استفسار مستعجل تكفون بالنسبة للتاريخ المكمل

بسم الله الرحمن الرحيم

بدون مقدمات اخواني انا بشتري بروكمبلكس قينر صراحه صارلي شهرين وانا اقرا عن مكملات القنر ومادخل راسي غير هذا ومتردد بعد اخذ قينر ولا عادي لاني سالت مدربنا قال لا لاتاخذ فات ابد مع انه شايف جسمي نحيف بس يقول افضل بناء العضل الصافي ورحت للجي ان سي امس ولقيت واحد معضل وعليه فنيلة نادي وسالته قالي ايضا خذ بروكمبلكس عادي الفات ابعد عنه يزيدك دهون انت خل الزيادة عضل صافي افضل لك
وسالت هنا بالمنتدى وتقريبا 95 بالمية قالولي خذ قيييييينر وخذ قينر ماراح يفيدك الزيرو فات ابددد !!!
واطلعت على تجارب بعض الاعضاء وقالو فعلن مافاد معنا الزيرو فات بالبداية لازم بدينا بالقينر
المهم احتررررررررت والله العظيم وانا بالجامعه وانا ابي انام وانا بكل مكان بس افكرررر اخذ قييينر ولا عادي اخذ قينر ولا عادي
المهم ماطول عليكم اني امس رحت للجي ان سي وقالي البروكمبلكس قينر خلص لكن فيه ميقا ماس ومدحه لي يقول ممتاز جدا راعي المحل !
وقال فيه البرو العادي قلت لا ارجع اسال الي يبيعون بالمنتدى ان شاءالله انهم مضمونين على كلام الاعضاء
ورجعت واتصلت على اخواننا احمد وايمن وكلهم الي عندهم تواريخه تنتهي بعد 3 اشهر او اربع اشهر !!

انا هناااااااااااا سؤالي هل ميييه بالمية ان شاءالله مافيه ضرر بالنسبة من التاريخ ؟؟ يعني عادي اخذ مكمل باقيله 3 اشهر وينتهي ؟ او ادور مكمل غير البروكمبلكس قينر ؟ ووش تنصحووني فيه هل تنصحوني بس اخذ من الجي ان سي الميقا ماس ؟؟ او اخذ مكمل زيرو فات مثل البرو العادي والواي بروتين ؟؟ والله محتاااااااار


ولا ادري وش اسوي المهم انا سؤالي بس احد منكم خذا مكمل يعني باقي على تاريخه زي كذا 3 اشهر وينتهي يعني الوضع طبيعي ان شاءالله ؟؟ مع انه المدرب حذرني من البداية قال لاتاخذ الا الي باقيله سنه ونص ومادري كيف ؟؟

وش رايكم ياشباب وتكفوووون ابي الكل يشارك كل من يدخل يقولي يعني نصيحته وانا اليوم بشتررري لازم احصل اني طولت ؟

حياك الله يا غالي

اولا لو تذكر بياناتك

ثانياً علبة وحدة لمدة شهر ما راح تأثر بشكل كبير طبعاً انا ما راح اقول خذ او لا تاخذ الا لما اعرف بيناتك وكم لك تتدرب.

عموماً الكثير من الشباب ما تلقاه يستمر على بروتين واحد فتلقاه يغير بين فترة وفترة لين يشوف البروتين اللي عمل معه شغل صح.

شوف انت ممكن لا تشتري قينر ولا عادي فيه نوع من شركة ديمتايز اسمه اليت فيوجن هذا المنتج جاي في الوسط لا هو اللي معبي دهون ولا هو اللي زيرو فات

انا استخدمه حاليا ومرتاح له كثير شوف الاخ ايمن يبيعه.

تحياتي

تسسلم يالغالي وانا اقصد تاريخه يعني ماياثر انه بس باقي له 3 اشهر


وبياناتي
الطول 170
الوزن 51 < قبل فتررررررره والحين اتووقع انه واصل 53

يعطيك العافيه على رايك راح اقرا عنه انا من الووووول كنت ابحث عن حل وسط :>

ويالغلا كييف طعمه المنتج الي قلته ؟؟

طعمه مقبول
وخلطه لازم خلاط ولا عادي بس اخضه ويمشي الحال
وكم يجلس من يوم ؟

Elite Fusion 7

هل تقصد هذا المنتج
اخي فعلا راي سديد الله يجزززززاك بالخيير صراحه قرات عنه بالبودي بولدنق الحين وبياناته حلوه
فيه فيتامينات كويسه وفيه زنك لكن الحين بسال اهم شي عن الطعم تكفى والاعضاء الي جربوه من يعرفه منكم الله يجزاكم الجنه انتظر ارائكم بهالمنتج تنصحوني فيه ؟؟

