كيف تعرفت على كمال الاجسام ؟؟!

السلام عليكم

طبعا اليوم عيد يعني كل عام وانتم بخير وعظم الله اجر خرفانكم ومن منطلق ان اليوم عيد خلنا ننبسط شوي ونسولف طبعا الي ابغاة منكم يا جماعة الخير انكم تقولون كيف تعرفت على كمال الاجسام او بالاحرى كيف خشيت في اللعبة وليش ؟ يعني دوافعك يا لبى قلبك ووش الي حببك فيها ؟


طبعا حيث انا الي كتبت الموضوع

اببدا اول

بدايتاً انا احب الرياضة بشكل عام وابغى القوة حيث كنت في التيكوندو وكنت مبسوط فيها لكن لعبة تجيب الهم كلها اصابات ووجع يعني اذا ما جاك اصابة وقت التمرين بتجيك وقت الفايت مع الخصم يعني جايتك جايتك انا وجهي راح فيها من التيكوندو واخرتها تمزق وطلعت وقلت لا تيكوندو ولا ابوها من رياضة ثم جلست في البيت فترة طويلة وكنت مرة امشي بطريق وشفت نادي كمال اجسام دخلت وشفت الاشتركات وسجلت ومن يومها وانا مبسوط صح داخل النادي ما ابغى احد يكلمني قافلة معي لكن اذا طلعت اشتاق للنادي


الي بعدوة

وانت بخير وصحة و سلامة يالغآالي ..
والله من يوم كنت صغير وانا العب بالدامبلز بو 4 كيلو و سبحان الله مع الأيام اصبحت رياضة كمال الاجسام هواية لا استغني عنها .. و ان شاء الله راح احاول اطور من نفسي اكثر في هالرياضة خصوصاً بعد انتشار البطولات في النوادي ..

تقبل مروري ... :)

حيا الله عبد الرحمن

اثرك لاعب كمال اجسام بالفطرة مشاء الله عليك وحش من يومك

تسلم على الموضوع.

أنا شفت اخوي داش كمال اجسام تقريبا من سنة وتغير جسمة بشكل كبير وصار كلة عضل ففكرت اني ادش لاني نحيف وجربت كل السبل بس مافي حل لجسمي بس الحمد لله انا الحين راضي عن جسمي لاني كسبت وزن في فترة وجيزة..

وانت بخير وصحه

انا جديد فيها لكني كنت ناوي ادخلها من فتره (( بالتحديد بثاني شهر لي بالدايت)) والي حببني فيها اكثر موقع بودي بيلدنج + بستفيد منها بالملاكمه والجيوجتسو ولاني صرت مهتم بشكل كبير بالصحه وبالرياضه بعد ماعنيت من السمنه

والسموحه عالاطاله

وإنت بخير يا غالي . .
بالنسبة إلي أنا لما كنت بالبكلوريا سمنت كتير وجسمي صار بشع وبعد ماخلصت من البكلوريا إجت الجامعة
ومن وقتها قررت غير شكل جسمي
فدخلت بالنادي لتخفيف وزني وبعدها بشي 3 شهور بلشت بالـGYM
والحمدلله صار جسمي مزبوط . .
تقبل تحياتي

مشاء الله عليكم نورتو الموضوع يا وحوش والله يديم عليكم الصحة والعضل :)

فكره حلوه عزيزي الرسمي

على الاقل نطلع شوي من الروتين المعهود :)

انا انسان محب للرياضه بشكل شبه عام ومريت على رياضات عديده واولها مثل ما الكل متعود الكوره ومن ثم قطعت واتجهت لمجال الخيل وبعدين اتجهت لمجال السيارات الرياضيه ووقفت فترة وفي هالفتره وبالفترات السابقه كنت افتقر للجسم المثالي وكانت فكرة بناء الجسم تراودني لكن بدون دافع الا ان التقيت بأصدقاء قدماء لي ولهم باع طويل وكل مره يقولولي يالا ويلا وانا اقول بعدين مو فاضي ( طبعا انا فاضي بس متردد :) ) وبعد فترة سجلت وكان واحد منهم المدرب الخاص فيني وكملت معاه سنه وبعدين كملت المشوار لوحدي مده زمنيه وفي كل فترة اقطع وارجع اعيد من جديد وكانت هذي غلطه ماتعلم منها الا بعد عناء شديد

