Smile...You Are in Saudi Arabia

صبااااااح ومسااااااااااء وعصر الخير يا جماعة الخير..
والسلام على من اتبع الهدى..
طبعا بما ان الصيفية فيها من الفائدة التي لا توصف.. من نوم ونوم ونوم ونت ونت ونت..
قلت خل نكتب للجماعة وش صار لي من كم يوم..

طالع اخوكم هو وأحمد الساعة تقريبا 6 المغرب بطريق الامير عبدالله ورايحين نشتري ديفيدي رايتر من جرير .. نبي نشوف نوروتو على التلفزيون الكبير:p ..
شريناه وكلش تمام.. ركبنا وجايعين والله.. رحنا قدام شوية الين ما وصلنا داجن.. مقفل صلاة
لقينا الطازج مفتوح الحق على الطازج واخذنا من الدرايف ثرو .. ووقفنا على جنب نبي ناكل..
قاعد ناكل واخر فلتيشن ومبسوطين على الديفيدي رايتر,..
الا ونشوف فجئة كامري وقف من ورانا :afraid: ..
ونزل واحد منه وطق القزاز بكل احترام.. طبعا اشكالهم ما كانت تساعد اننا نتناقش معاهم اصلا..
جينا نبي نرجع ورا ولا الاخ لف من الحارة لفة كاملة وجا ووقف بوجهنا:196: ..
وحاولنا نعط مافي.. هم ثلاثه كانو..
وخويي ما كان قدامه الا انه يرجع ريوس .. مافي غير هالطريقة..(علما اننا كنا بحارة ...!!!)
واحنا وراجعين ريوس والكامري ماشية بجهتنا.. الا BOOM!!! .. قام يصدمنا الاخ:7:
الييييييين ما انحشرنا بجدار ورانا.. واستسلمنا للأمر الواقع .. الا ونشوف اثنين نزلو من السيارة وواحد معاه سكينة :bigeyes: !!
يدق بقوة يبي يفتح الباب والقزاز ما انفتح.. راح مسك حجر وجا من جهتي وانا قاعد جنب السواق.. ويرميه:wow: .. تجرحت يديني ووجهي شوي من القزاز.. غير صكه الحجر الي جت براسي وكتفي..
انا جا ببالي انه سالفه شذوذ جنسي ولا شئ من هالشكالة الي تصير اغلب هالمشاكل بسببها:33: ..
تخيلو ايش طلعو يبغو بعد كل هذا ؟!!!


يبغو جواااااااااااااالااااااااااااااااااااتنا !!!!!!!!
والله شئ مقرف هالبلد.. جوالي كان كيوتيك.. والاخ الثاني اي ميت pda2k شارية قبل الاختبارات بالتمام ب 2700 ريال!!!

سرقة بوضح النهار.. والمشكلة هم كان عندهم عنصر المفاجئة والسكاكين الي معاهم .. ما خلتنا نتحرك ولا حتى ننزل من السيارة... تحجير تام !!
اشك انهم ماخذين دورة..
يالله.. ما اصابك لمن يكن ليخطئك وما اخطئك لمن يكن ليصيبك.. عوضنا عند ربنا:( ..


طولت عليكم بالهرج شوي.. بس وش اسوي والله لسه محرور والسالفة قاهرتني مرة..
طبعا هالكلام صار قبل 4 ايام تقريبا...
وسلملم..

ياللله ! قسم باللله حرة بقلبي لما قريت موضوعك



وش ذا ؟!



عادي عادي عادي .. من أمن العقوبة اساء الأدب ...



مثلهم مثل غيرهم ... يسرقون آلاف وملايين من البيوت والقصور ولا احد عمره مسكهم ؟!



نظام امني تافه ووضيع لابعد حد .. ما عمرهم صادوا حرامي !!



اصبر اصبر ما شفت شي .. بنشوف اشياء اعظم واعظم


والله يعوضك بالي راح منك ...