اقتباس:

---

المشاركة الأصلية كتبت بواسطة بردان1

Elite Fusion 7

هل تقصد هذا المنتج
اخي فعلا راي سديد الله يجزززززاك بالخيير صراحه قرات عنه بالبودي بولدنق الحين وبياناته حلوه
فيه فيتامينات كويسه وفيه زنك لكن الحين بسال اهم شي عن الطعم تكفى والاعضاء الي جربوه من يعرفه منكم الله يجزاكم الجنه انتظر ارائكم بهالمنتج تنصحوني فيه ؟؟

---

أخوي أصعب شي انك تسأل عن الطعم

مرة من المرات قلت لواحد هنا من الاعضاء ابتعد عن النكهة الفلانية لانها اسوأ نكهة في وجهة نظري في المكملات
فجا اخ كريم بعدي و قال ان النكهة ممتازة و انا احترم رأيه لأنها مسألة أذواق

لكن أنت وش تحب أي نكهة عموما حتى أدخل المواقع العالمية و أشوف تقييمهم للنكهات

أخوي تقريبا النكهات حسب كلام اللي جربوا (أجانب) كلها ممتازة عدا الموز

و فيه واحد يقول انا لي بالمكملات سنين و أن نكهة الشوكولاته في هذا المنتج هي الأفضل في عالم المكملات
عموما القرار راجع لك و لو حبيت تشوف بنفسك تقييم الناس للنكهات تفضل
http://reviews.bodybuilding.com/Dyma..._7/All_Reviews

والله يا غالي افضل نكهة في نظري هي الكوكيز مع الحليب طعمها وااااو. انا ما جربت انواع كثير غيرها لكن ما اتوقع فيه نكهة بتكون افضل من الكوكيز.

الحين عندي نكهة ثانية اظنها شوكولاته طعمها زين لكن برضه الكوكيز احلى.

عساك ع القوة.

منتج ايليت فاشن (( كوكيز اند كريم )) الأفضل على الاطلاق

موفق يارب

وودي :)

تسسسسسلمون يالغالين والله ماقصرتو

سبحان الله :)
لي شهر والله شهر وانا محتاااااار بين برو عادي ولا برو قينر ولا واي بروتين ولا سيرياس ماس
وكللللهن عجزت ارتاح القا ناس تسب من هنا وناس تمدح من هنا
بس يوم ذكرلي هالمنتج وقريت عنه احس جا بالمقاس والله يعني ماهو مبالغ فييه ابد من ناحية المكونات ومادري ارتحت له على طول
والحمدلله ابشركم شريته :)

الحين بس ابي اسالكم يعني عن طريقته ؟
كم اخذ من سكوب باليوم ومتى وكيف مع ماء بارد ولا حار ؟
وهل اذا بحطه مع حليب انا استخدم حليب بودره مجفف عادي احطه معه يعني اغلي الماء واحط بودرة الحليب وبودرة البروتين سوا واصب عليه الماء ولا ماتفرق احطه مع الي انا ابي !!

واعطوووني نصااايحكم بكل شي والعلبه الكيلو واحد كم راح تجلس معي تقريبا
والله يعطيكم العافيه ؟

هذي طريقة الاستخدام نسختها من موقع بودي بيلدنق


Directions For Dymatize Elite Fusion 7:
Recommended use for Males: Take 1-2 scoops (equaling approx. 23-46 grams of protein) with 4-5 oz. to 8-10 oz. of cold water or any beverage of your choice. Use approximately 4-5 oz. of liquid per 1 scoop of powder. To achieve your desired flavor and consistency, vary the amount of liquid. In addition, for a thicker shake replace some of the liquid with ice. Drink 1-4 servings daily, or as needed to help satisfy your protein requirements. To increase your protein intake per serving, mix with non-fat or low fat milk.

with 4-5 oz. to 8-10 oz
معليش بس هالكلام وش يعني
يعني مع 4 الى 5 وشو او مقدار الماء بالكوب
اانا عندي كووب جي ان سي ومررقم فيه ارقام بالملي وارقام ثانيه هل يعني هو يقصد كذا ؟

واذا ماكان هذا قصده الماء الى وين احطه ؟

اقتباس:

---

المشاركة الأصلية كتبت بواسطة بردان1

with 4-5 oz. to 8-10 oz
معليش بس هالكلام وش يعني
يعني مع 4 الى 5 وشو او مقدار الماء بالكوب
اانا عندي كووب جي ان سي ومررقم فيه ارقام بالملي وارقام ثانيه هل يعني هو يقصد كذا ؟