بالنسبة للدوافع

اولا الصحه والنفسيه ومن ثم بناء العضلات بالشكل المطلوب

دمت بود عزيزي

والله نوت الموضوع يا بعدي من جهة الكورة كلن مرينا فية بس قطعتها لان مدرب التيكوندو منعني عنها اما ركوب الخيل مشاء الله عليك حلوة هي لكن ما تمشي معي كان عندي اخويا قديما كانو محبين للركوب الخيل وكنت معهم ويقلون لي يا رجال اركب الخيل اقولهم لا والله معليش ما اظمنة هههههه

بالنسبة عني .... وانا صغير كنت اسوي دامبلز من الاسمنت يعني عشقت هالرياضة ما ادري ليه بعدسن تركته مدة ورجعت الحمد لله الان مشكلتي اني اتركها فترة وفترة بس ان شاء الله هالفترة ناوي استمر

بنور الجميع عزيزي :)

ماتضمنه ولا ماتضمن نفسك هههه

بالبداية انا عشق رياضة كمال الاجسام والقوى وبدا عشقي للعبة الحديد لما كنت طقل صغير وكنت من عشاق

المصارعه الحره القديمة WWE وكنت متابع للاسطورة ارنولد شوارزنجر واشوي اشوي تعمقت اكثر باللعبه

حتى كنت العب بدانبلز وانا بالبيييت على خفيف وماكنت فاهم اللعبه عدل والحمدالله ....

باختصار شديد احب لعبة كمال الاجسام (ادق حديد)

وبالتوفيق للكل وموضع حلوووو وفكرة جديده

والله من جهة الخيل هو الي ما اظمنة ولا انا ماعندي مشاكل يجيك يناقز ولا يهج فيني انا ماشي على نظام الوقاية هي الغاية

ونورتو موضوعي يا بشوات واغلب الشباب الي هنا عشقهم من يوم ما كانو صغار

واللهي ما عرف ههههههههه
كدا فجأة من غير نية
والسبب التاني اني جسمي كان نحييف وضعيف ^^

نورتو الموضوع يا احمداني وحسمو ومبروك على النتائج الجديدة وما راح يندم شخص دخل للحديد الا للي راح لطريق المنشطات والخربطة يعطيكم العافية يا ابطال

اقتباس:

---

المشاركة الأصلية كتبت بواسطة ahmadani

بالبداية انا عشق رياضة كمال الاجسام والقوى وبدا عشقي للعبة الحديد لما كنت طقل صغير وكنت من عشاق

المصارعه الحره القديمة WWE وكنت متابع للاسطورة ارنولد شوارزنجر واشوي اشوي تعمقت اكثر باللعبه

حتى كنت العب بدانبلز وانا بالبيييت على خفيف وماكنت فاهم اللعبه عدل والحمدالله ....

باختصار شديد احب لعبة كمال الاجسام (ادق حديد)

وبالتوفيق للكل وموضع حلوووو وفكرة جديده

---

الظاهر يا بعد قلبي الشعور واحد :)

مثل ما قال اخوي احمداني بالتفصيل الممل انا كنت مثله وازيد عليه كنت من محبي افلام الحركية الي تتميز بالممثلين ذو العضلات الضخمه مثل ارنولد وسلفستر وفان دام

واللي شاف فلم Bigger.Stronger.Faster.2008. راح يعرف اني كنت ماخذ نفس تفكير الشخص اللي بالفلم