جزاءهم عند الله ..




طيب ما حفظتوا رقم لوحة الكامري ؟



( سبحان مافي كامري الا ويسوقها طعس :p )

المشكلة يا بدر.. ما امدانا حتى نطالع ببعض انا وخويي..يعني السالفة صارت بثواني بالتمام.. الين ما وعينا على نفسنا اننا انسرقنا وان راسي مدمي والقزاز بكل مكان ..
وصدقني.. السيارة اكيد مسروقة..
وصدقني بعد.. لو جبنا لهم اسم الي سرقونا الثماني.. ما جابوهم ....!!!
فما حتفرق كثير ..

ههههه صح وش راح تفرق


زين ما كلفت على عمرك وحفظت الرقم على الفاضي


وما تشوف ان شالله على الضربه الي جتك



المرة الثانيه الواحد لازم يمشي ومعاه سلاح كلاشنكوف وياله يأمن على نفسه

سرقة ومحترمة بعد :afraid:
يعني ماشي شغل ولا هي هواية :blackeye:
والله شي يقهر الصراحة ..
يعني ينزل ويدق زجاج السيارة بعد ..
ما يخافون ربهم -__-'

معوض إن شاء الله ..
ويزاهم عن ربهم.

شوهت سياحة دولتنا يا عزيزي =_= << اي سياحة وسط كثبان الرمال و الوزغ و الضبان (&)

بصراحة ما عندي خبرة في المناطق الوسطى و ما حواليها :31: .. تعاللي في الحجاز على الاقل .. عندنا في مكة تأكد انك تستأجر حارس قبل ما تسافر سفرية بسيطة .. و إلا راح يتنظف بيتك مجانا .. لا تحاول تسحب قرشين من الة الصرف ( وقت الليل ) اللين تتاكد انه الشارع فاضي و انه ما في احد راح يباغتك :11: ..

اقتباس:

---

نظام امني تافه ووضيع لابعد حد .. ما عمرهم صادوا حرامي !!

---

من جد .. يتبطر علينا وقت التفتيش و وقت مخالفات السرعة (&)

عموما يعطيك الله خيرا من اللي كان معاك ..

سلامات ما تشوف شر زين على سرقة جوال .. الحمدلله انه الجرح خفيف .. بس الصراحة شي غريب أول مرة اسمع بناس زي كذا ! ... لكن ابتسم انت في السعودية !

اقتباس:

---

المشاركة الأصلية كتبت بواسطة ODIN

( سبحان مافي كامري الا ويسوقها طعس :p )

---

لا تغلط -_-

:bigeyes: :bigeyes: :bigeyes:

لا.. و يدق القزاز بعد...

ربي سلمكم يا شيخ
و معوضين في الجوالات ان شاء الله

صدق... نظام امني تافه..
تصدق بالله ان واحد اعرفه كان في جدة يوم من الأيام
و شاف واحد -يحلف لي بالله- قاعد يروج حبوب في مواقف سوق الكورنيش
المهم شاف دورية واقفة في الشارع و راح يبي يبلغ...
اتعرفون مازا قال اخينا الشرطي؟؟

"والله انا مرور بس مالي دعوة... ايش اسوي انا؟"

ايش تسوي؟؟؟!؟؟!! :vereymad:

اقتباس:

---

( سبحان مافي كامري الا ويسوقها طعس )

---

اي والله :33:
و الدداسن الغمارة بعد... :p

لا حول ولا قوة إلا بالله :12: !!

سلامات سلامات !! .. ما تشوف شر ..

ويبي يجي يومهم .. what goes around , comes around


بعد هالكلام الواحد صار يخاف على روحه وأهله .. but now i will go to plan B


المشكله . سيارتي كامري ._. .. الله يستر بس:afraid:


والله قهر ! .. طيب وش أشكالهم .. تقدر توصفهم لنا أو ترسمهم لنا ..