واذا ماكان هذا قصده الماء الى وين احطه ؟

---

أخوي بالمختصر كل سكوب بروتين حط معه 150 ملل ماء بارد أو حليب سواء كان الحليب حار أو بارد (بس البارد أطعم و كل واحد و ذوقه)
يعني إذا بتاخذ سكوبين حط 300 ملل

و عموما مهب شرط تتقيد بهذا الرقم فلو حسيت ان البروتين ثقيل زود الماء أو الحليب يعني بالعربي زود و نقص لين يضبط الطعم اللي انت تبيه و هذا ما راح يؤثر على مفعول البروتين

خذه مع ماء بارد او حليب قليل او منزوع الدسم الحليب الطازج وليس البودرة

لا تزيد عن اسكوب وخصوصاً انك مبتدئ عشان تستفيد منه

وشد حيلك .. :)

يعطيييكم العافية
اول اسبوعين على الاقل

راح اخذ قبل التمرين نصف سكوب
وبعد التمرين نصف سكوب

واكتفي بهذا القدر
واذا حسيت ان الوضع ممتاز ابتل على هالبرنامج واحتمال اضيف الكازين قبل النوم

وجززززاكم الله خيييير على وقفتكم معي امما وخزار < اتمنى تكون اسماءكم صحيحة :)

والله ماقصرررررتو
نصحتوني وانا اخذت المكمل ويبدو انه جيد وان شاءالله راح ادعيلكم وانتم ادعولي :)

الله يوفقك

بس ترى نص سكوب قليل مرة
خله سكوب واحد بعد التمرين و بعد اسبوع أو اكثر شوي خله سكوب قبل التمرين و سكوب بعده

الشركة تنصح بأخذ سكوب من 1-4 مرات في اليوم
أهم شي يكون عدد الجرامات من البروتين اللي تاخذه في اليوم (من الأكل العادي + المكمل) تساوي 2 - 2.5 x وزنك بالكيلو

يعني إذا وزنك 51 يكون الكمية المطلوبة من البروتين = 102- 128 جرام تقريبا
لو ما تعرف كم كمية البروتين اللي في أكلك اكتب لي جدولك الغذائي و أنا أحسبلك كمية البروتين فيه عشان نعرف كم تحتاج من المكمل أو حتى انك تعدل من أكلك

امم صحيح كلامك
جدولي الغذائي

الصبح الفطور احيانا بيضتين وكوب حليب وخبزة بزبدة الفول السوداني < الفول الي عندي مكتوب عليه زيادة بروتينات ( قودي ) بس مادري , واحيانا ما اكل بيضتين اكون اكل خبزتين بزبدة الفول مع عسل
وبعد 3 ساعات ونص بالجامعه اكل فطيرتين سفن دايز مع عصير ربيع برتقال < احس ان هالوجبه ماله فايده يعني لو ابدل عصير البرتقال بحليب السعودية افضل او لا

وتقريبا بعد 3 ساعات الغداء ودائما رز مع اما لحم او دجاج
وبالمغرب اتقهوى مع الاهل واكل تقريبا 9 تمرات الى 15 تمرة
وبعد العشاء اروح النادي وقبل لا اروح اكل موزتين او ثلاث احيانا
واذا رجعت امر البقاله واخذ حليب السعودية < افكر اشيله بعد البروتين
وتقريبا الساعه 11 ونص العشاء ودائما اما معكرونه او اكلات خفيفه بيض وفول وفاصوليا وجبن ومربى


هذا تقريبا نضامي الغذائي ولا اقدر اسميه جدول لاني احسسسسس ابد ماني مستفيد منه لاني ماتعبت عليه ولا قصدته
بس فيه شغله مهمه يعني تقريبا كلللل شوي ماكل موزه الى موزتين يعني تقريبا باليوم كامل اكل 10 موزات بالقليل

مادري وش رايك !!
وبالنسبة للغداء والعشاء ما اقدر اغيرهم لاني مع اهلي ساكن واكل من الي يطبخون يعني ماقدر اغير نضامي لحالي عنهم
اما الوجبات الثانيه ما ادري وش رايك
وافكر اشتري كيلو لوز وش رايك فيه ينفع او لا ؟
او وش فيه اكلات تنصحني اشتريها تنفع يعني ؟
لاني ماودي اعتمد كل الاعتماد على البروتين


وشكرا يعطيك العافية

مبروك المنتج لكن خذها قاعده لابد انك تستخدم مكملات فيها نسبة فات بي ماانك في البداية وليسى وزنك في مرحلة زيادة وفي كمال الاجسام لابد من مسالة التنويع في المكملات الغذائيه وزيادة الوزن وخصوصن العضل تبي شغل وتركيز وبي التوفيق

امين وياك

مشككوور ع النصيحة بس ماكنت اتمنى اخذ شي مليان فات

لانه ماودي ازيد من الترهلات ودي لو يتغير شكل جسمي لو واحد بالمية بس يكون عضل ومبين


يعطيكم العافية

يا بردان :)

نظامك الغذائي يحتاج تعديل ..