وبدايتي كانت بعد ما سمنت شوي وصارت عندي كرش اللمبي وكان احد اصدقائي ياخذ داينبول وشفت تغيرات بجسمه اعجبتني وما كنت اعرف انه مضر فاستعملته من غير بروتين ولا شي فقط اكل كاني دب من دببه القطب الشمالي :) والعب حديد بشكل خاطئ العلوي واهمال السفلي بالاضافه الى تمارين خطأ في كثير من الاحيان واللعب على المشتهى :)

وبالفعل حبيت الرياضه ( ملاحظة :- يسمون رياضه كمال الاجسام في امريكا برياضه الكسولين :) ) لانها كانت رياضه سلسله كلها ساعتين باليوم وتطلع لك عضلات طبعا الداينبول صدمني بعد ماتوقفت عنه اني لقيت نفسي افش كاني بالون ( اقصد العضل وليس الوزن ) وصدمه عمري وعرفت ان الشي اللي يعطيك بسرعه يزول بسرعه فقررت ادخل بنظام عدل ولعبت 3 اشهر من غير بروتين طبعا كان في عضلات لكن ليس بالصورة المطلوبة و..... كاني بدأت احكي قصه حياتي :)

وهذه كل السالفه

اقلقت راحتكم ادري

سلام

صحيح ( يثبت الموضوع لمدة 5 ايام لنرى المشاركات :) )

بسم الله الرحمن الرحيم

اشكرك يالرسمي على الموضوع الرائع جدا


بالنسبه لحبي الرياضه كنت احب المصارعه وكنت اشوف اجسام المصارعيين كيف ضخميين خاصتا جون سينا وباتيستا وكين خخخخ

كنت اتمنى اعضل

ثاني شىء كانت بنيتي ضعيفه جدا

وغررت ادخل كمال اجسام وبديت وأستمريت والحمد لله لاحظت نتائج قويه زياده الوزن


وشكرا

ايييييييييه يابوراشد رجعتنا للماضي <- ايـّـام الغوص ( معليش خارج النص ) :D

في البدايه احب اهنيك بالعيد وكل عام وانت بخير

واشكرك على موضوعك المميز وفكره طيـّـبه منك :biggthump ( عفارم عليك )

ندش بالموضوع على طول ..

الحقيقه انا كنت شخص رياضي من صغري ومن اهم الرياضات اللي مارستها وابدعت فيها هي كرة القدم والسباحه

وكنت جيـّـد جداً في رياضة السباحه وحصلت على المركز الثالث على منطقتنا ( للصغار ) <- يعني في مرحلة المتوسطه .. وايضاً حصلت على ميداليه

واستمريت فيها فتره بعدين قطعتها .. وكرّشنا واخترب الجسم هههه

ولي اخ , وولد عم , وولد عمـّـه ( هم كانو من عشـّـاق رياضة كمال الاجسام ولهم فتره طويله يمارسونها ) وخصوصاً ولد عمتي ماشاء الله عليه له 13 سنه من ممارسته لهذي الرياضه يعني بصراحه ماشاء الله عليه وحش

ولعل من ابرز الاسباب اللي خلتني التحق بهذي الرياضه هي تأثير اخوي واقاربي لي بحيث انهم دايم يلحـّـون علي بالإلتحاق بهذي الرياضه

وبعد ما اكتملت سنّ 18 سنه التحقت بهذي الرياضه بشكل حماسي خصوصا ان عندي اخوي وابن عمي وعمتي معاي ويعلموني بخبرتهم وكانو معاي ويعلموني كل شي خطوه بخطوه

واصبحت من عشـّـاق هذي الرياضه الآن ولله الحمد والآن كمــّـلت خمس سنوات في هذي الرياضه ولكن للأسف فقط السنه الأولى اللي كان فيها اخوي واقاربي معي وبعدين كلهم سبحان الله كل واحد جاه نصيبه من تعيين او نقل او توظيف وكل واحد صار بديره وبقيت لوحدي