والله يعوضكم خير

-

حطني بغرفه مع هذولا الـ thugs وأنا أوريك فيهم .. sharpen ones teeth

سلامات أخوي وما تشوف شر إن شاء الله
بس صدق والله شوهت السياحة عندكم:196:
سوالف السرقة موجودة في كل بلاد بس شكلها زايدة عندكم حبتين
بس والله تحس بقهر هب طبيعي لما تنسرق
الله يعوضلك ويجازيهم إن شاء الله..
بعدين تعلم من هالمرة ولا توقف بحاراتP:

:wow:ويع

من صجك أنت.....الحمد لله على سلامتك عموماً وما تشوف شر.

:afraid:أنا سمعت أن الأمان عندكم مب لين هناك بس مب لهالدرجة

تدري عاد أنا قاعد أقرا الموضوع وأقول في بالي (الحين بيقول أنه حلم) بس

وهالأغبيا مسويين كل هالدراما بس علشان جوال؟؟؟


عموماً ما تشوف شر مرة ثانيه

زين ما اخذوا الديفيدي رايتر ! http://webpost.net/px/pxl/smilies/horror.gif

-________- ..

انا نفسك .. فكرت اول شي انهم يبون يتحرشون جنسياً .. لوووووول وقلت يمكن انهم مشبهين عليكم بأخوياهم ..

ولله قمطتني .. انا واخوياي دايم نسوي هالحركه .. نطلب درايف ثرو ونوقف بحارة وناكل ..

اقتباس:

---

نبي نشوف نوروتو على التلفزيون الكبير

---

صح علييييييك :biggthump ..

اقتباس:

---

اي ميت pda2k شارية قبل الاختبارات بالتمام ب 2700 ريال!!!

---

يحمد ربه >.> .. انا شاريه اول ما نزل بـ4 -_-" ..

اقتباس:

---

( سبحان مافي كامري الا ويسوقها طعس )

---

لوووووووول الظاهر ان ما عمرك جربت تفحط عليها :D ..

والمطعسه عندكم الكامري شي خيالي .. انا مره كنت طالع معهم .. اذا مرينا ببي ام ولا سياره حلوه وفخمه .. اقوله شف السيارات .. يقول ابك وين الكامري بس -____- " .. وان شاف وحده يخخخق ..

سلامات صلوح -__- .. وخيرها بغيرها ..

بالعكس كان جبت رقم اللوحه ازين .. يعني احتياط .. انا اعرف واحد من اخوياي مره لاحقوه مطعسه .. بس هذي اللمره للتحرش .. دق على اخوياه ولعنوهم .. >>>> هعععع شغل Gangstaz XD ..

lol @ snorlax XD XD

المهم ..

الحمدلله على سلامتكم والله ..
فعلا على هالدراما كلها توقعت انك تقول انها نصبه او حلم ..
بس ان هالشي حقيقي؟
حسبي الله عليهم .. يعني تيرحون اوادم وشوي وبتذبحونهم حسب تسرقون؟
لكن جزاهم عند الله ..
الحمدلله على سلامتكم شباب وما تشوفون شر والله

عاد تصدق اني اعرف واحد كذا -____- ..

حياته كلها سرقات .. بس يسرقون سيارات وتدري شلون ؟ ..

دايم الرجال الكبار اذا نزل محل بقاله او شي ينزل ويخلي السياره مفتوحه .. يجونك هذول وياخذونها بذا الوقت -_- .. يفحطون فيها يوم يومين ويرجعونها ..

بس بيني وبينك ياهو يعرف يفحط ذا الولد .. اذا شافوا بنت على نفس الشارع .. يسحب جلنط ويخلي وجهية السياره مواجه لباب البنت ويقعد يكبس .. لوووووووووووول xD ..

وياما لاحقتهم دوريات .. وكالعاده عندهم قاعده " دوريه = حاره " .. ومثل ما قلت ماشاءلله .. الي يسوق طااااااره -_- .. كم مره راح القسم :D ..