انت لا تتوقع الحين ان البروتين راح يخليك تتنتفخ .. البروتين يعتبر مكمل غذائي لكن الاكل هو الاساس

لا تقول لي فطيرة سفن ديز وعصير الربيع هذي برضه ما تعتبر اكل ..

ادخل في البيض الممسلوق والتونة والسمك وصدور الدجاج واللحم والزبادي والشوفان ونوع بينهم

يعني ممكن تتجاوز شوي موضوع فطور وغداء وعشاء وحاول تاخذ كل ساعة إلأى ساعة ونص شيء

ممكن تبدأ يومك بشوفان مع حليب وعسل ولا هو لازم تاكل لين تشبع اهم شيء تاكل
بعده بساعة ونص ساندوتش تونه مع عصير برتقال مثلا بعده بساعة البروتين بعده بساعة ونص ممكن موزة وزبادي بعده بساعة صدر دجاج مشوي وهكذا تملا يومك بوجبات سريعة ولا هو لازم تكون كبيرة اتهم شيء لا تقعد ثلاث ساعات من دون اكلك لانه فترة كبيرة جدا

شوف الطريق لسه قدامك طويل فلذلك خليك مستعد وإن شاء الله تحصل النتيجة واي استفسار لا تتردد في السؤال

تحياتي

اقتباس:

---

المشاركة الأصلية كتبت بواسطة بردان1

امم صحيح كلامك
جدولي الغذائي

الصبح الفطور احيانا بيضتين وكوب حليب وخبزة بزبدة الفول السوداني < الفول الي عندي مكتوب عليه زيادة بروتينات ( قودي ) بس مادري , واحيانا ما اكل بيضتين اكون اكل خبزتين بزبدة الفول مع عسل
ك الفطور تمام ولو حبيت تزيد عليه زد بياض بيض لأنه غني بالبروتين و لا يحسسك بالشبع و هو أجود أنواع البروتين و كل بياض بيض فيه 4 جرام بروتين و عليك الحساب

وبعد 3 ساعات ونص بالجامعه اكل فطيرتين سفن دايز مع عصير ربيع برتقال < احس ان هالوجبه ماله فايده يعني لو ابدل عصير البرتقال بحليب السعودية افضل او لا
الوجبة هذي تلغيها و تشوف لك وجبة صحية بدون دهون ضارة أو سكريات مفرطة حتى لو كان هدفك تضخيم لازم تاكل شي نظيف قدر المستطاع و لو قدرت انك تاخذ معك كمية من البروتين في علبة صغيرة للجامعة فالوقت هذا مناسب للبروتين

وتقريبا بعد 3 ساعات الغداء ودائما رز مع اما لحم او دجاج
الغداء ممتاز بس حاول مدامك تتغدى مع الأهل تاكل الصدر لانه أغنى منطقة بالبروتين و صدر الدجاج كل 100 جرام فيه 30-35 جرام بروتين فلو كان الصدر وزنه 150 يكون عندك 45 جرام بروتين و الرز يمكن 3-5 جرام بروتين

وبالمغرب اتقهوى مع الاهل واكل تقريبا 9 تمرات الى 15 تمرة
هذي سلمك الله فيها تقريبا 4-6 جرام بروتين طبعا كل تمرة فيها 26 سعرة و عليك الحساب
و أفضل إنك تقلل من التمر و تاخذ زيادة نشويات معقدة مثل البطاطس المسلوق أو الشوفان بس لا تكثر مرة لأن النشويات المعقدة هي أفضل من يمدك بالطاقة لفترات طويله.

وبعد العشاء اروح النادي وقبل لا اروح اكل موزتين او ثلاث احيانا
هذي خليها بوسط التمرين لو حسيت انك ما تقدر تكمل و أفضل انك ما تاخذها قبل التمرين نهائيا لأن الموز فيه سكريات سريعة الامتصاص و هذي ترفع الانسولين عندك بسرعة فتحس بعدها بحالة خمول شوي
فأحسن شي تخلي معك في النادي موزة أو تمر في حالة ما قدرت تكمل كل منها و أنا أفضل التمر لأنه يتم امتصاصه أسرع من غيره و كلامي عن التمر عن تجربة و كلام خبراء

واذا رجعت امر البقاله واخذ حليب السعودية < افكر اشيله بعد البروتين
دايم إذا ما تدري وش تتناول أو ما عندك وقت تتناول وجبة بسيطة عندك الحليب قليل الدسم كوب أو كوبين أو زبادي و سلطة وشي راجعلك لو حبيت تحط مكان وجبة الحليب بروتين