والحمد لله بالحماس والصبر صار جسمي افضل من اخوي وولد عمـّـي الآن :biggthump

ولكن ولد عمـّـتي والله لو ابطي ما اوصل مواصيله ماشاء الله عليه وحش ولكن الصبر مفتاح الفرج .. ويا أنا يا الحديد :silly:

يعطيك العافيه ع الموضوع واعذروني ع الإطاله

mashkaljey

حيا الله ابو ابراهيم وش جاكم انتم وذا المصارعة شكلك يا مشكلجي شفت هوق هوقن وهو يقطع ملابسة زي كل مرة وتحمست معة اهم شي يا ابو ابراهيم الحمد على سلامتك من ذا الدينبول والله لا يرجع ايام كرشة اللمبي ههههههه


عزه النفس


والله يا عزة النفس صف طابور مع الي يحبون المصارعة وعقبال ما تصير اطلق من جونا سينا
عشــق البطــوله

ههههههههههههههه اي ايام الغوص الله يسلمك

اجل سباح يوم كنت صغير اثرك كنت اول سمكة بعدين خشيت في الحديد ما عليك من ولد عمك بيجي يوم يطفش ويوقف شوي بعدين تقدر تجيبة واذا بغيت فزعة ولا شي دق وسكر نجيك انا وابو ابراهيم بددسن غمارة

يعطيك العافية على الموضوع الحلو

بالنسبة لي شخصياّ .. انا محب للرياضة من صغري
كورة وسباحة لايقل عن 3 مرات اسبوعيا ( وفي عطلة الصيف يوميا )

تزوجت قبل 3 سنوات .. ( عمري 28 موب شايب هههه )
وفي اول سنة زواج زاد وزني من 80 كيلو الى 95 !! ( طولي 181 سم)

قلت مابدهاش لازم ادخل نادي رياضي واحافظ على جسمي
وسجلت في نادي وقصدي كان انزال وزني وفعلا في 3 شهور نزلت 10 كيلو
وبعدها دخلت العب حديد .. وحبيتها
خاصة كان لي صديق فاهم جدا في اللعبة من جميع النواحي .. استفدت منة

والان لي تقريبا سنتين والحمدالله حصلت نتائج جيدة وراضي جدا عن جسمي ..

ممتاز جدا واعذرنا ما باركنا لك منك المال والعضلات ومنها العيال با بعدي

الله يعطيكم الف عافية كلكم

انا من محبين المصارعه وهي السبب الرئيسي اللي خلتني احب جميع العاب الدفاع عن النفس والقتال
والحديد طبعا
اول مابديت اتمرن يوم كان عمري 17 سنه تقريبا بس اني ماطولت تدربت فتره قصيره بس استفدت كثير
يمكن لأن جسمي من النوع اللي يقبل التغيير يعني انحف بسرعه واسمن بسرعه
حاليا عمري 21 سنه بس اني ما اتمرن ناوي ارجع ان شاء الله الشهر هذا او شهر واحد بالكثير
عندي زيادة 15 كيلو تقريبا
الله يسهل واتخلص منها وابني جسم عضل صافي
بالتوفيق للجميع

انا من زمان اشوف مجالات كمال الاجسام ( عالم الرياضة ) عند اقربائي الكبار .. و احب اشوف هالرياضه و كيفية التمارين .. و كنت مخطط اخش نادي من عام 1996 تقريبا .. لكن ما خشيت الا سنة 2009 :)

يعني كلها تأخير 13 سنه بس خخخ

alakrab

الله يوفقك وترجع وتجيك الـ 15 كيلو عضل وبالتوفيق يا وحش

جبروت ملكي من 1996 الين 2009 لا ما تاخرت ابد كان استنيت لين تطق ال 2400 هههههههه

على العموم موفق يا وحش بالتوفيق وان شاءالله تلحق على السنين الي راحت

والله أنا حبيت هذه الرياضة وعرغتها من رياضة المصارعة لاني كنت معجب بمصارع اسمه ترابل اتش
وحبيت أصير مثله حتى أكتب على اليوتيوب تدريبات ترابل اتش أو TRIPLE H TRINING HARD و
شكرا على هذا الموضوع

الله يهني كل سعيد بسعيدة :)

وعليكم السلام ورحمة الله وبركاته ..