عالعموم سلامات مره ثانيه -_- ..

بالمناسبه .. أمس فيه هلكبتر حربيه تدور بحارتنا .. يمكن ؟


حنا عطله .. والفراغ والتسكع والصياعه ( في الغالب ) تبي تزيد .. والمشاكل تبي تزيد

لذا أقترح إستدحاث مهنه جديده .. ألا وهي الـ Bounty Hunters .. والمكافئه "وظيفه سنعه"

ايه صحيح..الامن مفلت عندنا المفروض كل واحد ما يمشي الا ومعاه 3 من افراد الشرطة:tongue2:

الحمدلله على السلامة... لكن انت وش يخليك تتعشى وقت الصلاة و في الشارع بعد :06: يا اخي اذا ما جوك ذولي بتجيك الهيئة :31: .. الصراحة و انا اقرا الموضوع توقعت انهم من الهيئة و انهم صاروا يستخدمون كوامري للتمويه :p

سلامات صلوح -_- ان شا الله ما انفقشت ولا شي؟
وأنا أقول وينك عن المسنجر

وبعدين السعودية كل شي متوقع ×_× للأسف

وعلى فكرة أحمد مين؟T.A?بس عشان أسلم عليه

الله يخلي جوالي اللي محد يفكر يسرقه ^_^

هالشي منتشر كثيــر ومن فترة طويلـة تقريبا من سنة وشوي "اقصد الجوالات" ..

وتعوضهـا ان شاء الله ..

المهم الحمدلله على سلامتك
والله لايوفق الي سرقوك

والله اخوي شي من جد يقهر .. لا وجوالك توه جديد ..

غريبة عاد طريق الامير عبد الله دايما زحمة ودوريات ..

بس الحمد الله على سلامتك :) ..

Rory..
اي ابد بكل ثقة ينزل ويدق يبي يقول هاتو الجوالات :blackeye:
يالله على قولك.. عوضنا عند ربنا ان شاء الله.. وشكرا على مرورك:)

جسطن..
امحق سياحة...
بس اول مرة اسمع انه عندكم بعد الحالة اصعب من هنا:196: .. والله حالة من جد هالبلد ابو سياحة:p .
وثانقس على المرور

سنورلاكس..
اي منجد.. زين ما راحت عين ولا شئ بسكينة ولا شئ.. يالله مشي حالك..
وشكرا على المرور..

musou
يدق من سطاحة الوجة والله..
والنظام.. شوية كلمة تافه عليه الله يرحم اهلك قل كلمة على الاقل تعطيهم شوي من حقهم..
بس ما استبعد عن سالفة الترويج الي عيني عينك ذي.. وحق المرور..ابتسم بس..
وثانكس على المرور.

ارنوب..
الله يسلمك يارب..ومنجد ربك ينتقم منهم بس.. جاييهم يومهم على قولك..
بس انت خلك ببلان بي لاني حولت لبلان زد:blackeye: ..
وبالنسبة للأشكال.. اتذكرهم واحد واحد بكل تفاصيلهم
الوجة حق الواحد منهم صاير شبك من كثر ما اتشطب يا شيخ..
خلاص اوووووول ما اشوفهم بحجر لهم واناديك ونشتغل فرم انا وياك:D ..
ومشقور ارنوب

عصفور..
سلمك ربي..بس ارجع وأقول..
امحق سياحة:09: .. انا اول مرة يصير لي كذا.. بس عندنا سطاحة الوجة الي منتشره :196: ..
ومن ناحية الحارات.. ياشيخ صرت اذا جيت اوقف اوقف بنص الشارع العام:D ..
وعوضنا عند ربنا ان شاء الله ..شكرا على ردك..