وتقريبا الساعه 11 ونص العشاء ودائما اما معكرونه او اكلات خفيفه بيض وفول وفاصوليا وجبن ومربى
أنا ودي انك تقلل زي ما تقدر من النشويات بالليل (المكرونة و الرز و الخبز الخ) و تحاول تكثر من البروتين و السلطة

هذا تقريبا نضامي الغذائي ولا اقدر اسميه جدول لاني احسسسسس ابد ماني مستفيد منه لاني ماتعبت عليه ولا قصدته
بس فيه شغله مهمه يعني تقريبا كلللل شوي ماكل موزه الى موزتين يعني تقريبا باليوم كامل اكل 10 موزات بالقليل

مادري وش رايك !!

الموز سعراته عالية و أشوف 10 موزات كثير


وبالنسبة للغداء والعشاء ما اقدر اغيرهم لاني مع اهلي ساكن واكل من الي يطبخون يعني ماقدر اغير نضامي لحالي عنهم
اما الوجبات الثانيه ما ادري وش رايك
وافكر اشتري كيلو لوز وش رايك فيه ينفع او لا ؟
ممتاز

او وش فيه اكلات تنصحني اشتريها تنفع يعني ؟
لاني ماودي اعتمد كل الاعتماد على البروتين
التونة ممتازة جدا و عن تجربة خاصة إنها معلبة يعني افتح و سم الرحمن و العلبة الوحدة 95 جرام فيها تقريبا 27 جرام بروتين و بالنسبة لوجبة قبل التمرين حاول تكون قبل التمرين بـ45 دقيقة تزود أو تنقص يعني لا تدقق مرة ويفضل تكون مثلا شوفان مع عسل و حليب مثلا أو أي نشويات معقدة.


وشكرا يعطيك العافية

---

طبعا جدولك السابق من دون وجبة السفن ديز فيه من 80 -90 جرام بروتين فباقيلك تقريبا عشان توصل القيمة المثالية 30 - 50 جرام فأنت شف كيف توزعها مثلا تخلي سكوب الصبح و سكوب بعد التمرين مباشرة أهم شي بعد التمرين دايم خلك على المكمل و لو حبيت تستغني عن جرعة المكمل الثانية خذلك علبة تونة 95 جرام أو صدر دجاج مشوي.


طبعا خلك على طريقة كل ثلاث ساعات وجبة (يعني 5-6 وجبات في اليوم) و لا تكثر مرة في الوجبة عشان تقدر تاكل بعد 3 ساعات الوجبة الثانية لأنه كثير من الناس يقول ما اقدر آكل 5 وجبات في اليوم و الشهية ما تسمح لأنه تلقاه يدبج في الأكل و ما يجوع إلا بعد 5 ساعات أو أكثر و لكن لو أكلت كميات معقولة صدقني بعد 3 ساعات تكون شهيتك مفتوحة و تذكر حديث من لا ينطق عن الهوى عليه الصلاة والسلام: (نحن قوم لا نأكل حتى نجوع و إذا أكلنا لا نشبع) و قوله :(ما ملئ ابن آدم وعاء شر من بطن)
وقال الحارث بن كلدة (طبيب العرب) :
الحمية رأس الدواء والبطنة رأس الداء . و الذي قتل البرية
وأهلك السباع في البرية إدخال الطعام على الطعام قبل الانهضام . << هذي شطحة لكن يؤكدها العلم الحديث

لو حبيت تزيد في كميات الأكل في أحد الوجبات الست فزد خضروات (سلطات)

جزااك الله خير اخوي وانا عارف والله ان وجبة السفن دايز مش وجبة ابد
بس لاني وقته بالجامعه واجوع ولا فيه شي قدامي غيره ووقتي مضغوط
طيب يالغالي حبيت اسالك عن حليب السعودية ( سدافكو ) وش رايك فيه ؟ لاني ذقت الشوكولاته اتوقع توهم منزلينه وطعمه مقبووول وفيه بالقيم الغذائية لكل 200 مل فيه عناصر كثيرة منها 6.6 قرام بروتين ؟
وصراحه الحليب هذا الي يجي لحاله كذذذذذذذا عجززززززززززززت اتقبله بالمره يالله اشرب نص كووب مع مذابح وحاله مادري ليه لكن اذا طبخته يكون اخف بس مادري شرايك بحليب السعودية
افكر اخذ باليوم اربع حبات يعني 800 قرام منه طبعا موزعه يعني مثلا واحد الصبح وواحد قبل التمرين وثنين بعد التمرين
والفول السوداني الي قلتلك عليه مكتوب عليه لكل 32 قرام فيه 8 قرام بروتين وفيه ايضا كالوري عالي ووش رايك ؟؟ و32 قرام يعني قد ايش ملعقه او ملقعتين او كم ؟
والشوفان كيف اسويبة ؟؟ اخذ هذا حق الشوربة هوو ؟ واحطه مع حليب وبس واشربه ؟

