ماهي افضل شركة انترنت للعب الاون لاين في الكويت

[BRAZILIYA]

السلام عليكم ورحمة الله وبركاته

اتمنى من كل الاعضاء يشاركونا في الموضوع خاصة الاعضاء الذين يلعبون اون لاين........
اتمنى التفاعل في الموضوع لاهميته....وهذا الموضوع ليس دعاية للشركات لكننا نريد الافضل من ناحية السرعة وعدم الانقطاع في الخط ....فاحنا سمعنا الكثير من الكلام لكن نريد نسأل الاولى والي عندهم الاجابة والي مجربين...

واتمنى من كل شخص يلعب اون لاين ومرتاح من الخدمة والنت يجواب علينا

يذكر لنا ماهي الشركة الي مشترك فيها ؟
وماهي سرعة النت؟
وماهو السعر في الشهر؟

يعني يعطينا اكثر قدر ممكن من المعلومات؟

واكون شاكرة لكم تفاعلكم

[بلا ميعاد]

كواليتي نت اخوي احسن شركة

[Grand Marshal]

انا عندي فاست تلكو ,, حلو بس انا اقولك كواليتي ابرك واحسن والكل يمدحه

[Black.3ye]

اخوي لا كواليتي ولا فاستبطيخ
انا مشترك يونايتد نتورك و السرعه عندي عسل وللحين ولا حاشني لاق انا سرعتي 256 و البلود عندي بين 150 و 190
و ادفع 12 دينار شهريا
اخوي انصحك تشترك بيونايتد نتورك سعر افل و خدمه افضل

[joker_zambrotta]

يذكر لنا ماهي الشركة الي مشترك فيها ؟
يونايتد نتوورك
وماهي سرعة النت؟
512
وماهو السعر في الشهر؟
اعتقد 20 شيء جذي .. بس بالسنة 220 دينار

وبصراحه شغل عدل مدل

[PremaFrost]

انا مشترك اول بيونايتد نتورك وكانت زينه بس تفصل
الحين مشترك بكيمز وخطيره الشركه بالعاب الاون لاين ماكو لا ولا شى ولا هم يحزنون
512 اشتراكى خذيته 3 اشهر ب 64اذا تدفع شهر بروحه 30
الحين مسوين عروض بعد ب8 نانير العروض تبدا
يعنى تبى الزبده كيمز واقطع

[Haseo Terror]

انا مشترك بشركة كيمز

وسرعة اشتراكي 256

واللعب بالاونلاين ماشي معاي 100%

وبخصوص السعر اخذته وهم عندهم عرض

ان السنه ب96 دينار فلحق عليهم قبل لا يطوفك عرضهم

[BRAZILIYA]

اكثر شركتين لحد الحين يمدحونهم يونايتد نتورك وكيمز

يلا بعد عطونا خيارات اكثر شاركونا..... )

[PS Player]

من اقدم الشركات في الكويت والاولى في مجال الانترنت

كواليتي نت الافضل من كل النواحي

انا كنت مشترك يونايتد نتورك
السرعه 1Mb
السعر 35 بالشهر

لكن كان دايما يفصل معاي النت وكان في تقطيع دايم تركت الشركة

واشتركت بكواليتي نت بسرعه 1Mb بسعر 40 بالشهر

وكان الفرق واضح

يونايتد كان يعطيني سرعه داونلود 120 وتحت

كواليتي يعطيني سرعه داونلود 120 وفوق

وانصح بشركة كواليتي نت

وشكرا

[ZACK]

ابعد عن يونايتد نتووركس ! بطييييييييئ وخدمة العملاء جدا تعبانة .. انا مجربها

كيمز وكواليتي تمام ... شوف الأسعار .. اللي يناسبك اخذ منه

[فوق المستحيل]