وانت بصحة وسلامة الرسمي ،

بالنسبة لدخولي لعالم كمال الاجسام فكان بسبب الضعف الشديد .. فكنت دائماً معروف بضعفي الي كان بالتحديد حول 52 كيلو ، وبصراحة كنت اتحرك مع الهواء >_< ..

وبدايتي الفعلية كانت في الربع الاخير من 2007 وكنت اتمرن لهدف واحد فقط .. التمرين لمدة 3 شهور فقط لزيادة الوزن .. ولكن بعد نهاية الـ3 شهور حبيت اللعبة بشكل كبير وعشقت الطاقة وقوة التحمل الي صرت الاحظها على نفسي وعجبني شكل جسمي الجديد ، فقررت استمر وبالفعل استمريت بلاتوقف الى الربع الاول من 2009 وكنت بهذه الفترة في اعلى ماوصلت اليه من وزن مثالي ودهون بـ 7% .. وللاسف بعدها توقفت ولكن سأستمر وسأعود في المستقبل القريب بإذن الله .. وتستمر القصة P: .

يعطيك الف عافية الرسمي على الموضوع .. واتمنى تتقبل مشاركتي المتواضعه مع مشاركة الكباتن الي قبلي :) .

مشاء الله

الله يعافيك يا الغالي وان شاءلله تلقا وقت وترجع للتمارين

هلا أخوي الرسمي ...

أنا تقريبا مثل الشباب اللي قبل أحب المصارعة بشكل ماتتصوره أتابع المصارعة من ولدت الى يومك هذا وشفت الأجسام الضخمة والعملاقة وعجبتني فقلت أتمرن يمكن أصير مصارع يوم من الأيام... تحياتي .,.. اللورد

هههههههههههههههههههههههههه


اما تبي تصير مصارع رووق بلله

أهلين يا جماعة الربع

أشكرك أبو راشد على هذا الموضوع

أنا بصراحة كنت فتيت كورة وكنت أقلد خالد الرشيد وحسين عبد الغني
بعدها وأنا في سن الـ 14 كان لنا جار في الحارة مدرب أسكواش وشافني في الحارة وأخذني وعلمني أصول اللعبة وكلها ثلاثة شهور رجعت للكورة

يوم صار عمري 25 سنة أعجبت بكمال الأجسام ودخلت اللعبة لأني تزوجت فترتها وخش أخوي الكبير معاي وأحنى طالعين من الصالة شفنا المسبح قالي خوي وش رايك نسبح قلت له قدام نطينا في المسبح ولا خرج أخوي إلي شباب كانو في المسبح بغى يروح فيها


بعدها بسنة رحت لدرة العروس في جدة ويوم نزلت المسبح حق الفندق إلي أشوف كرشي تقول صحن بلاستك فرجعت لديرتي وبعدها دخلت النادي وإلين اليوم لي 3 سنين دخلت النادي وأول سنة كنت كويس لكن السنة الثانية أشترك شهر وأتركها شهر والأن مازال صحن البلاستك موجود وإلي سويته في السنه الأولى خربتة في السنه الثانية بسبب ما عندنا صالات حديد كويسة كلهم نصابين حقين تجارة مو رياضة بس أنا أنشاء الله مستمر وبقوة لين أصير مثل ما أريد وأدعولي

طولت عليكم تحياااااتي

الله يعينك وان شاء تشيها كلها يا بطل