سميجل..
والله للأسف من صدقي..:(
الله يسلمك يارب..والي قاهرني انه لو كانو بيكسرون القزاز وكل ذا الزحمة.. كان عطيتهم اياه وخلصونا بدون التكسير والحالة..
والشر ما يجيك يارب.. شكرا على مرورك

سنورلاكس مرة ثانية :09: ..
ذول لو شافو الديفيدي رايتر بيحسبونه جنط للكامري:196: ..

طرابد..
والله من اووووول ما شفت الاشكال الطعوسية حقتهم وانا قايل بسسسسسسسسسسسس رحت فيها يبو..
ومنجد انتبه من وقفة الحارات الي ما تعرفها مسبقا..بس نوروتو بالشاشة الكبيرة .. عندنا 54 بوصة.. تفجييييييييييييييييييييير:biggthump ..
واكتشفت ان خويي طلع شارية ب 2990 بعد:196: ..
وبيني وبينك.. اكسنت وتخب علي..وتفحيط هين توني .. i'm a skater man...:D
والله يسلمك يارب.. وسالفة اللوحة.. والله يا محمد مع اللخبطة والربشة ما تشوف دربك..ربك ستر بس
شايفك طايح بالبرتقالي ذا اليومين:D ..طالع ستايل يا واد
بس قوية حقت الي كبس .. اتخيلت شكلها.. بططططططططل:biggthump
وثانقس على المرور..

Nazimod
وش تسوي.. تلقينهم حقون حشيش ولا شئ.. ويبون فلوس..
والله يسلمك يارب
وثانكس انجلو على ردك..

القعقاع..
شوية مفلوت يا رجل..الله يسلمك يارب
وبعدين عزيزي اقلك كان فاتح المطعم..المطاعم تسكر الصلاه بوقت علشان تطلع الناس الي فيها.. والدرايف ثرو يكون فاتح.. اخذنا اكلنا ولسه ما أذن اصلا..

مستا..
الله يسلمك يارب.. والله بس شوية رض براسي ويروح ان شاء الله .. كتفي انجرح..
احمد T.A :biggthump
وثانكس على المرور

ماتشو مان..
ايوة سرقة الجوالات مررررررة منتشرة..
ومشكور على المرور..

sfs...
الله يسلمك يارب..والشر ما يجيك

اكس او:D ...
والله هذا الي قاهرني..
والي قاهرني اكثر انه بطريق الامير عبدالله:12:
والله يسلمك يارب..
مشكور على مرورك

الحمدلله على سلامتك و سلامة أحمد
ياخي صارت كثيرة هالأيّام هالأخبار حقّت السرقات و غيرها هذا و حنّا المفروض في دولة الأمن و الأمان -__-
الحمدلله إنّها اقتصرت على جوّالات و إنّ الأمور ما تعدّت ذا الحد
و اللّه يرد لكم حقّكم إن شاء الله من اللي ظلمكم و سرقكم

><"
اشوا انها جت على كذا

اقتباس:

---

فكرت اول شي انهم يبون يتحرشون جنسياً

---

نفس الشي ><"


الله يخلي لي جوالي ^^
هم لا شافوا شكله
عطوني جوال XD
ماخذوا جوالي


سلام:ds010:

وضرب الله مثلا قرية كانت آمنة مطمئنة يأتيها رزقها رغدا من كل مكان فكفرت بأنعم الله فأذاقها الله لباس الجوع والخوف بما كانوا يصنعون

أعوذ بالله... ايه والله يمكن يكون انعدام الأمن عذاب من الله... صياعه ماليه البلد... الله يرحمنا

الحمدلله على السلامه... كلم الشرطة... ان جابوهم حلو... ولا احتسبها عند الله

لا لا المفروض معاك كلاشنكوف احتياط :biggthump

عالعموم الحمدلله على السلامـه والجوالات الله يعوضكم بغيرها .... :)

... و الله الدنيا وصخ
أخوي نحن لمن تستوي صرقات مثل هذي نودي اسيريل نمبر مال التلفون للأتصالات و هم يخبرونا مع منو التلفون عن طريق البطاقه ألي راكبة عليه و من صاحبها
...
و أنا مجرب ..تلفون صديقي أنصرق وحصلوة

اكييييد

محششييييييييييييييييييييييييييييييييييييييين:afraid:

والا انك حاولت تغش في الامتحان وهذي جزاك:05:

الله يجيبهم "بشر القاتل بالقتل ولو بعد حين"

اما الكامري بسراحة من يوم ما طلع ما اشوف اللي يركبونه الا داااااااجين

اعوذ بالله؟!!!!