الشباب طايحين له ردود اخوي واخوي..ياجماعه هذي اختنا برازيليه

المهم ماعلينا

لا تحطين امال بعدين راح تنصدمين

الكويت مشكلتها ان سيرفرهم مرتبط بالسعوديه

يعني مهما كانت سرعتك عاليه..لا تظنين انج راح تتفادين اللاق في بعض الاماكن لان الاساس هو السيرفر الي يخدم الاون لاين

المهم كوالتي نت سرعه 512...Perfect في نظري

بالشهر 32 او 35 دينار

وحطي الف خط تحت هالجمله : مستحيل تحصلين خدمه عملاء مثل كوالتي نت................حسب التجارب

يوناتيد يلزمونك باامور منتي في حاجه لها...لكن مااذكرها بصراحه

لا تفكرين بااعلى من 512..راح تواجهج مشاكل بسبب سوء السنترالات بالكويت

تيك كير

[MAXI2]

من صجك كيمز واقطع 512 تصير هوست الالعاب ما في لاق اخوي في عرض عندهم سرعة 512سعره 156 بنتهي بعد 5 ايام

ارخص شركه واحسن شركهز ما انصح بيونايتد كلش لاااااااااااااااااااااااااااااااق وايد حتى ما الكويتيين وكاوالتي زين بس يقطع وايد!!!! وحوشه بعض المرات لاق

[BRAZILIYA]

شكرا اخواني الكرام على الردود ماقصرتوا والله كفيتوا ووفيتوا بالمعلومات

واشكرا خاصة اخوي فوق المستحيل على النصايح الرائعة والشرح لاني بصراحة استفدت من كلامك وشكرا للتوضيح باني اخت مو اخو بس خفت احرجهم اذا قلتلهم بس ماعلي الشباب ماقصروا

لانه ودي اشترك dsl السبب :ميتل غير ياية بالطريج وفيها الاون لاين

هههههههههه

بالاخير شركة كواليتي هي الافضل من كلام اغلبية الاعضاء والله العالم

تليها كيمز و يونايتد نتورك......
واي احد عنده معلومات اكثر وتجارب في الشركات يشاركنا..

[فوق المستحيل]

تستاهلين اختي اكثر وماسوينا شي

وياسلام على الذوق الرفيع..عشان ميتل جير...تستاهل اللعبه دي اس ال وفوق الدي اس ال

يلا بالتوفيق

تبين نصيحه قويه

بالبدايه لا تاخذين اشتراك سنه...والله يصير معاج النت بطئ او مشكله تتبهدلين بهدله على الفاضي

جربي شهر مع كوالتي ولما يخلص جربي الشهر الثاني من كيمز وبعدها نتورك ( لكن نتورك مااعتقد يعطونج شهر لازم اكثر ) مجرد اعتقاد

هذي ثلاث شهور من شهر 2 لي غايه شهر 5 تكونين مجربه كل الشركات

وشهر 6 تنزل ميتل جير ...ووقتها تكونين عارفه اي شركه افضل للنت

لكن مازلت اصر على ان السيرفر اهم شي..احنا محكومين بسيرفر سعودي...يعني اللاق سببه الرئيسي السيرفر...وبعد مسافة السيرفرات الي نلعب معاهم

واكرر لا تجازفين وتشتركين سنوي بالبدايه..جربي شهر بعدين اشتركي سنه

وديرلي بالج ترى سرعه 1 ميج..بعض مناطق الكويت ماتتحملها..حتى ولو قالوا لج تتحمل..ترى ماتتحمل يقعد يفصل معاج كل فتره...فعشان جذي اقولج افضل شي جربي شهر بعدين حددي الشركه بعدين اشتركي سنوي

ترى نصيحتي فيها منطق لحد يضحك علي

[delpiero89]

كوالتي 512

كنت قبلها مشترك عند الشوتايم ( يونايتد نيتوورك ) على نفس السرعه

بعد ما غيرت اشتراكي على كوالتي كان الفرق واضح لمصلحه كوالتي خصوصا بموضوع الـ Ping

بالاضافه الى النقطه الي ركز عليها الكل ( خدمة عملاء ) بلا منافس

34بالشهر


بالتوفيق