وابي رايك طيب مثلا بهالجدول الغذائي لو تكرمت وادري تعبتك معي :$

الساعه 7 صباحا \ 2 شندوتش فول سوداني مع عسل + بيضتين + 1 حليب السعودية ( 16 قرام بروتين + 8 قرام + 6 قرام = 40 قرام )
الساعه 11 ونص بالجامعه \ مادري وش اخذ !! فيه شي اقدر اشريه من البقاله ويكون فيه نسبة بروتين ؟ ؟
الساعه 3 \ الغداء رز ودجاج او رز ولحم + اما سلطة خضروات او ايدام بطاطا وكوسة ( الغداء تقريبا قل 25 قرام الى 30 )
الساعه 5 \ كاسة من مكسرات اللوز + موزتين او ثلاث ( ماعندي علم كم فيهم من قرام بروتين ؟ )
الساعه 7 \ قهوة وتمر :) ( 5 قرام بروتين )
الساعه 8 ونص \ حليب السعودية ( 6 قرام بروتين )
الساعه 10 ونصف ( بعد التمرين ) \ 2 حليب السعودية + سكوب كامل تقريبا او اقل بقليل من ايليت فيوجن ( 12 قرام بروتين + 23 قرام = 35 قرام )
الساعه 11 ونصف \ العشاء مثل العشاء الي ذكرته لك بالسابق ( لا اعلم بالضبط )

اكثر من 121 تقريبا اعتقد شي خيالي
طبعا مع اني حاط ببالي اني اكيد كل يوم راح افوت وجبة منهم
بس اهم شي ابي وجبة الجامعه مادري وش اخذ يعني شي يسد الجوع وفيه نسبة كويسة ؟؟


واالله يعطيك العافيه ويعطيييييييييييك على قد نيتك ويقدررررررن على رد جميلك والله ماقصررت

اقتباس:

---

المشاركة الأصلية كتبت بواسطة بردان1

جزااك الله خير اخوي وانا عارف والله ان وجبة السفن دايز مش وجبة ابد
بس لاني وقته بالجامعه واجوع ولا فيه شي قدامي غيره ووقتي مضغوط
طيب يالغالي حبيت اسالك عن حليب السعودية ( سدافكو ) وش رايك فيه ؟ لاني ذقت الشوكولاته اتوقع توهم منزلينه وطعمه مقبووول وفيه بالقيم الغذائية لكل 200 مل فيه عناصر كثيرة منها 6.6 قرام بروتين ؟
طيب اوك بس مدري كم نسبة الدهون فيه لكن انت حسب كلامك انه عادي لو تزيد دهون شوي
عشان كذا علبتين ممتاز جدا

وصراحه الحليب هذا الي يجي لحاله كذذذذذذذا عجززززززززززززت اتقبله بالمره يالله اشرب نص كووب مع مذابح وحاله مادري ليه لكن اذا طبخته يكون اخف بس مادري شرايك بحليب السعودية
افكر اخذ باليوم اربع حبات يعني 800 قرام منه طبعا موزعه يعني مثلا واحد الصبح وواحد قبل التمرين وثنين بعد التمرين
طيب ممتاز ولو زدت 2 عادي
والفول السوداني الي قلتلك عليه مكتوب عليه لكل 32 قرام فيه 8 قرام بروتين وفيه ايضا كالوري عالي ووش رايك ؟؟
زبدة الفول السوداني ممتازة خاصة الصبح و البعض ينصح بلمعقة صغيرة مع الوجبات الرئيسية

و32 قرام يعني قد ايش ملعقه او ملقعتين او كم ؟
شوف المكيال اللي يجي مع البروتين هذا حجمه 44 جرام يعني عشان تحصل 32 جرام من الفول خذ كمية تقارب ثلاث ارباع السكوب عاد انت وازنها بطريقتك و شوف كم تسوى من ملعقة بس ملعقة وحدة كافية

والشوفان كيف اسويبة ؟؟ اخذ هذا حق الشوربة هوو ؟ واحطه مع حليب وبس واشربه ؟
شف الموضوع هذا
http://www.montada.com/showthread.php?t=679286&page=1

وابي رايك طيب مثلا بهالجدول الغذائي لو تكرمت وادري تعبتك معي :$

الساعه 7 صباحا \ 2 شندوتش فول سوداني مع عسل + بيضتين + 1 حليب السعودية ( 16 قرام بروتين + 8 قرام + 6 قرام = 40 قرام ) قصدك 30 جرام
خليه 1 ساندوتش (عشان الدهون ما تكون عالية) + 3-5 بياض بيض + حليب السعودية = 30-35 جرام بروتين