يالله مب السعوديه شيكاغو على غفله؟


اخوي يمشي بامان الله بالطريق بالليل


يجيون شلة شباب يفحطون جنبه..يوقفون..واحد يزنطه ويكتفه ...والثاني يفتش جيوبه ويسرق جواله؟؟


وش قصتهم مع الجولاات؟


وبعدين الحمدلله ماذبحو اخوي؟! وجع


واخوي الكبير سرقو كاميرته ام 2500 والهارد درايف ابو 1000 من سيارته حسبي الله عليهم لا تنسون المحتويات الي كان الاثنين يحتوونها


والله قهر خربت الدنيا صارت دماااااااار


حمدلله على سلامتك


والله زين ماذبحوك والله طز بالفلوس :(

أول قاعده من قواعد الهجولة الخمس :o <<<<<:p

انك تعزز البيبان

ثاني شي خذها نصيحه مني بالرياض لاتمشي بسيارتك الا وتحت مرتبة السواق عفريته والا عصاة

طبعا السلاح والسكاكين مشاكل فابعد عنها :196:

ثالث شي اعرف ان ذا الي هاجمك مب صاحي

اما شربان واما محشش

وحده من الثنتين

رابع شي في مثل هالمواقف لاتفكر في موترك حتى لو اظطريت انك تصدم موتره اصدمه ولاتشوف الدرب قلعة الموتر اهم الشي السلامه :ciao:

والحمد لله على السلامة...:D

سلامات وما تشوف شر اخوي Da S.O.S

قول الحمدالله على انها جات على كذا

عمي السنة الماضية انسرقت عليه بضاعة جولات بقيمة 170000 ريال

بس مو هو الي كان في السيارة كا واحد مصري يشتغل عنده

حظرته ترك البظاعة في السيارة ودخل بيتهم ونام شوي

وطلع الا يشوف السيارة مكسورة الدريشة حقتها و البضاعة انباقت

يالله الله يعوضنا جمعيا

و زين انها ما كانت شذوذ جنسي

ولا كانت السالفة اللعن

:ciao:

:D



شصار على الدي في دي رايتر ..؟


وبعدين وش هالحرامي والله قويه عينه يكسر قزازه ويصدم سياره علشان الجوال .. :06:


يعوضك ربك خير .. :D

سلامات ماتشوف شر و الجوال ربك يعوضه المهم انت ما صار فيك شي
وفعلا في البداية حسبت تحرش جنسي احنا عندنا تحرش بس مو جنسي وطقاق في الشوارع لما يشوفونك هادي يتحرشون فيك المهم
انا واحد اعرفه كان واقف في مواقف سوق ماشاف الا تكروني جاي طاير واخذ جوال الولد وضربه ضربه طاح في الارض وراح الجوال

عاااااادي عاااااااادي ماهي اول مرره

موظفين بالشرطه بزاارين وماهم دارين عن شي

مره واحد خبرني بقصه ان واحد من جيرانهم صارت عليه سرقه واتصلوا بأبطال الشرطه الله يخليهم لنا :p

المهم جاء الشرطي والرجال علمه بكل شي وهو واقف برا البيت الشرطي قال وبكل بروده طيب انا وش اسوي الحين

انت شرطي وتمثل الامن وتقول هالكلام :bigeyes:

الحمدلله على سلامتك اخوي والفلوس تروح وتجي

ونعم Smile you are in Saudi Arabia :09: