2 engine.
في هذه الاثناء كان إيكاري يطلب من أيانامي انه تطيع أوامره عشان يقدر يشوف زوجته مرة ثانية، شلون يشوفها؟ بطريقة وحده وهي عن طريق الاتحاد بين Adam و Lilith.. ومثل ماذكر صديقي زيرو ان ايكاري زرع آدم داخل يده..
لكن راي ماسمعت كلامه و دخلت راي أيانامي لوحدها داخل Lilith (اللي يعتبر 1st angel) واتخذ شكل راي ايانامي وبعدين راحت حق شنجي اللي كان مرتفع قريب من نهاية الغلاف الجوي.
وفي نفس الوقت بداية الصدمة الثالثة ظهرت و ظهر مايسمى بالGeofront من داخل الارض وهال"جيو فرونت" هي بيضة ليليث، المكان اللي ظهر منه ليليث و المصدر لجميع الحياة الانسانية، العودة اليها يعني نهاية الحياة لكن قرار العودة اليها او لأ يعود الان لLilith.
شنجي كان يشوف كل هذا مما أدى انه ممم.. نقدر نقول يجن.. وSEELE ذكروا انه من خلال تدمير نفسية قائد إيفا01 سوف تتحقق النبوؤة (اللي ذكرها زيرو).
بدأوا سلسلة الايفا بالالتحام مع راي (ليليث في هذه الحالة).. وأدى هالشي ان نفسية شنجي خلاص راح تدمر.
وبعدها دخل الSpear of Longinus داخل إيفا 01 وتكون مايسمى بـ شجرة الحياة ومعناها (هي الشجرة الموجودة في حديقة في الجنة من يأكل منها يعيش حياة خالدة) وهذا يثبت ماقاله اخوي زيرو عن أهداف SEELE..
المهم.. قال الدكتور فيوتسكي: " الانجيلز يحملون فاكهة الحياة، والبشر يحملون فاكهة الحكمة. الآن إيفا01 يحملهم جميعهم، وبالتالي اصبح كالإله. والان شجرة الحياة و الgeo-front مصدر جميع الحياة تم تكوينهم، هل سيكون هذا حماية للانسان من الصدمة الثالثة أم سيكون نهاية البشرية والعالم؟ الأمر الآن بيد إيفا 01 و شنجي" :واو: شنجي في يده مصير البشرية.

يتبع...... :)

تابع للرد السابق.......

كما ذكرت ان الان المصير كله في يد شنجي.. هذا الولد اللي قصته قصه.. ويعتقد ان الناس يكرهونه وغيره وغيره.. الحين مصير البشرية في يده..
المهم..
الحين، إيفا01 يغطيها شجرة الحياة و أمامه الgeo-front و أيضا ليليث (راي).. يعني كل شي كامل.
تكلمت روح أم شنجي اللي داخل إيفا 01 تقول له أن راي اللي أمامك الحين هي تمثل قلبك، تمثل أحلامك و آمالك.
في هالفترة.. مازالوا يرتفعون في الفضاء لين ظهروا خارج الغلاف الجوي.. و بعدها الAnti AT-Field بدأ بالاتساع بدرجة كبيرة من ليليث لدرجة انه راح يغطي الكرة الارضية وبالتالي سيفقد الاشخاص اشكالهم.
الحيــــن......... البوابة لنهاية وبداية العالم فتحت.
بدأ الاشخاص يفقدون أشكالهم.. وكل شخص يشوف جدامه الشخص اللي يحبه او القريب من قلبه بعدين يفقد شلكه، إيكاري عاد من شاف؟ شاف زوجته، "أخيرا شفتج يا يووي.. أخيرا.. خذيني معاج وخلينا مع بعض للأبد"
و أخيرا ايكاري حقق اللي يبيه وشاف زوجته، وحتى قال الدكتور فيوتسكي: " did u sea Yui at last, Ikari" واختفى هو بعد..
احتفى جميع البشر.. التحم ليليث مع إيفا 01.. والحين المصير بيدك يا شنجي..
بدأ شنجي يتذكر بعض طفولته.. يتخيل بعض الامور.. بعد الاحلام.. الآمال.. يتخيل ويفكر.. البشر يكرهوني.. مافي أحد يحبني او يهتم فيني.. يعني المفروض كلهم يموتون.. ولا حد يعيش.. انا اصلا ليش عايش.....
(و الكثير من هالكلام).. ماراح اذكر كل الكلام اللي فكر فيه لكن كانت هذه من اروع المشاهد في السلسلة.. كلام جميل جدا وحوار شنجي مع نفسه ومع راي كان رووووعه..
ظهر بعدها شنجي و راي أيانامي في العالم الاخر حيث لايوجد AT-Field يفصل الناس عن بعض.. حيث يوجد ناس ولا يوجد ناس.. هذه هي حياة اخرى، لايوجد شي يفصل الناس..
لكن شنجي ماعجبه الوضع.. وقال انه هالشي خطأ.. فيه شي خطأ في الوضع هذا.. و أجابته راي ان تستطيع توقفه وتغيره لو تبي. لكن تبي تعيد ذاك العالم حيث الناس يفصلهم AT-Field والمشاعر ايضا. قال: ماعندي مانع.. وحلوة جملته لما قال : "I want to sea them again" :)
شنجي.. شنجي قرر الحياة للبشر.. قرر أن يعيش البشر مره ثانية ومايتم تدميرهم :" how touching.. احم..
بعدين وضحت راي له (ولنا) التالي:
مايحتويه قلب الشخص هو اللي يشكل جسمه.. القدرة على التخيل هي ان تستطيع تكوين وتحديد مستقبلك.. اذن يمكن للجميع ان يستعيدوا أجسادهم دام لديهم القدرة على تخيل انفسهم في قلبهم.
هنا في هذه اللحظه.......... انتهى الTHIRD IMPACT.. وخرج إيفا 01 من ليليث\راي.. وتحوّلت جميع أجساد الايفا اي صخر.. ولكنها مازات متخذه شكلها الاساسي طبعا.
وخرج شنجي من الايفا01.. انفصل شنجي عن أمه، روح أمه، اللي بقيت مع إيفا 01 سابحة في الفضاء، وعاد شنجي الى الارض.
وهذه بعض الكلمات المهمة ذكرتها أم شنجي:
" البشر لايمكنهم التواجد إلا على وجه الارض، ولكن الإيفانجليون يمكنهم التواجد للأبد، مع أرواح البشر التي بداخلهم (مثل روح أم شنجي في إيفا01). عندنا تختفي الشمس والارض والقمر، ستبقى الإيفا. صحيح انه هذا سيكون وحيدا، ولكن مادام هناك روح واحده لازات تعيش، سوف يكون اثبات أبدي أن الجنس البشري كان ولا زال موجود" :" كلام جمييييل جدا.