الساعه 11 ونص بالجامعه \ مادري وش اخذ !! فيه شي اقدر اشريه من البقاله ويكون فيه نسبة بروتين ؟ ؟
عندك الحليب أو اللوز و المكسرات
و أحسن شي من المكسرات من ناحية البروتين عندك
اللوز 100 جرام = 7 جرام بروتين
الجوز 100 جرام = 16 جرام بروتين
الكاجو 100 جرام = 16 جرام بروتين
الفستق 100 جرام = 20 جرام بروتين

طبعا خذ السكوب حق البروتين و اغرف قيه من المكسرات ثلاث غرفات و بيصير عندك تقريبا 130 جرام خذها معك

طيب صار عندك هنا تقريبا 20 جرام بروتين


الساعه 3 \ الغداء رز ودجاج او رز ولحم + اما سلطة خضروات او ايدام بطاطا وكوسة ( الغداء تقريبا قل 25 قرام الى 30 )
حلو كذا صار عندك تقريبا 40 جرام بروتين في الغداء

الساعه 5 \ كاسة من مكسرات اللوز + موزتين او ثلاث ( ماعندي علم كم فيهم من قرام بروتين ؟ )
ماله داعي خلاص المكسرات أخذتها الصبح فإذا بتاكل موزتين عادي أو سلطات أو تشكيلة فواكه عشان يصير عندك تنوع فيتامينات

الساعه 7 \ قهوة وتمر :) ( 5 قرام بروتين )
الساعه 8 ونص \ حليب السعودية ( 6 قرام بروتين )
إذا تشوف ان البور عندك في التمرين ممتاز فخليك على طريقتك أما لو حسيت انه ما فيه طاقة فكل مع وجبة التمر و القهوة نشويات معقدة (بطاطس مسلوقة أو كورن فلكس أو شوفان أو خبزة الخ)

الساعه 10 ونصف ( بعد التمرين ) \ 2 حليب السعودية + سكوب كامل تقريبا او اقل بقليل من ايليت فيوجن ( 12 قرام بروتين + 23 قرام = 35 قرام )
ممتاز بس لو حبيت امتصاص أسرع خذ البروتين مع ماء و كل موزه عشان تسرع الامتصاص او ثلاث تمرات أو اي شي حالي لأن السكر يسرع توصيل البروتين للعضلة

الساعه 11 ونصف \ العشاء مثل العشاء الي ذكرته لك بالسابق ( لا اعلم بالضبط )
ودي تغيره و تخليه مثلا سلطة و زبادي لو قدرت أهم شي قلل الكربوهيدرات لأنك بتنام فيتخزن دهون


اكثر من 121 تقريبا اعتقد شي خيالي
حلو صار عندك 120 -130 جرام بروتين و هذا المطلوب حاليا

طبعا مع اني حاط ببالي اني اكيد كل يوم راح افوت وجبة منهم
بس اهم شي ابي وجبة الجامعه مادري وش اخذ يعني شي يسد الجوع وفيه نسبة كويسة ؟؟
مثل ما قلت لك اما حليب علبتين أو مكسرات

واالله يعطيك العافيه ويعطيييييييييييك على قد نيتك ويقدررررررن على رد جميلك والله ماقصررت

---

ما سوينا شي و هذا واجب مثل ما استفدنا من هذا المنتدى العملاق نحب نوصل المعلومة لغيرنا

الله يوفقك أهم شي شد حيلك و أي مساعدة انا حاظر

وربي مااااقصرررررررررررت الله يجزاك كل الخير
والله يشهد اني ادعيلك من قلب ولا ادري كيف اتشكرك اول مره احد ياقف معي بموضوع مثل كذا ويوصلي كل الي ابيه

وبالنسبة لوجبة العشاء المقترحه فعلااا وجبببه اقدر عليها زبادي علبة ممتاز جدا

والمكسرات كان ببالي انه اكثر شي يحتوي البروتين هو اللوز واثاريه مهو هو الاكثرر!!

يعطيييك العافية
وانا تراني اقصد بوجبة بعد التمرين حليب السعودية لوحده والبروتين اخذه مع ماء لحاله
او اترك الحليب اخليه بس الصبح ؟

يعطيك ربي العافية ماقصرت

اقتباس:

---

المشاركة الأصلية كتبت بواسطة بردان1

وربي مااااقصرررررررررررت الله يجزاك كل الخير
والله يشهد اني ادعيلك من قلب ولا ادري كيف اتشكرك اول مره احد ياقف معي بموضوع مثل كذا ويوصلي كل الي ابيه
و الله الدعوة من الطيبين أمثالك افرح بها و مرة ثانية اقولك لا شكر على واجب و الاعضاء و المشرفين ما يقصرون الله يعطيهم العافية و khazzar ما قصر الله يعطيه العافية

وبالنسبة لوجبة العشاء المقترحه فعلااا وجبببه اقدر عليها زبادي علبة ممتاز جدا
ممتاز بس تقدر تضيف أشياء بسيطة أكيد بتكون عندك بالثلاجة أو بسهولة تقدر توفرها مثل خيار مع زبادي أو تحط زعتر مع الزبادي يعني التنويع حلو أهم شي العشاء تجنب السكريات و النشويات في العشاء قد ما تقدر و خذ راحتك في الخضروات

والمكسرات كان ببالي انه اكثر شي يحتوي البروتين هو اللوز واثاريه مهو هو الاكثرر!!
المكسرات أذكر شفت في برنامج ذا دكتور أن المكسرات النية (الغير محموسة) أكثر فايدة من المحموسة طبعا تحصل المكسرات النية و المحموسة عند العطارين جرب عندهم المكسرات النية لو اعجبك الطعم خذها أفضل من المحموسة بس المحموسة أطعم

يعطيييك العافية
وانا تراني اقصد بوجبة بعد التمرين حليب السعودية لوحده والبروتين اخذه مع ماء لحاله
او اترك الحليب اخليه بس الصبح ؟
بعد التمرين كل زبيب أو تمر أو عنب أو موزه يعني سكر ثم اشرب البروتين مع الماء و الحليب ماله داعي بذا الوقت

بس شوف لو أنت منتب راعي تشكيل بالفواكه و الخضروات يلزمك ملتي فيتامين لأن لاعبين الحديد يحتاجون فيتامينات بزيادة
يعطيك ربي العافية ماقصرت

---

حياك ربي أخوي

مشكووور اخوي بس مادري انت متاكد من المكسرات هذا العدد الي فيها من البروتينات

لاني الحين رجعت للوكيبيديا وطبعا معروف ان الوكيبيديا مصدر غير موثوق به بس غالبا معلوماته صحيحه
انه اللوز لكل 140 قرام فيه 30 قرام بروتين
يعني تقريبا 21 قرام بروتين لكل 100 قرام من اللوز

اذا كذا معناته نسبببة جييده جدا
اما اذا كانت 7 قرام فقط اعتقد ماتستاهل اعوضه بشي اخر
ولا ادري

ع العموم انت ماقصررررررت معي والله يعطيك العافية ادري تعبت معي بس خلاص استفساراتي قضت :)

اقتباس:

---

المشاركة الأصلية كتبت بواسطة بردان1

مشكووور اخوي بس مادري انت متاكد من المكسرات هذا العدد الي فيها من البروتينات

لاني الحين رجعت للوكيبيديا وطبعا معروف ان الوكيبيديا مصدر غير موثوق به بس غالبا معلوماته صحيحه
انه اللوز لكل 140 قرام فيه 30 قرام بروتين
يعني تقريبا 21 قرام بروتين لكل 100 قرام من اللوز

اذا كذا معناته نسبببة جييده جدا
اما اذا كانت 7 قرام فقط اعتقد ماتستاهل اعوضه بشي اخر
ولا ادري

ع العموم انت ماقصررررررت معي والله يعطيك العافية ادري تعبت معي بس خلاص استفساراتي قضت :)

---

هههه لا عادي حياك الله

أخوي بالنسبة لموقع ويكيبيديا إذا ما فيه مراجع معتبرة لا تثق فيه يعني بإمكاني الحين الدخول على الموقع و تعديل الرقم لو تبي أحط لك 90 جرام بروتين في حبة لوز وحدة ههههه
لكن خذ الموقع هذا موقع رسمي (وزارة الصحة البحرينية) يعني ما راح يكتبون شي إلا بعد التحليل في مختبراتهم
اضغط هنا

و هنا موقع يقول ان اللوز زي ما تفضلت فيه 30 جرام تقريبا
اضغط هنا

يعني من الآخر شكل بين انواع المكسرات مدري والله أيهم أصح معلومة (الموقع الأول أو الثاني)
على العموم ترى الكمية اللي راح تاخذها تعتبر كبيرة (120 قرام أو أكثر من المكسرات) لأن هذي فيها أكثر من 700 سعرة حرارية
يعني كنك آكل برجر بيج ماك أو أكثر بعد شوي

يعني أنا ما ودي انك تكثر من المكسرات لا تتعدى 100 جرام

يعطيييك ربي العافيه اخي

انا بكذا ان شاءالله جاهز للدخول للمرحله الجدية :) بفضل الله ثم بفضل مساعدتك لي