وفي نهاية الفيلم ظهر شنجي وبجانبه آسكا.. لكن لماذا هم اول من ظهروا؟؟ شنجي كان داخل إيفا 01 اللي كل هالحادثة صارت له.. لكن آسكا ليش كانت موجوده بعد؟ لأنها أيضا كانت داخل إيفا 02.. ولم تتأثر.

النـــــهــــــايـــــــــة.

اتمنى ان اكون جاوبت على جميع تسائلاتكم من خلال تحليلي لهامسلسل الاسطوري..
لو كان لديكم أي مزيد من الاسئلة تفضلوا و انشالله راح اجاوب عليها :)
و أتمنى من زميلي زيرو أن لو كان في بعض الاخطاء في كلامي او شيء ناقص يصلّح لي أو كان عنده أي اضافات :)

هذي نهاية كلامي عن Neon Genesis Evangelion..
الانيمي القادم اللي راح أتكلم عنه هو ان شاء الله:
Akira
لماذا اخترت أكيرا؟ لأن فيه بعد الكثير من الامور اللي في ناس مافهموها وهذا لاحظته من ردود بعض الاعضاء في منتدى الانيمي وايضا بعض الزملاء على المسنجر...

اتمنى ان ماكون ثقّلت عليكم في تحليلي.. ومشكورين على ردودكم :D
i really had soooooooo much fun writing all this about Evangelion
thank u alot
bye

مشكور على التحليل الرائع وننتظر منك المزيد

بهرني مسلسل إيفانجليون في نهاية التسعينات، و لا تزال عندي بعض الأسئلة حوله:

أنا متأكدة أن ميساتو هي قتلت كاجي لأن لما سألوا المخرج Anno عن هذا المشهد قال أنه كان يريد جعله درامي لأكثر درجة ممكنة و لا يمكت أن يصل إلى تلك الدرجة إلا بقتل كاجي من قبل ميساتو نفسها و للعلم فإن ميساتو لم تكن صاحية تماما (هل يوجد شخص عاقل في هذا الأنيماي؟؟ )

و لكن ما يحيرني هو قتل إيكاري لريتسكو، الكل يعرف أنها كانت تموت في حبه و لكن ما ذا قال لها قبل الضغط على الزناد؟؟ (صار لنا سيشيرو و سوبارو) بعض المتابعين للمسلسل قالوا Watashi ai anata و لكن هذه جملة يابانية ركيكة للغاية ><

سؤالي الثاني أنه ذكر أن Seele كانت تستعين بصحف البحر الميت Dead Sea Scrolls في تنبؤ حركات الأنجيلز، و هذه الصحف عثر عليها في الحقيقة فما علاقتها بالمسلسل؟

و أتمنى أن ما كانت ضايقتك بالأسئلة.